Engulhu Yuwene Ngoku Yahandikawa na Luka 1:1-80
1 Erilhangira ngoku abandu bangyi babirihiraho akaghalha erisondekania emyatsi eyihikire eya thukayikethera ighuma,
2 ngoku abayilhangirira emyatsi eyi okw’itsuka n’abathulhughanaya omwatsi banathuhandikira,
3 ow’ekitsumbi kinene Teofilo, kundi naghe nabirisekulya ndeke emyatsi yosi eritsuka okwa nzuko inganayitheghirye, nabirithwamu erikuhandikirayo ngoku yithondekenie,
4 nuku wanga minya ndeke okwenene kw’emyatsi eyo wabiribwirwa.
5 Omwa biro bya Herode,* omwami we Yudea, habya omuhereri oyukahulhawamo Zakaria ow’omwa gurupu eyikahulhawamo Abiya. Mukali wiwe abya mughuma w’okwa bali ba Haruni, n’erina liwe ini Elizabeti.
6 Abosi babiri ibathunganene embere sya Nyamuhanga, ibakakwama ebihano n’ebilhaghiro byosi bya Yehova butsira kahinira.
7 Aliwe sibabya bawithe omwana, kundi Elizabeti abya ngumba, kandi abosi babiri babya ibabirikulha omo myaka.
8 Abere anemukolha olhusunzo lhwiwe ng’omuhereri omwa gurupu yabo embere sya Nyamuhanga,
9 erikwamana n’emitheghekere* y’obuhereri eyabya iyabirihirwaho, endambi yiwe y’erihayo obukwa muyahika neryo am’ingira omwa hekalhu ya Yehova.
10 N’abandu abosi babya ibanemusabira eyihya okwa saha y’erihayo obukwa.
11 Omumalaika wa Yehova mwamubuthukirako n’erimana okwa lhuhandi lhw’amali olhw’ekiherero ky’obukwa.
12 Aliwe Zakaria mwakwa obuba akamulhangira n’engitsi muyamuhononokya.
13 Aliwe omumalaika mwamubwira athi: “Zakaria, siwukwe buba, kundi erisaba lyawu lyabiriowibwa, na mukali wawu Elizabeti akendi kubuthira omughalha, kandi wasyamwahulhamo Yohana.
14 Wukendi tsema n’eriyisyandira, kandi abangyi bakendi syatsema akabuthwa,
15 kundi akendi syabya mukulhu embere sya Yehova. Aliwe syatholere akanywa evini kutse obwabu bwosi-bwosi, kandi akendisyabyako omulimu abuyirire nibya isyali abuthwa,*
16 kandi akendi syawathikya abangyi b’okwa baana be Israeli erisuba oku Yehova Nyamuhanga wabo.
17 Kandi akendi syamutsuka embere iniane n’omuhwa* n’amaaka ebya Eliya abya nabyo, erisubya emithima y’abathatha oko baana, n’ey’abathowa okwa menge w’abathunganene, nuku atheghekere Yehova y’abandu abanayitheghekire.”
18 Zakaria mwabwira omumalaika athi: “Eki nanga kiligha nyithi? Kundi namabirikulha, na mukali waghe amabirikulha omo myaka.”
19 Omumalaika mwamubwira athi: “Ningye Gabrieli, oyuk’imana embere sya Nyamuhanga, kandi indyathumawa erikania nawu n’erikubwira engulhu yuwene eyi.
20 Aliwe lebaya! wukendibya mumu, siwendi syathasyabugha erihika aha emyatsi eyi yikendi syabererera, kundi siwuthaligha ebinywe byaghe, ebikendi syabererera okwa buthuku bwabyo obwabirihirwaho.”
21 Ebyo bine aho, abandu mubalholha embere erilinda Zakaria, kandi mubasweka kundi mwasiba omwa hekalhu mwa kutsibu.
22 Abere akahulhukamo, mwabya isyanga thasyathoka eribugha nabo, neryo mubaminya kw’abirilhangira omwa hekalhu mw’ekindu ekithe kya buli kiro.* Mwabera erikania nabo omwa syosayini aliwe isyanga bugha.
23 Ebiro by’erikolha omubiiri wiwe owabuyirire* byabere byahwa, mwaghenda ewiwe.
24 Enyuma w’ebiro birebe, mukali wiwe Elizabeti mwabya mukule, kandi mwaghunza amezi athano isyali hulhukira abandu, iniakabugha athi:
25 “Yehova kw’abirinyikolera athya omwa biro bino. Abirinyilengekaniako erinyilhusyako erihemuka omwakathi-kathi k’abandu.”
26 Abere ahikya amezi mukagha, Nyamuhanga mwathuma omumalaika Gabrieli omwa tawuni ye Galilaya eyikahulhawamo Nazareti,
27 oko mumbesa oyuthe wathabana mulhume oyuwabya iniabiriboha endaghane y’erisyathahibwa n’omulhume oyukahulhawamo Yozefu ow’omwa kihanda kya Dawudi, n’erina ly’omumbesa oyo abya ini Maria.
28 Omumalaika abere ak’ingiramo, mwabwira Maria athi: “Namakuramukya, iwe wusimirwe kutsibu, Yehova ali haghuma nawu.”
29 Aliwe ebinywe by’omumalaika mubyamulyambya kutsibu neryo mwalengaho eriyitheghererya eri nga n’iramukya eriri lithi.
30 Neryo omumalaika mwamubwira athi: “Siwubahe, Maria, Nyamuhanga abirikusima.
31 Neryo lebaya! wukendibya mukule n’eributha omughalha, kandi wasyamwahulhamo Yesu.
32 Oyu akendi syabya mukulhu kandi akendi syahulhwamo Mughalha w’ow’Endatha Kutsibu, kandi Yehova Nyamuhanga akendi syamuha ekithumbi ky’obwami kya Dawudi thatha wiwe,
33 kandi akendisyathabalha ng’Omwami okwa kithunga kya Yakobo kera na kera, kandi Obwami bwiwe sibwendisyahwaho.”
34 Aliwe Maria mwabwira omumalaika athi: “Eki kyanga thokekana kithi isindi nathakolha emyatsi y’engyingo n’omulhume?”
35 Omumalaika mwamusubirya athi: “Omulimu abuyirire asyakubyako, n’amaaka w’ow’Endatha Kutsibu asyakuswika. Kandi busana n’ekyo oyukendi buthwa asyahulhwamo oyubuyirire, Mughalha wa Nyamuhanga.
36 Kandi lebaya! omuhughu wawu ya Elizabeti, omukali oyuwasibwe mwa ngumba nayu ni mukule kandi akendi butha omughalha omwa myaka yiwe y’obukulhu, kandi kuno kw’okwezi kwiwe okw’omukagha;
37 kundi oku Nyamuhanga, sihali mwatsi* owathe angathokekana.”
38 Neryo Maria mwamubwira athi: “Lebaya! Omughombe wa Yehova ow’obukali! Leka kinyibyeko ngoku wabiribugha.” Neryo omumalaika mwalhua ahali Maria.
39 Neryo omwa biro ebyo, Maria mwahongoka, amaghenda akanguha erilhaba omwa kihugho ky’ebithwe, eriya omwa tawuni ye Yuda,
40 mwahika ewa Zakaria, neryo amaramukya Elizabeti.
41 Neryo Elizabeti abere akowa eriramukya lya Maria, omwana oyuli omo nda yiwe mwayisumba, neryo Elizabeti musulibwa mw’omulimu abuyirire
42 kandi mwabugha omwa mulenge munene athi: “Wuli w’omughisa omwa bakali, n’oyuli omo nda yawu ni w’omughisa!
43 Kikathokekana kithi ingye erithunga olhusunzo olhu, mama w’Omukama waghe eryasa ewaghe?
44 Kundi lebaya! mungabya inganowa eriramukya lyawu, omwana oyuli omo nda yaghe mwakayisumba busana n’etseme.
45 Kandi obutseme buli oko mukali oyuw’ikiriraya, kundi emyatsi eyo abwirawa erilhua oku Yehova yikendi syabererera ndeke-ndeke.”
46 Neryo Maria mwabugha athi: “Ngahalhamba Yehova,
47 n’omuthima waghe syanga leka eritsemera Nyamuhanga Omulhamya waghe,
48 kundi abirilhangira omughombe wiwe w’obukali ow’ahisi kutsibu. Kundi lebaya! eritsuka lino esyondengo esyosi syasyanyahulhamo ow’obutseme,
49 kundi ow’amaaka abirinyikolera eby’amani kutsibu, n’erina liwe libuyirire,
50 kandi eritsuka kera omwa syondengo syosi, obughanyiri bwiwe buli okwa bakamubaha.
51 Abirikolha eby’amaaka omwa kuboko kwiwe; abiripanza-panza abakayiheka omwa mithima yabo.
52 Abirilhusya ab’amaaka okwa bithumbi by’obwami kandi abirihamya ab’ahisi kutsibu;
53 abiryughuthya ndeke abakwire enzalha omw’ibaha ebibuya kandi abirithibitha okwa bagaga ibane byalha bisa.
54 Abiriwathikya Israeli omughombe wiwe, eryibuka obughanyiri bwiwe,
55 ngoku anakanaya n’abathatha-kulhu wethu, Abrahamu n’ab’olhubutho* lhwiwe, kera na kera.”
56 Maria mwikalha na Elizabeti ahabw’emyezi ng’isathu neryo mwasuba ewabo.
57 Neryo endambi ya Elizabeti ey’eributha muyahika, neryo mwabutha omughalha.
58 Neryo abaliranwa n’abahughu biwe mubowa ngoku Yehova abirimukangania olhukogho lhunene, neryo mubatsema haghuma nayu.
59 Okwa kiro ky’omunani mubasa erisyabania omwana, kandi babya ibakayamulhuka erina lya thatha wiwe, Zakaria.
60 Aliwe mama wiwe mwabugha athi: “Eyihi! akendyahulhwamo Yohana.”
61 Neryo mubamubwira bathi: “Sihali n’omughuma w’okwa bahughu bawu oyukahulhawa omwa lina eri.”
62 Neryo mubabulya thatha w’omwana omw’ikolesya esyosayini ng’anzire iniahulhwa mwa ndi.
63 Neryo mwabugha athi bamuhe ekisayi neryo mwahandikako athi: “Erina liwe ni ya Yohana.” Neryo abosi mubasweka.
64 Aho naho mwasobolha n’olhulimi lhwiwe mulhwaghobokalha neryo amatsuka eribugha, eripipa Nyamuhanga.
65 N’abaliranwa biwe abosi mubakwa obuba, kandi emyatsi yosi eyi muyatsuka erikanibwako omwa kihugho kyosi ky’ebithwe ekye Yudea.
66 Kandi abosi abowa ebi, mubabihira omwa mithima yabo n’eribugha bathi: “Omwana oyu akendi syabya mundu oyuli athi?” Kundi kwenene ebyalha bya Yehova byabya haghuma nayu.
67 Neryo thatha wiwe ya Zakaria musulhako omulimu abuyirire neryo mwaminyerera athi:
68 “Yehova apipawe, Nyamuhanga we Israeli, kundi abirilengekania okwa bandu biwe n’eribalethera omulhamu.
69 Kandi abirithuhanganirya erihembe ly’omulhamu* omwa kihanda kya Dawudi omughombe wiwe,
70 ngoku anabugha erilhabira omwa buno bw’abaminyereri biwe ababuyirire abakera,
71 erithulhamya okwa syonzighu syethu n’omwa byalha by’abosi abakathupona;
72 erikangania obughanyiri busana n’abathatha-kulhu wethu n’eryibuka endaghane yiwe eyibuyirire,
73 eriyilhagha eryo alhahiraya oku Abrahamu thatha-kulhu wethu,
74 athi enyuma w’erilhamibwa okwa byalha by’esyonzighu, akendi syathuha olhusunzo lhw’erimukolera buthubaha omubiiri owabuyirire
75 ithune bathaleghulha kandi bathunganene embere siwe ebiro byosi.
76 Aliwe iwe mwana, wukendi syahulhwamo omuminyereri w’ow’Endatha Kutsibu, kundi akendi syatsuka Yehova y’embere eritheghekania esyonzira siwe,
77 eriminyisya abandu biwe ngoku bakendi syabana omulhamu omw’ighanyirwa ebibi byabo,
78 busana n’olhukeri lhwa Nyamuhanga wethu. Habw’olhukeri olhu, ekyakakalha ky’engyakya-ngyakya kikendi syathubungira erilhua endatha,
79 erikolerya abikere omwa mwirima n’omwa mwirima w’olhuholho n’erisondolha ebisandu byethu omwa nzira y’obuholho.”
80 Neryo omwana mwakulha amabya n’amaaka omwa mulimu, kandi mwalholha embere er’ikalha omo mbwarara erihika okwa kiro ayibisulira oko Baisraeli kinyamwisi.
Emyatsi Ahikwa
^ Kutse “emirwa.”
^ Kutse “eritsuka omo nda ya mama wiwe.”
^ Obundi, “omulimu abuyirire.”
^ Kutse “eribonokerwa.”
^ Kutse “erikolera abandu.”
^ Kutse “ekindu.”
^ Kinywe okwa kinywe “embuthu.”
^ Kutse “omulhamya w’amaaka.” Lebaya Erisoborera Ebinywe, “Erihembe.”
