Engulhu Yuwene Ngoku Yahandikawa na Luka 10:1-42
10 Enyuma w’emyatsi eyi, Omukama mwasombolha abandi 70 n’eribathuma mo babiri-babiri embere siwe eriya omwa buli tawuni n’omo buli mwanya eyo iyuwene-wene abya iniakendiya.
2 Neryo mwababwira athi: “Eby’erighesa ni bingyi, aliwe abaghesi ni bake. Busana n’ekyo, mulembe-lembe Omukama w’erighesa athume abaghesi omw’ighesa liwe.
3 Mughende! Lebaya! Ngabathuma ng’esyombuli omwa byuhu.
4 Simuheke ehisaho hy’esyosente kutse ehisaho hy’ebyalya kutse esyongetha, kandi simuramukaye owosi-wosi* omwa nzira.
5 Enyumba yosi-yosi eyamuk’ingiramo mutsuke eribugha muthi: ‘Obuholho bubye okwa b’omwa nyumba eno.’
6 Neryo mwamabya imune omunywani w’obuholho, obuholho bwenyu ibukendibya okw’iyo. Aliwe amabya isyalimo, ibukendi basubako.
7 Neryo mubye omwa nyumba eyo, mulye n’erinywa ebya bakabaha, kundi omukoli atholere obuhingyi bwiwe. Isimwabya mukahuma-huma erilhua omwa nyumba eyi erighenda omwa yindi.
8 “Kandi mwam’ingira omwa tawuni, bakab’angirira, mulye ebyo bakabaha
9 kandi mulhamaye abalhwere abalimo n’eribabwira muthi: ‘Obwami bwa Nyamuhanga bwabirihika hakuhi nenyu.’
10 Aliwe mwam’ingira omwa tawuni neryo bakaghana erib’angirira, mughende omwa syonzira syayo nene-nene n’eribugha muthi:
11 ‘Thwamabakunguthira etsutsu y’etawuni yenyu nibya n’eyiryasighalha okwa bisandu byethu. Nomwabine, muminye kino, ngoku Obwami bwa Nyamuhanga bwabirihika hakuhi.’
12 Ngababwira ngoku okwa kiro ekyo, olhubanza lhw’etawuni eyo lhukendi syabya lhunene kwilhaba olhwe Sodomo.
13 “Obulighe okw’iwe, Korazini! Obulighe okw’iwe, Betisaida! kundi eby’amaaka ebyabirikoleka omw’inywe, kubyakoleka e Tiro ne Sidoni, bangabere ibabiriyisubamu kera omw’ambalha esyongyimba sy’esyonguniha n’omw’ikalha omw’ibu.
14 Busana n’ekyo, okwa kiro ky’eritswera, olhubanza lhwenyu lhwasyabya lhunene kwilhaba olhwe Tiro ne Sidoni.
15 Nawu Kapernaumu, mbwino wukalengekanaya wuthi wukendi sumbirwa elhubulha? Wukendi andaghalira omw’Isinda!*
16 “Owosi-wosi oyukabahulikirira, akanyihulikirira. N’owosi-wosi oyukabaghana, naghe akanyighana. Kandi owosi-wosi oyukanyighana, akaghana n’oyuwanyithuma.”
17 Neryo abigha 70 mubasubulha ibanatsemire bathi: “Mukama, nibya n’esyombinga musikathughondera thukakolesya erina lyawu.”
18 Neryo mwababwira athi: “Ngalhangira Sitani iniabirithogha erilhua elhubulha ng’akarabyo.
19 Lebaya! Nabiribaha obuthoki bw’erilyathangirira esyonzoka n’esyonge ahisi sy’ebisandu byenyu, n’obw’erikinda amaaka wosi w’enzighu, kandi sihali ekyosi-kyosi ekikendi syabakolha nabi.
20 Nomwabine, simutseme kundi ebirimu byabiribaghondera, aliwe mutseme kundi amena wenyu abirihandikwa elhubulha.”
21 Okwa ndambi eyo, Yesu mwatsema kutsibu omwa mulimu abuyirire n’eribugha athi: “Embere sy’abandu, ngakupipa Thatha, Omukama w’olhubulha n’ekihugho, kundi wabiribisa emyatsi eyi okwa b’amenge n’abasomire aliwe wabiribisulirayo abaana balere. Kwabine bithya, Thatha, kundi kuwanzire ikyabya kithya.
22 Thatha abirimba ebyosi, kandi sihali oyuwasi Mughalha athe Thatha; kutse sihali oyuwasi Thatha athe Mughalha n’owosi-wosi oyo Mughalha anzire erimubisulirayo.”
23 Neryo mwakebera abigha biwe n’eribabwira ibane ibobene athi: “Obutseme buli okwa meso aw’akalhangira ebindu ebya mukalhangira.
24 Kundi kwenene ngababwira, abaminyereri bangyi n’abami mubayisunza erilhangira emyatsi eyo mukalhangira aliwe mubathalhangirayo, n’eriowa emyatsi eyo mukowa aliwe mubathowayo.”
25 Neryo lebaya! omulhume oyuwasi ndeke Emighambo mwahangana n’erimulengako athi: “Mukangirirya, ni kyahi ekya ngatholere ingakolha nuku ngabane engebe y’erikotha?”
26 Mwamusubirya athi: “Ni byahi ebihandikire omwa Mighambo? Wukabisoma wuthi?”
27 Mwamusubirya athi: “‘Wutholere iwanza Yehova Nyamuhanga wawu n’omuthima wawu wosi n’engebe yawu yosi n’akaghalha kawu kosi n’obulengekania bwawu bwosi’ kandi ‘iwanza omuliranwa wawu ngoku wuyanzire.’”
28 Mwamubwira athi: “Wamasubirya ndeke; wulhole embere erikolha eki neryo wukendi syabana engebe.”
29 Aliwe erianza eriyikangania ng’oyuthunganene, omulhume mwabulya Yesu athi: “Omuliranwa waghe kwenene yo wahi?”
30 Yesu mwasubirya athi: “Omulhume mwalhua e Yerusalemu akandaghalira e Yeriko neryo mwawa omwa byalha by’ababbandi, mubamulhusya, bamamuswirya, bamayighendera, n’erimusigha iniakisiya iniaholha.
31 Buthuku buke enyuma waho, omuhereri abya inianemundaghalha omwa nzira eyo, aliwe abere akamulhangira mwalhaba okwa lhundi lhuhandi.
32 Kuthya n’Omulawi, abere ahikaho mwamulhangira, aliwe nayu mwalhaba okwa lhundi lhuhandi.
33 Aliwe Omusamaria mulebe inianemughenda omwa nzira eyo mwahikaho, abere amulhangira, mwamukwira obulighe.
34 Neryo mwamuhikako, amaboha ebironda biwe, amabyuthako amaghutha n’evini. Neryo amamuhira okwa kisoro kiwe n’erimuthwalha omwa nyumba eyikapangamo abalhabi kandi amamutsomana.
35 Ekiro ekyakwamako, mwathwalira oyukalabirira enyumba eyikapangamo abalhabi y’esyodinari ibiri, n’eribugha athi: ‘Wumutsomane kandi wamakolesya sinene okw’esi, ngendi syakusubirya syoho ingasubulha.’
36 Okw’iwe, nindi okwa basathu aba oyuwabya abere muliranwa w’omulhume oyuwawa omwa byalha by’ababbandi?”
37 Mwasubirya athi: “Oyuwamutsomana.” Neryo Yesu mwamubwira athi: “Nawu wughende wuyakole ekiri ng’ekyo.”
38 Neryo babere balholha embere n’olhughendo lhwabo, mwahika omwa kyalu kirebe. Yabya omukali oyukahulhawamo Marata oyuwamw’angirira ng’omugheni omwa nyumba yiwe.
39 Marata aby’awithe mwali wabo oyukahulhawamo Maria, oyuw’ikalha ahali ebisandu by’Omukama kandi mwalholha embere erihulikirira ebya Omukama akabugha.*
40 Okwa lhundi lhuhandi, Marata mwalengemeribwa omw’ikolha emibiiri mingyi. Neryo mwasa ahali Omukama n’erimubwira athi: “Mukama, siwulhangire ngoku mwali wethu abirinyisighira emibiiri? Mubwire wuthi ase anyiwathikaye.”
41 Omukama mwamusubirya athi: “Marata, Marata, wukahanga-hangaya n’eriyisurusuthya omo myatsi mingyi.
42 Ni bindu bike ebikayithayisibawa, kutse kighuma nibya. Kundi Maria iyo mwakasombolha erighabo* eryuwene, kandi siryendi syamulhusibwako.”
Emyatsi Ahikwa
^ Kutse “eriwa okwa wosi-wosi wukamuramukya.”
^ Kutse “Hadesi,” ni bugha ambu, eyisinda y’abandu abosi. Lebaya Erisoborera Ebinywe.
^ Kinywe okwa kinywe, “ekinywe kiwe.”
^ Kutse “erighabo eryuwene kutsibu.”
