Engulhu Yuwene Ngoku Yahandikawa na Luka 11:1-54
11 Neryo Yesu abya iniane omwa mwanya mulebe akasaba, abere aghunza, omughuma w’okwa bigha biwe mwamubwira athi: “Mukama, wuthukangiriraye ngoku thwanga saba, ngoku Yohana nayu akangiriraya abigha biwe.”
2 Neryo mwababwira athi: “Omughulhu mukasaba, mubughe muthi: ‘Thatha, erina lyawu libye libuyirire. Obwami bwawu bwase.
3 Wuthuhe ebyalya byethu obuli kiro erikwamana n’ebiyithawa byethu ebya buli kiro.
4 Kandi wuthughanyire ebibi byethu, kundi nethu thukaghanyira obuli mundu oyuli mw’eribanza lyethu; kandi siwuthwingiraye omw’irengwako.’”
5 Neryo mwababwira athi: “Thubughe thuthi omughuma w’okw’inywe awithe omunywani neryo iniaghenda eyo ali omwakathi k’ekiro n’erimubwira athi, ‘Munywani, nyibweke emiggati isathu,
6 kundi omughuma w’okwa banywani baghe amambikako akalhua omwa lhughendo kandi singwithe eky’erimuha.’
7 Aliwe iniamusubirya iniane omwa nyumba athi: ‘Leka erinyisurusuthya. Olhuyi lhwabirikingwa, kandi ngane omwa ngyingo n’abaana baghe. Sinangahangana erikuha ekindu kyosi-kyosi.’
8 Ngababwira, nomwangaghana erihangana akamuha ekyosi-kyosi kundi ni munywani wiwe, ahathe erithika-thika busana n’erihathikana liwe omwa buthubaha, iniakendi hangana iniamuha eky’akayithagha.
9 Neryo ngababwira, mulhole embere erisaba, neryo mukendi habwakyo; mulhole embere erisondekania neryo mukendi banakyo; mulhole embere erikongotha neryo mukendi kyungulirwa.
10 Kundi obuli mundu oyukasaba akahebawa, n’obuli mundu oyukasonda-sondaya akabana, n’obuli mundu oyukakongotha, akakyungulirawa.
11 Omo kwenene, ni thatha wahi okw’inywe oyuwangaha omwana wiwe y’enzoka amamusaba eyiswe?
12 Kutse kandi oyuwangamuha enge amamusaba eriya?
13 Neryo nomomune babi munasi eriha abaana benyu b’ebihembo ebyuwene, na Thatha w’elhubulha angaha bungahi omulimu abuyirire okwa bakamusabagho!”
14 Enyuma waho mwahighitha embinga emumu. N’omulhume emumu abere abirilhuako embinga mwatsuka eribugha, n’abandu bangyi mubasweka.
15 Aliwe abaghuma b’okw’ibo mubabugha bathi: “Akahighitha esyombinga omwa maaka wa Belzebabu,* omuthabali w’esyombinga.”
16 N’abandi erianza erimulengako, mubatsuka erimusaba bathi abakolere ekiminyikalho erilhua elhubulha.
17 Abere abiriminya amalengekania wabo, mwababwira athi: “Obuli bwami obughabulene bukahwaho, n’enyumba eyighabulene yikathera.
18 Kuthya, Sitani nayu amabya iniaghabulene, obwami bwiwe ibukend’imana buthi? Kundi mukabugha muthi ngahighitha esyombinga omwa maaka wa Belzababu.
19 Namabya iningahighitha esyombinga omwa maaka wa Belzababu, abaana benyu nabu ibakasihighitha omwa wandi? Eki ky’ekikendi syaleka ibabya batsweri benyu.
20 Aliwe namabya iningahighitha esyombinga omwa munwe wa Nyamuhanga, kwenene Obwami bwa Nyamuhanga ibwabiribahikako isimwasi.
21 Omulhume w’amaaka kandi oyuwithe ebirwanisyo amatheya ekikali kiwe, ebindu biwe bikabya omwa butheya.
22 Aliwe omundu mulebe oyumulengirye amaaka amasyalhwa nayu kandi akamukinda, omulhume oyo akaheka ebirwanisyo biwe ebyosi eby’alhue akayikethera, n’erighaba eby’alyamuhekako.
23 Oyuthe okwa lhuhandi lhwaghe, ni nzighu yaghe, n’oyuthekuma-kuma haghuma naghe, akapanza-panza.
24 “Ekirimu kibi kikabya kikalhua omwa mundu, kikalhaba eyithe maghetse kikasondya ah’erilhuhukira neryo kikabya kyabiribulhaho, kikabugha kithi, ‘Ngendisuba omwa nyumba yaghe eyo nalhuamu.’
25 Neryo kikabya kikahikamo, kik’eghaya enyumba iyinabirirye ndeke n’eryuwanibwa ndeke.
26 Neryo kikaghenda ikyayaletha ebindi birimu musanju ebibi kukilhaba, neryo bikabya byabir’ingiramu, bik’ikalhamu. Neryo emibere y’omundu oyo yikabya mibi kutsibu kwilhaba kwabya erimbere.”
27 Abere anemubugha emyatsi eyi, omukali iniane omwa bandu banene mwabugha nayu omwa mulenge munene athi: “Obutseme buli okwa libunda eryakuheka n’okwa mabere agho wongako!”
28 Aliwe Yesu mwamubwira athi: “Kwabithe bithya, obutseme buli okwa bakowa ekinywe kya Nyamuhanga n’erikighenderako!”
29 Abandu babere banemukukumana, mwatsuka eribugha athi: “Olhulengo olhu ni lhulengo lhubi; lhukasondaya ekiminyikalho, aliwe sihali ekiminyikalho ekya lhukendi hebwa, kya n’ekiminyikalho kya Yona kisa.
30 Ngoku Yona anabya kiminyikalho okwa banya Ninawe, n’Omughalha w’omundu kw’anemwendibya athya okwa lhulengo olhu.
31 Omwami-kali w’eyikwa asyahangana abandu b’olhulengo olhu bakatswerwa kandi asyabasingisya omusango, kundi mwalhua okwa nduli y’ekihugho akasyahulikirira amenge wa Solomona. Aliwe lebaya! oyulengire Solomona ane hano.
32 Abandu be Ninawe bakendi syahangana olhulengo olhu lhukatswerwa kandi bakendi syalhusingisya omusango, kundi mubayisubamo busana n’ebya Yona athulhughanaya. Aliwe lebaya! oyulengire Yona ane hano.
33 Omundu akabya abiryakya etara syalihirayo ahabisamire kutse omwisi sy’ekithiri, aliwe akahirayo okwa muthaghalha w’etara, nuku abakingiramo balhangire ekyakakalha.
34 Etara y’omubiri ly’eriso lyawu. Eriso lyawu lyamathungerera kighuma,* omubiri wawu wosi nagho akabya kyakakalha; aliwe lyamabya mw’eriyighomba,* omubiri wawu nagho akabya mwirima.
35 Busana n’ekyo, muyitheghaye, nuku ekyakakalha ekiri omw’inywe si kibye mwirima.
36 Neryo, omubiri wawu wosi amabya kyakakalha isikuli katsweka ak’omwirima, owosi iniakendibya kyakakalha ng’omughulhu etara yikakuha ekyakakalha yikakolerya.”
37 Abere abiribugha ebi, Omufarisayo mwamusaba athi ase alye haghuma nayu. Neryo mw’ingiramo, am’ikalha okwa meza.
38 Aliwe Omufarisayo mwasweka akalhangira kw’akalya isyathatsuka erinaba.*
39 Aliwe Omukama mwamubwira athi: “Inywe Bafarisayo, mukoghaya ekikopo n’ebbakuli by’eyihya, aliwe omwakathi kenyu muswiremo omururu n’obubi.
40 Inywe bakiru! Oyuwakolha eyihya mwakolha n’omwakathi, kwabithe?
41 Ebindu by’omwakathi mubiheyo ng’ebihembo by’olhukeri,* neryo lebaya! obuli kindu ekibahambireko ikikendi henia.
42 Aliwe obulighe okw’inywe Bafarisayo, kundi mukahayo ekighuma ky’omw’ikumi eky’omunana n’omukyikya n’esindi nyinyi syosi, aliwe mukagheghena obulingirirania n’olhwanzo lhwa Nyamuhanga! Emyatsi eyi mwabya mutholere erikolhayo, aliwe isimwagheghena eyindi myatsi eyo.
43 Obulighe okw’inywe Bafarisayo, kundi mwanzire ebithumbi by’embere-mbere* omwa syosinagogi n’eriramukibwa omwa hithali!
44 Obulighe okw’inywe, kundi muli ng’amasinda* ayo, awathelhangirika ndeke,* agho abandu bakalyathako kandi ibathaminya!”
45 Omughuma w’okwa basi ndeke Emighambo mwamusubirya athi: “Mukangirirya, eribugha emyatsi eyi, nethu wukathutsuma.”
46 Neryo mwamubwira athi: “Nenyu obulighe okw’inywe inywe mwasi ndeke Emighambo, kundi mukahekaya abandu b’emisiko eyikalire eriheka kandi inywe inyw’ibene-bene simuli thulhaya okwa misiko eyo kw’omunwe wenyu n’omughuma!
47 “Obulighe okw’inywe, kundi mukahimba amasinda* w’abahereri, aliwe abathatha-kulhu benyu ni bo bab’itha!
48 Ahathe erithika-thika, munasi emibiiri y’abathatha-kulhu wenyu, kandi mukalighirana nabo, kundi mub’itha abaminyereri aliwe nenyu mukahimba amasinda wabo.
49 Ky’ekyaleka amenge wa Nyamuhanga nagho iniabugha athi: ‘Ngendi syabathumira abaminyereri n’abakwenda, kandi bakendi sy’itha n’eriendererya abaghuma b’okw’ibo,
50 nuku omusasi w’abaminyereri abosi owuthika erilhua okw’itsuka ly’ekihugho* angasyabya* okwa lhulengo olhu,
51 eritsuka okwa musasi wa Abeli erihika okwa musasi wa Zakaria, oyuwithibirawa ahakathi-kathi k’ekiherero n’enyumba.’* Kwenene, ngababwira, akendi syabya* okwa lhulengo olhu.
52 “Obulighe okw’inywe inywe mwasi ndeke Emighambo, kundi mumwaheka ekisumuruzyo ky’eriminya. Inywe inyw’ibene-bene mumuthingiramo kandi mukakakiraya abakanza eryingiramo!”
53 Neryo abere alhua aho, abahandiki n’Abafarisayo mubatsuka erimuhirako akahathikano kanene n’erimubulya ebindi bibulyo bingyi,
54 bakalindirira ekyo angabugha nuku bamutheghe mukyo.
Emyatsi Ahikwa
^ Erina erikahebawa Sitani.
^ Kutse “lyamalhangira ndeke.” Kinywe okwa kinywe “lyamabya lyolho.”
^ Kinywe okwa kinywe, “libi.”
^ Ni bugha ambu, erikolha emirwa y’eriyerya.
^ Kutse “eriha abanakwa b’ebihembo.” Lebaya Erisoborera Ebinywe.
^ Kutse “ebyuwene kutsibu.”
^ Kutse “amasinda w’eryibukwa.”
^ Kutse “awatheko himinyikalho.”
^ Kutse “amasinda w’eryibukwa.”
^ Kilhangirikire eki kikamanyisaya eributhwa ly’abaana ba Adamu na Eva.
^ Kutse “asyasabwa.”
^ Kutse “ehekalhu.”
^ Kutse “erisabwa.”
