Engulhu Yuwene Ngoku Yahandikawa na Luka 12:1-59
-
Ekihamya ky’Abafarisayo (1-3)
-
Sagha Nyamuhanga, butsira abandu (4-7)
-
Eriligha eribya bughuma na Kristo (8-12)
-
Omukya w’omulhume omugaga omukiru (13-21)
-
Muleke erihangya-hangya (22-34)
-
Ekihyo kike (32)
-
-
Eribya iwunatheghirye (35-40)
-
Omwimaniri oyutheleghulha n’omwimaniri oyukaleghulha (41-48)
-
Butsira obuholho, aliwe erighabulhana (49-53)
-
Ekiyithawa ky’eriminyerera emighulhu (54-56)
-
Erighunzaho erithendi yitheghererania (57-59)
12 Ebyo bine aho, esyongumi sy’abandu babere banahindene haghuma kandi ibanemulyathangirirana, Yesu mwatsuka erikania n’abigha biwe athi: “Muyitheghaye okwa kihamya ky’Abafarisayo, ni buthebya.
2 Aliwe sihali ekikuthire ndeke ekithendi syabisulhwa, kandi sihali embitha eyithendi syaminywa.
3 Busana n’ekyo, ebyamukabughira omwa mwirima bikendi syowibwa omwa kyakakalha, n’ebya mukabughira ekathi omwa bihwe-hwe bikendi syathulhughanibwa endatha okwa nyumba.
4 Nomwabine, ngababwira, banywani baghe, simusaghe abak’itha omubiri n’enyuma waho ibabya isibawithe ekindi ekyo banga kolha.
5 Aliwe ngendi bakangya oyo mwanga sagha: Musaghe Oyukabya abir’itha iniabya inianawithe obuthoki bw’erighusa omwa Gehena.* Ee, ngababwira, Oyo ya musaghe.
6 Mbwino ehindegheya hithano sihirighulibawa binusu bibiri eby’obughuli* buke? Nomwabine sihali n’akaghuma k’okw’ihyo ako Nyamuhanga ak’ibirirawa.*
7 Nibya n’esyonzwiri sy’okwa mithwe yenyu esyosi sinaghanzirwe. Simubahe; muli b’obughuli bunene kwilhaba ehindegheya hingyi.
8 “Ngababwira, omundu wosi-wosi oyukanyiligha embere sy’abandu, Omughalha w’omundu asyamuligha embere sy’abamalaika ba Nyamuhanga.
9 Aliwe oyukanyighana embere sy’abandu akendi syaghanwa embere sy’abamalaika ba Nyamuhanga.
10 N’omundu wosi-wosi oyukabugha nabi oko Mughalha w’omundu, akendi syaghanyirwa, aliwe owosi-wosi oyukatsuma omulimu abuyirire syendi syaghanyirwa.
11 Omughulhu bakabaletha embere sy’abandu,* abathabali, n’ab’ehamuli, simuhanga-hangaye busana n’ebya mukendi syabugha kutse nga mukendi syabibugha muthi mukayilhwirako,
12 kundi okwa saha eyo omulimu abuyirire akendi syabakangirirya ebya mutholere imwabugha.”
13 Neryo omundu mulebe omwa bandu bangyi mwabugha nayu athi: “Mukangirirya, bwira mughalha wethu wuthi thughabane nayu omwandu wethu.”
14 Mwamusubirya athi: “Mulhume, nindi wanyiyiramo mutsweri kutse mughabi wenyu inywe babiri?”
15 Neryo mwababwira athi: “Mubye imunalholire kandi muyitheghaye okwa buli mulingo w’obururu,* kundi omundu nomwangabya iniawithe bingyi, syendi syabana engebe busana n’eby’awithe.”
16 Busana n’ekyo, mwababwira omukya* ono athi: “Ekithaka ky’omulhume omugaga mukyerya bingyi.
17 Neryo mwatsuka eriyibwira athi, ‘Ngakoleki lino kundi singwithe ah’eribika ebirimwa byaghe?’
18 Neryo mwabugha athi, ‘Ngendi kolha kino: Ngendi himbulha ebighona byaghe n’erihimba ebinene-binene, neryo omo mwangendihira engano yaghe n’ebindu byaghe ebyosi,
19 neryo ngendiyibwira nyithi: “Wabiribika ebindu bingyi ebyuwene ebikendi syaghunza myaka mingyi; siwutsomane, wulye, wunywe, wuyitsemesaye.”’
20 Aliwe Nyamuhanga mwamubwira athi, ‘Iwe mukiru, munabwire omwa kiro bakendi sondya engebe yawu. Neryo nindi yukendi syimya ebindu ebya wubikire?’
21 Neryo kwa bikabya bithya okwa mundu oyukayibikira ebindu aliwe isi mugaga embere sya Nyamuhanga.”
22 Neryo mwabwira abigha biwe athi: “Ky’ekikaleka ingababwira nyithi, muleke erihangya-hangya busana n’engebe yenyu nga mukendiryaki kutse busana n’emibiri yenyu nga mukendyambalhaki.
23 Kundi engebe yilengire ebyalya n’omubiri alengire esyongyimba.
24 Musamalire ebikororo: Sibyebiba embutho kutse erihulhulha; sibiwithe ekighona kutse esitoha; nomwabine Nyamuhanga akabilisaya. Mbwino simuli b’obughuli kwilhaba esyonyonyi?
25 Nindi okw’inywe oyuwang’ongera okwa ngebe yiwe nibya n’edakika* nguma busana n’erihangya-hangya?
26 Neryo mwamabya isimwanga thoka n’erikolha n’akandu kake ng’ako, busana naki imwahangya-hangya busana n’ebyamasighalhayo?
27 Musamalire ngoku ebimole bikakulha: Sibyekolha kutse erisona esyongyimba; aliwe ngababwira, nibya na Solomona omwa lhukengerwa lhwiwe lhwosi mwathambalha ng’ekighuma ky’okw’ibyo.
28 Neryo Nyamuhanga amabya ikw’akambalhaya athya ebithi by’omoli ebikabyaho munabwire n’omungya ibyaghuswa omwa muliro, mbwino iniakendi bambalya bungahi, inywe b’erikirirya like!
29 Neryo muleke erisondya ebyamukendirya n’ebyamukendinywa, kandi muleke erihangya-hangya;
30 kundi ebihanda by’ekihugho bikasondaya ebindu byosi ebi bya kutsibu, aliwe Thatha wenyu anasi ku mukayithagha ebindu ebi.
31 Omwakanya k’ekyo, mulhole embere erisondya Obwami bwiwe, n’ebindu ebi mwasyongerwabyo.
32 “Simubahe, ekihyo kike, kundi Thatha wenyu abiriligha eribaha Obwami.
33 Mughulhaye ebindu byenyu n’eriha ebihembo by’olhukeri.* Mukole ehisaho hy’esyosente ehithekulha, eky’obughuli omwa lhubulha ekithe kyangahwa, eyo omwibi athe angahika n’ehinyurughunzu hithe hyangatsandya.
34 Kundi aho ekindu kyawu ky’obughuli kiri h’omuthima wawu akabya.
35 “Mubye imunambere kandi imunayitheghekire kandi imunakirye esyotara syenyu,
36 kandi mutholere imwabya ng’abandu abakalindirira omukama wabu akalhua okw’iherukya, neryo akabya akasa n’erikongotha, bakalhuaho ibamukyungulira.
37 Obutseme buli okwa baghombe abo mukama wabo ak’eghaya ibanatheghirye! Kwenene ngababwira, akendyambalha esyongyimba sy’erikoleramo n’eribabwira athi bikale okwa meza neryo iniasa n’eribaherezya.
38 Kandi amasa omwa kisisimuko kyakabiri,* nibya n’omwa kyakasathu,* neryo ak’eya ibanayitheghekire, obutseme buli okw’ibo!
39 Aliwe muminye kino, omwinye nyumba alyaminya esaha eyo omwibi akendyasiramo, syanga lighire enyumba yiwe yikathwibwa.
40 Nenyu mubye imunayitheghekire, kundi Omughalha w’omundu akendyasira okwa saha eyo muthayitsulirye.”
41 Neryo Petero mwabugha athi: “Mukama, omukya* oyu wukathubwiragho ithwe basa kutse obuli mundu?”
42 Neryo Omukama mwabugha athi: “Omo kwenene omwimaniri oyutheleghulha, ow’amenge nindi, oyo omukama wiwe asyaha omubiiri w’eritheya abaghombe b’enyumba yiwe n’erilholha embere eribaha ebyalya ebya bakayithagha okwa buthuku obutholere?
43 Obutseme buli okwa mughombe oyo mukama wiwe amamweya inianemukolha ekyo!
44 Ngababwira okwenene, akendi syamuyira mwa mutheya w’ebindu biwe byosi.
45 Aliwe omughombe oyo amasyayibwira omwa muthima wiwe athi, ‘Omukama waghe amasibayo,’ neryo akatsuka eriswirya abaghombe b’obulhume n’ab’obukali n’erirya, n’erinywa n’erithamira,
46 omukama w’omughombe oyo akendi syasa okwa kiro ekyo athamuyitsulirye n’okwa saha eyo athasi, neryo akendi syamusuyira kutsibu n’erimuhighulira omwa bakaleghulha.
47 Neryo omughombe oyuwayitheghereraya erisonda lya mukama wiwe aliwe akaghana eriyithegheka kutse erikolha ebyo abwirawa* akendi syaswiribwa ebibboko bingyi.
48 Aliwe oyuthayitheghereraya aliwe akakolha ebikaleka iniatholera ebibboko akendi syaswiribwa bike. Omo kwenene, obuli mundu oyuwahebawa bingyi akendi syasabwa bingyi, n’oyuwayirawa mwamutheya wa bingyi akendi syasabwa kwilhaba ebyo akalengekanaya.
49 “Nasa eritsukisya omuliro okwa kihugho, neryo amabya iniabiryaka, ni kindi kyahi ekya ngathasyayithagha?
50 Ni kwenene ngawithe olhubatizo olho ngayabatizibawamo, aliwe ngakwire engitsi erihika aho lhukendi hwera!
51 Mukalengekanaya muthi nasa okwa kihugho eriletha obuholho? Eyihi, ngababwira naletha erighabulhana.
52 Kundi eritsuka lino omwa nyumba mukendisyabya abandu bathano abaghabulene, abasathu ibabiribindukira ababiri n’ababiri ibabiribindukira abasathu.
53 Bakendi syaghabulhana, thatha na mughalha, mughalha na thatha, mama na mwali, mwali na mama, nyoko-byalha na mwalyana, na mwalyana na nyoko-byalha.”
54 Neryo kandi mwabwira abandu bangyi athi: “Mukabya mukalhangira ekithu kikahulhuka ebulengera lyuba, mukalhuaho imwabugha muthi, ‘Embulha y’ekiyagha yinemwasa,’ kandi ikyabya.
55 Kandi mukabya mukalhangira ekiyagha kikalhua eyikwa, mukabugha muthi, ‘Hakendibya ekihuhania,’ kandi ikyabya.
56 Inywe bathebya, munasi eriminyerera erisosa ly’ekihugho n’ekyanya, aliwe busana naki imuthathoka eriminyerera obuthuku buno?
57 Busana naki imuthayiminyira ekithunganene nga ky’ekyahi?
58 Ng’eky’erileberyako, omughulhu wunemughenda ew’omuthabali iwune n’oyo wuwitheko olhubanza, imune omwa nzira, lengaho erighunzaho ekitsibu ekya muwithe nayu nuku syakuthwale embere sy’omutsweri, n’omutsweri akakuwathya omupolisi w’ekoti, n’omupolisi w’ekoti akakuhira omwa ngomo.
59 Kwenene ngakubwira, isiwangalhuamo erihika aho wukendi thuhira n’akanusu* kake ako wusighere nako.”
Emyatsi Ahikwa
^ Kinywe okwa kinywe, “esyosariyoni ibiri.”
^ Kutse “ako akagheghena.”
^ Kutse “embere w’esyosinagogi.”
^ Kutse “eriyighomba.”
^ Kutse “eky’erileberyako.”
^ Kinywe okwa kinywe, “‘kyubbiti nguma’ ni bugha ambu inji nga 17.5.”
^ Kutse “eriha abanakwa b’ebihembo.” Lebaya Erisoborera Ebinywe.
^ Eritsuka saha 3 esy’erigholho erihika omwa kathi k’ekiro.
^ Eritsuka omwa kathi k’ekiro erihika saha 9 sy’ekiro.
^ Kutse “eky’erileberyako.”
^ Kutse “erikolha erikwamana n’erisonda liwe.”
^ Kinywe okwa kinywe, “elaptoni y’erighunzerera.”
