Engulhu Yuwene Ngoku Yahandikawa na Luka 13:1-35
-
Eriyisubamo kutse erithoghothibwa (1-5)
-
Omukya w’omuthi w’omuthini owathehethaya (6-9)
-
Omukali oyukondomire akalhamibawa okwa Sabato (10-17)
-
Omukya w’akaghuma k’eharadali n’ow’ekihamya (18-21)
-
Akaghalha akakayithaghisibawa eryingira omwa lhukyo lhuke (22-30)
-
Herode, “eboha eyo” (31-33)
-
Yesu akalira busana ne Yerusalemu (34, 35)
13 Okwa buthuku obo abaghuma b’okwa babyaho mubabwira Yesu okwa bihambire okwa banya Galilaya abo Pilato atswanganaya omusasi wabo omwa buhere bwabo.
2 Mwabasubirya athi: “Mukalengekanaya muthi abanya Galilaya abo babya babi kutsibu kwilhaba abandi banya Galilaya abosi kundi mubaghalhwa omwa myatsi eyi?
3 Kwabithe bithya; aliwe mwamathendi yisubamu, nenyu inywe bosi imukendi syathoghothibwa.
4 Kutse mukalengekakanaya muthi abandu 18 abo ekinyumba kiri-kiri ekye Siloamu kyathererako n’er’itha babya babi kutsibu kwilhaba abandi bosi ababya bikere e Yerusalemu?
5 Kwabithe bithya; aliwe mwamathendi yisubamu, nenyu inywe bosi imukendi syathoghothibwa ng’ibo.”
6 Neryo mwalholha embere eribabwira omukya* ono: “Omulhume aby’aherire omuthi w’omuthini omw’irima liwe ly’emizabibu, neryo mwasa akasyasondyamo ebighuma aliwe mwathabanamwaki.
7 Neryo mwabwira omukoli w’omwa mizabibu athi, ‘Hamabirilhaba myaka isathu inganemusyalebya omwa muthi w’omuthini oyu mw’ebighuma, aliwe ingathabanamwaki. Kondagho! Busana naki akalira omwanya wabbule’?
8 Mwamusubirya athi, ‘Mukama, lekagho ahabw’omwaka mughuma erihika aho ngendi limiriragho n’erihiramo omubogha.
9 Amasyahethya, ikyuwene; aliwe amathendi syahethya, neryo iwakondagho.’”
10 Neryo abya inianemukangirirya omwa nguma y’okwa syosinagogi okwa Sabato.
11 Neryo lebaya! habya omukali oyuwabyako ekirimu ekyabya ikyabirimutsekya* ahabw’emyaka 18; kandi abya iniabirikondoma kabiri kandi isyanga thoka eriyisingika nahake.
12 Yesu abere amulhangira, mwamubwira athi: “Mukali, wamalhamibwa kw’obutseke bwawu.”
13 Neryo mwamuhirako ebyalha, aho naho omukali mwalhungukalha n’eritsuka eriha Nyamuhanga y’olhukengerwa.
14 Aliwe omukulhu w’omwa sinagogi mwahithana, kundi Yesu mwalhamya okwa kiro kye Sabato, neryo mwabwira abandu bangyi athi: “Hali biro mukagha eby’erikoleramo emibiiri; neryo ebyo bya mubye mukasiramo erisyalhamibwa, butsira okwa Sabato.”
15 Aliwe Omukama mwamusubirya athi: “Inywe bathebya, mbwino obuli mughuma w’okw’inywe syalihangulha enume yiwe y’ende kutse epunda omwa lhughuthu lhwayu okwa kiro kye Sabato akayahayo aw’erinywa?
16 Mbwino omukali oyu, mwali wa Abrahamu kandi oyo Sitani yabiriboha habw’emyaka 18 syatholere akaboholhwa kw’obutseke obu okwa kiro kye Sabato?”
17 Abere abiribugha emyatsi eyi, abahakani biwe bosi mubatsuka eriyikutha-kuthira, aliwe abandu abosi mubatsuka eritsema busana n’eby’olhukengerwa ebyosi eby’akolha.
18 Neryo mwalholha embere eribugha athi: “Obwami bwa Nyamuhanga buli ngaki, kandi nangabulinganisya naki?
19 Buli ng’akaghuma k’eharadali ako omulhume imaya n’erihera omw’irima liwe, neryo mukalhasa amabya muthi, n’esyonyonyi sy’omwa kyanya musyahimba esyonyuthu omwa mithahi yagho.”
20 Kandi mwabugha athi: “Obwami bwa Nyamuhanga nanga bulinganisya naki?
21 Bulingene n’ekihamya ekya omukali imaya amadungamo ehirengyi hinene-hinene* hisathu ehy’eyisyano ey’engano erihika aho yathundira.”
22 Neryo mwaya omwa buli tawuni n’omwa buli kyalu, erikangirirya n’erilholha embere n’olhughendo lhwiwe lhw’eriya e Yerusalemu.
23 Neryo omulhume mwamubulya athi: “Mukama, mbwino abakalhamibawa ni bake?” Mwababwira athi:
24 “Muyikase kutsibu eryingira omwa lhukyo lhuke, kundi ngababwira, abangyi bakendi syanza eryingira mulho aliwe sibendi syathoka.
25 Omwinye nyumba akendi syabya akahangana n’erikinga olhuyi, mukendi syimana eyihya n’erikongotha muthi, ‘Mukama, thukyungulire.’ Aliwe akendi syabasubirya athi: ‘Singasi eyo mukalhua.’
26 Neryo mukendi syatsuka eribugha muthi. ‘Muthwalya n’erinywira embere syawu, kandi muwakangirirya omwa syonzira syethu nene-nene.’
27 Aliwe akendi syababwira athi, ‘Singasi eya mukalhua. Mulhue aho nyiri, inywe bakoli b’ebithathunganene!’
28 Eyo yamukendi syalirira n’erikereghetha ameno wenyu, mukalhangira Abrahamu, Isaka, Yakobo, n’abaminyereri abosi omo Bwami bwa Nyamuhanga, aliwe inywe imunaghusirwe eyihya.
29 Eryongera okw’ekyo, abandu bakendi syalhua ebulhua lyuba n’ebulengera lyuba, eyighulhu n’eyikwa, kandi bakendi syikalha okwa meza omo Bwami bwa Nyamuhanga.
30 Neryo lebaya! hane ab’erighunzerera abakendi syabya b’erimbere, kandi hane ab’erimbere abakendi syabya b’erighunzerera.”
31 Okwa saha iyan’eyo abaghuma b’okwa Bafarisayo mubasa n’erimubwira bathi: “Hulhuka wulhue hano kundi Herode akanza erikwitha.”
32 Neryo mwababwira athi: “Mughende muyabwire eboha eyo, ‘Lebaya! Nganemuhighitha esyombinga n’erilhamya abandu munabwire n’omungya, n’okwa kiro kyakasathu ngendibya ingamaghunza.’
33 Nomwabine, ngatholere ingaghenda munabwire, omungya, n’ekiro ekikakwamako, kundi omuminyereri syatholere* ak’ithirwa eyihya we Yerusalemu.
34 Yerusalemu, Yerusalemu, omwithi w’abaminyereri kandi oyuk’itha abakathumawa ey’ali omo mabwe—mirundi mingahi munanza erikuma-kumira abaana bawu ba haghuma ngoku engoko yikakuma-kumira ehyana hyayu hy’omwa bipupa byayu! Aliwe muwuthanza.
35 Lebaya! Mwabirisighirwa enyumba yenyu. Ngababwira, simwendi syasanyilholhako erihika aho mukendi syabughira muthi: ‘Omughisa ali oko yukasa omo lina lya Yehova!’”
Emyatsi Ahikwa
^ Kutse “eky’erileberyako.”
^ Kutse “ekirimu ekyamulehemaya.”
^ Kinywe okwa kinywe, “eripima omwa syoseya.” Eseya nguma yingene n’esyolita 7.33.
^ Kutse “sikithokekene.”
