Engulhu Yuwene Ngoku Yahandikawa na Luka 14:1-35
14 Buthuku bughuma Yesu mwaya omwa nyumba y’omughuma w’okwa basondoli b’Abafarisayo okwa Sabato eriyalya, kandi babya ibanemumulebya ndeke.
2 Neryo lebaya! omulhume oyuwabya alhwere obulhwere obw’eribimba-bimba abya iniane embere siwe.
3 Neryo Yesu mwabulya abasi ndeke Emighambo n’Abafarisayo athi: “Kinatholere erilhamya okwa Sabato kutse eyihi?”
4 Aliwe mubabya bukuthu. Neryo mwahamba okwa mulhume, amamulhamya n’eribugha athi aghende.
5 Neryo mwababwira athi: “Nindi okw’inywe oyo enume yiwe y’ende kutse omwana wiwe amathoghera omwa kyuna ky’amaghetse okwa kiro kye Sabato oyuthe wangalhuaho akamukuramo?”
6 Mubalemwa erisubirya.
7 Neryo Yesu abere alhangira abakokibirwe bakayisombolera emyanya y’ab’ebitsumbi, mwabaha eky’erileberyako. Mwababwira athi:
8 “Omundu mulebe amakukokya okwa bugheni bw’eriheryukya, isiwikalha omwa myanya y’ab’ebitsumbi. Obundi omundu mulebe oyukulengirye ekitsumbi anganabya nayu iniabirikokibwa.
9 Neryo oyulyabakokaya akendyasa n’erikubwira athi, ‘Hangana aho oyu ikaleho.’ Neryo iwukendi yikutha-kuthira wukayikalha omo mwanya w’enyuma.
10 Aliwe wamakokibwa, ghenda wuyikale omo mwanya w’enyuma, nuku oyulyakukokaya akendibya akasa, akendi kubwira athi, ‘Munywani, ghenda wuyikale omwa mwanya ow’embere.’ Neryo iwukendi sikibwa embere sy’abagheni abosi.
11 Kundi obuli mundu oyukayihamaya akendi syakehibwa, n’oyukayikehaya akendi syahamibwa.”
12 Neryo mwabwira n’oyulyamukokaya athi: “Omughulhu wukatheghekanaya eky’erirya eky’erithungyi kutse eky’erigholho, isiwabirikira abanywani bawu kutse baghalha benyu kutse abahughu kutse abaliranwa bawu abagaga. Kundi nabo ibangana syakukokya, neryo iwabya iwamalihwa.
13 Aliwe omughulhu wukatheghekanaya erirya inene, kokaya abanakwa, abalema, n’esyondimethime;
14 neryo iwukendi tsema kundi sibawithe ekya bakendi syakuliha. Kundi wukendi syalihwa okw’ilhubuka ly’abathunganene.”
15 Omughuma w’okwa bagheni abere owa eki, mwamubwira athi: “Obutseme buli oko yukalira* omo Bwami bwa Nyamuhanga.”
16 Yesu mwamubwira athi: “Omulhume mwatheghekania erirya inene ery’erigholho kandi mwakokya abangyi.
17 Mwathuma omughombe wiwe okwa saha y’erirya ery’erigholho eribwira abakokibirwe athi, ‘Mwase, kundi obuli kindu kyabiritheghekanibwa.’
18 Aliwe abosi mubatsuka eriyihambulya-hambulya. Ow’erimbere mwamubwira athi, ‘Munaghulire eririma kandi nganzire ingaya lirebya; ngakusaba, wunganyire singendyasa.’
19 N’owundi athi, ‘Munaghulire esyonde ikumi esy’erilimisya kandi ngayasilebaya; ngakusaba, wunganyire sinendyasa.’
20 N’owundi athi, ‘Naherukaya lino-lino, neryo busana n’eki singendyasa.’
21 Neryo omughombe mwasa, amabwira mukama wiwe y’emyatsi eyi. Neryo omukama w’enyumba mwahithana n’eribwira omughombe wiwe athi, ‘Anguha omwa syonzira nene-nene n’ehike-hike ehy’omwa tawuni, wulethe hano abanakwa, abalema, n’esyondimethime.’
22 Enyuma waho omughombe mwabugha athi: ‘Mukama ebya wulyabugha byabirikolhwa, aliwe hakine omwanya.’
23 Neryo omukama mwabwira omughombe athi, ‘Ghenda omwa syonzira n’omwa hiyira hy’omwa byalu, wubabwire wuthi base nuku enyumba yaghe yusule.
24 Kundi ngakubwira, sihali n’omughuma okwa balyakokibawa oyukendi rozya okwa byalya byaghe by’erigholho.’”
25 Neryo abandu bangyi babya ibanemughenda na Yesu, neryo mwabinduka n’eribabwira athi:
26 “Omundu wosi-wosi oyukasa okw’ingye kandi akathendipona* thatha wiwe, mama wiwe, mukali wiwe, abaana biwe, baghalha babo, bali babo, nibya n’engebe yiwe, syangabya mwigha waghe.
27 Omundu wosi-wosi oyutheheka omuthi wiwe w’amaghali* kandi akanyikwama, syangabya mwigha waghe.
28 Ng’eky’erileberyako, nindi okw’inywe oyukanza erihimba akaleberyo oyuthe wanga tsuka erikalha ahisi n’eribaririra ng’anawithe ebyangaghunza erihimbako?
29 Bithe bithya, inianganatsuka omusingyi wako aliwe iniathathoka erighunzako, n’abalhabi abosi ibatsuka erimusiningulira,
30 bathi: ‘Omulhume oyu mwatsuka obuhimbe aliwe mwathathoka eribughunza.’
31 Kutse ni mwami wahi oyuwangayalhwa n’owundi mwami oyuthe wangatsuka erikalha ahisi erilebya abasirikali biwe 10,000 ng’anganathoka erilhwa n’abasirikali 20,000 ab’oyukasyalhwa nayu?
32 Omo kwenene amabya isyanga kolha eki, neryo owundi olya iniakendibya iniakine omwa nzira mwa haali, iniakendi muthumako ab’ambasada neryo ibahiraho obuholho.
33 Kuthya, sihali n’omughuma w’okw’inywe oyuwangabya mwigha waghe amathendi lholya okwa bindu biwe byosi kw’omughongo.*
34 “Erithababwira, omunyu uwene. Aliwe omunyu amabirihwamo amaaka wagho, ni kyahi ekyangathasya subyaghomo?
35 Akabya isyangathasyabya w’omughaso omwa muthaka kutse eribya mubogha. Abandu bakaghusagho. Oyuwithe amathwe w’eriowa, owe.”
Emyatsi Ahikwa
^ Kinywe okwa kinywe, “oyukalya okwa muggati.”
^ Kutse “erimwanza okwa lhulengo lhuke kutsibu.”
^ Kutse “erisighania.”
