Engulhu Yuwene Ngoku Yahandikawa na Luka 15:1-32
15 Neryo abasolesya n’abakolha-nabi abosi mubabera eriyihindania aho ali bakamuhulikirira.
2 Abafarisayo n’abakangirirya b’emighambo abosi mubabera eriyineghenia bathi: “Omulhume oyu ak’angirira abakolha-nabi n’erirya nabo.”
3 Neryo mwababwira eky’erileberyako kino athi:
4 “Nindi okw’inywe oyuwithe esyombuli 100, enguma yamathalha, oyuthe wangasigha 99 omo mbwarara akayasondya eyathere erihika aho akendi banirayo?
5 Neryo akabya akabanayo, akahirayo okwa bithigho n’eritsema.
6 Akabya akahika eka, akabirikira abanywani biwe n’abataka biwe b’ahaghuma n’eribabwira athi, ‘Mutseme haghuma naghe kundi nabiribana embuli yaghe eyathalha.’
7 Ngababwira indi omwa nzira iyan’eyo, elhubulha yikabya etseme nene omukolha-nabi mughuma amayisubamu kwilhaba abathunganene 99 abatheyithagha eriyisubamu.
8 “Kutse ni mukali wahi oyuwithe ebinusu ikumi by’edrakima, amathalya kwa kighuma, oyuthe wangakya etara n’eribirya enyumba yiwe n’erisondya ndeke erihika aho akendi kibanira?
9 Akabya abirikibana, akabirikira abanywani,* n’abataka biwe b’ahaghuma n’eribugha athi, ‘Mutseme haghuma naghe, kundi nabiribana ekinusu ky’edrakima ekyo nathalhaya.’
10 Omwa nzira iyan’eyo, ngababwira, abamalaika ba Nyamuhanga bakatsema omukolha-nabi mughuma akayisubamu.”
11 Neryo mwabugha athi: “Omulhume aby’awithe abaghalha babiri.
12 Omulere mwabwira thatha wiwe athi, ‘Thatha, umba omughabo w’ebindu ebitholere eribya byaghe.’ Neryo mwabaghabira ebindu biwe.
13 Biro bike enyuma waho, omulere mwasorokya ebindu biwe ebyosi amaghenda omwa kihugho ky’ehaali, kandi eyo mwatsandalikania ebindu biwe omw’ibya omwa ngebe y’obutswatswa.
14 Abere abiriyighunzako obuli kindu, omwa kihugho ekyo mumwabya enzalha nene, neryo mwabya omwa buyithawa.
15 Nibya mwaghenda amayayihanga okwa mwikalhani mughuma ow’omwa kihugho ekyo, oyuwamuha omubiiri w’erilisya esyombunu siwe.
16 Neryo mwayisunza eribya akalya okwa byalya by’esyombunu, aliwe isihali n’oyuwangamuha ekindu kyosi-kyosi.
17 “Abere abuka kw’obulengekania, mwabugha athi, ‘Abangyi b’okwa bakoli ba thatha waghe banawithe ebyalya ebikaghunza, aliwe ingye nganemuholera eno n’enzalha!
18 Ngendighenda eyiri thatha n’erimubwira indi: “Thatha, nabirihalya okwa lhubulha n’okw’iwe.
19 Singakitholere eryahulhwamo mughalha wawu. Wunyiyire mwa mughuma w’okwa bakoli bawu.”’
20 Neryo mwahangana n’erighenda eyiri thatha wiwe. Abere akine haali omwa nzira, thatha wiwe mwamulhangira neryo amamukwira obulighe, kandi mwathibitha eyo ali, amamuwako n’erimulyatsirira.*
21 Neryo omughalha mwabugha nayu athi, ‘Thatha, nabirihalya okwa lhubulha n’okw’iwe. Singakitholere eryahulhwamo mughalha wawu.’
22 Aliwe thatha wiwe mwabwira abaghombe biwe athi, ‘Mwanguhe! Mulethe ekanzu, eyuwene kutsibu, mumwambalhayeyo, kandi mumwambalhaye embeta n’esyongetha.
23 Kandi mulethe ekyana ky’ende ekinenehire, mukikere, thulye thuyitsemesaye,
24 kundi mughalha waghe oyu abya iniabiriholha aliwe abirisuba; abya iniabirihera, abiribanika.’ Neryo mubatsuka eriyitsemesya.
25 “Neryo omughalha omukulhu abya iniane omw’irima, abere akasubulha, mwowa omuziki n’amahothole.
26 Neryo mwabirikira omughuma w’okwa baghombe n’erimubulya eka nga yamabyaki.
27 Mwamubwira athi, ‘Mughalha wenyu abiryasa, na thatha wawu abirikera ekyana ky’ende ekinenehire kundi mwakasa inianawithe amaghalha awuwene.’
28 Aliwe mwahithana n’erighana ery’ingiramo. Neryo thatha wiwe mwasa n’eritsuka erimulemba-lemba.
29 Mwasubirya thatha wiwe athi, ‘Lebaya! Emyaka yosi eyi nabiribya inganemukukolera kandi sindi nathaghana erikwowa, aliwe siwuli wathamba n’ekyana ky’embene aky’erirya haghuma n’abanywani baghe.
30 Aliwe mughalha wawu oyu, oyuwatsandaya ebindu byawu haghuma n’abamalaya, mwakabya akanahika muwukamukerera ekyana ky’ende ekinenehire.’
31 Neryo mwamubwira athi, ‘Mughalha waghe, wabiribya iwune naghe mughulhu wosi, n’ebindu byaghe byosi ni byawu.
32 Aliwe thulyathakolha akagheni n’eriyitsemesya, kundi mughalha wenyu oyuwabya iniabiriholha abirisuba; abya iniabirihera, abiribanika.’”
