Engulhu Yuwene Ngoku Yahandikawa na Luka 17:1-37
17 Neryo Yesu mwabwira abigha biwe athi: “Ebikathwikalhaya si byangabya bithethasa. Aliwe obulighe okwa yukabiletha!
2 Ikikendibya ky’omughaso olhuso lhulyaboherawa omwa bikya biwe neryo iniaghuswa omo ngetse omwakanya k’erithwikalya omughuma ow’okwa baana balere aba.
3 Muyitheghaye. Mulikyenyu amakolha ekibi, mukunge, kandi amayisubamo, mughanyire.
4 Nomwanga kukolera ekibi mirundi musanju okwa kiro kandi akasa eya wuli mirundi musanju athi, ‘Namayisubamo,’ wutholere iwamughanyira.”
5 Neryo abakwenda mubabwira Omukama bathi: “Wongere erikirirya lyethu.”
6 Neryo Omukama mwabugha athi: “Mwamabya n’erikirirya eryingene n’akaghuma k’eharadali, imukendi bwira omuthi w’amakerere muthi, ‘Yikule aho wuyayihere omo ngetse!’ nagho iniakendi bowa.
7 “Nindi okw’inywe oyuwangabwira omughombe wiwe akakulhuka kutse akalhua okw’irisya athi, ‘Ilhuaho wase okwa meza, wulye’?
8 Omwakanya k’ekyo, mbwino isyendi mubwira athi, ‘Nyitheghekere eky’erirya eky’erigholho, kandi wambale olhukimba lhw’erikoleramo, wunyihukulire ngalye n’erinywa erihika aho ngendi ghunzira n’enyuma waho nawu wanalya n’erinywa’?
9 Isyendi sima omughombe wiwe kundi mwakakolha ebyo atholere erikolha, kwa bithe?
10 Kuthya, mwamabirikolha ebyosi ebya muhebirwe erikolha, mubughe muthi: ‘Thuli baghombe ndambire lhwahi. Thwakolire ekya thunatholere ithwakolha.’”
11 Abere anemughenda e Yerusalemu, mwalhaba ahakathi-kathi ke Samaria ne Galilaya.
12 Neryo abere ahika omwa kyalu, abalhume ikumi abahagha mubamweya, aliwe mub’imana haali.
13 Neryo mubabirikira omwa mirenge miri bathi: “Yesu, Mukangirirya, thuwathikaye!”
14 Abere abalhangira, mwababwira athi: “Mughende muyayikangaye okwa bahereri.” Neryo babere banemughenda mubalhamibwa.
15 Omughuma w’okw’ibo, abere abirilhangira kw’amabirilhama, mwasubulha, inianemuha Nyamuhanga y’olhukengerwa omwa mulenge muuli.
16 Neryo mwawa embere sy’ebisandu bya Yesu akamusima. Eryongera okw’ekyo, abya Musamaria.
17 Yesu mwabugha athi: “Abosi ikumi mubakalhamibawa, kwa bithe? Neryo abandi mwenda bali hayi?
18 Sihali n’oyuwamasubulha erisyaha Nyamuhanga y’olhukengerwa ya n’omulhume ow’ekindi kihanda oyu?”
19 Neryo Yesu mwamubwira athi: “Hangana wuyighendere; erikirirya lyawu lyamakulhamya.”
20 Abafarisayo babere bamubulya Obwami bwa Nyamuhanga nga bukasa mughulhu wahi, mwabasubirya athi: “Obwami bwa Nyamuhanga sibwendi syasa omwa nzira eyilhangirikire;
21 kutse abandu sibendi syabugha bathi, ‘Lebaya hano!’ kutse ‘Erya!’ Kundi lebaya! Obwami bwa Nyamuhanga bune omwa kathi-kathi kenyu.”
22 Neryo mwabwira abigha athi: “Obuthuku bukendi syahika omughulhu mukendi syayisunza erilhangira ekighuma ky’okwa biro by’Omughalha w’omundu, aliwe simwendi syakilhangira.
23 Kandi abandu bakendi syababwira bathi, ‘Mulebaye erya!’ kutse, ‘Mulebaye hano!’ Isimwahulhuka kutse eribakwama.
24 Kundi ngoku akarabyo kakanapalhaya erilhua okwa lhundi lhuhandi lhw’elhubulha erihika okwa lhundi lhuhandi lhw’elhubulha, n’Omughalha w’omundu kw’akendi syabya athya okwa kiro kiwe.
25 Aliwe atholere iniatsuka eriaghalhwa kutsibu n’olhulengo lhuno ilhwamughana.
26 Kandi ngoku byanabya omwa biro bya Noa, kwabine mwendi syabya bithya omwa biro by’Omughalha w’omundu:
27 babya bakalya, babya bakanywa, abalhume babya bakaherukya, abakali babya bakaheruka erihika okwa kiro Noa ingirira omo bwathu, n’Erighunga ly’Amaghetse mulyasa lyamathoghothya abosi.
28 Kuthya ngoku byanabya omwa biro bya Loti: babya bakalya, babya bakanywa, babya bakaghulha, babya bakaghulya, babya bakahera, babya bakahimba.
29 Aliwe okwa kiro Loti alhua e Sodomo, elhubulha muyalhua embulha y’omuliro n’amabwe aw’akaka kandi mubyathoghothya abosi.
30 Kwabine mwendi syabya bithya okwa kiro ekyo omughulhu Omughalha w’omundu akendi syabisulhwa.
31 “Okwa kiro ekyo, oyuli okwa nyumba kw’endatha aliwe ebindu biwe ibine omwa nyumba isyakima erisyabyenda, kuthya n’oyuli omw’irima syatholere akasubira ebindu biwe.
32 Wibuke mukali wa Loti.
33 Oyukanza eritheya engebe yiwe akendi syaheryayo, aliwe oyukaherayayo akendi syatheyayo.
34 Ngababwira, omwa kiro omo, abandu babiri bakendi syabya ibane omwa ngyingo nguma; omughuma akendi syathwalhwa, aliwe owundi akendi syasighanibwa.
35 Hakendi syabya abakali babiri ibanemuswa okwa lhuso lhughuma; omughuma akendi syathwalhwa, aliwe owundi akendi syasighanibwa.”
36 ——
37 Neryo mubamusubirya bathi: “Hayi Mukama?” Mwabasubirya athi: “Aho ekinda kiri, h’amasamba nagho akayisorokeraya.”
