Engulhu Yuwene Ngoku Yahandikawa na Luka 18:1-43
18 Neryo Yesu mwalholha embere amababwira omukya* owahambire okwa kiyithawa ky’erisaba mughulhu wosi n’erithendi bikyako,
2 athi: “Omwa tawuni ndebe mwabya omutsweri oyuthabya ak’ubaha Nyamuhanga kandi isyali sikaya abandu.
3 Omwa tawuni eyo mwabya n’omukwakali oyuwabya akabera eryasa eyo ali n’eribugha athi, ‘Lhangira wuthi ngabana obulingirirania n’oyo thuwitheneko olhubanza.’
4 Nomwabine muhalhaba buthuku isyanzire erimukolera ekyo, aliwe enyuma waho mwayibwira athi, ‘Nomwakine indi sindyubaha Nyamuhanga kutse erisikya omundu wosi-wosi,
5 kundi omukwakali oyu akabera erinyighunza kw’obuholho, ngendilhangira indi akabana obulingirirania nuku aleke eribera eriasa eyo ngali erinyisurusuthya omwa ky’akasaba.’”
6 Neryo Omukama mwabugha athi: “Mwanamowa ebya omutsweri abugha, nomwakine indi abya isyathunganene!
7 Mbwino kwenene Nyamuhanga anemwendi syaghana erikangania abasombolhwa biwe abakamulhakira omwa musibo n’omwa kiro b’obulingirirania, oyunemubaghumisirizya?
8 Ngababwira, akendisyalhangira athi bakabana obulingirirania omwa byalhuba. Aliwe, Omughalha w’omundu akendisyabya akasa, kwenene inemwendisyeya erikirirya ng’eri okwa kihugho?”
9 Kandi mwabwira abaghuma b’okwa bakayikethera obuthunganene bwabu n’abakalhangira abandi ng’abathawithe mughaso b’omukya* ono:
10 “Abalhume babiri mubaghenda omwa hekalhu bakayasaba, owundi ini Mufarisayo n’owundi ini musolesya.
11 Omufarisayo mwahangana n’eritsuka eriyisabira emyatsi eno athi, ‘Iwe Nyamuhanga, ngakusima kundi singali ng’abandi—abanyeyi, abathathunganene, abasingiri—kutse nibya ng’omusolesya oyu.
12 Ngasiba kabiri omwa wiki; ngaha ekighuma ky’omw’ikumi okwa byosi ngabana.’
13 Aliwe omusolesya inian’imene ahalhuthambi, isyangathoka n’erilhalhamira endatha, mwabera eriyihumbanga okwa kikuba athi, ‘Iwe Nyamuhanga, nyikwire obulighe,* ingye mukolha-nabi.’
14 Ngababwira, omulhume oyo mwasuba ewiwe kandi mwakangania ku ni muthunganene kwilhaba Omufarisayo oyo. Kundi obuli mundu oyukayihamaya akendi syahemulhwa, aliwe oyukayikehaya akendi syahamibwa.”
15 Neryo abandu mubamulethera esyomekeke nuku asihambeko, aliwe abigha babere balhangira eki, mubabakunga.
16 Aliwe Yesu mwabugha athi bamulethere esyomekeke n’eribugha athi: “Muleke abaana balere base okw’ingye, simubakakiraye, kundi Obwami bwa Nyamuhanga ni bw’abali ng’abo.
17 Kwenene ngababwira, oyuthy’angirira Obwami bwa Nyamuhanga ng’omwana mulere syendi syingira mubo nahake.”
18 Neryo omughuma w’okwa bathabali mwabulya Yesu athi: “Mukangirirya mubuya, ngatholere ingakolhaki nuku ngabane engebe y’erikotha?”
19 Yesu mwamusubirya athi: “Busana naki wukanyahulhamo mubuya? Omubuya ni mughuma, Nyamuhanga.
20 Wunasi ebihano: ‘Isiwasingira, isiwitha, isiw’iba, isiwabugha amabehi, wusikaye thatha wawu na mama wawu.’”
21 Neryo mwabugha athi: “Ebyosi ebi nabiribya inganemubighenderako eritsuka bulere.”
22 Yesu abere abiriowa ekyo, mwamubwira athi, “Hakine kindu kighuma ekikubulirweko: Wughulhaye ebyosi ebyo wuwithe n’esikendi lhuako wusighabire abanakwa, neryo wukendibya n’eby’obughuli omwa lhubulha; neryo wase wunyikwame.”
23 Abere owa eki, mwakwa obulighe bunene, kundi abya mugaga kutsibu.
24 Yesu mwamusamalira n’eribugha athi: “Ka kikendi syakalira abawithe esyosente eryingira omo Bwami bwa Nyamuhanga!
25 Omo kwenene, kyolhobire engamia erilhaba omwa kuna k’enginzo eyikasona kwilhaba omugaga eryingira omo Bwami bwa Nyamuhanga.”
26 Abowa eki, mubabugha bathi: “Kwesi nindi oyuwangathoka erilhamibwa?”
27 Yesu mwabugha athi: “Emyatsi eyithethokekana oko bandu yikathokekana oku Nyamuhanga.”
28 Aliwe Petero mwabugha athi: “Lebaya! Thwabirisigha ebyethu n’erikukwama.”
29 Mwababwira athi: “Kwenene ngababwira, sihali oyuwabirisigha enyumba kutse omukali kutse baghalha babu kutse ababuthi kutse abaana busana n’Obwami bwa Nyamuhanga
30 oyuthendi syabanabyo mirundi mingyi omwa mughulhu ono, n’omwa buthuku obukasa, engebe y’erikotha.”
31 Neryo Yesu mwahengeka Erikumi n’Ababiri n’eribabwira athi: “Lebaya! Thukaghenda e Yerusalemu, kandi emyatsi yosi eyabirihandikwa erilhabira omo baminyereri eyihambire oku Mughalha w’omundu yikendi bererera.
32 Ng’eky’erileberyako, akendi hirwa omwa byalha by’abanya bihanda, iniasekereribwa, iniakolhwa nabi, n’erithwirwako amathande.
33 N’enyuma w’erimuswirya, bakendi mw’itha, aliwe okwa kiro kyakasathu inialhubuka.”
34 Nomwabine, mubathayitheghererya ekyosi-kyosi okwa myatsi eyi, kundi ebinywe ebi byabya bibisirwe okw’ibo, kandi mubathayitheghererya ebyabughawa.
35 Neryo Yesu abere akayahika hakuhi ne Yeriko, omulhume endimethime abya inian’ikere okwa nzira inianemusabirirya.
36 Kundi mwowa ekingungu ky’abandu kikalhaba, mwatsuka eribulya nga yamabyaki.
37 Mubamubwira bathi: “Yesu Omunazareti akalhaba!”
38 Neryo mwabirikira omwa mulenge munene athi: “Yesu, Mughalha wa Dawudi, ngwathikaye!”
39 N’ababya embere mubatsuka erimukunga, erimubwira bathi abye bukuthu, aliwe mwongera eribirikira athi: “Mughalha wa Dawudi, ngwathikaye!”
40 Neryo Yesu mwimana n’erihamulha athi bamulethere omulhume. Abere ahika aho ali, Yesu mwamubulya athi:
41 “Wanzire ingakukoleraki?” Mwamusubirya athi: “Mukama, libulha ameso waghe.”
42 Neryo Yesu mwamubwira athi: “Ameso wawu alibukale; erikirirya lyawu lyamakulhamya.”
43 Neryo aho n’aho ameso wiwe mwalibukalha, amatsuka erimukwama, inianemuha Nyamuhanga y’olhukengerwa. N’abandu babere balhangira eki, abosi mubapipa Nyamuhanga.
Emyatsi Ahikwa
^ Kutse “eky’erileberyako.”
^ Kutse “eky’erileberyako.”
^ kutse “nyikanganaye olhukogho.”
