Engulhu Yuwene Ngoku Yahandikawa na Luka 19:1-48
19 Neryo mw’ingira omwa Yeriko n’erikyurukania.
2 Yabya omulhume oyukahulhawamo Zakayo; abya mukulhu w’abasolesya, kandi abya mugaga.
3 Neryo abya inianemulengaho erilhangira Yesu oyu nga nindi, aliwe isyangamulhangira busana n’obungyi bw’abandu, kundi abya mukuhi.
4 Neryo mwathibitha amayasambira omwa muthi w’omukuyu nuku amulhangire, kundi Yesu abya iniakayalhaba omwa nzira eyo.
5 Neryo Yesu abere ahikaho, mwasamalira mugho n’eribugha athi: “Zakayo, lhuba, kima, kundi munabwire ngatholere ingabya omwa nyumba yawu.”
6 Neryo mwakima lhuba-lhuba kandi inianatsemire kutsibu mwamw’angirira ng’omugheni wiwe.
7 Babere balhangira eki, abosi mubayineghenia bathi: “Amayabya mugheni omwa nyumba y’omulhume omukolha-nabi.”
8 Aliwe Zakayo mwahangana n’eribugha n’Omukama athi: “Mukama, Lebaya! Embindi y’ebindu byaghe ngayaha y’abanakwa, n’oyo nabirinyegha kw’ekindu kyosi-kyosi ngendi musubuliryakyo mirundi ini.”
9 Busana n’eki, Yesu mwamubwira athi: “Munabwire omulhamu abiryasa omwa nyumba eno, kundi nayu ni mughalha wa Abrahamu.
10 Kundi Omughalha w’omundu asa erisondya n’erilhamya ababirihera.”
11 Babere banemuhulikirira emyatsi eyi, mwababwira owundi mukya,* kundi abya hakuhi ne Yerusalemu kandi mubalengekania bathi Obwami bwa Nyamuhanga bukayasa aho n’aho.
12 Neryo mwabugha athi: “Omukulhu mughuma w’omo bwami mwaghenda omwa kihugho ky’ehaali eriyasingibwa ng’omwami n’erisubulha.
13 Mwabirikira erikumi ly’okwa baghombe biwe n’eribaha esyomina* ikumi n’eribabwira athi, ‘Muyasisuburemo erihika aho ngendisyasira.’
14 Aliwe abikalhani biwe mubamupona n’erimuthumako abakwenda eriyamubwira bathi, ‘Sithwanzire omulhume oyu akabya mwami wethu.’
15 “Erighunzerera abere alhua okw’isinga ng’omwami, mwabirikira abaghombe biwe abo abya iniabiriha esyosente,* nuku aminye amaghoba agho babiribana omwa syosuburu syabo.
16 Neryo ow’erimbere mwasa n’eribugha athi, ‘Mukama, emina yawu muyaghoba esyomina ikumi.’
17 Mwamubwira athi, ‘Wasingya kutsibu, mughombe mubuya! Kundi omo mwatsi muke kutsibu wabirikangania ku wuli muthaleghulha, wuthabale okwa syotawuni ikumi.’
18 Neryo owakabiri mwasa n’eribugha athi, ‘Mukama, emina yawu muyaghoba esyomina ithano.’
19 Oyu nayu Omukama mwamubwira athi, ‘Nawu wuthabale okwa syotawuni ithano.’
20 Aliwe owundi mwasa n’eribugha athi, ‘Mukama, emina yawu y’eno eyo nabisa omwa lhukimba.
21 Wunasi, munakusagha, kundi wuli mulhume oyutsurumire; wukimaya n’ebya wuthahira omwa bbanka kandi wukahulhulha n’ebya wuthahera.’
22 Mwamubwira athi, ‘Ngakutswera busana n’ebinywe byawu, mughombe mubi. Muwaminya ngoku ngali mulhume oyutsurumire oyukimaya n’eby’athahira omwa bbanka n’erihulhulha eby’athahera, kwa bithe?
23 Neryo busana naki muwuthahira esyosente* syaghe sy’omwa bbanka? Neryo nangabere ingasa ingasihamo n’amaghoba.’
24 “Neryo mwabwira ab’imene aho athi, ‘Mumwiheko emina, muheyo oyuwithe esyomina ikumi.’
25 Aliwe mubamubwira bathi, ‘Mukama, k’anawithe esyomina ikumi!’—
26 ‘Ngababwira, obuli mundu oyuwithe, akendi syongerwa bingyi, aliwe oyuthawithe, nibya n’eby’awithe akendisyalhusibwa byoko.
27 Neryo mulethe esyonzighu syaghe sya hano abathabya banzire ngabya mwami wabo, mub’ithire embere syaghe.’”
28 Abere abiribugha emyatsi eyi, mwalholha embere, amahethukira e Yerusalemu.
29 Abere ahika hakuhi ne Betefage ne Betania okwa kithwe ekikahulhawamo Ekithwe ky’Emizeituni, mwathuma ababiri b’okwa bigha biwe,
30 n’eribabwira athi: “Mughende omwa kyalu ekya mulhangire, mukendibya mukahikayo, mukendyeyayo ekyana ky’epunda ekithe kyathikalhako mundu ikinahangire. Mukihangule mukilethe hano.
31 Aliwe omundu wosi-wosi amababulya athi, ‘Mukakihanguliraki?’ imwamubwira muthi, ‘Omukama akakiyithagha.’”
32 Neryo abathumawa mubaghenda bamakyeya ngoku analyababwira.
33 Aliwe babere banemuhangulha ekyana ky’epunda, binyekyo mubababulya bathi: “Busana naki mukahangulha ekyana ky’epunda?”
34 Mubabugha bathi: “Omukama akakiyithagha.”
35 Neryo mubakithwalha eyiri Yesu, bamakihirako esyongyimba syabo n’erikalya Yesu y’okw’ikyo.
36 Abere anemughenda, babya ibanemusanza esyongyimba syabo sy’omwa nzira.
37 Abere akanahika hakuhi n’enzira eyikandaghalha okwa kithwe ky’Emizeituni, ekikumulha kyosi ky’abigha mubatsuka eritsema n’eripipa Nyamuhanga omwa mulenge munene busana n’eby’amaaka ebyosi ebyo babya ibabirilhangira,
38 bathi: “Ali n’omughisa oyukasa ng’Omwami omwa lina lya Yehova! Obuholho omwa lhubulha, n’olhukengerwa endatha kutsibu!”
39 Aliwe abaghuma b’okwa Bafarisayo ibane omwa kingungu ky’abandu, mubabugha nayu bathi: “Mukangirirya, kunga abigha bawu.”
40 Aliwe mwabasubirya athi: “Ngababwira, aba bamayihunira, amabwe iniakendi bugha omwa mulenge muuli.”
41 Neryo abere ahika hakuhi, mwalhangira etawuni, amalira busana nayu,
42 athi: “Iwe, nibya iwe, okwa kiro kino wulyaminya emyatsi eyikaletha obuholho—aliwe lino yabiribiswa okwa meso wawu.
43 Kundi ebiro bikendi syahika omughulhu esyonzighu syawu sikendi syakuthimbyako olhughuthu lhw’emithi eyisongire kandi isyakuthimbako n’erikubambira* okwa buli lhuhandi.
44 Bakendi syakughusa okwa kithaka iwe n’abaana bawu, kandi sibendi syasigha eribwe endatha okwa lindi omw’iwe, kundi muwuthaminya omughulhu w’eritswerwa lyawu.”
45 Neryo Yesu mwingira omwa hekalhu n’eritsuka erithibitha okwa babya bakaghuliryamo,
46 n’eribabwira athi: “Kihandikire kithi, ‘Enyumba yaghe yikendi syabya nyumba y’erisabiramu,’ aliwe inywe mwabirikolhayo mo mwangalhu w’abibi.”
47 Mwalholha embere erikangirirya omwa hekalhu obuli kiro. Aliwe abahereri bakulhu, abakangirirya b’emighambo, n’abakulhu b’abandu babya bakanza erimw’itha;
48 aliwe mubathabana enzira yosi-yosi y’erikoleramo eki, kundi obuli mundu n’abosi ibakabera erimukwama bakanza erimuhulikirira.
Emyatsi Ahikwa
^ Kutse “eky’erileberyako.”
^ Omwa Lhugiriki emina ini syogramu 340 kandi iyingene n’esyodrakima 100.
^ Kinywe okwa kinywe, “efeza.”
^ Kinywe okwa kinywe, “efeza yaghe.”
^ Kutse “erikunubya.”
