Engulhu Yuwene Ngoku Yahandikawa na Luka 2:1-52
2 Omwa biro ebyo, Kaisaria Augusto mwathumira abandu bosi ab’omwa kihugho ekyo b’ekihamulho athi bayahandikawe.
2 (Erihandikwa ly’erimbere eri lyabya omughulhu Kurenio abya gavana we Suria.)
3 N’abandu bosi mubayahandikwa, obuli mundu omwa tawuni yabo.
4 Yozefu nayu mwalhua e Galilaya omwa tawuni ye Nazareti, amaya e Yudea omwa tawuni ya Dawudi, eyikahulhawamo Betelehemu, kundi abya w’okwa b’omwa nyumba n’ow’okw’ihiika lya Dawudi.
5 Mwaghenda amayahandikwa na Maria, oyo abya iniabiriherukya ngoku ayilhagha kandi oyuwabya iniakisiya iniabutha.
6 Babere bane eyo, endambi yiwe y’eributha muyahika.
7 Neryo mwabutha omughalha wiwe, akambere, kandi mwamulingirako esyongyimba n’erimuhira omw’ithuba, kundi emyanya y’erikesyamo yabya iyabiribahwerako.
8 Kandi omwa kitsweka ekyo mwabya imune abalisya ibane eyihya bakatheya ebihangulho byabo omwa kiro.
9 Kitsumbukirania omumalaika wa Yehova mwimana embere syabo, n’olhukengerwa lhwa Yehova mulhwabakolerya neryo mububaha kutsibu.
10 Aliwe omumalaika mwababwira athi: “Simubahe, kundi lebaya! ngababwira engulhu yuwene ey’obutseme bunene eyo abandu abosi bakendi bana.
11 Kundi munabwire omwa tawuni ya Dawudi babiribabuthirayo omulhamya, nayu ni Kristo Omukama.
12 Kandi ngabaha ekiminyikalho kino: Mukendyeya olhumekeke ilhunalingirweko esyongyimba kandi ilhune omw’ithuba.”
13 Neryo kitsumbukirania mubalhangira omumalaika oyu iniane n’abangyi b’okwa mahe w’elhubulha, ibanemupipa Nyamuhanga n’eribugha bathi:
14 “Olhukengerwa oku Nyamuhanga ow’endatha kutsibu, n’obuholho okwa kihugho okwa bandu abo akatsemera.”
15 Neryo abamalaika babere babirisuba elhubulha, abalisya mubatsuka eribwirana bathi: “Thulhangire thuthi thukaghenda e Betelehemu, thwanayalebya ekyabere, ekya Yehova amabirithuminyisya.”
16 Neryo mubalhuaho ibaghenda, bameya Maria kuthya na Yozefu, n’olhumekeke ilhune omw’ithuba.
17 Babere balhangira eki, mubathulhughania omwatsi ogho balyabwirawa owahambire oko mwana oyu.
18 N’abosi abowagho mubasweka busana n’ebya balisya bababwira,
19 aliwe Maria mwatsuka eribika emyatsi yosi eyi omwa muthima wiwe, n’erighanirya kuyo.
20 Neryo abalisya mubasubayo, ibanemuha Nyamuhanga y’olhukengerwa n’erimupipa busana n’ebyosi ebyo bowa n’erilhangira, ngoku banabya ibabiribwirwa.
21 Okwa kiro ky’omunani, omughulhu w’erimubania iniamahika, mwahulhwamo Yesu, erina erya omumalaika amulhuka Maria isyali abya mukule.
22 Kandi endambi yabo y’ery’eribwa erikwamana n’Emighambo ya Musa yabere yahika, mubaletha Yesu ye Yerusalemu erimuhayo oku Yehova,
23 ngoku kihandikire omwa Mighambo ya Yehova: “Obuli kambere katholere ikabya kabuyirire embere sya Yehova.”
24 Neryo mubahayo obuhere erikwamana n’ebya Emighambo ya Yehova yikabugha: “esyondungulha ibiri kutse ebyana bibiri by’ehipizo.”
25 Neryo lebaya! e Yerusalemu yabya omulhume oyukahulhawamo Simioni, omulhume oyo abya muthunganene kandi iniayihereyo oku Nyamuhanga, abya inianalindirire erihumulikanibwa ly’Abaisraeli, kandi abyako omulimu abuyirire.
26 Eryongera okw’ekyo, Nyamuhanga abya iniabirimubisulira erilhabira omwa mulimu abuyirire ngoku syendi syaholha athali alhangira Kristo wa Yehova.
27 Omw’isondolibwa n’omulimu, mwasa omwa hekalhu, n’ababuthi babere balethamo omwana Yesu nuku akolhaweko erikwamana n’emirwa y’Emighambo,
28 mwimya omwana n’eripipa Nyamuhanga athi:
29 “Omukama Omuthabali w’Ebyosi, wamalighira omughombe wawu eriholha buholho busana n’ebya wabugha,
30 kundi ameso waghe amabirilhangira enzira yawu y’eriletheramo omulhamu
31 eyo wabiritheghekania embere sy’abandu abosi,
32 ekyakakalha ekikalhusaya ekitambara okwa meso w’ab’ebihanda kandi olhukengerwa okwa bandu bawu Israeli.”
33 Neryo thatha na mama w’omwana mubalholha embere erisweka busana n’emyatsi eyikamubughawako.
34 Kandi Simioni mwabatsumulha n’eribwira Maria, mama w’omwana athi: “Lebaya! Omwana oyu abirisombolhwa busana n’eriwa n’erithasyahangana ly’abangyi omwa Israeli kandi ng’ekiminyikalho ekikendi syakanibwako nabi
35 (kwenene, wasyalhabibwamo omuyali muuli), nuku amalengekania w’abangyi angabisulhwa.”
36 Neryo habya omuminyereri w’obukali ya Ana, mwali wa Fanueli, ow’ekihanda kya Aseri. Omukali oyu abya iniabirikulha omo myaka kandi iyo na mwira wiwe mubaghunza omwa butheke mw’emyaka musanju,
37 kandi abya mukwakali ow’emyaka 84. Kandi isyali bulha okwa hekalhu, akakolha omubiiri owabuyirire omwa musibo n’omwa kiro, iniakasiba n’erisaba omw’ilemba-lemba.
38 Okwa saha iyan’eyo mwasa hakuhi n’eritsuka eriha ewasingya oku Nyamuhanga n’eribwira abosi ababya bakalindirira omulhamu we Yerusalemu b’ebihambire okwa mwana.
39 Neryo babere babirikolha ebyosi erikwamana n’Emighambo ya Yehova, mubasuba e Galilaya omwa tawuni y’ewabo, e Nazareti.
40 N’omwana mwalholha embere erikulha n’eribya n’amaaka, musulha n’amenge, kandi Nyamuhanga mwalholha embere erimusima.
41 Neryo obuli mwaka ababuthi biwe ibabeghere erighenda e Yerusalemu okwa mukonga w’ekiro ky’Erikyuruka.
42 N’omughulhu abya w’emyaka 12, mubaghenda erikwamana n’emirwa y’omukonga.
43 Ebiro by’omukonga byabere byahwa mubasuba eka, n’omulhwana Yesu mwasighalha e Yerusalemu, aliwe ababuthi biwe mubathaminya.
44 Kundi mubalengekania bathi ane n’abandi abali omwa lhughendo, kyaleka ibatsuka erimusondya omwa bahughu n’omwa bandi bandu ibamabirighenda olhughendo lhw’ekiro kighuma.
45 Babere babirimubulha, mubasuba e Yerusalemu n’eriyamusondya kutsibu.
46 Neryo enyuma w’ebiro bisathu, mubamweya omwa hekalhu, inian’ikere omwa kathi-kathi k’abakangirirya, inianemubahulikirira n’eribabulya ebibulyo.
47 N’abosi ababya bamuhulikirire mubabera erisweka busana n’eriyitheghererya liwe n’erisubirya liwe.
48 Neryo ababuthi biwe babere bakamulhangira mubasweka, na mama wiwe mwabugha nayu athi: “Mwana waghe, busana naki iwathukolha wuthya? Ingye na thatha wawu thwabirinuba thukakusondya.”
49 Mwababwira athi: “Mulhue mukanyisonderyaki? Simulhue mwasi ngoku ngatholere ingabya ingali omwa nyumba ya Thatha waghe?”
50 Aliwe, mubathayitheghererya ebyo akababwira.
51 Neryo mwandaghalha nabo, bamasuba e Nazareti, kandi mwalholha embere eribaghondera.* Kandi mama wiwe mwabika ndeke emyatsi yosi eyi omwa muthima wiwe.
52 Neryo Yesu mwalholha embere erikulha omwa menge n’okwa mubiri n’erisimwa na Nyamuhanga n’abandu.
Emyatsi Ahikwa
^ Kutse “erisighalha iniane mwowa.”
