Engulhu Yuwene Ngoku Yahandikawa na Luka 20:1-47
20 Kiro kighuma, Yesu inianemukangirirya abandu omwa hekalhu n’erithulhughania engulhu yuwene, abahereri bakulhu, abakangirirya b’emighambo, haghuma n’abakulhu mubasa
2 n’erimubulya bathi: “Thubwire, wukakolha emyatsi eyi omwa buthoki bwandi? Kutse nindi oyuwakuha obuthoki obu?”
3 Mwabasubirya athi: “Naghe ngendi babulya, nenyu mumbwire:
4 Olhubatizo lhwa Yohana, lhwalhua omwa lhubulha kutse okwa bandu?”
5 Neryo mubaghanirya omwa mithima yabo bathi: “Thwamabugha thuthi, ‘Lhwalhua omwa lhubulha,’ iniakendi thubulya athi, ‘Busana naki mumuthamw’ikirirya?’
6 Aliwe thwamabugha thuthi, ‘Lhwalhua okwa bandu,’ abandu abosi ibakendi thw’itha omwa mabwe, kundi banasi ndeke ngoku Yohana abya muminyereri.”
7 Neryo mubasubirya bathi sibasi nga lhwalhua hayi.
8 Yesu mwababwira athi: “Naghe sinendi babwira nga ngakolha emyatsi eyi omwa buthoki bwandi.”
9 Neryo mwatsuka eribwira abandu b’omukya* ono: “Omulhume mwahera emizabibu y’omw’irima neryo amalisighira abalimi, amaghenda omwa kindi kihugho habw’obuthuku bulebe.
10 Yabere y’era, mwathuma omughombe eyiri abalimi nuku bamuhe kuyo. Aliwe abalimi mubamuswirya n’erimusubyayo byalha bisa.
11 Kandi mwabathumako owundi mughombe. Nayu mubamuswirya n’erimuhemulikania n’erimusubyayo byalha bisa.
12 Aliwe kandi mwathuma owakasathu; nayu mubamuhuthangalya n’erimughusa eyihya w’eririma.
13 Busana n’ekyo, omwinye eririma mwabugha athi, ‘Ngakoleki? Ngendi thumayo mughalha waghe, omwanzwa. Obundi oyu bakendimusikya.’
14 Abalimi babere bamulhangira, mubayibughako bathi, ‘Oyu y’omuli w’omwandu. Muyire thumwithe nuku omwandu angabya wethu.’
15 Neryo mubamughusa eyihya w’eririma n’erimwitha. Neryo, omwinye eririma ly’emizabibu akendisyabakoleraki?
16 Akendi syasa in’itha abalimi aba, n’erihererya eririma ly’abandi.”
Babere b’owa eki, mubabugha bathi: “Ekyo isikyabya!”
17 Aliwe mwabathungerera n’eribugha athi: “Neryo ekihandikire kino kikamanyisayaki: ‘Eribwe eryo abahimbi baghana ly’eryabiribya libwe likulhu okwa sonda’?*
18 Obuli mundu oyukawa okw’ibwe eryo akendi syathulhangika. N’oyo eribwe eri likawako, likendi syamuhinolera.”
19 Neryo abakangirirya b’emighambo n’abahereri bakulhu mubanza erimuhamba okwa saha eyo, kundi mubaminya ngoku n’ibo akakanayako omwa mukya* oyu, aliwe mubasagha abandu.
20 Babere babirimuyitheghererya ndeke, mubamuthumako abalhume abo babya ibabiripangisya bubiso-biso eriyayikangania nga ni bathunganene nuku bamuhambe omwa by’akabugha, neryo banamuthwalha embere sy’egavumente na gavana.
21 Neryo mubamubulya bathi: “Mukangirirya, thunasi ku wukabugha n’erikangirirya ebihikire kandi siwuwithe kasolholho, aliwe ebya wukakangiriraya oku Nyamuhanga ni kwenene:
22 Mbwino kinahikire ithwe eriliha Kaisari y’omusolho kutse sikihikire?”
23 Aliwe mwaminya amenge wabo, amababwira athi:
24 “Munyikanganaye edinari. Ekisasani n’ebihandikireko ni byandi?” Mubamusubirya bathi: “Ni bya Kaisari.”
25 Mwababwira athi: “Neryo mulhangire muthi, mukaliha Kaisari ebindu bya Kaisari, na Nyamuhanga ebindu bya Nyamuhanga.”
26 Neryo mubathathoka erimuthegha omwa by’akabugha embere sy’abandu, aliwe kundi ebyo asubiraya mubyabaswekya, mubabya bukuthu.
27 Neryo abaghuma b’okwa Basadukayo, abakabugha bathi sihali erilhubuka, mubasa n’erimubulya bathi:
28 “Mukangirirya, Musa mwathuhandikira athi, ‘Mughalha wobu mundu amaholha, akasigha mukali wiwe, aliwe isyalyabutha omwana, mughalha wabo atholere iniamusighalya neryo iniabuthira mughalha wabu y’abaana.’
29 Neryo habya abalhume musanju abasubeneko. Ow’erimbere mwathahya, aliwe mwaholha isyalyabutha abaana.
30 Neryo owakabiri
31 n’owakasathu mubamusighalya. Kuthya n’abosi musanju; mubaholha isibathamubuthako.
32 Erighunzerera, n’omukali mwaholha.
33 Neryo okw’ilhubuka, akendi syabya mukali wandi? Kundi mwabya mukali w’abosi musanju.”
34 Yesu mwabasubirya athi: “Abaana b’omughulhu ono bakaherukaya n’eriheruka,
35 aliwe ababirighanzwa ng’abakendi syabya omwa mughulhu oyo n’abakalhubukibawa okwa baholi sibali herukaya kutse eriheruka.
36 Erithwalira haghuma, sibangathasya holha kundi bali ng’abamalaika, kandi ni baana ba Nyamuhanga omw’ibya baana b’erilhubuka.
37 Aliwe bikahika okw’ilhubukibwa ly’abaholi, nibya na Musa mwakikangania omo mwatsi owahambire okwa kisaka ky’amahwa, akahulha Yehova ‘Nyamuhanga wa Abrahamu, Nyamuhanga wa Isaka, na Nyamuhanga wa Yakobo.’
38 Iyo si Nyamuhanga w’abaholi aliwe ni Nyamuhanga w’abaliho, kundi okw’iyo abosi baneho.”
39 Abaghuma b’okwa bakangirirya b’emighambo mubabugha bathi: “Mukangirirya, wamabugha ndeke.”
40 Kundi babya isibakiwithe obuthubaha bw’erimubulya n’ekibulyo n’ekighuma.
41 Nayu mwababulya athi: “Busana naki bakabugha bathi Kristo ni mughalha wa Dawudi?
42 Kundi Dawudi iyuwene-wene akabugha omwa kitabu ky’esyonyimbo athi, ‘Yehova mwabugha n’Omukama waghe athi: “Ikalha okwa lhuhandi lhwaghe lhw’amali
43 erihika aho nasyahirira esyonzighu syawu mwa kithumbi ky’ebisando byawu.”’
44 Busana n’ekyo, Dawudi akamwahulha mwa Mukama; neryo angabya athi mughalha wiwe?”
45 Neryo abandu abosi babere banemuhulikirira, mwabwira abigha biwe athi:
46 “Muyitheghaye okwa bakangirirya b’emighambo abanzire erilendera ibanambere esyokanzu kandi abanzire eriramukibwa omwa hithali n’ebithumbi by’embere-mbere* omwa syosinagogi n’emyanya y’ebitsumbi okw’irya ly’erigholho,
47 kandi abakanyegha amanyumba* w’abakwakali n’erisaba emisabe miri-miri bakanza eriyikangania. Aba bakendi syatswerwa kutsibu.”
Emyatsi Ahikwa
^ Kutse “eky’erileberyako.”
^ Kinywe okwa kinywe, “omuthwe w’esonda.”
^ Kutse “eky’erileberyako.”
^ Kutse “ebyuwene kutsibu.”
^ Kutse “ebindu.”
