Engulhu Yuwene Ngoku Yahandikawa na Luka 21:1-38
21 Neryo Yesu abere asamalira, mwalhangira abandu ibanemuthogherya ebihembo byabo omwa hisanduku ehy’erithogheryamo.
2 Neryo mwalhangira omukwakali oyuli omwa buyithawa akathogheryamo ehinusu hibiri ehy’obughuli buke kutsibu,*
3 neryo mwabugha athi: “Kwenene ngababwira, omukwakali omunakwa oyu amathogheryamo bingyi kwilhaba abosi abalyathogherayamo.
4 Kundi abosi aba balyahiramo ebihembo habw’eribya ibawithe bingyi, aliwe iyo n’omwa bunakwa bwiwe, mwakahiramo ebyosi eby’awithe omwa ngebe yiwe.”
5 Enyuma waho, abandi babere banemukania okwa hekalhu ngoku yabya yihimbirwe omwa mabwe awuwene n’omwa bindu ebihebirweyo,
6 mwabugha athi: “Emyatsi eyamukalhangira eyi, ebiro bikendi syahika omughulhu hakendi syabya isihali eribwe erikendi syasighalha endatha oko lindi lithethahimbulhwa.”
7 Neryo mubamubulya bathi: “Mukangirirya, emyatsi eyi kwenene yikendisyabya mughulhu wahi, kandi ni kyahi ekikendi syabya kiminyikalho emyatsi eyi yikayabya?”
8 Mwabugha athi: “Muyitheghaye nuku simuthebibawe, kundi abangyi basyasa omwa lina lyaghe, bathi, ‘Ningye iyo,’ kandi ‘Endambi eyirindirirwe yiri hakuhi.’ Isimwabakwama.
9 Eryongera okw’ekyo, omughulhu muk’owa okwa syonyuhi n’ebikaghunzaho obuholho,* simubahe. Kundi emyatsi eyi yitholere iyatsuka eribya, aliwe enduli siyendihika aho n’aho.”
10 Neryo mwababwira athi: “Ekihugho kikendi syalhwa n’ekindi kihugho, n’obwami bukendisyalhwa n’obundi bwami.
11 Hasyabya emisiki minene-minene, erikeherera ly’ebyalya n’amalhwere ehandi n’ehandi; kandi hakendi syabya ebikubahisaya n’ebiminyikalho binene-binene erilhua elhubulha.
12 “Aliwe emyatsi yosi eyi yithe yabya, abandu bakendi syabahamba n’eribendererya, eribathwalha omwa syosinagogi n’omwa syongomo. Mukendi syalethwa embere sy’abami n’abathabali busana n’erina lyaghe.
13 Eki kikendi syaleka imwaha obwema.
14 Neryo, muthwemu omwa mithima yenyu erithendi sangwa mwayibegheresya ebyo mwanga bugha mukayilhwirako,
15 kundi ngendi syabaha ebinywe n’amenge agho abahakani benyu bosi bathendi syaghania kutse erikakalhukanako.
16 Nibya n’ababuthi benyu, baghalha benyu, abahughu, n’abanywani, bakendi syabahambisya* kandi bakendi sy’itha abaghuma bw’okw’inywe,
17 n’abandu bosi bakendi syabapona busana n’erina lyaghe.
18 Aliwe sihali n’olhuywiri n’olhughuma lhw’okwa mithwe yenyu olhukendi syahera.
19 Omw’iyiyinia lyenyu mukendi syalhamya esyongebe syenyu.
20 “Aliwe mukendi syabya mukaminya ngoku esyokampu sy’amahe syabirithimba okwa Yerusalemu, neryo imwaminya ngoku erithoghothibwa lyayu lyabirihika hakuhi.
21 Neryo abali e Yudea batsuke erithibitha okwa bithwe, abalimo bahulhukemo, n’abali omwa byalu isibasamo,
22 kundi bino ni biro by’eribaniramo obulingirirania* nuku ebyosi ebihandikire byanga bererera.
23 Obulighe okwa bakendi syabya ini bakule n’abakongaya omwa biro ebyo! Kundi hakendi syabya eriaghalhwa linene okwa kihugho n’erihithana lya Nyamuhanga likendi syabya okwa bandu aba.
24 Kandi bakendi syawa omwa muyali ibathwalhwa ng’abanyewa omwa bihugho byosi; kandi ebihanda bikendi syalyathangirira e Yerusalemu erihika aho emighulhu y’ebihanda eyahirawaho yikendi syabererera.
25 “Kandi hakendi syabya ebiminyikalho okwa lyuba, okwezi, n’esyongununu, n’ebihanda by’ekihugho bikendi syabya omwa bulighe isibyasi nga byangalhama bithi busana n’eriruruma ly’engetse n’erisuka-sukana lyayo.
26 Abandu bakendi syalembera busana n’obuba n’ebya balindirire bathi bikayabya okwa kihugho, kundi eby’amaaka eby’elhubulha bikendi syasuka-sukanibwa.
27 Neryo bakendi syalhangira Omughalha w’omundu akasira omwa kithu iniawithe obuthoki n’olhukengerwa lhunene.
28 Aliwe emyatsi eyi yikendi syabya yikatsuka eribya, muhangane muyisingike kandi musumbe emithwe yenyu, kundi omulhamu wenyu ali hakuhi.”
29 Neryo mwabaha eky’erileberyako athi: “Mulebaye omuthi w’omuthini n’eyindi mithi yosi.
30 Yikabya yikasasa, mukayilhangiriragho kandi mukaminya ngoku obuthuku bw’omwisi buli hakuhi.
31 Kuthya nenyu, omughulhu mukalhangira emyatsi eyi yikabya, muminye ngoku Obwami bwa Nyamuhanga buli hakuhi.
32 Kwenene ngababwira, olhulengo olhu silhwendi syahwaho emyatsi yosi eyi yitheyabya.
33 Olhubulha n’ekihugho bikendi syahwaho, aliwe ebinywe byaghe sibyendi syahwaho n’ahake.
34 “Aliwe muyitheghaye nuku emithima yenyu siyirithoherawe busana n’erirya binene, erinywa bunene, n’amaghaniryo w’engebe, neryo ekiro ekyo kikabahikako isimuyitsulirye
35 ng’ekithegho. Kundi kikendi syahika okwa bosi ab’ikere omwa kihugho kyosi.
36 Neryo mulhole embere eribya imunalholire, kandi mughulhu wosi musabe omw’ilemba-lemba nuku musyathoka eribalha okwa myatsi yosi eyi eyitholere iyabya n’erisyathoka erimana embere sy’Omughalha w’omundu.”
37 Neryo omwa musibo iniakakangiriraya omwa hekalhu, aliwe omwa kiro iniakayakesaya okwa kithwe ekikahulhawamo Ekithwe ky’Emizeituni.
38 Neryo abandu bosi ibakasa eyo ali omwa ngyakya-ngyakya omwa hekalhu bakasa muhulikirira.
Emyatsi Ahikwa
^ Kinywe okwa kinywe, “esyolapta ibiri.”
^ Kutse “eriyisamambulha.”
^ Kutse “eribaghoberya.”
^ Kutse “ebiro by’erithuhulya.”
