Engulhu Yuwene Ngoku Yahandikawa na Luka 22:1-71
-
Abahereri bakaya embitha y’eritha Yesu (1-6)
-
Eritheghekera Erikyuruka ly’erighunzerera (7-13)
-
Eritsukisya Ekihulho ky’Omukama eky’Erigholho (14-20)
-
‘Oyukendi nyighoberya ane naghe okwa meza’ (21-23)
-
Erikakalhukana erikalire busana n’obukulhu (24-27)
-
Endaghane ya Yesu ey’obwami (28-30)
-
Eriyighana lya Petero likalhaghulhawa (31-34)
-
Ekiyithawa ky’eriyithegheka; emiyali ibiri (35-38)
-
Omusabe wa Yesu okwa Kithwe ky’Emizaituni (39-46)
-
Yesu akahambawa (47-53)
-
Petero akayighana Yesu (54-62)
-
Yesu akasekereribawa (63-65)
-
Erithondesibwa embere sy’Eribuyiro (66-71)
22 Neryo Omukonga ow’Omuggati Owathemo Kihamya owakahulhawamo Erikyuruka abya iniakayabya.
2 Neryo abahereri bakulhu n’abakangirirya b’emighambo babya ibanemusondya enzira eyuwene ey’erimw’ithiramo, kundi babya bakasagha abandu.
3 Neryo Sitani mwingira omu Yuda, oyukahulhawamo Iskariota, oyuwabya mughuma w’okw’Ikumi n’Ababiri,
4 neryo mwaghenda amayakania n’abahereri bakulhu n’abakulhu b’abatheya b’ehekalhu ngoku akendi mughoberya nuku bamuhambe.
5 Eki mukyabatsemesya kandi mubaligha erimuha esyosente sy’efeza.
6 Neryo mwaligha, amatsuka erisondekania akaghisa akuwene ak’erimughoberyamo ahathe abandu bangyi.
7 Ekiro ky’erimbere eky’Omuggati Owathemo Kihamya mukyahika, eky’erihereramo obuhere bw’Erikyuruka;
8 neryo Yesu mwathuma Petero na Yohana athi: “Mughende muyathutheghekere aho thukendilira Erikyuruka.”
9 Mubamubwira bathi: “Wanzire ithwalitheghekera hayi?”
10 Mwababwira athi: “Lebaya! Mukendibya mukingira omwa tawuni, mukendyeya omulhume oyuhekire erilegha ly’amaghetse. Mumukwame omwa nyumba eyo akendyingiramo.
11 Kandi mubwire omukama w’enyumba muthi, ‘Omukangirirya akabugha nawu athi: “Ekisenge ky’abagheni kiri hayi aho nangalira Erikyuruka haghuma n’abigha baghe?”’
12 Omulhume oyo akendi bakangya ekisenge kinene eky’endatha ekitheghekirwe kandi ikine mw’ebyosi. Aho hamulitheghekere.”
13 Neryo mubaghenda bameya ibine ngoku analyababwira, neryo bamathegheka Erikyuruka.
14 Neryo esaha yabere yahika, mwikalha okwa meza haghuma n’abakwenda biwe.
15 Neryo mwababwira athi: “Ngalhue ingayisunza kutsibu erirya Erikyuruka eri haghuma nenyu ngathe ngaghalhwa;
16 kundi ngababwira, sinendi sasyalyalyo erihika aho likendi syabererera omo Bwami bwa Nyamuhanga.”
17 Neryo mw’angirira ekikopo, amaha ewasingya n’eribugha athi: “Mwimaye ekikopo eki kandi mulhabiranayekyo,
18 kundi ngababwira, eritsuka lino, sinendi sasyanywa okwa vini y’emizabibu erihika aho Obwami bwa Nyamuhanga bukendi syasira.”
19 Mwimya n’omuggati, amaha ewasingya, amatsutsangagho n’eribahagho athi: “Oyu akimanira omubiri waghe, owakendihebwayo busana nenyu. Mubye mukakolha muthya erinyibuka.”
20 Mwakolha athya n’okwa kikopo enyuma w’erirya ekihulho ky’erigholho, athi: “Ekikopo eki kikimanira endaghane nyihya-nyihya erisighikira okwa musasi waghe, owakendyuthika busana nenyu.
21 “Aliwe lebaya! ebyalha by’oyukendi nyighoberya bine naghe okwa meza.
22 Kundi kwenene, Omughalha w’omundu akayaghenda omwa nzira yiwe ngoku kyanabiribuwa; nomwabine, obulighe oko mulhume oyukendi mughoberya!”
23 Neryo mubatsuka eriyibulya kwenene nga nindi omw’ibo oyukayakolha eki.
24 Neryo muhabya erikakalhukana linene omwakathi-kathi kabo omukulhu omw’ibo nga nindi.
25 Aliwe mwababwira athi: “Abami b’ebihanda bakabithabalhako, n’ababawitheko ehamuli bakahulhawamo Abakaha Obuwathikya.
26 Nomwabine, inywe simutholere mukabya muthya. Aliwe omukulhu kutsibu omw’inywe, atholere iniabya ng’omulere kutsibu, n’oyukasondolha atholere iniabya ng’oyukabakolera.
27 Kundi omukulhu y’owahi, oyuli okwa meza kutse oyukaherezaya? Mbwino si y’oyuli okwa meza? Aliwe ngali omwakathi-kathi kenyu ng’oyukaherezaya.
28 “Aliwe inywe, n’inywe mwabirinyamakirira omw’ilengwako lyaghe;
29 kandi ngakolha endaghane haghuma nenyu ngoku Thatha waghe abirikolha endaghane naghe, busana n’obwami,
30 nuku mwangasyalira n’erinywira okwa meza yaghe omo Bwami bwaghe, n’er’ikalha okwa bithumbi by’obwami eritswera ebihanda 12 bye Israeli.
31 “Simoni, Simoni, lebaya! Sitani anzire eribaghulhukya inywe bosi ng’engano.
32 Aliwe nabirikusabira nuku erikirirya lyawu sirihwe; kandi wukendibya wukasubulha, iwaghumya baghalha benyu.”
33 Neryo mwamubwira athi: “Mukama, nganayitheghekire eribya nawu omwa ngomo n’omwa lhuholho.”
34 Aliwe mwabugha athi: “Petero, ngakubwira, munabwire engoko-lhome yikendi bika iwamabirinyighana mirundi isathu.”
35 Kandi mwababwira athi: “Nabere ingabathuma isimuli n’ehisaho hy’esyosente n’ehisaho hy’ebyalya n’esyongetha, mumuthabulha kindu, kwabithe?” Mubasubirya bathi: “Kwabine!”
36 Neryo mwababwira athi: “Aliwe lino oyuwithe akasaho k’esyosente akaheke, kuthya n’ak’ebyalya, n’oyuthawithe omuyali aghulhaye olhukimba lhwiwe aghulegho.
37 Kundi ngababwira ebihandikire bitholere ibyabererera omw’ingye, ni bugha ambu, ‘Mwaghanzirwa omwa bathwi b’ebilhaghiro.’ Kundi eki kikabererera okw’ingye.”
38 Neryo mubabugha bathi: “Mukama, lebaya! Hano hane emiyali ibiri.” Mwababwira athi: “Eyo yikaghunza.”
39 Abere alhua aho, mwaghenda okwa Kithwe ky’Emizaituni ngoku anabya akakolha, n’abigha mubamukwama.
40 Babere bahikayo, mwababwira athi: “Muhathikane erisaba, nuku simuwe omw’ilengwako.”
41 Neryo mwalhua aho bali amaghenda ahalhuthambi, amakukama n’eritsuka erisaba,
42 athi: “Thatha, wamabya iwunanzire, nyilhusayeko ekikopo eki. Aliwe butsira erisonda lyaghe aliwe eryawu ly’erikoleke.”
43 Neryo omumalaika mwalhua elhubulha amamubuthukirako n’erimughumya.
44 Aliwe abya omwa bulighe bunene kutsibu indi mwalholha embere erisaba kutsibu; n’olhunza lhwiwe mulhwabya ng’amathondi w’omusasi awakathoghongera okwa kithaka.
45 Abere aghunza erisaba mwaghenda eyiri abigha, ameya ibanaghotsere, ibabirilhuha busana n’obulighe.
46 Mwababwira athi: “Busana naki mughotsere? Muhangane kandi mulhole embere erisaba, nuku simuwe omw’ilengwako.”
47 Abere akinabugha, lebaya! ekingungu ky’abandu n’omulhume oyukahulhawamo Yuda, omughuma w’okw’Ikumi n’Ababiri, abya inianemubasondolha, mwasa ahali Yesu amamulyatsirira.*
48 Aliwe Yesu mwamubwira athi: “Yuda, wukaghoberaya Mughalha w’omundu omw’imulyatsirira?”
49 Ababya nayu babere balhangira ebikabya, mubabugha bathi: “Mukama, thubaswiraye omwa muyali?”
50 Omughuma w’okw’ibo nibya mwaswirya omughombe w’omuhereri mukulhu, amamuthwako okuthwe kwiwe kw’amali.
51 Aliwe Yesu mwabugha athi: “Koko.” Neryo mwahamba okwa kuthwe, amamulhamya.
52 Neryo Yesu mwabugha n’abahereri bakulhu n’abakulhu b’abatheya b’ehekalhu n’abakulhu ababya ibabiryasa aho ali athi: “Mukanyasira n’emiyali n’emigho ng’omwibi?
53 Iningabya nenyu omwa hekalhu obuli kiro, mumuthanyihamba. Aliwe eno y’esaha yenyu n’obuthoki bw’omwirima.”
54 Neryo mubamuhamba n’erimuthwalha, mubamuletha omwa nyumba y’omuhereri mukulhu; aliwe Petero abya inianabakwamire iniane haali.
55 Babere babiryakya omuliro omwakathi-kathi k’obuthalha n’er’ikalha haghuma, Petero abya inianikere omw’ibo.
56 Aliwe omughombe w’obukali abere amulhangira ekyakakalha ky’omuliro ikyabirikolerya, mwamuthungerera n’eribugha athi: “Omulhume oyu nayu alhue nayu.”
57 Aliwe mwayighana athi: “Mukali, singamwasi.”
58 Enyuma w’akathambi kake owundi mundu mwamulhangira n’eribugha athi: “Nawu wuli mughuma w’okw’ibo.” Aliwe Petero mwabugha athi: “Mulhume, ingye sindi w’okw’ibo.”
59 Enyuma w’esaha nga nguma owundi mulhume mwahathikana kutsibu athi: “Omo kwenene, omulhume oyu nayu alhue iniane haghuma nayu, kundi kwenene ni Mugalilaya!”
60 Aliwe Petero mwabugha athi: “Mulhume, singasi ebya wukabugha.” Neryo aho naho, abere akinabugha, engoko-lhome muyabika.
61 Neryo Omukama mwabinduka amahanda oku Petero kw’ameso, na Petero mwibuka ebya Omukama abugha akamubwira athi: “Munabwire, engoko-lhome yitheyabika, wukendi nyighana emirundi isathu.”
62 Neryo mwaghenda eyihya amayalira kutsibu.
63 Neryo abalhume abahamba Yesu mubatsuka erimusekererya n’erimuswirya;
64 kandi babere babiriswika obusu bwiwe, mubabera erimubulya bathi: “Thaminyerera! Oyuwamakumathulha, nindi?”
65 Kandi mubamubughako ebindi bitsumi bingyi.
66 Neryo bwabere bwakya, abakulhu b’abandu, abahereri bakulhu n’abakangirirya b’emighambo abosi mubahindana haghuma, n’erimuthwalha omw’Ibuyiro lyabo n’eribugha bathi:
67 “Wamabya iwuli Kristo, thubwire.” Aliwe mwababwira athi: “Nomunangababwira, simwangikirirya nahake.
68 Kandi namababulya, simwendi subirya.
69 Aliwe eritsuka lino, Omughalha w’omundu akendibya inian’ikere okwa lhuhandi lhw’ebyalha by’amali bya Nyamuhanga eby’amaaka.”
70 Busana n’eki, abosi mubabugha bathi: “Neryo, wuli Mughalha wa Nyamuhanga?” Mwababwira athi: “Inywe inywibene-bene mwamabughakyo.”
71 Mubabugha bathi: “Busana naki thukinayithagha obundi bwema? Kundi ithwibene-bene thwamabiriyowirakyo omwa buno bwiwe.”
Emyatsi Ahikwa
^ Kutse “ekisi.”
