Engulhu Yuwene Ngoku Yahandikawa na Luka 23:1-56
23 Neryo ekingungu ky’abandu, abosi mubamuthwalha ewa Pilato.
2 Neryo mubatsuka erimuhandikirira bathi: “Muthweya omulhume oyu akahindulha ekihugho kyethu, akaghania eriliha Kaisari y’emisolho, n’eribugha athi iyo iyuwene-wene ni Kristo omwami.”
3 Neryo Pilato mwamubulya athi: “Niwe Mwami w’Abayuda?” Yesu mwasubirya athi: “Iwe iwuwene-wene wamabughakyo.”
4 Neryo Pilato mwabwira abahereri bakulhu n’ekingungu ky’abandu athi: “Sinathabana oko mulhume oyu kw’omusango.”
5 Aliwe mubahathikana bathi: “Akatsotsereraya abandu omw’ikangirirya omwa Yudea yosi eritsuka e Galilaya erihika na hano.”
6 Pilato abere owa ekyo, mwabulya omulhume oyo nga ni Mugalilaya.
7 Abere abiriminya ndeke ngoku ali omwa kitsweka ky’obuthabali bwa Herode, mwamuthuma ewa Herode, nayu oyuwabya iniane e Yerusalemu omwa biro ebyo.
8 Herode abere alhangira Yesu, mwatsema kutsibu. Kundi abya iniamabirighunza buthuku inianemwanza erilholha oku Yesu kundi abya iniabirimwowako myatsi mingyi, kandi aby’awithe amaha w’erilhangira Yesu akakolha ekiminyikalho kirebe.
9 Neryo mwatsuka erimubulya ebibulyo bingyi, aliwe Yesu mwathamusubirya.
10 Nomwabine, abahereri bakulhu n’abakangirirya b’emighambo mubabya ibanimene kandi ibanemumuhandikirira kutsibu.
11 Neryo Herode n’abasirikali biwe mubahemulikania Yesu n’erimusekererya omw’imwambalya olhukimba olhuwene neryo bamamusubya ewa Pilato.
12 Herode na Pilato mubabya banywani okwa kiro ekyo, kundi enyuma owundi abya nzighu y’owundi.
13 Neryo Pilato mwabirikira haghuma abahereri bakulhu, abathabali, n’abandu
14 n’eribabwira athi: “Mumukanyilethera omulhume oyu muthi akahira omwa bandu mw’omuthima w’eriyisamambulha. Neryo lebaya! Nabirimulebya ndeke embere syenyu aliwe sinathamubanako ebyanga leka iniahirwako emisango eyamukamuhirako.
15 Nibya na Herode syathamubanakwaki, kundi mwakathusubulirayayo, neryo lebaya! syaliko musango owangaleka iniakwa.
16 Neryo ngendi musuyira n’erimuboholha.”
17 ——
18 Aliwe ekingungu ky’abandu abosi mubabirikira bathi: “Omulhume oyo ithawe, kandi muthuboholere Baraba!”
19 (Omulhume oyu ahirawa omwa ngomo busana n’erileka abandu bayisamambule n’eby’obwithi ebyabya omwa tawuni.)
20 Kandi Pilato mwabugha nabu kundi aby’anzire eriboholha Yesu.
21 Neryo mubatsuka eribirikira bathi: “Ahanikawe okwa muthi! Ahanikawe okwa muthi!”*
22 Omurundi wakasathu Pilato mwababulya athi: “Busana naki? Ni kibi kyahi ekya omulhume oyu akolire? Sinathamubanako ekyanga leka iniakwa; busana n’ekyo ngendi musuyira n’erimuboholha.”
23 Aliwe mubahathikana, bamabirikira omwa mirenge miiri bathi ithawe,* n’emirenge yabo muyamulengya amani.
24 Neryo Pilato mwathwamu athi erisaba lyabu likolhawe.
25 Neryo mwaboholha omulhume oyo babya bakasaba, oyuwahirawa omwa ngomo busana n’erileka abandu bayisamambule n’eby’obwithi, aliwe amabalhwikira Yesu erikwamana n’erisonda lyabo.
26 Neryo babere banemumuthwalha, mubahamba Simoni mulebe owe Kurene, oyuwabya akalhua omwa kyalu, bamamuhekya omuthi w’amaghali,* ahekegho akwame Yesu.
27 Abandu bangyi babya ibanamukwamire, imune n’abakali ababya ibanemuyihumbanga omwa bulighe n’erilira busana nayu.
28 Yesu mwakebera abakali n’eribugha athi: “Bali be Yerusalemu, muleke erilira busana naghe. Aliwe muyilire n’erilira abaana benyu;
29 kundi lebaya! ebiro binemwasa omughulhu abandu bakendi syabugha bathi, ‘Obutseme buli okwa bakali esyongumba n’amabunda awathali athabutha n’amabere awathali athongya!’
30 Neryo bakendi syatsuka eribugha n’ebithwe bathi, ‘Thutherereko!’ n’ehithwe bathi, ‘Thuswike!’
31 Bamathakolha ebi omuthi inina mubisi, neryo ni byahi ebikendi syabya iniabiryuma?”
32 Abandi balhume babiri, esyongoli sy’ebibi, nabo mubathwalhwa eriyahanikwa haghuma nayu.
33 Neryo babere bahika omo mwanya owakahulhawamo Akahangarara, mubamukongomerera okwa muthi haghuma n’esyongoli sy’ebibi, omughuma okwa mali n’owundi okwa malembe.
34 Aliwe Yesu mwabugha athi: “Thatha, baghanyire, kundi sibasi ebyo bakakolha.” Eryongera okw’ekyo, mubaghusa ehithuli bakaghaba esyongyimba siwe.
35 Neryo abandu mub’imana, bamasamalira. Aliwe abathabali babya ibanemumusekererya bathi: “Mwalhamya abandi; leka ayilhamaye amabya ini Kristo wa Nyamuhanga, Omusombolhwa.”
36 N’abasirikali mubamusekererya, bamasa n’erimuha evini eyipakere
37 bathi: “Wamabya iwuli Mwami w’Abayuda, yilhamaye.”
38 Ahighulhu okwa muthwe wiwe habya ihane ebinywe bino: “Oyu ni Mwami w’Abayuda.”
39 Neryo omughuma w’okwa syongoli sy’ebibi oyuwabya ahanikire aho mwatsuka erimutsuma athi: “Wuli Kristo, kwabithe? Yilhamaye kuthya nethu!”
40 Owundi mwamukunga athi: “Mbwino siwulyubaha Nyamuhanga nahake, nawu iwabiritswerwa olhuli ng’olhw’oyu?
41 Kandi eki kithutholere, kundi ithwe thutholere ithwatswerwa thuthya erikwamana n’ebya thwakolha; aliwe omulhume oyu syathakolha ekibi.”
42 Neryo mwabugha athi: “Yesu, wusyanyibuka wuk’ingira omo Bwami bwawu.”
43 Yesu mwamubwira athi: “Kwenene ngakubwira munabwire, wukendi syabya haghuma naghe omwa Paradiso.”
44 Neryo syabya nga saha mukagha,* n’omw’irima mwawa omwa kihugho ekyo erihika saha mwenda,*
45 kundi omwisi mwathakolha; neryo ekisukuliryo ky’omwa hekalhu mukyasathika omwakathi-kathi.
46 Neryo Yesu mwabirikira omwa mulenge munene athi: “Thatha, ngahira engebe yaghe omwa byalha byawu.” Abere abiribugha eki, mwalekulha.*
47 Omukulhu mughuma w’abasirikali abere alhangira ebyamabya, mwatsuka eriha Nyamuhanga y’olhukengerwa athi: “Kwenene, omulhume oyu alhue muthunganene.”
48 N’abandu bangyi ababya bahindene omo mwanya oyu babere balhangira ebyamabya, mubasuba eka ibanemuyihumbanga okwa bikuba.
49 N’abosi ababya bamwasi babya ibanimene ahalhuthambi. N’abakali ababya ibabirimukwama erilhua e Galilaya babya ibaneho kandi mubalhangira emyatsi eyi.
50 Neryo lebaya! habya omulhume oyukahulhawamo Yozefu, ow’omwa Kyaghanda ky’Abayuda, oyuwabya mubuya kandi muthunganene.
51 (Omulhume oyu abya isyathasighika embitha yabo kandi mwathasangira muyo.) Abya we Arimatea, etawuni ye Yudea, kandi aby’akalindirira Obwami bwa Nyamuhanga.
52 Omulhume oyu mwaghenda eyiri Pilato, amayasaba omubiri wa Yesu.
53 Neryo mwakyimyagho amalingirako olhukimba olhuwene olhw’ekitani, amahiragho omw’isinda* eyathakulhawa omwa lhukuka, eyabya isiyiri yathatsikwamo mundu.
54 Neryo kyabya kiro ky’Eritheghekania, ne Sabato yabya iyikayatsuka.
55 Aliwe abakali ababya ibabirikwama Yesu erilhua e Galilaya mubahikaho bamasamalira omw’isinda* neryo bamalhangira omubiri wiwe ng’amahirwamo athi,
56 neryo mubasubayo bamayatheghekania amanukato n’amaghutha awakakumba ndeke. Aliwe, mubalhuhuka okwa Sabato erikwamana n’ekihano.
Emyatsi Ahikwa
^ Kutse “Ithibawe okwa muthi! Ithibawe okwa muthi!”
^ Kutse “ithibirawe okwa muthi.”
^ Ni bugha ambu, saha nga 6 sy’erithungyi.
^ Ni bugha ambu, saha nga 9 sy’erithungyi.
^ Kutse “amathwa omuthima.”
^ Kutse “eyisinda y’eryibukwa.”
^ Kutse “eyisinda y’eryibukwa.”
