Engulhu Yuwene Ngoku Yahandikawa na Luka 3:1-38
3 Omo mwaka we 15 ow’erithabalha lya Tiberio Kaisari, omughulhu Pontio Pilato abya gavana we Yudea, Herode* abya muthabali w’ekitsweka kye Galilaya, Filipo mughalha wabo abya gavana w’ekitsweka kye Ituria ne Terakoniti, na Lisania abya muthabali w’ekitsweka kye Abilene,
2 omwa biro by’omuhereri mukulhu Ana n’ebya Kayafa, omwatsi wa Nyamuhanga mwahika oku Yohana mughalha wa Zakaria omo mbwarara.
3 Neryo mwaghenda omwa bitsweka byosi ebithimbire oko Yorodani, akathulira abandu athi batholere ibabatizibwa ng’ekiminyikalho ky’eriyisubamo busana n’erighanyirwa ebibi,
4 ngoku kihandikire omwa kitabu ky’ebinywe by’omuminyereri Isaya kithi: “Omulenge w’oyukabirikirira omo mbwarara athi: ‘Mutheghekanaye enzira ya Yehova! Muterekereraye esyonzira siwe.
5 Obuli musya atholere iniusulibwa, n’obuli kithwe n’akathwe bitholere ibyabonderibwa; n’esyonzira esihengemire sitholere isyaterekerera, n’esiri mw’ebikudu-bikudu sitholere isyuwanibwa;
6 n’abandu abosi basyalhangira omulhamu wa Nyamuhanga.’”*
7 Neryo mwatsuka eribwira abandu ababya bakamuhikako bathi ababatizaye, athi: “Inywe baana b’esyonzoka, nindi oyuwabahabwire athi muthibithe nuku muyibalhaye okw’isuyira erikasa?
8 Busana n’ekyo, muhethaye ebighuma ebikakanganaya eriyisubamu. Isimwatsuka eriyibwira muthi: ‘Thuli baana ba Abrahamu.’ Kundi ngababwira nyithi Nyamuhanga anawithe amaaka w’eriha Abrahamu y’abaana erilhua omwa mabwe aya.
9 Omo kwenene, embasa yabirihirwa omwa syondina sy’emithi. Neryo obuli muthi owathehethaya ebighuma ebyuwene akendi kondwa n’erighuswa omwa muliro.”
10 Neryo abandu mubamubulya bathi: “Neryo kwesi thutholere ithwakolhaki?”
11 Mwabasubirya athi: “Omundu oyuwithe esyongyimba* ibiri ahe oyuthawithe, n’oyuwithe eky’erirya akole ikyan’ekyo.”
12 N’abasolesya mubasa bakasyabatizibwa, kandi mubamubulya bathi: “Mukangirirya, thutholere ithwakolhaki?”
13 Mwabasubirya athi: “Isimwasolesaya* sinene kwilhaba esitholere erisolhwa.”
14 N’abasirikali mubamubulya bathi: “Thutholere ithwakolhaki?” Mwabasubirya athi: “Isimwakolha nabi* omundu wosi-wosi kutse erihangirira owosi-wosi, aliwe mutsemere ebyo mukahebawa.”*
15 Neryo abandu babya ibanalindirire Kristo kandi abosi ibanemulengekania oku Yohana omwa mithima yabu bathi, “Mbwino oyu syangabya ini Kristo?”
16 Yohana mwasubirya abosi athi: “Ingye ngababatizaya omwa maghetse, aliwe oyundengirye amaaka anemwasa, singahikire n’okwa lhulengo lhw’eriboholha emikoba y’esyongetha siwe. Akendi syababatizya omwa mulimu abuyirire n’omwa muliro.
17 Ekitiyo kiwe ky’erighulhukyamo kine omwa byalha biwe erikokothya ndeke ekihumbiro kiwe n’erikuma-kumira engano omwa kighona kiwe, aliwe omusunga akendi syahisiryagho omwa muliro owathe angalimibwa.”
18 Kandi mwabakangirirya eyindi myatsi mingyi n’erilholha embere eribwira abandu b’engulhu yuwene.
19 Aliwe kundi Yohana abya iniabirikunga Herode omuthabali w’ekitsweka busana na Herodia muka mughalha wabo na busana n’ebibi byosi ebyo abya iniabirikolha,
20 Herode mwongera okwa eby’abya iniabirikolha ebi akahira Yohana y’omwa ngomo.
21 Neryo abandu bosi babere banemubatizibwa, Yesu nayu mwabatizibwa. Abere anemusaba, olhubulha mulhwakyungukalha,
22 n’omulimu abuyirire omw’isosa ly’akalikuku mwamwandaghalirako, n’omulenge mwalhua elhubulha athi: “Wuli Mughalha waghe, omwanzwa; ngakutsemera.”
23 Yesu abere akatsuka omubiiri wiwe, abya w’emyaka nga 30, ngoku kyabya kyasibwe, abya mughalhawa Yozefu,mughalha wa Heli,
24 mughalha wa Matati,mughalha wa Lawi,mughalha wa Melki,mughalha wa Yanai,mughalha wa Yozefu,
25 mughalha wa Matatia,mughalha wa Amosi,mughalha wa Nahumu,mughalha wa Esli,mughalha wa Nage,
26 mughalha wa Mati,mughalha wa Matatia,mughalha wa Simei,mughalha wa Yoseke,mughalha wa Yoda,
27 mughalha wa Yoanani,mughalha wa Resa,mughalha wa Zerubabeli,mughalha wa Salatieli,mughalha wa Neri,
28 mughalha wa Melki,mughalha wa Adi,mughalha wa Kosamu,mughalha wa Elmadamu,mughalha wa Eri,
29 mughalha wa Yesu,mughalha wa Eliezeri,mughalha wa Yorimu,mughalha wa Matati,mughalha wa Lawi,
30 mughalha wa Simioni,mughalha wa Yuda,mughalha wa Yozefu,mughalha wa Yonamu,mughalha wa Eliakimu,
31 mughalha wa Mela,mughalha wa Mena,mughalha wa Matata,mughalha wa Natani,mughalha wa Dawudi,
32 mughalha wa Yese,mughalha wa Obedi,mughalha wa Boazi,mughalha wa Salmoni,mughalha wa Nasoni,
33 mughalha wa Aminadabu,mughalha wa Arni,mughalha wa Hezironimughalha wa Perezi,mughalha wa Yuda,
34 mughalha wa Yakobo,mughalha wa Isaka,mughalha wa Abrahamu,mughalha wa Tera,mughalha wa Nahori,
35 mughalha wa Serugu,mughalha wa Reu,mughalha wa Pelegi,mughalha wa Iberi,mughalha wa Sela,
36 mughalha wa Kainana,mughalha wa Aripakisadi,mughalha wa Semu,mughalha wa Noa,mughalha wa Lameki,
37 mughalha wa Metusela,mughalha wa Enoka,mughalha wa Yeredi,mughalha wa Mahalaleli,mughalha wa Kainana,
38 mughalha wa Enosi,mughalha wa Seti,mughalha wa Adamu,mughalha wa Nyamuhanga.
Emyatsi Ahikwa
^ Ni bugha ambu, “Herode Antipa.” Lebaya Erisoborera Ebinywe.
^ Kutse “enzira ya Nyamuhanga ey’erilhamiryamo.”
^ Kutse “olhundi lhukimba.”
^ Kutse “erisorokya.”
^ Kutse “erinyegha.”
^ Kutse “obuhingyi.”
