Engulhu Yuwene Ngoku Yahandikawa na Luka 4:1-44
4 Neryo Yesu inianoswire kw’omulimu abuyirire, mwalhua omwa Yorodani, kandi omulimu mwamusondolha eriya omo mbwarara
2 habw’ebiro 40 nuku Diabolo amulengeko. Kandi omwa biro ebyo mwathalya kyosi-kyosi, aliwe byabere byahwa, mwakwa enzalha.
3 Busana n’ekyo, Diabolo mwamubwira athi: “Wamabya iwuli mughalha wa Nyamuhanga, bwira eribwe eri libye byalya.”*
4 Aliwe Yesu mwamusubirya athi: “Kihandikire kithi: ‘Omundu syalibyaho ahabw’ebyalya bisa.’”
5 Neryo Diabolo mwamuthwalha okwa singi y’ekithwe eriyamukangya amami wosi w’ekihugho omwa kathuku kake kutsibu.
6 Neryo Diabolo mwamubwira athi: “Ngendi kuha obuthoki okwa mami wosi aya n’olhukengerwa lhwagho, kundi nabirihebwabyo, kandi ngabihereraya okw’oyo nganzire.
7 Neryo wamakolha ekindu kyosi-kyosi erinyiramya, ebyosi ibikendibya byawu.”
8 Yesu mwamusubirya athi: “Kihandikire kithi, ‘Yehova Nyamuhanga wawu yawutholere iwaramya, kandi iyo musa yawutholere iwakolera omubiiri owabuyirire.’”
9 Neryo mwathwalha Yesu ye Yerusalemu n’eriyamwimania okwa kasweswe k’ehekalhu n’erimubwira athi: “Wamabya iwuli mughalha wa Nyamuhanga, yighuse ahisi,
10 kundi kihandikire kithi: ‘Nyamuhanga asyathuma abamalaika biwe busana nawu, erikutheya,’
11 kandi, ‘Basyakubaghalira omwa byalha byabo nuku ekisandu kyawu sikiyihinde okw’ibwe.’”
12 Yesu mwamusubirya athi: “Kikabughawa kithi, ‘Siwutholere wukalenga oku Yehova Nyamuhanga wawu.’”
13 Neryo Diabolo abere abirighunza erimulengako, mwalhua aho ali amalinda akandi kathambi akatholere.
14 Neryo Yesu mwasuba e Galilaya iniane kw’amaaka w’omulimu abuyirire. N’omwatsi owuwene owamuhambireko mwalhandaghana omwa kihugho kyosi ekyo.
15 Kandi mwatsuka erikangirirya omwa syosinagogi syabo, n’abandu bosi mubamusikya.
16 Neryo mwaghenda e Nazareti eyo akulira, kandi erikwamana ngoku anabya akakolha okwa Sabato, mw’ingira omwa sinagogi, amahangana n’erisoma amasako.
17 Neryo mubamuha omukunzo w’omuminyereri Isaya, mwasanzulhagho n’eribana ahahandikire hathi:
18 “Omulimu wa Yehova ali okw’ingye, kundi abirinyihakabya eribwira abanakwa b’engulhu yuwene. Mwanyithuma eribwira abanyewa ngoku bakendi syabya bwiranda, erilibulha ameso w’esyondimethime, n’erilhamya ababbunikire omuthima,
19 erithulhughania ebihambire okwa buthuku bw’erisimirwamo na Yehova.”
20 Neryo mwalinga omukunzo, amahagho omughombe, neryo am’ikalha; n’abandu bosi omwa sinagogi mubamuthungerera.
21 Neryo mwababwira athi: “Munabwire erisako erya mwamwowa eri lyamabererera.”
22 Neryo abosi mubatsuka erimukaniako ndeke kandi mubasweka busana n’ebinywe by’olhukeri eby’abugha, kandi mubabugha bathi: “Oyu ni mughalha wa Yozefu, kwabithe?”
23 Neryo mwababwira athi: “Ahathe erithika-thika mukendi kolesya ebinywe bino okw’ingye, ‘Muthambiri, yilhamaye. N’ewenyu eno kolhayo eby’amaaka ebyo thwabiriowa ku mubyakolhwa e Kapernaumu.’”
24 Neryo mwababwira athi: “Kwenene ngababwira, sihali omuminyereri oyukalighawa omwa bulhambu bwabu.
25 Ng’eky’erileberyako, ngababwira okwenene: Omwa Israeli mwabya abakwakali bangyi omwa biro bya Eliya omughulhu olhubulha lhwaghunza myaka isathu n’amezi mukagha ilhunakingire, kandi muhabya enzalha nene omwa kihugho kyosi ekyo.
26 Nomwabine Eliya mwathathumwa n’okwa mughuma w’okwa bakali abo, aliwe okwa mukwakali we Zarefati ow’omwa kihugho kye Sidoni musa.
27 Kandi e Israeli yabya abahagha bangyi omwa buthuku bw’omuminyereri Elisa; aliwe muhathabya n’omughuma w’okw’ibo oyuwalhamibawa, Namani musa Omusuria.”
28 Neryo abosi ababya omwa sinagogi abowa emyatsi eyi mubahithana kutsibu,
29 neryo mubahangana, bamamuhulhukya lhuba-lhuba omwa tawuni, n’erimuthwalha okwa singi y’ekithwe ekyo etawuni yabo yabya yihimbirweko, nuku bamughuse atsuke omuthwe w’okwa kithaka.
30 Aliwe mwalhaba omwa kathi-kathi kabo, amayighendera.
31 Neryo mwandaghalira e Kapernaumu, etawuni ye Galilaya. Kandi aby’akabakangirirya okwa kiro ky’Esabato,
32 neryo mubasweka busana n’erikangirirya liwe, kundi iniakabakangiriraya ng’oyuwithe ehamuli.
33 Neryo omwa sinagogi mwabya omulhume oyuliko ekirimu, embinga eyithunda-thundire, neryo mwalhaka omwa mulenge munene athi:
34 “Wukasyathusondaya kwaki, Yesu we Nazareti? Wukasyathuthoghothaya? Nganasi ndeke nga wulindi, Omubuyirire wa Nyamuhanga.”
35 Aliwe Yesu mwakungayo omw’ibugha athi: “Ibya bukuthu, kandi mulhuemu.” Neryo embinga yabere yabirighusa omulhume y’ahisi omwa kathi-kathi kabo, muyamulhuamu isiyithamuhuthalya.
36 Busana n’eki, abosi mubasweka n’eritsuka eribwirana bathi: “Ebi ni binywe ebiri bithi? Busana n’obuthoki n’amaaka, akathibitha okwa mirimu eyithunda-thundire, nayo iyaghenda!”
37 Neryo emyatsi eyimuhambireko muyabera erilhandaghana omwa kihugho kyosi ekyo.
38 Abere akalhua omwa sinagogi, mw’ingira omwa nyumba ya Simoni. Nyoko-byalha wa Simoni aby’alhwere obulhwere bw’erihuhana kutsibu, neryo mubamusaba bathi amuwathikaye.
39 Neryo Yesu mw’imana aho ali, amamulhamya kw’ekihuhania ekyo. Aho naho mwahangana n’eritsuka eribawathikya.
40 Aliwe eryuba lyabere likalenga, abosi ababya bawithe abandu abalhwere amalhwere muthina-muthina mubamuletherabo. Omw’ihira okw’obuli mughuma kw’ebyalha, mwabalhamya.
41 N’esyombinga musyalhua omwa bangyi, isinemulhaka n’eribugha sithi: “Wuli Mughalha wa Nyamuhanga.” Aliwe iniakabya akasikunga, isyali silighira eribugha, kundi syabya isinamwasi ku ni Kristo.
42 Aliwe bwabere bwakya, Yesu mwaya eyithe bandu. N’abandu mubatsuka erimusondya* n’eriasa aho abya, kandi mubathanza akabalhuako.
43 Aliwe mwababwira athi: “Ngatholere ingathulhughania engulhu yuwene y’Obwami bwa Nyamuhanga n’omwa sindi tawuni, kundi ekyo ky’ekyaleka ingathumwa.”
44 Neryo mwalholha embere erithulira omwa syosinagogi sye Yudea.
