Engulhu Yuwene Ngoku Yahandikawa na Luka 5:1-39
5 Buthuku bughuma Yesu inianimene okwa musike w’engetse ye Genezareti,* abandu babya ibanemuyihathathania aho ali bakahulikirira ekinywe kya Nyamuhanga.
2 Neryo mwalhangira amathu abiri inianaghobere okwa musike w’engetse, aliwe abasohi ibabirilhuamo, ibanemwoya amatimba wabo.
3 Abere asambira omwa bughuma bw’okwa mathu, obwabya bwa Simoni, mwamubwira athi abusukumire omwa ngetse mw’ahake. Neryo mwabwikalhamu amatsuka erikangirirya abandu iniane omo bwathu.
4 Abere aghunza erikania, mwabwira Simoni athi: “Ghenda ahali omuthobero, muthogherayeho amatimba wenyu musohe.”
5 Aliwe Simoni mwamusubirya athi: “Mukangirirya, mubukakya thukasoha aliwe muthuthethahambaki, neryo busana n’ekinywe kyawu ngendi thogheryaho amatimba.”
6 Neryo babere bakolha eki, mubahamba esiswe nyingyi. Nibya n’amatimba wabo mwatsuka erisathangika.
7 Neryo mubakombosya abasohi balikyabo ababya omwa bundi bwathu bathi base babawathikaye, neryo mubasa bamusulya amathu abiri awosi, nagho amatsuka erithobera.
8 Simoni Petero abere alhangira eki, mwathulhama embere sya Yesu n’eribugha athi: “Mukama, wulhua aho ngali, kundi indi mukolha-nabi.”
9 Kundi iyo nabo abya nabo babya ibabirisweka kutsibu busana n’esiswe nyingyi esya babya ibamabirihamba,
10 ku byanabya bithya n’oku Yakobo na Yohana, baghalha ba Zebedayo ababya bakakolha na Simoni. Aliwe Yesu mwabwira Simoni athi: “Siwubahe. Eritsuka lino wukendibya wukasoha abandu.”*
11 Neryo mubasubya amathu w’okwa musike w’engetse kandi mubasighania obuli kindu, bamamukwama.
12 Ekindi kiro Yesu iniane omwa tawuni ndebe, lebaya! yabya omulhume oyuswireko ebihagha! Abere akalhangira Yesu, mwathulhama ahisi n’erimulemba-lemba athi: “Mukama, wamabya iwunanzire, iwukendi nyilhamya.”
13 Neryo Yesu mwananulha okuboko, amamuthulhako, n’eribugha athi: “Ngananzire! Wulhamibawe.” Aho n’aho ebihagha biwe mubyalhama.
14 Neryo mwabwira omulhume athi isyabwira omundu wosi-wosi: “Aliwe ghenda wuyayikangaye okwa muhereri, kandi wuheyo obuhere busana n’erilhama lyawu, ngoku Musa alhaghira, busana n’eribaha obwema.”
15 Aliwe emyatsi eyimuhambireko muyabera erilhandaghana, n’abandu bangyi ibakayihindanaya haghuma bakahulikirira n’erilhamibwa kw’amalhwere wabo.
16 Aliwe mughulhu mungyi iniakaghenda eyithe bandu eriyasaba.
17 Kiro kighuma inianemukangirirya, Abafarisayo n’abakangirirya b’Emighambo ababya ibabirilhua omwa buli kyalu kye Galilaya, e Yudea, ne Yerusalemu babya ibanikere aho; kandi abya inianeko amaaka wa Yehova aw’erilhamya.
18 Neryo lebaya! abalhume babya ibanahekire omulhume oyusanyarere y’okwa kakyingo, kandi babya ibanemulengaho erimwingiryamo nuku bamuhire embere sya Yesu.
19 Neryo babere babiribulha ah’erimulhabya busana n’obungyi bw’abandu, mubasambira oko lhuthwe lhw’enyumba, neryo iniane okwa kakyingo mubamulhabya aho baly’iha amategura erimwandaghalirya omwa bulingirirane bw’abali embere sya Yesu.
20 Yesu abere akalhangira erikirirya lyabo, mwabugha athi: “Mulhume, ebibi byawu byamaghanyirwa.”
21 Neryo abahandiki n’Abafarisayo mubatsuka eriyibughako bathi: “Oyu nindi oyukatsuma? Nindi oyuwanga ghanyira ebibi athe Nyamuhanga musa?”
22 Aliwe Yesu abere aminya ebyo bakaghaniraya, mwabasubirya athi: “Mukaghanirayaki omwa mithima yenyu?
23 Ekyolhobire ky’ekyahi, eribugha indi, ‘Ebibi byawu byamaghanyirwa,’ kutse eribugha indi, ‘Hangana wughende’?
24 Aliwe inywe erithoka eriminya ngoku Omughalha w’omundu awithe ehamuli y’erighanyira ebibi okwa kihugho—” mwabwira oyusanyarere athi: “Ngakubwira nyithi, Hangana, wimaye akakyingo kawu, wughende eka.”
25 Aho naho mwahangana embere syabo, amimya eky’alhue akesiryeko, amaghenda ewabo, inianemupipa Nyamuhanga.
26 Neryo abosi mubasweka kutsibu n’eritsuka eripipa Nyamuhanga, kandi mububaha kutsibu, bamabugha bathi: “Munabwire thwamalhangira ebikaswekaya!”
27 Enyuma waho, Yesu mwahulhuka amalhangira omusolesya oyukahulhawamo Lawi inian’ikere omwa ofisi eyo bakalihiramu emisolho, neryo mwamubwira athi: “Nyikwame.”
28 Mwahangana amasighania ebyosi, n’eritsuka erimukwama.
29 Neryo Lawi mwatheghekera Yesu y’erirya inene omwa nyumba yiwe, kandi habya abasolesya bangyi n’abandi ibanemulya* nayu.
30 Busana n’eki, Abafarisayo n’abahandiki babo mubatsuka eriyineghenerya okwa bigha biwe bathi: “Busana naki mukalya n’erinywa haghuma n’abasolesya n’abakolha-nabi?”
31 Yesu mwabasubirya athi: “Abathalhwere sibaliyithagha omuthambiri, aliwe abalhwere bakamuyithagha.
32 Nasa erisyabirikira, butsira abathunganene aliwe abakolha-nabi nuku bayisubemo.”
33 Mubamubwira bathi: “Abigha ba Yohana bakasiba mughulhu wosi n’erisaba Nyamuhanga omw’imulemba-lemba, kuthya n’ab’Abafarisayo, aliwe abawu bakalya n’erinywa.”
34 Yesu mwabasubirya athi: “Simwangabwira banywani b’omwira w’omuheruki muthi basibe iniane nabo, imwanakolha ekyo?
35 Aliwe kwenene endambi yikendi syahika ibab’ihako mwira w’omuheruki, neryo ibabya b’erisiba okwa biro ebyo.”
36 Kandi mwabaha eky’erileberyako athi: “Sihali omundu oyukasara ekibbandiko okwa lhukimba olhuhyaka akakisonera okwa lhukimba lhukulhu. Amakolha ekyo, ekibbandiko ekyo ikikendi lhuaho ikyalhuako, kundi ekibbandiko ekiryalhua okwa lhukimba lhuhyaka sikirihambana n’olhukulhu.
37 Kandi sihali oyukahira evini nyihyaka omwa lhuhu lhw’evini olhukulire. Amakolha ekyo, evini enyihyaka iyikendi sathya olhuhu, neryo evini iyikendyuthika n’olhuhu ilhwatsanda.
38 Aliwe evini enyihyaka yitholere iyahirwa omwa lhuhu lhw’evini olhuhyaka.
39 Sihali oyukanza erinywa evini enyihyaka akalhua okw’inywa enyikulhu, kundi akabugha athi, ‘Enyikulhu y’eyuwene.’”
Emyatsi Ahikwa
^ Ni bugha ambu, “Engetse ye Galilaya.”
^ Kutse “abandu abaliho.”
^ Kutse “erikalha okwa meza.”
