Engulhu Yuwene Ngoku Yahandikawa na Luka 6:1-49
-
Yesu, “Mukama we Sabato” (1-5)
-
Omulhume ow’ebyalha ebisanyarere akalhamibawa (6-11)
-
Abakwenda 12 (12-16)
-
Yesu akakangiriraya n’erilhamya (17-19)
-
Obutseme n’obulighe (20-26)
-
Erianza esyonzighu (27-36)
-
Muleke eritswera (37-42)
-
Eriminyirwa okwa bighuma byagho (43-45)
-
Enyumba eyihimbire ndeke; enyumba eyithawithe omusingyi owaghumire (46-49)
6 Okwa sabato, Yesu mwalhaba omwa malima w’engano, n’abigha biwe ibanemughenda bakathwa emithwe y’engano, ibanyughusulhayo omwa byalha, n’eriryayo.
2 Busana n’ekyo, abaghuma b’okwa Bafarisayo mubabulya bathi: “Busana naki mukakolha ebithe lighirawa erikolhwa okwa Sabato?”
3 Aliwe Yesu mwabasubirya athi: “Simwethasoma okwa bya Dawudi akolha omughulhu iyo n’abalhume abo abya nabo bakwa enzalha?
4 Ngoku ingira omwa nyumba ya Nyamuhanga n’erihebwa emiggati y’erikangania, kandi ngoku alyayo n’eriha kuyo kw’abalhume abo abya nabo, emiggati eya omundu wosi-wosi athabya atholere erirya, aliwe ibabahereri basa?”
5 Neryo mwababwira athi: “Omughalha w’omundu ni Mukama we Sabato.”
6 Okwa yindi sabato mw’ingira omwa sinagogi n’eritsuka erikangirirya. Neryo mwabya omulhume oyuwithe ebyalha by’amali ebisanyarere.
7 Abahandiki n’Abafarisayo babya ibanemulebya Yesu ya ndeke erilhangira ng’anemwendi lhamya okwa Sabato, nuku babane enzira y’erimuhandikiriramo.
8 Aliwe mwaminya amalengekania wabu, neryo mwabwira omulhume ow’ebyalha ebisanyarere athi: “Hangana wimane omwakathi-kathi.” Nayu mwahangana amimanamo.
9 Neryo Yesu mwababwira athi: “Inywe balhume ngababulhaya, mbwino kinatholere erikolha ekibuya kutse ekibi okwa Sabato, erilhamya engebe kutse erithoghothyayo?”
10 Abere abiribathimbyamo ameso, mwabwira omulhume athi: “Nanulha okuboko kwawu.” Nayu mwakikolha, n’okuboko kwiwe mukwasuba.
11 Aliwe mubahithana kutsibu, neryo bamatsuka eribulhania nga ni kyahi ekya banga kolera Yesu.
12 Omwa biro ebyo mwahethukira okwa kithwe eriyasaba, kandi mwaghunza omwa kiro omwosi akasaba Nyamuhanga.
13 Neryo bwabere bwakya, mwabirikira abigha biwe n’eribasombolhamo 12, kandi abo ahulhamo abakwenda:
14 Simoni, oyo ahulhamo Petero, Anderea mughalha wabo, Yakobo, Yohana, Filipo, Batolomayo,
15 Matayo, Tomasi, Yakobo mughalha wa Alfayo, Simoni oyukahulhawamo “ow’omuhwa,”
16 Yuda mughalha wa Yakobo, na Yuda Iskariota, oyuwahinduka mwa mughobya.
17 Neryo mwandaghalha nabo amimana omwa kithambi, kandi habya abigha biwe bangyi, n’abandu bangyi erilhua e Yudea yosi ne Yerusalemu n’omwa kitsweka ky’okwa musike w’engetse ekye Tiro ne Sidoni, abasa erisyamuhulikirira n’erilhamibwa kw’amalhwere wabo.
18 Nibya n’ababya bakanuba busana n’ebirimu bibi mubalhamibwa.
19 Kandi abandu abosi babya bakanza erimuthulhako, kundi aby’akalhua kw’obuthoki n’erilhamya abosi.
20 Neryo mwasamalira abigha biwe n’eritsuka eribugha athi:
“Obutseme buli okw’inywe inywe banakwa, kundi Obwami bwa Nyamuhanga ni bwenyu.
21 “Obutseme buli okw’inywe inywe mukwire enzalha lino, kundi mwasyughuthibwa.
“Obutseme buli okw’inywe inywe mukalira lino, kundi mwasyaseka.
22 “Obutseme buli okw’inywe omughulhu abandu bakabapona, n’omughulhu bakabasolholha n’eribatsuma n’eribatsandya kw’erina omw’ibahulhamo babi busana n’Omughalha w’omundu.
23 Okwa kiro ekyo mutseme n’eriyitsangura, kundi lebaya! olhuhembo lhwenyu ni lhunene elhubulha, kundi eyo ya n’emyatsi eyo abathatha-kulhu babo babya babeghere erikolha okwa baminyereri.
24 “Aliwe obulighe okw’inywe inywe bagaga, kundi mwabiribana erihumulikanibwa lyenyu omwa buswire.
25 “Obulighe okw’inywe inywe abaghuthire lino, kundi mukendi syakwa enzalha.
“Obulighe okw’inywe abakaseka lino, kundi mukendi syasusumana n’erilira.
26 “Obulighe okw’inywe omughulhu abandu bosi bakabakanayako ndeke, kundi eki kya bathatha-kulhu babo bakolha okwa baminyereri b’amabehi.
27 “Aliwe ngababwira inywe muhulikirire: Mulhole embere erianza esyonzighu syenyu, erikolera abakabapona b’ebibuya,
28 eritsumulha abakabathakira, erisabira abakabatsuma.
29 Oyukakumathulha okwa lithema lighuma, iwamubindukirya n’erindi; n’oyukakusaghulha olhukimba lhwawu lhw’eyithomekako, isiwamughanira n’olhw’omwakathi.
30 Wuhe obuli mundu oyukakusaba, kandi oyukathwalha ebindu byawu, isiwathasyamusababyo.
31 “Kandi, ebya mwanzire abandu ibabakolera, nenyu ku munabakolere muthya.
32 “Mwamanza ababanzire, imukendi thasyasimirwaki? Kundi nibya n’abakolha-nabi bakanza ababanzire.
33 Kandi mwamakolha ebibuya okwa bakabakolera ebibuya basa, imukendi thasyasimirwaki? Nibya n’abakolha-nabi ku bakanakolha bathya.
34 Kandi, mwamabweka* abo mukalengekanaya muthi bakendi syabathuha, imukendi thasyasimirwaki? Kundi nibya n’abakolha-nabi bakabweka abakolha-nabi nuku banga syabathuha bingyi.
35 Mbaghane n’ebyo, mulhole embere erianza esyonzighu syenyu n’erikolha ebibuya n’eribweka ahathe maha w’erithuhwa; n’olhuhembo lhwenyu lhukendi syabya lhunene kandi imwabya baana b’ow’Endatha Kutsibu, kundi akakanganaya abathasima n’ababi b’olhukeri.
36 Mulhole embere eribya b’obughanyiri, ngoku Thatha wenyu ni w’obughanyiri.
37 “N’ekindi, muleke eribya mukatswera, neryo nenyu isimwendi syatswerwa nahake; kandi muleke eritsweba, nenyu simwendi syatswebwa nahake. Mulhole embere erighanyira,* nenyu mukendi syaghanyirwa.*
38 Mubye mukahithya, n’abandu bakendi syabaha. Bakendi syahira omwa lhukimba lhwenyu mw’olhulengo olhuwene, olhuswire, olhusokire, kandi olhuboghire. Kundi olhulengo olhwamukalengamo, nenyu lhwamukendi syalengerwamo.”
39 Neryo mwabaha eky’erileberyako athi: “Endime-thime siyanga thoka erisondolha eyindi ndime-thime, kwa bithe? Abosi babiri ibakendi thoghera omwa kyuna, kwa bithe?
40 Omwigha syalengire omukangirirya wiwe, aliwe obuli mundu oyukakangiriribawa ndeke iniakendibya ng’omukangirirya wiwe.
41 Neryo busana naki iwalhangira akathi akali omo liso lya mulikyenyu aliwe iwuthalhangira omulabba* owali omwa liso lyawu?
42 Wangabwira wuthi mulikyenyu wuthi, ‘Mulikyethu, leka ngalhusaye omwa liso lyawu mw’akathi akalimo,’ aliwe iwuwene-wene isiwuli lhangira omulabba* owali omwa liso lyawu? Iwe muthebya! Tsuka erilhusya omwa liso lyawu mw’omulabba* owalimu, imuwalhangira ndeke ngoku wangalhusya omwa liso lya mulikyenyu mw’akathi akalimo.
43 “Kundi sihali omuthi owuwene owakahethaya ebighuma ebibbolire, kandi sihali omuthi owalhundire owakahethaya ebighuma ebyuwene.
44 Kundi obuli muthi akaminyirawa okwa bighuma byagho. Ng’eky’erileberyako, abandu sibang’eha emithini okwa mahwa, kutse sibangathwa emizabibu okwa mahwa.
45 Omundu mubuya akahulhukaya omwa kighona kiwe kibuya eky’omuthima wiwe mw’ebindu bibuya, aliwe omundu mubi akahulhukaya omwa kighona kiwe kibi mw’ebindu bibi; kundi obunu bukabugha ebyoswire omwa muthima.
46 “Neryo busana naki mukanyahulhamo ‘Mukama! Mukama!’ aliwe isimulikolha ebya ngabugha?
47 Obuli mundu oyukasa okw’ingye n’erihulikirira ebinywe byaghe n’eribighenderako, ngendi bakangya ng’alyathi:
48 Ali ng’omundu oyuwahimba enyumba yiwe amathakulha buuli n’erihimba omusingyi wayu okwa lhukuka. Neryo amaghetse abere abogha, olhusi mulhwayiswirya okwa nyumba eyo aliwe silhwabya lhuwithe amani w’eritsingya-tsingyayo, kundi yabya yihimbire ndeke.
49 Okwa lhundi lhuhandi, oyukowa aliwe akathendi bighenderako ali ng’omundu oyuwahimba enyumba yiwe okwa kithaka isiyiwithe omusingyi. Olhusi mulhwayiswirya kuyo, yamalhuaho iyathera, n’eritsanda lyayu mulyabya linene kutsibu.”
Emyatsi Ahikwa
^ Ni bugha ambu, “ahathe erighobesya.”
^ Kutse “eriboholha.”
^ Kutse “eriboholhwa.”
^ Kutse “erisiforo.”
^ Kutse “erisiforo.”
^ Kutse “erisiforo.”
