Engulhu Yuwene Ngoku Yahandikawa na Luka 7:1-50
7 Abere abirighunza eribwira abandu b’emyatsi eyo aby’atholere eribabwira, mwaghenda e Kapernaumu.
2 Neryo omughombe w’omukulhu mughuma w’abasirikali, oyo aby’anzire kutsibu, aby’athohire kandi iniakayaholha.
3 Abere owa oku Yesu, mwamuthumako abaghuma b’okwa bakulhu b’Abayuda erimusaba bathi ase alhamaye omughombe wiwe.
4 Mubahika oku Yesu n’eritsuka erimulemba-lemba erilhua okwa muthima bathi; “Eki wumukolerekyo, kimutholere,
5 kundi anzire ekihugho kyethu kandi mwahimba esinagogi yethu.”
6 Neryo Yesu mwaghenda nabo. Aliwe abere akahika hakuhi n’enyumba, omukulhu mughuma w’abasirikali abya iniamabirimuthumako abanywani eriyamubwira bathi: “Mukulhu, isiwahika ewaghe, ngayowa ngasingatholere iwe eryasa ewaghe.
7 Ekyo ky’ekiryaleka ingayowa isingatholere eryasa eya wuli. Aliwe wubughe ekinywe kisa, n’omughombe waghe alhame.
8 Kundi naghe ngali munya-buthoki, ngawithe abasirikali abo ngasondolha, kandi ngabwira oyu indi, ‘Ghenda!’ neryo iniaghenda, n’owundi indi, ‘Asa!’ neryo iniasa, n’oko mughombe waghe indi, ‘Kolha eki!’ neryo iniakikolha.”
9 Yesu abere owa emyatsi eyi, mwasweka, n’eribindukira abandu bangyi ababya bamukwamire n’eribabwira athi: “Erithababwira, nibya n’omwa Israeli sindi nathabanamo oyuwithe erikirirya linene ng’oyu.”
10 Neryo abathumawa babere basuba eka, mub’eya omughombe iniabirilhama.
11 Buthuku buke enyuma waho, mwaghenda omwa tawuni eyikahulhawamo Naini, abigha biwe n’abandu bangyi babya ibanemughenda nayu.
12 Abere akahika hakuhi n’olhukyo lhw’etawuni, lebaya! habya abandu abahekire omulhume oyuholire, omughalha musa* wa mama wiwe. Eryongera okw’ekyo, omukali abya mukwakali. Abandu bangyi erilhua omwa tawuni nabo babya ibane haghuma nayu.
13 Omukama abere alhangira omukali, mwamukwira obulighe n’erimubwira athi: “Leka erilira.”
14 Neryo mwaseghera hakuhi, amathulha okwa kakyingo akaliko ekinda, n’abakihekire mub’imana. Neryo mwabugha athi: “Mulhwana, ngakubwira nyithi, hangana!”
15 N’omulhwana oyuwabya aholire mw’ikalha n’eritsuka erikania, na Yesu mwamuha mama wiwe.
16 Neryo abosi mububaha, kandi mubatsuka eripipa Nyamuhanga bathi: “Omuminyereri mukulhu abirihanganibwa omw’ithwe,” kandi, “Nyamuhanga abirilengekania okwa bandu biwe.”
17 N’omwatsi owamuhambireko oyu mwalhandaghana omwa Yudea yosi n’omwa bihugho byosi ebithimbire kuyo.
18 Neryo abigha ba Yohana mubayamubwira emyatsi yosi eyi.
19 Neryo Yohana mwabirikira ababiri b’okwa bigha biwe n’eribathuma oko Mukama eriyamubulya bathi: “Niwe Wukayasa, kutse thulindirire owundi?”
20 Abalhume abo babere bamuhikako, mubamubwira bathi: “Yohana Omubatizya amathuthuma okw’iwe erisyakubulya, ‘Niwe Wukayasa, kutse thulindirire owundi?’”
21 Okwa saha eyo mwalhamya abandu bangyi abalhwere, abalhwere amalhwere awakalha-kalire, abaliko emirimu mibi, n’eriwathikya esyondimethime nyingyi erilhangira.
22 Yesu mwabasubirya athi: “Mughende mubwire Yohana ebyo mwamabirilhangira n’eriowa: Lino esyondimethime sinemulhangira, abalema banemughenda, abahagha banemulhamibwa, abatsiha bali mwowa, abaholi banemulhubukibwa, n’abanakwa banemubwirwa engulhu yuwene.
23 Obutseme buli okwa oyuthethwikalha busana naghe.”
24 Abo Yohana athuma babere babirisubayo, Yesu mwatsuka erikanirya abandu ebihambire oku Yohana athi: “Mwabya mukayalebyaki omo mbwarara? Olhuseke olho omuyagha akatsinga-tsingaya?
25 Neryo kwesi, mwayalebaya yaki? Omulhume oyuwambere esyongyimba esyuwene?* Kundi abakambalha esyongyimba esyuwene kandi abali omwa tseme bali omwa manyumba w’abami.
26 Neryo kwesi, mwayalebaya yaki? Omuminyereri? Ngababwira, syabya muminyereri buyira.
27 Oyu yo amasako akanayako athi: ‘Lebaya! Ngathuma omukwenda waghe embere syawu, oyukendi kutheghekanirya enzira.’
28 Ngababwira, okwa bandu abosi ababuthawa n’abakali, sihali oyulengire Yohana, aliwe omuke kutsibu omo Bwami bw’elhubulha amulengire.”
29 (Abandu abosi n’abasolesya babere b’owa eki, mubabugha bathi Nyamuhanga athunganene, kundi babya ibabiribatizibwa omwa lhubatizo lhwa Yohana.
30 Aliwe Abafarisayo n’abasi ndeke Emighambo mubathaghendera okwa busondoli obo Nyamuhanga abaha, kundi Yohana s’iyo ababatizaya.)
31 “Neryo nanga linganisya abandu b’olhulengo olhu na bahi, kandi bali nga bahi?
32 Bali ng’abaana balere abikere omwa kathali abanemubirikirana bathi: ‘Muthwababuhira enyabulere, aliwe mumuthahotholha; muthwalira ekiriro ky’obulighe, aliwe mumuthalira.’
33 Kuthya, Yohana Omubatizya mwasa isyalirya muggati kutse erinywa evini, aliwe muthi, ‘Ali kw’embinga.’
34 Omughalha w’omundu abiryasa iniakalya n’erinywa, aliwe muthi: ‘Lebaya! Omulhume w’omururu kandi omuthamiri, omunywani w’abasolesya n’abakolha-nabi!’
35 Nomwabine, amenge akaminyikalha kw’athunganene omwa baana bagho abosi.”*
36 Neryo omughuma w’okwa Bafarisayo mwabera erihathikana Yesu athi ase alye haghuma nayu. Neryo mw’ingira omwa nyumba y’Omufarisayo, am’ikalha okwa meza.
37 Neryo lebaya! omukali oyuwabya asibwe omwa tawuni ng’omukolha-nabi mwaminya ngoku Yesu anemulira* omwa nyumba y’Omufarisayo, neryo mwaletha etsupa ye alabbasta ey’amaghutha aw’akakumba ndeke.
38 Omukali mw’ikalha ahali ebisandu bya Yesu, amalira n’eritsuka eribitsapya omwa misoni yiwe, neryo mwabisangulha omwa syonzwiri siwe. Kandi mwalyatsirira* ebisandu bya Yesu n’eribyuthako amaghutha aw’akakumba ndeke.
39 Omufarisayo oyuwakokaya Yesu abere alhangira eki, mwayibughako athi: “Omulhume oyu kwenene alhue ini muminyereri, angabere iniabiriminyerera omukali oyukamuthulhako oyu nga nindi kandi ng’ali athi, ngoku ni mukolha-nabi.”
40 Aliwe Yesu mwamusubirya athi: “Simoni, nganawithe eky’erikubwira.” Mwabugha athi: “Mukangirirya, kibughe!”
41 “Abalhume babiri babya mw’amabanza w’omubweki mulebe; omughuma abya mw’eribanza ery’esyodinari 500, aliwe owundi 50.
42 Babere balemwa erimuthuha, abosi mwabaghanyira. Neryo okwa babiri, nindi oyukendi mwanza kutsibu?”
43 Simoni mwasubirya athi: “Ngalengekanaya y’oyuwaghanyirawa sinene.” Mwamubwira athi: “Wamasubirya ndeke.”
44 Busana n’ekyo, mwakebera omukali n’eribwira Simoni athi: “Wamalhangira omukali oyu? Mung’ingira omwa nyumba yawu; muwuthethamba amaghetse w’erinaba okwa bisandu. Aliwe omukali oyu mwakatsapaya ebisandu byaghe omwa misoni yiwe n’eribisangulhua omwa syonzwiri siwe.
45 Siwuthanyilyatsirira*, aliwe omukali oyu, eritsuka aho ngalyingirira muno, syathaleka erilyatsirira* ebisandu byaghe.
46 Muwutheth’utha okwa muthwe waghe kw’amaghutha, aliwe omukali oyu mwak’utha okwa bisandu byaghe kw’amaghutha aw’akakumba ndeke.
47 Busana n’eki, ngakubwira, ebibi biwe, nomwabine bingyi, byamaghanyirwa, kundi mwakakanganaya olhwanzo lhunene. Aliwe oyukaghanyirawa bike, akakanganaya olhwanzo lhuke.”
48 Neryo mwabwira omukali athi: “Ebibi byawu byamaghanyirwa.”
49 Abo abya ikere nabo okwa meza mubatsuka eribwirana bathi: “Omulhume oyukaghanyira n’ebibi oyu nindi?”
50 Aliwe mwabwira omukali athi: “Erikirirya lyawu lyamakulhamya; wughende buholho.”
Emyatsi Ahikwa
^ Kinywe okwa kinywe “ekyusa.”
^ Kutse “esyongyimba esy’olhoberere ndeke.”
^ Kutse “ebikalhwiririramo.”
^ Kutse “inianikere okwa meza.”
^ kutse, “ekisi.”
^ Kutse “siwuthanyiha ekisi.”
^ Kutse “eriha ekisi.”
