Engulhu Yuwene Ngoku Yahandikawa na Luka 8:1-56
-
Abakali bakakwama Yesu (1-3)
-
Omukya w’omubibi (4-8)
-
Ekyaleka Yesu iniakolesya emikya (9, 10)
-
Omukya w’omubibi akasoborerawa (11-15)
-
Etara siyirikuningirawa (16-18)
-
Baghalha bobu Yesu na mama wiwe (19-21)
-
Yesu akahunaya ekiyagha (22-25)
-
Yesu akahighithira esyombinga sy’omwa syombunu (26-39)
-
Mwali wa Yairo; omukali akathulha okwa lhukimba lhwa Yesu (40-56)
8 Buthuku buke enyuma waho, Yesu mwaghenda omwa buli tawuni n’omwa buli kyalu akathulira n’erithulhughania engulhu yuwene ey’Obwami bwa Nyamuhanga. N’abigha Ikumi n’Ababiri babya ibane haghuma nayu,
2 kuthya n’abakali balebe ababya ibabirilhamibwa kw’emirimu mibi n’amalhwere: Maria oyuwabya akahulhwamo Magdalene, oyuwabya iniabirilhuako esyombinga musanju;
3 Yoana mukali wa Kuza, omwimaniri w’enyumba ya Herode; Suzana; n’abandi bakali bangyi ababya bakabawathikya omwa bindu byabu.
4 Neryo abandu bangyi babere babirihindana haghuma n’ababya bakamuhikako erilhua omwa buli tawuni, mwabakanirya omw’ikolesya omukya:*
5 “Omubibi mwayabiba embutho yiwe. Abere anemubiba, eyindi muyathoghera okwa musike w’enzira, yamalyathangirirwa, n’esyonyonyi sy’omwa kyanya syamalyayo.
6 Eyindi muyathoghera okwa lhukuka, yabere yabirilhasa, muyuma kundi sihabya amaghetse.
7 Eyindi muyathoghera omwa mahwa, n’amahwa awakulha haghuma nayo mwakusyayo.
8 Aliwe eyindi muyathoghera okwa muthaka owuwene, neryo yabere yalhasa, muyahethya ebighuma mirundi 100.” Abere abirikania emyatsi eyi, mwabugha athi: “Oyuwithe amathwe w’eriowa, owe.”
9 Aliwe abigha biwe mubamubulya omukya* oyu ng’akamanyisayaki.
10 Mwababwira athi: “Inywe mwabirilighirwa eriyitheghererya esyombitha esibuyirire esy’Obwami bwa Nyamuhanga, aliwe okwa bandi siri omwa mikya,* neryo nomwakine indi banasamalire, sibangalhangira, kandi nomwakine indi banahulikirire, sibangakenga.
11 Omukya* akamanyisaya kino: Embutho ky’ekinywe kya Nyamuhanga.
12 Eyiri okwa musike w’enzira bababiriowa ekinywe, neryo Diabolo akasa n’erilhusya ekinywe ky’omwa mithima yabo nuku sib’ikiriraye bakalhamibwa.
13 Eyiri okwa lhukuka, babo omughulhu bakowa ekinywe, bakaky’angirira n’obutseme, aliwe sibawithe emirihi. Bak’ikiriraya ahabw’akathuku kake, aliwe omwa buthuku bw’erilengwako, bakathera.
14 N’eyathoghera omwa mahwa, aba bababiriowa ekinywe, aliwe amaghaniryo w’engebe, n’eby’obugaga, n’eby’eriyitsemesya eby’engebe eno bikabya bikabasamo, bakalhuaho ibakusir’ighuma, ibathakulha.
15 N’eyiri okwa muthaka owuwene, aba babakabya babiriowa ekinywe omwa muthima owuwene, bakakibika omo mithima n’erihethya ebighuma omw’iyiyinia.
16 “Sihali oyuk’akaya etara akakuningirayo kutse erihirayo omwisi sy’engyingo, aliwe akahirayo okwa muthaghalha w’etara nuku abak’ingiramo bangalhangira ekyakakalha.
17 Kundi sihali ekibisire ekithendi syalhangirwa, kutse sihali ekikuthire ndeke ekithendi syaminywa kandi ekithendi syakundulhwa.
18 Busana n’ekyo, mulebaye ndeke nga mukahulikirira muthi, kundi oyuwithe akendi sy’ongerwa bingyi, aliwe oyuthawithe, nibya n’eby’akalengekanaya athi awithe akendi syalhusibwa byoko.”
19 Neryo mama wiwe n’abaghalha babo mubasa eyo ali, aliwe mubathathoka erimuhikako busana n’obungyi bw’abandu.
20 Neryo omwatsi mwamuhikako athi: “Mama wawu n’abaghalha benyu ban’imene eyihya, bakanza erikulholhako.”
21 Mwabasubirya athi: “Mama waghe n’abaghalha bethu b’aba, abak’owa ekinywe kya Nyamuhanga n’erikighenderako.”
22 Kiro kighuma iyo n’abigha biwe mubasambira omo bwathu, neryo mwababwira athi: “Muyire thusokere okwa wundi musirya w’engetse.” Neryo mubahongoka.
23 Aliwe babere banemughenda, mwaghotsera. Neryo ekiyagha kinene mukyahitha okwa ngetse, n’obwathu bwabo mubwatsuka eryusulhamo amaghetse neryo mubabya omwa kabi.
24 Neryo mubayamubukya n’eribugha bathi: “Mukangirirya, Mukangirirya, thwamakwa!” Neryo mwahangana, amakunga ekiyagha, n’amaghetse awabirighunga mwathekana, neryo muhabya akahunerero.
25 Neryo mwababwira athi: “Erikirirya lyenyu liri hayi?” Aliwe mububaha kutsibu kandi mubasweka, n’eriyibughako bathi: “Oyu nindi na? Kundi akakunga ebiyagha n’amaghetse nabyo ibyamw’owa.”
26 Neryo mubaghenda okwa wundi musirya w’engetse omwa kitsweka ky’Abagerasene, ekisamalirene ne Galilaya.
27 Yesu abere alhua omo bwathu, omulhume oyuliko embinga mwalhua omwa tawuni amasa eyo ali. Abya iniamabirighunza buthuku isyalyambalha, kandi isyal’ikalha omwa nyumba, aliwe iniak’ikalha eyiri amasinda.*
28 Abere alhangira Yesu, mwalhaka n’eriwa ahisi embere siwe, kandi omwa mulenge munene mwabugha athi: “Yesu, Mughalha wa Nyamuhanga ow’Endatha Kutsibu, wukanyisonda kwaki? Ngakulemba-lemba, siwunyithoghothaye.”
29 (Kundi Yesu abya inianemukunga ekirimu kibi athi kilhue omwa mulhume. Ikikamuwirira mirundi mingyi, kandi iniakabera eribohwa omwa syongyeghere n’omwa syombinga n’eribya inianatheghibirwe, aliwe iniakatsutsanga eby’abohirwemo n’embinga iyikamuthwalha omo myanya eyithemo abandu.)
30 Yesu mwamubulya athi: “Erina lyawu ni wendi?” Mwasubirya athi: “Lijoni,”* kundi esyombinga nyingyi syabya isyabirimwingiramo.
31 Kandi musyabera erimulemba-lemba sithi isy’abugha athi sighende omwa kyuna kiri-kiri ekithawithe kabuno.
32 Habya ekihangulho ky’esyombunu nene isinemulira okwa kithwe, neryo esyombinga musyamulemba-lemba sithi asilighire singire omwa syombunu, nayu mwasilighira.
33 Neryo esyombinga musyalhua omwa mulhume syam’ingira omwa syombunu, n’ekihangulho mukyathibitha erihika okwa mukunguli w’engetse, syamawamo n’eriholeramo.
34 Aliwe abalisya babere balhangira ekyamabya, mubathibitha bamayabwira abali omwa tawuni n’omwa kyalu.
35 Neryo abandu mubayalebya ekyabere. Mubasa eyiri Yesu, bameya omulhume oyo esyombinga syabya isyabirilhuamo, inianambere kandi iniabirilhama, inian’ikere ahali ebisandu bya Yesu, neryo mububaha.
36 Abayilhangirira eki mubababwira omulhume oyulhueko embinga ng’alyalhama athi.
37 Neryo abandu bangyi erilhua omwa kitsweka ky’Abagerasene mubabwira Yesu bathi alhue ewabo, kundi babya ibabiryubaha kutsibu. Neryo mwaya omo bwathu nuku aghende.
38 Aliwe omulhume oyuwabya iniabirilhuako esyombinga mwamulemba-lemba athi akaghenda nayu, aliwe Yesu mwaghana, amamubwira athi:
39 “Suba eka, kandi wulhole embere eribwira abandi okwa ekya Nyamuhanga abirikukolera.” Neryo mwaghenda, amathulhughania omwa tawuni eyosi ekya Yesu abya iniamabirimukolera.
40 Yesu abere asubulha, abandu bangyi mubamwangirira ndeke, kundi abosi babya ibanamulindirire.
41 Neryo lebaya! omulhume oyukahulhawamo Yairo mwasa; omulhume oyu abya mukulhu w’omwa sinagogi. Neryo mwawa embere sya Yesu n’eritsuka erimulemba-lemba athi ase ewiwe,
42 kundi mwali wiwe musa,* oyuwabya w’emyaka nga 12, abya iniakayaholha.
Yesu abere anemughenda, ekingungu ky’abandu mukyayihathathania aho ali.
43 Neryo habya omukali oyuwabya iniamabirighunza emyaka 12 inianemulhuako omusasi, kandi abya isyali athabana omundu wosi-wosi oyukamulhamaya.
44 Mwasira enyuma amathulha okwa musike w’olhukimba lhwiwe, neryo aho n’aho erisenda ly’omusasi liwe mulyaleka.
45 Neryo Yesu mwabulya athi: “Oyuwamanyithulhako nindi?” Abosi babere banemuyighana, Petero mwabugha athi: “Mukangirirya, hali ekikukumano ky’abandu kandi banemuyihathathania aho wuli.”
46 Aliwe Yesu mwabugha athi: “Omundu amanyithulhako, kundi namaminya ngoku obuthoki bwamanyilhuako.”
47 Omukali abere aminya ngoku babirimulhangira, mwasa inianemutukumira neryo amakukama embere sya Yesu n’eribughira embere sy’abandu abosi ekiryaleka iniamuthulhako kandi ngoku mwakalhuaho inialhama.
48 Aliwe Yesu mwamubwira athi: “Mwali waghe, erikirirya lyawu lyamakulhamya. Wughende buholho.”
49 Abere akinabugha, omuthumwa erilhua ew’omukulhu w’omwa sinagogi mwasa, n’eribugha athi: “Mwali wawu amabiriholha; wuleke erithasyasurusuthya Omukangirirya.”
50 Yesu abere owa eki, mwamubwira athi: “Siwubahe, ekikulhu wubye n’erikirirya, akendi lhama.”
51 Abere ahika okwa nyumba, mwathalighira owosi-wosi ak’ingiramo nayu, aliwe mw’ingiramo na Petero, Yohana, Yakobo, na thatha na mama w’omusika.
52 Aliwe abandu bosi babya ibanemulira n’eriyihumbanga busana n’obulighe. Neryo mwabugha athi: “Muleke erilira, kundi syaholire aliwe aghotsere.”
53 Neryo mubatsuka erimuseka lhukukunia kundi babya ibanasi kw’abiriholha.
54 Aliwe mwamuhamba okwa byalha n’erimubirikira athi: “Mwana, hangana!”
55 Neryo mwasuba, n’erilhuaho iniahangana, neryo Yesu mwabugha athi bamuhe eky’erirya.
56 Ababuthi b’omwana mubatsema kutsibu, aliwe mwababwira athi isibabwira mundu wosi-wosi ekyabere.
Emyatsi Ahikwa
^ Kutse “eky’erileberyako.”
^ Kutse “eky’erileberyako.”
^ Kutse “eby’erileberyako.”
^ Kutse “eky’erileberyako.”
^ Kutse “amasinda w’eryibukwa.”
^ Erisoborera, “Lebaya Matayo 26:53, omwatsi ahikwa.”
^ Kinywe okwa kinywe, “ekyusa.”
