Engulhu Yuwene Ngoku Yahandikawa na Luka 9:1-62
-
Erikumi n’Ababiri bakahebawa obusondoli bw’erithulira (1-6)
-
Herode akakwa obuba bunene busana na Yesu (7-9)
-
Yesu akalisaya abandu 5,000 (10-17)
-
Petero akaminyerera Kristo (18-20)
-
Olhuholho lhwa Yesu lhukalhaghulhawa (21, 22)
-
Eribya mwigha w’okwenene (23-27)
-
Erihindukibwa lya Yesu (28-36)
-
Omulhwana oyuli kw’embinga akalhamibawa (37-43a)
-
Olhuholho lhwa Yesu lhukathasyalhaghulhawa (43b-45)
-
Abigha bakakakalhukana busana n’obukulhu (46-48)
-
Oyuthelhwa nethu ali okwa lhuhandi lhwethu (49, 50)
-
Ekyalu ky’Abasamaria kikaghana Yesu (51-56)
-
Ngoku wanga kwama Yesu (57-62)
9 Neryo Yesu mwabirikira abigha Ikumi n’Ababiri n’eribaha obuthoki n’ehamuli ey’erihighitha esyombinga syosi n’erilhamya amalhwere.
2 Neryo mwabathuma eriyathulhughania Obwami bwa Nyamuhanga n’erilhamya,
3 kandi mwababwira athi: “Simuheke kindu ekyosi-kyosi busana n’olhughendo, mbulha ni mutso kutse ehisaho hy’ebyalya kutse emiggati kutse esyosente;* nomusyangabya esyongyimba ibiri.*
4 Aliwe omuyi wosi-wosi owamukahikako, mubyeko erihika aho mukendilhwirako.
5 Kandi abandu bamathendi bakokya, mukalhua omwa tawuni eyo, mukunguthe etsutsu eyiri okwa bisandu byenyu busana n’eribaha obwema.”
6 Neryo babere bakahongoka mubahika omwa buli kyalu erithulhughania engulhu yuwene n’erilhamya abandu ehosi-hosi.
7 Neryo Herode* omuthabali w’ekitsweka mw’owa ebyosi ebinemubya, neryo mwakwa obuba bunene kundi abandi babya bakabugha bathi Yohana abirilhubukibwa okwa baholi,
8 aliwe abandi ibakabugha bathi Eliya abiributhuka, n’abandi bathi omughuma w’okwa baminyereri abakera abirilhubuka.
9 Herode mwabugha athi: “Yohana munamuthwako omuthwe. Neryo oyo ng’owako emyatsi ng’eyi nindi?” Neryo mwanza amulholeko.
10 Neryo abakwenda babere basubulha mubabwira Yesu y’ebyosi ebyo babirikolha. Busana n’ekyo mwabathwalha eyithe abandu omwa tawuni eyikahulhawamo Betesaida.
11 Aliwe abandu bangyi babere baminya eki, mubamukwama. Kandi mwabathangirira ndeke n’eritsuka eribakangirirya okwa Bwami bwa Nyamuhanga, n’erilhamya ababya bakayithagha erilhamibwa.
12 Neryo obuthuku bwabya ibukayira. Abigha Ikumi n’Ababiri mubasa n’erimubwira bathi: “Bwira abandu wuthi baghende, nuku banga ghenda omwa byalu ebiri hakuhi-hakuhi eribana ah’erikesya n’ebindi biyithawa, kundi thuli eyithe bandu.”
13 Aliwe mwababwira athi: “Inywe mubahe eky’erirya.” Mubabugha bathi: “Thuwithe emiggati ithano n’esiswe ibiri bisa, mbwino ithunalyayaghulira abandu bosi aba b’ebyalya.”
14 Habya abalhume nga 5000. Aliwe mwabwira abigha biwe athi: “Mubabwire muthi b’ikale ahisi omwa syogurupu sy’abandu makumi athano-athano.”
15 Nabo mubakolha ekyo n’eribwira abosi bathi b’ikale ahisi.
16 Abere imya emiggati ithano n’esiswe ibiri, mwalhalhamira elhubulha n’eritsumulhabyo. Neryo mwatsutsangayo n’eritsuka erihayo abigha nuku baghabireyo abandu bangyi.
17 Neryo abosi mubalya bam’ughutha, kandi mubasorokya ebyasaka, ebithiri 12 by’ebitahangukirya.
18 Enyuma waho, abere anemusaba iniane iyuwene, abigha biwe mubasa aho ali neryo amababulya athi: “Abandu bakabugha bathi ningye ndi?”
19 Mubamusubirya bathi: “Yohana Omubatizya, aliwe abandi bathi, Eliya, n’abandi bathi omughuma w’okwa baminyereri bakera abirilhubuka.”
20 Neryo mwababulya athi: “Aliwe inywe, mukabugha muthi ningye ndi?” Petero mwasubirya athi: “Kristo wa Nyamuhanga.”
21 Neryo omw’ibakongomerera mwababwira athi eki isibakibwira owosi-wosi,
22 aliwe mwabugha athi: “Omughalha w’omundu atholere iniaghalhwa kutsibu kandi abakulhu n’abahereri bakulhu n’abakangirirya b’emighambo bakendi mughana kandi in’ithibwa, n’okwa kiro kyakasathu inialhubuka.”
23 Neryo mwalholha embere eribwira abosi athi: “Omundu amanza erinyikwama, ayighane n’eriheka omuthi wiwe w’amaghali* obuli kiro n’erilholha embere erinyikwama.
24 Kundi oyukanza erilhamya engebe yiwe akendi syaheryayo, aliwe oyukaheraya engebe yiwe busana naghe y’oyukendi syalhamyayo.
25 Omo kwenene, ni kibuya kyahi ekya omundu angabana amathunga ebyosi eby’ekihugho aliwe akaherya engebe yiwe kutse akatsandalikaniayo?
26 Kundi oyukakwa esisoni busana naghe na busana n’ebinywe byaghe, Omughalha w’omundu akendi syakwa esisoni busana n’omundu oyo akasa omwa lhukengerwa lhwiwe n’olhwa Thatha n’olhwa bamalaika ababuyirire.
27 Aliwe kwenene ngababwira, hano hane abathendi syaholha bathe balhangira Obwami bwa Nyamuhanga.”
28 Neryo enyuma w’ebiro nga munani alibughire ebinywe ebi, Yesu mwaghenda haghuma na Petero, Yohana, na Yakobo bamahethukira okwa kithwe eriyasaba.
29 Neryo abere anemusaba, obusu bwiwe mubwahinduka n’esyongyimba siwe musyabya sy’enzeru n’erikangabasania.
30 Neryo lebaya! abalhume babiri babya ibanemukania nayu; babya ini Musa na Eliya.
31 Mubabuthuka ibane n’olhukengerwa kandi mubatsuka erikania okw’ighenda liwe eryo abya iniakayaberereraya e Yerusalemu.
32 Neryo Petero n’abo abya nabo babya bakwire othulho thunene aliwe babere bahwamo othulho mubalhangira olhukengerwa lhwiwe n’abalhume babiri iban’imene haghuma nayu.
33 Neryo aba babere banemulhua aho ali, Petero mwabwira Yesu athi: “Mukangirirya, ni lhusunzo okw’ithwe eribya hano. Leka thuhimbe esyohema isathu, eyawu, eya Musa, n’eya Eliya.” Petero mwathaminya ebyo akabugha.
34 Aliwe abere anemubugha emyatsi eyi, muhabya ekithu neryo kyamatsuka eribaswika. Babere b’ingira omwa kithu, mububaha.
35 Neryo omulenge mwalhua omwa ekithu, athi: “Oyu ni Mughalha waghe, oyuwabirisombolhwa. Mumuhulikirire.”
36 Omulenge abere owibwa, mubalhangira Yesu iniane iyuwene. Kandi okwa biro ebyo mubathabwira mundu owosi-wosi y’ekyosi-kyosi okwa myatsi eyo balhangira.
37 Ekiro ekyakwamako bakalhua okwa kithwe, ekingungu ky’abandu mukyamuhikako.
38 Neryo lebaya! omulhume mwabirikirira omwa kingungu ky’abandu athi: “Mukangirirya, ngakulemba-lemba, asa wulebaye mughalha waghe, kundi ya mwana musa ngawithe.
39 Neryo lebaya! ekirimu kikamuwirira, neryo kitsumbukirania inialhaka, kandi ikyamukangararya, iniaburura, kandi sikirimulhuako athethahonongoka.
40 Mungalemba-lemba abigha bawu indi bakihighithe aliwe mubakalemawa.”
41 Yesu mwabugha athi: “Inywe lhulengo olhuthawithe erikirirya kandi olhuthere, ngendi syalholha embere ingane nenyu erihika mughulhu wahi n’eribaghumisirizya? Letha mughalha wawu yo hano.”
42 Neryo abere anemuseghera hakuhi, embinga muyamughusa okwa kithaka n’erimukangararya nabi-nabi. Aliwe Yesu mwakunga ekirimu kibi, amalhamya omulhwana, neryo amamuha thatha wiwe.
43 Neryo abosi mubakukubalha busana n’amaaka manene wa Nyamuhanga.
Abosi babere banaswekire busana n’ebyosi ebyo aby’akakolha, mwabwira abigha biwe athi:
44 “Muhulikirire ndeke kandi mw’ibuke ebinywe bino, kundi Mughalha w’omundu akayaghoberibawa n’erihirwa omwa byalha by’abandu.”
45 Aliwe mubathayitheghererya ebyo aby’akabugha. Kundi okw’ibo byabya bibisire nuku sibabiyitheghereraye, kandi mubasagha erimubulya ebihambire okwa mwatsi oyu.
46 Neryo muhabya obuhaka omwakathi-kathi kabo omukulhu omw’ibo nga nindi.
47 Yesu abere abiriminya ebya bakalengekanaya omwa mithima yabo, mwimya omwana mulere amamw’imania aho ali,
48 neryo mwababwira athi: “Oyuk’angirira omwana mulere oyu omwa lina lyaghe, naghe akanyangirira; kandi oyukanyangirira ak’angirira n’Oyuwanyithuma. Kundi oyukayilhangira mwa muke omwa kathi-kathi kenyu inywe bosi oyo ya mukulhu.”
49 Yohana mwabugha athi: “Mukangirirya, muthwalhangire omundu akahighitha esyombinga omwa lina lyawu, kandi muthwalengireho erimukakirya, kundi syali thukwama.”
50 Aliwe Yesu mwamubwira athi: “Isimwalengaho erimukakirya, kundi oyuthalhwa nenyu ali okwa lhuhandi lhwenyu.”
51 Ebiro bya Yesu eby’erithwalhua elhubulha byabere binemuseghera hakuhi, mwathwamu erighenda e Yerusalemu.
52 Neryo mwathuma abathumwa embere siwe. Kandi mubaghenda bamahika omwa kyalu ky’Abasamaria eriyamutheghekera.
53 Aliwe mubathamwangirira, kundi abya iniabirithwamu erighenda e Yerusalemu.
54 Abigha Yakobo na Yohana babere balhangira eki, mubabugha bathi: “Mukama, wanzire ithwabirikira omuliro erilhua elhubulha erisyabathoghothya?”
55 Aliwe Yesu mwabinduka n’eribakunga.
56 Neryo mubaghenda omwa kindi kyalu.
57 Neryo babere bane omwa nzira ibanemughenda, omundu mulebe mwabugha na Yesu athi: “Ngendikukwama ahosi-hosi aho wukaya.”
58 Aliwe Yesu mwamubwira athi: “Esyoboha sinawithe amarubu n’esyonyonyi sinawithe esyonyuthu, aliwe Omughalha w’omundu syawithe n’ah’erihira omuthwe wiwe.”
59 Neryo mwabwira owundi athi: “Nyikwame.” Omulhume mwabugha athi: “Mukama, nyilighire ngatsuke eriyatsika thatha waghe.”
60 Aliwe mwamusubirya athi: “Wuleke abaholi batsike abaholi babu, aliwe iwe wughende wuyathulhughanaye Obwami bwa Nyamuhanga.”
61 N’owundi mwabugha athi: “Mukama, ngendi kukwama, aliwe wutsuke erinyilighira ngayalhaghe ab’ewaghe.”
62 Yesu mwamusubirya athi: “Sihali omundu oyukahamba okw’isuka eyikakurawa n’ende oyukakebera ebiri enyuma akatholera Obwami bwa Nyamuhanga.”
Emyatsi Ahikwa
^ Kinywe okwa kinywe, “efeza.”
^ Kutse “olhundi lhukimba.”
^ Ni bugha ambu, Herode Antipa. Lebaya Erisoborera Ebinywe.
