Engulhu Yuwene Ngoku Yahandikawa na Mariko 1:1-45
-
Yohana Omubatizya akathulira (1-8)
-
Olhubatizo lhwa Yesu (9-11)
-
Sitani akalenga oku Yesu (12, 13)
-
Yesu akatsuka erithulira e Galilaya (14, 15)
-
Abigha b’erimbere bakabirikirawa (16-20)
-
Ekirimu kibi kikahighithawa (21-28)
-
Yesu akalhamaya abangyi e Kapernaumu (29-34)
-
Erisaba iniane eyithe abandu (35-39)
-
Omuhagha akalhamibawa (40-45)
1 Enzuko y’engulhu yuwene eyihambire oku Yesu Kristo, Mughalha wa Nyamuhanga:
2 Ngoku omuminyereri Isaya anahandika athi: “(Lebaya! Ngathuma omukwenda waghe embere syawu,* oyukendi thegheka enzira yawu.)
3 Omulenge w’oyukabirikirira omo mbwarara athi: ‘Mutheghekanaye enzira ya Yehova! Muterekereraye esyonzira siwe.’”
4 Yohana Omubatizya abya omo mbwarara akathulira abandu athi batholere ibabatizibwa ng’ekiminyikalho ky’eriyisubamo busana n’erighanyirwa ebibi.
5 Neryo abandu bosi ab’omwa bulhambu bwe Yudea n’abosi abikere e Yerusalemu ibakaghenda eyo ali, kandi ibakabisulha amalholho wabo ahathe eribisirira, neryo iniababatizya* omwa Lhusi Yorodani.
6 Yohana iniakambalha olhukimba lhw’obweya bw’engamia n’omukabba w’olhuhu omwa mbindi yiwe, kandi iniakalya esyongyike n’obuki.
7 Kandi aby’akathulira athi: “Oyundengirye amaaka anemwasa enyuma syaghe, kandi singahikire n’okwa lhulengo lhw’eryunama ngaboholha emikoba y’esyongetha siwe.
8 Munababatizya omwa maghetse, aliwe iyo akendi syababatizya omwa mulimu abuyirire.”
9 Omwa biro ebyo, Yesu mwalhua e Nazareti ye Galilaya, eryasa eyiri Yohana nuku amubatizaye omwa Lhusi Yorodani.
10 Neryo abere akanahangana omwa maghetse n’erimana, mwalhangira olhubulha lhukakyungukalha, neryo omulimu mwamwandaghalirako ng’akalikuku n’erimw’ikirako.
11 N’omulenge mwalhua elhubulha athi: “Wuli Mughalha waghe, omwanzwa; ngakutsemera.”
12 Aho n’aho omulimu mwathwalha Yesu y’omo mbwarara.
13 Neryo mwabyayo ahabw’ebiro 40, Sitani akamulengako. Abyayo n’ebisoro by’omoli, aliwe abamalaika babya ibanemumuwathikya.
14 Neryo Yohana abere abirihambwa, Yesu mwaghenda e Galilaya, akathulha engulhu yuwene ya Nyamuhanga
15 athi: “Obuthuku obwahirawaho bwabiribererera, n’Obwami bwa Nyamuhanga bwabirihika hakuhi. Muyisubemo, kandi mw’ikiriraye engulhu yuwene.”
16 Abere anemulhaba okwa musike w’Engetse ye Galilaya, mwalhangira Simoni na mughalha wabo ye Anderea ibanemughusa amatimba wabo w’omwa ngetse, kundi babya basohi.
17 Neryo Yesu mwababwira athi: “Mungwame, ngendibayiramo basohi b’abandu.”
18 Neryo mubalhuaho ibasighania amatimba wabo n’erimukwama.
19 Abere aghenda embere hake, mwalhangira Yakobo na Yohana baghalha ba Zebedayo ibane omo bwathu bwabo bakakokothya amatimba wabu,
20 neryo ahathe erilindirirya, mwababirikira. Neryo mubasigha thatha wabo ya Zebedayo y’omo bwathu iniane n’abakoli, bamakwama Yesu.
21 Neryo mubaghenda e Kapernaumu.
Esabato yabere yikanatsuka, mwaghenda omwa sinagogi n’eritsuka erikangirirya.
22 N’abandu mubasweka kutsibu busana n’emibere yiwe y’erikangirirya, kundi mwabakangirirya ng’oyuwithe ehamuli, butsira ng’abakangirirya b’emighambo.
23 Omwa sinagogi yabo mwabya omulhume oyuliko amaaka w’ekirimu kibi, neryo mwalhaka athi:
24 “Wukasyathusondaya kwaki, Yesu we Nazareti? Wukasyathuthoghothaya? Nganasi kwenene nga wulindi, Omubuyirire wa Nyamuhanga!”
25 Aliwe Yesu mwakikunga athi: “Ibya bukuthu, kandi mulhueko!”
26 Neryo ekirimu kibi kyabere kyabirikangararya omulhume n’erilhaka kutsibu, mukyamulhuako.
27 Abandu mubasweka kutsibu n’eritsuka eriyibughako bathi: “Eki niki? Eyi ka ni ngangirirya nyihya-nyihya! Awithe n’obuthoki bw’erithibitha okwa mirimu mibi, nayu iyamw’owa.”
28 Neryo omwatsi owamuhambireko mwalhuaho inialhandaghana omwa kitsweka kyosi kye Galilaya.
29 Neryo mubalhua omwa sinagogi bamaghenda ewa Simoni na Anderea ibane na Yakobo na Yohana.
30 Neryo nyoko-byalha wa Simoni abya inianakesirye inialhwere erihuhana kw’omubiri, nabo mubalhuaho ibabwira Yesu ngoku alhwere.
31 Yesu abere ahika aho ali, mwamuhamba okwa byalha n’erimuhangania. Ekihuhania kiwe mukyalhama, neryo amatsuka eribawathikya.
32 Erigholho lyabere lyahika, eryuba iryamabirilenga, abandu mubatsuka erilethera Yesu y’abandu bosi ababya balhwere n’ababyako esyombinga;
33 n’abandu abosi b’omwa tawuni mubayihindania okwa lhukyo.
34 Neryo mwalhamya abangyi ababya balhwere amalhwere muthina-muthina, n’erihighitha esyombinga nyingyi, aliwe mwathalighira esyombinga erikania, kundi isinamwasi ku ni Kristo.*
35 Omwa ngyakya-ngyakya, iyikine omwirimya, mwahangana amahulhukira eyihya n’erighenda eyithe abandu, neryo eyo, mwatsuka erisaba.
36 Aliwe Simoni n’abo abya nabo mubamusondya
37 neryo mubamubana, n’erimubwira bathi: “Obuli mundu anemukusondya.”
38 Aliwe mwababwira athi: “Thughende ehandi, omwa syotawuni esiri hakuhi, nuku ngayathulire n’eyo, kundi eki ky’ekyaleka ingasa.”
39 Neryo mwaghenda, amayathulira omwa syosinagogi syabo erithimba omwa Galilaya yosi n’erihighitha esyombinga.
40 Neryo omuhagha mwasa, amamulemba-lemba nibya inianakukamire, n’eribugha athi: “Wamabya iwunanzire, iwukendi nyilhamya.”
41 Busana n’ekyo, Yesu mwamukwira obulighe, amananulha okuboko, amamuthulhako, n’eribugha athi: “Ngananzire! Wulhamibawe.”
42 Aho n’aho ebihagha biwe mubyalhama, neryo am’uwana.
43 Neryo mwamubwira athi aghende kandi mwamukongomerera,
44 athi: “Isiwabwira owosi-wosi, aliwe wughende wuyayikangaye okwa muhereri kandi wuheyo ebya Musa alhaghira busana n’erilhama lyawu, eribaha obwema.”
45 Aliwe omulhume abere alhua aho, mwatsuka erithulhagho n’erilhalhaniagho, neryo Yesu mwabya isyanga thasyathoka er’ingira omwa tawuni kinyamwisi, aliwe mwabya omwa myanya eyithemo abandu. Nomwabine abandu mubabera eriasa eyo ali erilhua okwa syombande syosi.
Emyatsi Ahikwa
^ Kinywe kwa kinywe, “embere sy’obusu bwawu.”
^ Kutse “erilubba.”
^ Kutse obundi, “ibanasi iyo nga nindi.”
