Engulhu Yuwene Ngoku Yahandikawa na Mariko 10:1-52
-
Obutheke n’erikomolha (1-12)
-
Yesu akatsumulha abaana (13-16)
-
Ekibulyo ky’omulhume omugaga (17-25)
-
Eriyithalya okwa bindi busana n’Obwami (26-31)
-
Olhuholho lhwa Yesu lhukathasyalhaghulhawa (32-34)
-
Erisaba lya Yakobo na Yohana (35-45)
-
Yesu endongolya y’abangyi (45)
-
-
Baratimayo endimethime akalhamibawa (46-52)
10 Mwalhua eyo amasoka olhusi Yorodani, amahika okwa mithano ye Yudea, kandi abandu mubayihindania aho ali. Kandi ngoku anabya abeghere erikolha, mwatsuka eribakangirirya.
2 N’Abafarisayo mubasa, bakanza erisyamulengako, neryo mubamubulya nga kinatholere omulhume erikomolha mukali wiwe.
3 Mwabasubirya athi: “Musa mwabalhaghira athiki?”
4 Mubabugha bathi: “Musa mwalighira eky’erihandikira omukali y’ebaruha y’erimuthibithako n’ey’erimukomolha.”
5 Aliwe Yesu mwabasubirya athi: “Abahandikira ebi busana n’emithima yenyu eyikalire.
6 Aliwe eritsuka okw’ihangika, ‘Mwahangikabo omulhume n’omukali.
7 Busana n’enzumwa eyi, omulhume asyasigha thatha wiwe na mama wiwe,
8 n’ababiri basyabya mubiri mughuma,’ neryo ibabya isibakiri babiri aliwe mubiri mughuma.
9 Busana n’ekyo, ekya Nyamuhanga abirimathania haghuma, sihabye omundu oyukakighabulha.”
10 Kandi babere bane omwa nyumba, abigha mubatsuka erimubulya okwa mwatsi oyo.
11 Mwababwira athi: “Oyukakomolha mukali wiwe akathahya owundi, akabya iniamasingira,
12 kandi omukali amasigha mwira wiwe* akayathahibwa n’owundi mulhume, akabya iniamasingira.”
13 Neryo abandu mubatsuka erilethera Yesu y’abaana balere nuku abahambeko, aliwe abigha mubabakunga.
14 Yesu abere alhangira eki, mwahithana n’eribabwira athi: “Muleke abaana balere base okw’ingye; simubakakiraye, kundi Obwami bwa Nyamuhanga ni bw’abali ng’abo.
15 Kwenene ngababwira, oyuthy’angirira Obwami bwa Nyamuhanga ng’omwana mulere syendi syingira mubo nahake.”
16 Neryo mwimya abaana, amatsuka eribatsumulha, omw’ibahirako ebyalha.
17 Abere anemughenda, omulhume mwasa akathibitha eyo ali n’erikukama embere siwe n’erimubulya athi: “Mukangirirya mubuya, ngatholere ingakolhaki nuku ngabane engebe y’erikotha?”
18 Yesu mwamusubirya athi: “Busana naki wukanyahulhamo mubuya? Omubuya ni mughuma, Nyamuhanga.
19 Wunasi ebihano: ‘Isiwitha, isiwasingira, isiw’iba, isiwabugha amabehi, isiwanyegha, wusikaye thatha wawu na mama wawu.’”
20 Omulhume mwamubwira athi: “Mukangirirya, ebyosi ebi nabiribya inganemubighenderako eritsuka bulere.”
21 Yesu mwamusamalira kandi mwamwanza n’erimubwira athi, “Wubulirweko kindu kighuma: Wughende wughulhaye ebyo wuwithe n’eriha banakwa, neryo wukendibya n’eby’obughuli omwa lhubulha; neryo wase wunyikwame.”
22 Aliwe omulhume mwayowa nabi neryo mwaghenda inianalirikene, kundi aby’awithe bindu bingyi.
23 Yesu abere abirithimbya ameso, mwabwira abigha biwe athi: “Ka kikendi syakalira abawithe esyosente eryingira omo Bwami bwa Nyamuhanga!”
24 Aliwe abigha mubasweka busana n’ebinywe biwe. Neryo Yesu mwabugha athi: “Baana, ka kikalire eryingira omo Bwami bwa Nyamuhanga!
25 Kyolhobire engamia erilhaba omwa kuna k’enginzo kwilhaba omugaga eryingira omo Bwami bwa Nyamuhanga.”
26 Kandi mubongera erisweka kutsibu n’erimubwira* bathi: “Nindi oyuwangathoka erilhamibwa?”
27 Yesu mwabathungerera n’eribugha athi: “Okwa bandu sikithokekene aliwe kwa bithe bithya oku Nyamuhanga, kundi oku Nyamuhanga emyatsi yosi yithokekene.”
28 Petero mwatsuka eribugha nayu athi: “Lebaya! Thwabirisighania ebyosi n’erikukwama.”
29 Yesu mwabugha athi: “Kwenene ngababwira, sihali oyuwabirisighania enyumba kutse baghalha babu kutse bali babu kutse mama kutse thatha kutse abaana kutse ebithaka busana naghe na busana n’engulhu yuwene
30 oyuthendi syabanabyo emirundi 100 omwa mughulhu ono—amanyumba, baghalha babu, bali babu, abamama, abaana, n’ebithaka, haghuma n’eriendereribwa—n’omwa buthuku obukasa, engebe y’erikotha.
31 Aliwe abangyi ab’erimbere bakendi syabya b’erighunzerera n’ab’erighunzerera bakendi syabya b’erimbere.”
32 Neryo babya ibane omwa nzira eyikahethukira e Yerusalemu, aliwe Yesu abya iniane embere syabo, neryo mubasweka, aliwe ababya babakwamire mubatsuka eryubaha. Kandi Yesu mwahengeka abigha Ikumi n’Ababiri n’eritsuka eribabwira ebyosi ebyabya ibikayamubyako:
33 “Lebaya! Thukaghenda e Yerusalemu, n’Omughalha w’omundu akendihirwa omwa byalha by’abahereri bakulhu n’abakangirirya b’emighambo. Bakendi mutswera olhw’erikwa n’erimuhira omwa byalha by’ab’ebihanda,
34 nabo bakendi musekererya, n’erimuthwirako amathande n’erimuswirya n’erimw’itha, aliwe enyuma w’ebiro bisathu, akendi lhubuka.”
35 Yakobo na Yohana, baghalha ba Zebedayo, mubamuhikako n’erimubwira bathi: “Mukangirirya, thwanzire iwathukolera ekyosi-kyosi ekyathukakusaba.”
36 Mwababwira athi: “Mwanzire ingabakoleraki?”
37 Mubamusubirya bathi: “Wuthulighire erisyikalha, omughuma okwa byalha byawu by’amali n’owundi okwa by’amalembe, omwa lhukengerwa lhwawu.”
38 Yesu mwababwira athi: “Simwasi ebya mukasaba. Mwangananywa ekikopo ekyo nganywa kutse eribatizibwa omwa lhubatizo olhwa ngabatizibawamo?”
39 Mubamusubirya bathi: “Ee.” Neryo Yesu mwababwira athi: “Ekikopo ekyo nganywa mukendi syakinywa, n’olhubatizo olhwa ngabatizibawamo, mukendi syabatizibwa mulho.
40 Aliwe s’ingye ngathwamu nga nindi oyukendi sy’ikalha okwa byalha byaghe by’amali kutse eby’amalembe, aliwe abakendi sy’ikalhako, b’abo ababiritheghekerwabo.”
41 Abandi bigha ikumi babere bowa ekyo, mubahithana oku Yakobo na Yohana.
42 Aliwe Yesu mwababirikira n’eribabwira athi: “Munasi ngoku abakabya nga* bakathabalha ebihanda bakabithabalhako n’abakulhu babo babawitheko ehamuli.
43 Inywe simutholere mukabya muthya; aliwe oyuwanzire eribya mukulhu omwakathi-kathi kenyu atholere iniabya mukoli wenyu,
44 n’oyuwanzire eribya w’erimbere omwakathi-kathi kenyu atholere iniabya mukobe w’abosi.
45 Kundi nibya, Omughalha w’omundu asa, isi busana n’erikolerwa aliwe erikolha n’erihayo engebe yiwe ng’endongolya busana n’abandu bangyi.”
46 Neryo mubasa e Yeriko. Aliwe iyo n’abigha biwe n’abandi bandu babere bakalhua e Yeriko, Baratimayo (mughalha wa Timayo), endimethime oyukasabiriraya, abya inian’ikere okwa nzira.
47 Abere owa ku ni Yesu Omunazareti, mwatsuka eribirikira omwa mulenge munene athi: “Mughalha wa Dawudi, Yesu, ngwathikaye!”
48 Neryo abangyi mubatsuka erimukunga, erimubwira bathi abye bukuthu, aliwe mwongera eribirikira athi: “Mughalha wa Dawudi, ngwathikaye!”
49 Neryo Yesu mwimana n’eribugha athi: “Munyibirikirireyo.” Neryo mubabirikira omulhume endimethime, n’erimubwira bathi: “Sika! Hangana; anemukubirikira.”
50 Neryo mwaghusa esyongyimba siwe, amahangana lhuba-lhuba n’erighenda eyiri Yesu.
51 Neryo Yesu mwamubulya athi: “Wanzire ingakukoleraki?” Omulhume endimethime mwamusubirya athi: “Rabboni,* libulha ameso waghe.”
52 Yesu mwamubwira athi: “Ghenda. Erikirirya lyawu lyamakulhamya.” Aho n’aho ameso wiwe mwalibukalha, neryo mwatsuka erimukwama omwa nzira.
Emyatsi Ahikwa
^ Kutse, “erikomolha.”
^ Kutse obundi, “eribwirana.”
^ Kutse “abakaminyawa nga.”
^ Kikamanyisaya “Mukangirirya.”
