Engulhu Yuwene Ngoku Yahandikawa na Mariko 11:1-33
11 Babere bakayahika e Betefage ne Betania okwa Kithwe ky’Emizaituni hakuhi ne Yerusalemu, mwathuma ababiri b’okwa bigha biwe
2 n’eribabwira athi: “Mughende omwa kyalu ekya mulhangire, mukendibya mukanahikayo, mukendyeyayo ekyana ky’epunda ekithe kyathikalhako mundu ikinahangire. Mukihangule mukilethe hano.
3 Neryo omundu amababulya athi, ‘Busana naki mukakolha eki?’ imwamubwira muthi, ‘Omukama akakiyithagha, kandi akendilhuaho iniakisubulya.’”
4 Neryo mubaghenda bam’eya ekyana ky’epunda ikinahangire okwa lhukyo, eyihya okwa nzira, neryo mubakihangulha.
5 Aliwe abaghuma b’okwa babya bimeneho mubababulya bathi: “Busana naki mukahangulha ekyana ky’epunda?”
6 Mubababwira ebya Yesu analyababwira, neryo mubabalighira.
7 Neryo mubalethera Yesu y’ekyana ky’epunda, mubakihirako esyongyimba syabo, nayu mwakikalhako.
8 N’abangyi mubasanza esyongyimba syabo sy’omwa nzira, aliwe abandi mubathwa ebikoma omwa malima.
9 Neryo ababya embere n’ababya enyuma mubabera eribirikira bathi: “Thukakusaba, wulhamaye! Ali n’omughisa oyukasa omwa lina lya Yehova!
10 Obwami bwa thatha wethu Dawudi obukayasa buli n’omughisa! Thukakusaba, wulhamaye, iwe wuli endatha kutsibu!”
11 Neryo Yesu mwahika e Yerusalemu, am’ingira omwa hekalhu, neryo mwasamalira obuli kindu, aliwe kundi bwabya ibwabirira, mwalhuayo amaya e Betania haghuma n’abigha Ikumi n’Ababiri.
12 Ekiro ekyakwamako, babere bakalhua e Betania, mwakwa enzalha.
13 Neryo mwalhangirira haali omuthi w’omuthini inianeko ebikoma, neryo mwayalebya ngamune ebighuma. Aliwe abere akahika kugho, mw’eya isimuliki, ikuli ebikoma bisa, kundi sikyabya kirimo ky’emithini.
14 Neryo mwabwiragho athi: “Isihasasyabya n’oyukakukotholhako ekighuma na kera.” N’abigha biwe babya ibanahulikirire.
15 Neryo mubasa e Yerusalemu. Eyo mwingira omwa hekalhu n’eritsuka erithibitha okwa bakaghuliraya omwa hekalhu n’erighuliramo, kandi mwakubbungulha ehimeza hy’abahingisya b’esyosente n’ebithumbi by’abakaghulhaya ehirikuku,
16 aliwe mwathalighira owosi-wosi akaheka ekindu ky’omwa hekalhu.
17 Abya inianemubakangirirya n’eribabwira athi: “Mbwino sikihandikire kithi, ‘Enyumba yaghe yasyahulhwamo enyumba y’erisabiramu busana n’ebihanda byosi’? Aliwe inywe mwabirikolhayo mo mwangalhu w’abibi.”
18 Neryo abahereri bakulhu n’abakangirirya b’emighambo mub’owa ekyo, neryo mubatsuka erisondya ngoku bangamw’itha; babya bakamusagha, kundi abandu abosi ibakasweka busana n’erikangirirya liwe.
19 Ekiro ekyo, bwabere bwahika erigholho, mubalhua omwa tawuni.
20 Aliwe omwa ngyakya-ngyakya babere bakalhaba, mubeya omuthi w’omuthini iniabiryuma eritsuka okwa mirihi.
21 Petero abere ibuka ebyabughawa, mwabugha athi: “Rabbi, lebaya! omuthi w’omuthini ogho wathakira abiryuma.”
22 Yesu mwabasubirya athi: “Mw’ikiriraye Nyamuhanga.
23 Kwenene ngababwira, owosi-wosi oyukabwira ekithwe eki athi, ‘Yikule aho wuyighuse omwa ngetse,’ kandi akathendi thika-thika omwa muthima wiwe, aliwe akabya n’erikirirya ngoku eby’abiribugha bikendibya, ibikendibya.
24 Ky’ekikaleka ingababwira nyithi, ebyosi ebyo mukasaba n’eribulya, mw’ikiriraye ku mwabirihebwabyo, kandi mwasyabanabyo.
25 Kandi omughulhu muk’imana mukasaba, mughanyire owosi-wosi oyuwabiribasoberya, nuku Thatha wenyu oyuli elhubulha nayu asyabaghanyira ebibi byenyu.”
26 ——
27 Kandi mubasa e Yerusalemu. Neryo Yesu abere anemulhaba omwa hekalhu, abahereri bakulhu, abakangirirya b’emighambo, n’abakulhu mubasa
28 n’erimubulya bathi: “Wukakolha emyatsi eyi omwa buthoki bwandi? Kutse oyuwakuha obuthoki bw’erikolha ebi nindi?”
29 Yesu mwabasubirya athi: “Ngendibabulya kibulyo kighuma. Munyisubiraye, naghe ngendibabwira nga ngakolha ebi omwa buthoki bwandi.
30 Olhubatizo lhwa Yohana lhwalhua omwa lhubulha kutse okwa bandu? Munyisubiraye.”
31 Neryo mubatsuka eriyibughako bathi: “Thwamabugha thuthi, ‘Lhwalhua omwa lhubulha,’ iniakendi bugha athi, ‘Neryo busana naki mumuthamw’ikirirya?’
32 Aliwe ibbwa ithwanabugha thuthi, ‘Lhwalhua okwa bandu’?” Babya bakasagha abandu kundi abosi aba babya basi ngoku Yohana kwenene abya muminyereri.
33 Neryo mubasubirya Yesu bathi: “Sithwasi.” Yesu mwababwira athi: “Naghe sinendi babwira nga ngakolha emyatsi eyi omwa buthoki bwandi.”
