Engulhu Yuwene Ngoku Yahandikawa na Mariko 12:1-44
12 Neryo mwatsuka erikania nabo omwa mikya* athi: “Omulhume mwahera emizabibu y’omw’irima, amathimbyako olhughuthu, n’erithakulhamo ah’erikamira evini kandi mwahimbamo akaleberyo;* neryo mwalisighira abalimi, amaghenda omwa kindi kihugho.
2 Yabere y’era, mwathuma omughombe eyiri abalimi nuku amulethera kuyo.
3 Aliwe mubamuhamba, bamamuswirya, n’erimusubyayo byalha bisa.
4 Kandi mwabathumako owundi mughombe, iyo mubamuswirya okwa muthwe n’erimuhemulikania.
5 Kandi mwathuma owundi, iyo mubamwitha, mwathuma n’abandi bangyi, abaghuma b’okw’ibo mubabaswirya n’abandi bamabitha.
6 Abya inianawithe owundi, mughalha wiwe mwanzwa. Erighunzerera mwamuthumayo, iniakabugha athi, ‘Bakendisikya mughalha waghe.’
7 Aliwe abalimi abo mubayibughako bathi, ‘Oyu y’omuli w’omwandu. Mwase thumwithe, n’omwandu akendibya wethu.’
8 Neryo mubamuhamba, bamamwitha, n’erimughusa eyihya w’eririma ly’emizabibu.
9 Omwinye eririma ly’emizabibu akendisyakolhaki? Akendi syasa in’itha abalimi, n’erihererya eririma ly’abandi.
10 Simwethasoma erisako eri ngoku: ‘Eribwe eryo abahimbi baghana, ly’eryabiribya libwe likulhu okwa sonda?
11 Omwatsi oyu akalhua oku Yehova, kandi mbwino syali thuswekaya’?”
12 Busana n’ekyo mubanza erimuhamba, aliwe mubasagha abandu, kundi babya ibabiriminya ngoku n’ibo akakanayako omwa mukya* oyo. Neryo mubamusigha bamaghenda.
13 Neryo mubamuthumako abaghuma b’okwa Bafarisayo n’ab’omwa kyama kya Herode nuku bayamutheghe omwa by’akabugha.
14 Babere bamuhikako, mubamubwira bathi: “Mukangirirya, thunasi ngoku wukabugha okwenene kandi ku siwuli sondaya omwa bandu mw’erisimwa, kundi siwuli samalira emisosere y’abandu ey’eyihya, aliwe ebya wukakangiriraya oku Nyamuhanga ni kwenene. Mbwino kinahikire eriliha Kaisari y’omusolho kutse sikihikire?
15 Thunatholere ithwalihagho, kutse sithutholere?” Abere abiriminya obuthebya bwabo, mwabasubirya athi: “Busana naki mukanyirengako? Munyilethere edinari ngasamalireyo.”
16 Mubamuletherayo, neryo mwababulya athi: “Ekisasani n’ebihandikireko ebi ni byandi?” Mubamusubirya bathi: “Ni bya Kaisari.”
17 Neryo Yesu mwabugha athi: “Mulihe Kaisari ebindu bya Kaisari, na Nyamuhanga ebindu bya Nyamuhanga.” Neryo mubasweka.
18 Neryo Abasadukayo abakabugha bathi sihali erilhubuka, mubasa n’erimubulya bathi:
19 “Mukangirirya, Musa mwathuhandikira athi mughalha wobu mundu amaholha aliwe akasigha mukali wiwe isyawithe mwana, mughalha wabo atholere iniamusighalya neryo iniabuthira mughalha wabu y’abaana.
20 Habya abalhume musanju abasubeneko. Ow’erimbere mwathahya, aliwe mwaholha isyalyabutha abaana.
21 N’owakabiri mwamusighalya aliwe mwaholha isyalyabutha abaana, kuthya n’owakasathu.
22 Abosi musanju mubaholha isibathamubuthako. Erighunzerera, n’omukali mwaholha.
23 Okw’ilhubuka, akendi syabya mukali wandi? Kundi mwabya mukali w’abosi musanju.”
24 Yesu mwabasubirya athi: “Simwasi ebya mukabugha, kundi simwasi Amasako kutse obuthoki bwa Nyamuhanga.
25 Kundi bakendi syabya bakalhubuka okwa baholi, abalhume sibendi syathahya, kutse abakali erithahibwa, aliwe bali ng’abamalaika omwa lhubulha.
26 Aliwe bikahika okw’ilhubukibwa ly’abaholi, simwethasoma omwa kitabu kya Musa, omo mwatsi owahambire okwa kisaka ky’amahwa, ngoku Nyamuhanga mwabugha nayu athi: ‘Ingye indi Nyamuhanga wa Abrahamu, Nyamuhanga wa Isaka, na Nyamuhanga wa Yakobo’?
27 Iyo si Nyamuhanga w’abaholi aliwe ni Nyamuhanga w’abaliho. Simwasi nahake ebya mukabugha.”
28 Omughuma w’okwa bakangirirya b’emighambo oyuwabya iniabiryasa n’eriowa bakakakalhukana, abere abiriminya ngoku Yesu abiribasubirya ndeke, mwamubulya athi: “Ekihano eky’erimbere* okwa byosi ky’ekyahi?”
29 Yesu mwamusubirya athi: “Eky’erimbere kithi, ‘Iwe Israeli wowe, Yehova Nyamuhanga wethu ni Yehova mughuma,
30 kandi wutholere iwanza Yehova Nyamuhanga wawu n’omuthima wawu wosi n’engebe yawu yosi n’obulengekania bwawu bwosi n’akaghalha kawu kosi.’
31 Ekyakabiri ky’eki, ‘Wutholere iwanza omuliranwa wawu ngoku wuyanzire.’ Sihali ekindi kihano ekirengire ebi.”
32 Omukangirirya w’emighambo mwabwira Yesu athi: “Mukangirirya, wamabugha ndeke, erikwamana n’ekwenene, ‘Ni Mughuma, kandi sihali wundi athe n’iyo’;
33 kandi erimwanza n’omuthima wawu wosi, n’obulengekania bwawu bwosi, n’akaghalha kawu kosi n’erianza omuliranwa wawu ngoku wuyanzire kilengire kutsibu amahere wosi w’eriokererya n’ebihongo.”
34 Busana n’ekyo, Yesu abere abiriminya ngoku amamusubirya ndeke, mwamubwira athi: “Siwuli haali okwa Bwami bwa Nyamuhanga.” Aliwe muhabya isihakiri n’oyuwangabya n’obuthubaha bw’erithasyamubulya.
35 Aliwe Yesu abere anemulholha embere erikangirirya omwa hekalhu, mwabulya athi: “Busana naki abakangirirya b’emighambo bakabugha bathi Kristo ni mughalha wa Dawudi?
36 Omw’isondolibwa n’omulimu abuyirire, Dawudi iyuwene-wene mwabugha athi, ‘Yehova mwabugha na Mukama waghe athi: “Ikalha okwa lhuhandi lhwaghe lhw’amali erihika aho nasyahirira esyonzighu syawu sy’ahisi sy’ebisando byawu.”’
37 Dawudi iyuwene-wene akamwahulhamo Mukama, neryo angabya athi mughalha wiwe?”
N’abandu bangyi babya ibanamuhulikirire, ibanatsemire.
38 Kandi omw’ikangirirya liwe mwalholha embere eribugha athi: “Muyitheghaye okwa bakangirirya b’emighambo abanzire erighenda ibanambere esyokanzu kandi abanzire eriramukibwa omwa hithali
39 n’ebithumbi by’embere-mbere* omwa syosinagogi n’emyanya y’ebitsumbi okw’irya inene.
40 Bakanyegha amanyumba* w’abakwakali, kandi busana n’eriyikangania,* bakasaba emisabe miri-miri. Aba bakendi syatswerwa kutsibu.”*
41 Neryo Yesu mw’ikalha aho angalhangirira ehisanduku hy’erithogheryamo esyosente, neryo mwatsuka erilhangira ngoku abandu bangyi bakathogherayamo, n’abagaga bangyi babya ibanemuthogheryamo ebinusu bingyi.
42 N’omukwakali omunakwa mwasa amathogheryamo ehinusu hibiri ehy’obughuli buke kutsibu.*
43 Neryo mwabirikira abigha biwe n’eribabwira athi: “Kwenene ngababwira, omukwakali omunakwa oyu amathogheryamo bingyi kwilhaba abosi abalyathogheraya esyosente sy’omwa hisanduko.
44 Kundi abosi balyahiramo habw’eribya ibawithe bingyi, aliwe iyo n’omwa bunakwa bwiwe, mwakahiramo ebyosi eby’awithe omwa ngebe yiwe.”
Emyatsi Ahikwa
^ Kutse “eby’erileberyako.”
^ kutse “ah’erileberya.”
^ Kutse “eky’erileberyako.”
^ Kutse, “ekikulhu kutsibu.”
^ Kutse, “ebyuwene kutsibu.”
^ Kutse, “ebindu.”
^ Kutse, “eriyihambulya.”
^ Kutse, “erikalire.”
^ Kinywe kwa kinywe, “esyolapta ibiri, ni kwadrani nguma.”
