Engulhu Yuwene Ngoku Yahandikawa na Mariko 13:1-37
13 Abere akalhua omwa hekalhu, omughuma w’okwa bigha biwe mwamubwira athi: “Mukangirirya, lhangira! amabwe n’amanyumba mabuyanga!”
2 Aliwe Yesu mwamubwira athi: “Wanamalhangira amanyumba manene-manene aya? Sihali n’eribwe erikendi syasighalha hano endatha oko lindi lithethahimbulhwa.”
3 Abere anikere okwa Kithwe ky’Emizaituni inianasamalire ehekalhu, Petero, Yakobo, Yohana, na Anderea mubamubulya ahathe abandu, bathi:
4 “Thubwire, emyatsi eyi yikendisyabya mughulhu wahi, kandi ni kiminyikalho kyahi ekikendisyabya emyatsi yosi eyi yikahika okw’ihwererera lyayu?”
5 Neryo Yesu mwatsuka eribabwira athi: “Muyitheghaye sihabye oyukabathebaya.
6 Abangyi basyasa omwa lina lyaghe, bathi, ‘Ningye iyo,’ kandi basyathebya abangyi.
7 Aliwe mukendisyabya mukowa esyonyuhi n’esyongulhu sy’esyonyuhi, simuhahukaye emithima; emyatsi eyi yitholere iyabya, aliwe enduli isiyiriyahika.
8 “Kundi ekihugho kikendi syalhwa n’ekindi kihugho; n’obwami bukendisyalhwa n’obundi bwami; hasyabya emisiki ehandi n’ehandi; kandi hasyabya erikeherera ly’ebyalya. Ebi ni nzuko y’obulhumi bunene.
9 “Aliwe inywe, muyitheghaye. Abandu basyabathwalha omwa syokoti, kandi basyabaswirirya omwa syosinagogi n’eribaletha embere sy’abathabali n’abami busana naghe, nuku bubye bwema okw’ibo.
10 Kandi engulhu yuwene yitholere iyatsuka erithulhughanibwa omo bihugho byosi.
11 Kandi omughulhu bakabahamba n’eribathwalha, isimwahanga-hangaya busana n’ebya mukendi bugha; aliwe ebyamukahebawa okwa saha eyo, byamubughe, kundi imukendibya is’inywe mukabugha, aliwe iw’omulimu abuyirire.
12 Eryongera okw’ekyo, omundu asy’itha mughalha wabo, thatha asy’itha omwana wiwe, n’abaana basyabindukira ababuthi n’eribitha.
13 N’abandu abosi basyabapona busana n’erina lyaghe. Aliwe oyukendi syayiyinia* erihika okwa nduli yukendi syalhamibwa.
14 “Aliwe omughulhu mukalhangira ekikitha esyonye ekikaheraya ik’inimene ahakithatholere eribya (omusomi akolesaye obuyitheghererya), neryo abali e Yudea batsuke erithibitha okwa bithwe.
15 Oyuli okwa nyumba kw’endatha isyakima kutse eriyenda omwa nyumba yiwe mw’ekyosi-kyosi;
16 n’oyuli omw’irima isyasuba eka eriyenda olhukimba lhw’eriyithomekako.
17 Obulighe okwa bakendi syabya ini bakule n’abakongaya omwa biro ebyo!
18 Mulhole embere erisaba nuku ekiro ekyo kireke erisyabya omwa buthuku bw’eritsuku;
19 kundi ebiro ebyo byasyabya biro by’obulighe obuthe bwathabya eritsuka okwa bihangikwa ebyo Nyamuhanga ahangika erihika okwa buthuku obo, kandi sibwendi syathasyabya.
20 Omo kwenene, Yehova amathendi syakehya ebiro ebyo, isihali n’oyukendi syalhama. Aliwe busana n’abasombolhwa abo abirisombolha, abirikehya ebiro ebyo.
21 “Neryo owosi-wosi amababwira athi, ‘Lhangira! Kristo ane hano,’ kutse, Lhangira! ‘Ane halya,’ isimw’ikiriraya.
22 Kundi abakayahulhamo Kristo ab’amabehi n’abaminyereri b’amabehi bakendi syahulhuka kandi bakendi syakolha ebiminyikalho n’ebikaswekaya busana n’erithebya, kyamathokekana, ibathebya n’abasombolhwa.
23 Neryo inywe muyitheghaye. Namabirisangwa nababwira emyatsi yosi.
24 “Aliwe omwa biro ebyo, obulighe obo bukendisyabya bwabirihwa, eryuba likendi syabya mwirimya, n’okwezi sikwendi syakolerya,
25 n’esyongununu sikendi syabya isinemuthoghonga elhubulha, n’eby’amaaka ebiri elhubulha bikendi syasuka-sukanibwa.
26 Neryo bakendi syalhangira Omughalha w’omundu akasira omwa bithu iniawithe obuthoki n’olhukengerwa lhunene.
27 Neryo akendi syathuma abamalaika n’erihindania abasombolhwa biwe ba haghuma erilhua okwa mahunga ani, eritsuka okwa ngunzerero y’ekihugho n’erihika okwa ngunzerero y’ekyanya.
28 “Neryo mw’ighire okwa mukya* ono ow’omuthi w’omuthini: Ehithahi hyagho ehirere-hirere hikabya hikanalhasa n’eryasako ebikoma, mukaminya ngoku obuthuku bw’omwisi buli hakuhi.
29 Kuthya nenyu, omughulhu mukalhangira emyatsi eyi yikabya, muminye ngoku Omughalha w’omundu ali hakuhi okwa lhukyo.
30 Kwenene ngababwira, olhulengo olhu silhwendi syahwaho emyatsi yosi eyi yitheyabya.
31 Olhubulha n’ekihugho bikendi syahwaho, aliwe ebinywe byaghe sibyendi syahwaho nahake.
32 “Sihali oyuwasi ekiro ekyo kutse esaha, nomubangabya bamalaika b’omwa lhubulha kutse Omughalha, aliwe ni Thatha.
33 Mubye imunalholire, mubye imunabukire, kundi simwasi omughulhu owabirihirwaho ng’akendi syahika mughulhu wahi.
34 Kiri ng’omundu oyuwaya omwa kindi kihugho amasighira enyumba yiwe y’abaghombe biwe n’eribaha obuthoki, obuli mundu omubiiri wiwe, n’erilhaghira omutheya w’olhukyo athi alhole embere eritheya.
35 Busana n’ekyo, mulhole embere eritheya, kundi simwasi omukama w’enyumba ng’akendyasa mughulhu wahi, mbulha omw’igholho-gholho kutse omwakathi k’ekiro kutse omwa mitsange* kutse omwa ngyakya-ngyakya,
36 nuku amasa kitsumbukirania, isyabeghaya imunaghotsere.
37 Aliwe ebyangababwira, ngabwira abosi: Mulhole embere eritheya.”
Emyatsi Ahikwa
^ Kutse “oyukayiyinaya.”
^ Kutse “eky’erileberyako.”
^ Kinywe kwa kinywe, “engoko-lhome yikabika.”
