Engulhu Yuwene Ngoku Yahandikawa na Mariko 14:1-72
-
Abahereri bakaya embitha y’eritha Yesu (1, 2)
-
Amaghutha awakakumba ndeke ak’uthibawa oku Yesu (3-9)
-
Yuda akaghoberaya Yesu (10, 11)
-
Erikyuruka ly’erighunzerera (12-21)
-
Eritsukisya Ekihulho ky’Omukama eky’Erigholho (22-26)
-
Eriyighana lya Petero likalhaghulhawa (27-31)
-
Yesu akasaba iniane e Getesemane (32-42)
-
Yesu akahambawa (43-52)
-
Erithondesibwa embere sy’Eribuyiro (53-65)
-
Petero akayighana Yesu (66-72)
14 Habya ihakisiya biro bibiri Ekiro ky’Erikyuruka n’eky’Omukonga w’Omuggati Owathemo Kihamya ibyahika. Kandi abahereri bakulhu n’abakangirirya b’emighambo babya bakasondya enzira y’erimuhambiramo omwa menge n’erimwitha;
2 kundi babya ibanemubugha bathi: “Butsira okwa kiro kikulhu; obundi abandu ibangana tsuruma.”
3 Yesu abere ane e Betania omwa nyumba ya Simoni omuhagha inianemulya,* omukali mwasa iniane n’etsupa ye alabbasta eyiri mw’amaghutha awakakumba ndeke, aw’enardo eyonyine-nyine, aw’obughuli bunene. Mwakunulhayo n’eritsuka eryuthagho okwa muthwe wa Yesu.
4 Busana n’ekyo, abandi mubatsuka eriyibughako ibanahithene bathi: “Busana naki amaghutha aya akakwira busa?
5 Kundi amaghutha ayo anganaghulibirwe esyodinari esilhabire oku 300 n’esyosente isyawathikya abanakwa!” Neryo mubahithana okwa* mukali kwa kutsibu.
6 Aliwe Yesu mwabugha athi: “Mumuleke. Busana naki mukamughunza kw’obuholho? Mwakanyikolera ekindu kibuya.
7 Kundi mughulhu wosi mukabya imune n’abanakwa, kandi mwangana bakolera ebibuya okwa ndambi yosi-yosi eyo mwanzire, aliwe ingye simwendibya naghe mughulhu wosi.
8 Mwakakolha ekyo angathoka; mwakasangwa utha amaghutha awakakumba ndeke okwa mubiri waghe, akanyitheghekera eritsikwa.
9 Kwenene ngababwira, ehosi-hosi eyo engulhu yuwene yikathulhughanibawa omwa kihugho kyosi, ekya omukali oyu amakolha nakyo kikendi syakanibwako busana n’erimw’ibuka.”
10 Neryo Yuda Iskariota, omughuma w’okw’Ikumi n’Ababiri, mwaghenda eyiri abahereri bakulhu nuku aghoberaye Yesu.
11 Babere bowa ekyo, mubatsema, bamalhaghanisya Yuda erimuha esyosente sy’efeza. Neryo mwatsuka erisondekania akaghisa k’erimughoberyamo.
12 Neryo okwa kiro ky’erimbere eky’Omuggati Owathemo Kihamya, omughulhu babya bakahayo obuhere bw’Erikyuruka, abigha biwe mubamubulya bathi: “Wanzire ithwayakutheghekera Erikyuruka lyo hayi?”
13 Neryo mwathuma ababiri b’okwa bigha biwe n’eribabwira athi: “Mughende omwa tawuni, mukendyeya omulhume inianahekire erilegha ly’amaghetse. Mumukwame,
14 n’ahosi-hosi aho akend’ingira, mubwire omukama w’enyumba muthi, ‘Omukangirirya athi: “Ekisenge ky’abagheni kiri hayi aho nangalira Erikyuruka n’abigha baghe?”’
15 Neryo akendi bakangya ekisenge kinene eky’endatha, ekitheghekirwe kandi ikine mw’ebyosi. Aho hamuthutheghekereryo.”
16 Neryo abigha mubaghenda, bam’ingira omwa tawuni, bameya ibine ngoku Yesu anababwira, neryo mubatheghekania Erikyuruka.
17 Erigholho lyabere lyahika, mwasa n’abigha Ikumi n’Ababiri.
18 Babere banikere okwa meza ibanemulya, Yesu mwabugha athi: “Kwenene ngababwira, omughuma w’okw’inywe oyunemulya haghuma naghe akendi nyighoberya.”
19 Mubatsuka erikwa obulighe n’eribugha nayu mughuma okwa mughuma bathi: “Mbwino n’ingye?”
20 Mwababwira athi: “Ni mughuma w’okw’Ikumi n’Ababiri, oyukakolhaya naghe omwa bbakuli.
21 Kundi Omughalha w’omundu akayaghenda, ngoku ebimuhambireko ebihandikire bikabugha, aliwe obulighe oko mulhume oyukaghoberaya Omughalha w’omundu! Kyangabere kibuya omulhume oyo kw’athabuthwa.”
22 Kandi babere banemulholha embere erirya, mwimya omuggati, amasaba, amatsutsangagho, amabahagho, n’eribugha athi: “Mwimayegho; oyu ak’imanira omubiri waghe.”
23 Kandi mwimya ekikopo, mwasaba neryo amabahakyo, n’abosi mubakinywako.
24 Neryo mwababwira athi: “Eki kik’imanira ‘omusasi waghe w’endaghane,’ owakendyuthika busana n’abangyi.
25 Kwenene ngababwira, sinendi syasanywa okwa vini erihika okwa kiro ngendi syanywira kuyo ini nyihya-nyihya omo Bwami bwa Nyamuhanga.”
26 Erighunzerera, babere babiryimba esyonyimbo sy’eripipa, mubahethukira okwa Kithwe ky’Emizaituni.
27 Neryo Yesu mwababwira athi: “Inywe bosi mukendithwikalha, kundi kihandikire kithi: ‘Nasyaswirya omulisya, n’esyombuli syasyapanzikana.’
28 Aliwe ngendisyabya nabirilhubukibwa, ngendi syabatsuka e Galilaya.”
29 Aliwe Petero mwamubwira athi: “Abandi abosi nomubangathwikalha, ingye singendi thwikalha.”
30 Busana n’ekyo, Yesu mwamubwira athi: “Kwenene ngakubwira ngoku munabwire, ee, omwa kiro muno, engoko-lhome yikendibya yitheyabika kabiri, wukendi nyighana mirundi isathu.”
31 Aliwe mwabera erihathikana athi: “Nomunangabya w’eriholha haghuma nawu, singendi kughana nahake.” N’abandi bigha bosi mubabugha ikyan’ekyo.
32 Neryo mubasa omo mwanya owakahulhawamo Getesemane, neryo mwabwira abigha biwe athi: “Mwikale hano ngayasaba.”
33 Mwaghenda haghuma na Petero, Yakobo, na Yohana, neryo mwatsuka eribya omwa bulighe bunene* n’erikwa engitsi nene.
34 Mwababwira athi: “Nabirikwa obulighe bunene, nibya bwangana nyitha. Mwikale hano mutheghaye.”
35 Abere aghenda bisandu bike erilhua aho bali, mwathulhama ahisi n’eritsuka erisaba athi, kiryathokekana, endambi eyo yimulhabeko.
36 Neryo mwabugha athi: “Abba,* Thatha, emyatsi yosi yithokekene okw’iwe; nyilhusayeko ekikopo eki. Nomwabine, butsira ekyanganzire aliwe ekyawanzire.”
37 Mwasubulha ameya ibanaghotsere, neryo amabwira Petero athi: “Simoni, wughotsere? Siwuwithe n’akaghalha k’erilholha embere eritheya habw’esaha nguma?
38 Mulhole embere eritheya kandi musabe buthumbya, nuku simuwe omw’ilengwako. Kwenene omuthima anzire, aliwe omubiri akalemererawa.”
39 Kandi mwaghenda amayasaba, amasuba omwa binywe ibyan’ebyo.
40 Kandi mwasa ameya ibanaghotsere, kundi babya bakwire othulho thunene, neryo mubathabana eky’erimusubirya.
41 Kandi mwasubulha omurundi wakasathu n’eribabwira athi: “Okwa ndambi ng’eno mukinaghotsere n’erilhuhuka! Mubuke! Esaha yamabirihika! Lebaya! Omughalha w’omundu akaghoberibawa omwa byalha by’abakolha-nabi.
42 Muhangane thughende. Lebaya! Oyukendi nyighoberya amabirihika hakuhi.”
43 Neryo aho n’aho, Yesu abere akinabugha, Yuda, omughuma w’okw’Ikumi n’Ababiri, mwasa iniane n’ekingungu ky’abandu ibane n’emiyali n’emigho, abathumawa n’abahereri bakulhu n’abakangirirya b’emighambo n’abakulhu.
44 Neryo oyukendi mughoberya abya iniabirilighirana nabo kw’akendibaha ekiminyikalho, athi: “Oyo ngendilyatsirira,* akendibya iy’oyo; mumuhambe mumubohe, n’erimuthwalha inianatheghibirwe.”
45 Neryo Yuda mwasa, amalhabira ahali Yesu, n’eribugha athi, “Rabbi!” neryo mwamulyatsirira.*
46 Neryo mubamuhamba n’erimuboha.
47 Aliwe omughuma w’okwa babya bimene aho mw’ihayo omuyali wiwe amaswirya omughombe w’omuhereri mukulhu, amamuthwako okuthu.
48 Aliwe Yesu mwababwira athi: “Mukasyanyihamba imune n’emiyali n’emigho ng’omwibi?
49 Obuli kiro iningabya ingane nenyu omwa hekalhu ingakangirirya, aliwe mumuthanyihamba. Nomwabine, eki ni busana n’eriberererya Amasako.”
50 Neryo abosi mubamusighania, bamathibitha.
51 Aliwe omulhwana mulebe oyuwabya ambere olhukimba lhw’ekitani olhuwene lhusa mwatsuka erimukwama hakuhi, neryo mubanza erimuhamba,
52 aliwe mwasighania olhukimba lhwiwe olhuwene olhw’ekitani amathibitha ndumbu.*
53 Neryo mubathwalha Yesu ew’omuhereri mukulhu, n’abahereri bakulhu, abakulhu, n’abakangirirya b’emighambo abosi mubahindana haghuma.
54 Aliwe Petero, mwabya inianamukwamire, aliwe iniane haali, erihika omwa buthalha bw’omuhereri mukulhu; kandi abya inian’ikere haghuma n’abatheya b’enyumba inianemwotha okwa muliro.
55 Neryo abahereri bakulhu n’ab’omw’Ibuyiro abosi babya ibanemusondya oku Yesu kw’omwatsi nuku bamwithe, aliwe mubathamubanako n’omughuma.
56 Abangyi babya ibanemumubughako emyatsi y’amabehi, aliwe ebya bakabugha isibirihambangana.
57 N’abandi babya bakahangana n’erimubughako amabehi bathi:
58 “Muthwowa akabugha athi, ‘Ngenditherya ehekalhu eyi eyahimbawa n’abandu, kandi omwa biro bisathu ingahimba eyindi eyo abandu bathahimba.’”
59 Aliwe omwa byosi ebi, ebyo babugha mubithahambangana.
60 Neryo omuhereri mukulhu mwimana omwakathi-kathi kabo n’eribulya Yesu athi: “Busana naki siwulisubiraya? Wukabugha wuthiki okwa bya bandu bakakubughako ebi?”
61 Aliwe mwabya bukuthu kandi mwathasubirya. Kandi omuhereri mukulhu mwatsuka erimubulya athi: “Wuli Kristo Mughalha w’Omutsumulhwa?”
62 Neryo Yesu mwasubirya athi: “N’ingye; kandi mukendi lhangira Omughalha w’omundu inian’ikere okwa lhuhandi lhw’amali olhw’amaaka kandi akasira omwa bithu.”
63 Busana n’ekyo omuhereri mukulhu mwasathya esyongyimba siwe, n’eribugha athi: “Thukinayithagha obundi bwema?
64 Mwamabiriyowira kw’amatsuma. Mukathwamu muthiki?”* Abosi mubamutswera bathi atholere iniakwa.
65 N’abandi mubatsuka erimuthwirako amathande n’eriswika obusu bwiwe n’erimuha esyongumi n’erimubwira bathi: “Thaminyerera!” N’abatheya b’ekoti mubamumathangulha omwa busu, n’erimuthwalha.
66 Petero abere ane eyikwa omwa buthalha, omughuma w’okwa baghombe b’obukali ab’omuhereri mukulhu mwasa.
67 Abere alhangira Petero inianemwotha, mwamusamalira n’eribugha athi: “Nawu wunalhue n’Omunazareti, Yesu oyu.”
68 Aliwe Petero mwayighana n’eribugha athi: “Singamwasi n’ebya wukabugha ebyo sindibiyitheghereraya,” neryo mwaghenda eyihya okwa lhukyo.
69 Aho, omughombe w’obukali mwamulhangira kandi mwatsuka eribwira abimene aho athi: “Oyu ni mughuma w’okw’ibo.”
70 Kandi mwayighana. N’enyuma w’akathambi kake, ababya bimene aho nabo mubatsuka eribwira Petero bathi: “Kwenene, wuli mughuma w’okw’ibo, kundi kwenene wuli Mugalilaya.”
71 Aliwe mwatsukiraho eritsuma n’erilhahirya athi: “Omulhume oyo mukakanayako oyo singamwasi!”
72 Aho naho engoko-lhome muyabika omurundi wakabiri, neryo Petero mwibuka ebya Yesu abya iniabirimubwira athi: “Engoko-lhome yitheyabika kabiri, wukendi nyighana emirundi isathu.” Petero mwakwa obulighe amatsuka erilira.
Emyatsi Ahikwa
^ Kutse, “er’ikalha okwa meza.”
^ Kutse, “mubamutsurumira.”
^ Kutse, “erisweka.”
^ Ekinywe ky’Ekiaramaiki ekikamanyisaya “Iwe Thatha.”
^ Kutse “ekisi.”
^ Kutse “ekisi.”
^ Kutse, “inianambere olhw’omwakathi lhusa.”
^ Kutse “Mukalengekanaya muthiki?”
