Engulhu Yuwene Ngoku Yahandikawa na Mariko 15:1-47
15 Bwabere bukanakya, abahereri bakulhu haghuma n’abakulhu n’abakangirirya b’emighambo, ni bugha ambu, Eribuyiro eryosi, mubahindana haghuma, mubaboha Yesu n’erimuthwalha ewa Pilato.
2 Neryo Pilato mwamubulya athi: “Niwe Mwami w’Abayuda?” Mwasubirya athi: “Iwe iwuwene-wene wamabughakyo.”
3 Aliwe abahereri bakulhu babya ibanemumuhandikirira omo myatsi mingyi.
4 Neryo Pilato kandi mwatsuka erimubulya athi: “Siwuwithe eky’erisubirya? Lebaya bakakuhirako emisango minene.”
5 Aliwe lero Yesu mwathamusubirya, neryo Pilato mwasweka.
6 Obuli kiro kikulhu, iniakababoholera omunya-ngomo mughuma oyo balyasaba.
7 Okwa buthuku obo, omulhume oyukahulhawamo Baraba abya iniane omwa ngomo haghuma n’abayisamambulha okwa buthabali, ab’itha abandu omwa buyisamambuli bwabo.
8 Neryo abandu mubasa bamatsuka erisaba Pilato bathi abakolere ekyo akanabakolera.
9 Mwababulya athi: “Mwanzire ngababoholere Omwami w’Abayuda?”
10 Kundi Pilato abya inianasi ngoku eritsuru ly’eryaleka abahereri bakulhu ibamulethera Yesu.
11 Aliwe abahereri bakulhu mubahongererya ekingungu ky’abandu bathi babughe bathi ababoholere Baraba omwakanya ka Yesu.
12 Pilato kandi mwababulya athi: “Neryo kwesi oyo mukahulhamo Omwami w’Abayuda ngamukolereki?”
13 Kandi mubongera eribirikira bathi: “Ahanikawe okwa muthi!”*
14 Aliwe Pilato mwalholha embere eribabulya athi: “Busana naki? Ni kibi kyahi eky’akolire?” Aliwe mubongera eribirikira bathi: “Ahanikawe okwa muthi!”*
15 Busana n’erianza eritsemesya abandu, Pilato mwababoholera Baraba; kandi abere abirihamulha athi Yesu aswiribawe, mwabalhwikirayo nuku bayamuhanike okwa muthi.
16 Neryo abasirikali mubamuthwalha omwa buthalha, ni bugha ambu, ewa gavana, neryo mubabirikira abasirikali bosi ba haghuma.
17 Neryo mubamwambalya olhukimba olhw’erangyi y’olhubono-bono,* bamalhuka embiitha y’amahwa n’erimwambalyayo;
18 neryo mubatsuka eribugha nayu bathi: “Thwamakuramukya,* iwe Mwami w’Abayuda!”
19 Kandi babya ibanemumuswirya okwa muthwe omwa lhuseke n’erimuthwirako amathande, neryo mubakukama n’erimunamira.
20 Erighunzerera, babere babirimusekererya, mubamulhusya olhukimba lhw’erangyi y’olhubono-bono* n’erimwambalya ekanzu yiwe. Neryo mubamuthwalha eriyamukongomerera okwa muthi.
21 Neryo mubabwira omulhabi, Simoni mulebe owe Kurene, oyuwabya akalhua omwa kyalu, thatha wa Alekzanda na Rufu, bathi ahekere Yesu y’omuthi wiwe w’amaghali.*
22 Neryo mubamuletha omo mwanya owakahulhawamo Gologota, kyamahindulhwa kikamanyisaya, “Omwanya w’Akahangarara.”
23 Eyo mubalengaho erimuha evini eyitswangene mw’emane-mane, aliwe mwathanywayo.
24 Neryo mubamukongomerera okwa muthi n’erighaba esyongyimba siwe omw’ighusa ehithuli erilebya nga nindi oyukendimya lhwahi.
25 Syabya isyamabiribya saha isathu,* neryo mubamukongomerera okwa muthi.
26 N’omusango ogho bamuhirako owabya ahandikire aby’akabugha athi: “Omwami w’Abayuda.”
27 Neryo mubahanika abibi babiri okwa mithi hakuhi nayu, owundi okwa lhuhandi lhwiwe lhw’amali n’owundi okwa lhw’amalembe.
28 ——
29 N’ababya bakalhabaho ibakatsingaya emithwe yabu n’erimutsuma bathi: “Ha! Iwe wabugha wuthi wanganatherya ehekalhu n’erihimbayo omwa biro bisathu,
30 yilhamaye omw’iyikimya okwa muthi w’amaghali.”*
31 Kandi omwa nzira iyan’eyo, abahereri bakulhu n’abakangirirya b’emighambo babya ibanemuyibughako omw’imusekererya, bathi: “Mwalhamya abandi; syangathoka eriyilhamya!
32 Kristo Omwami we Israeli, athayikimya okwa muthi w’amaghali* nuku thwanalhangira n’erimw’ikirirya.” Nibya n’ababya bahanikire okwa mithi hakuhi nayu babya ibanemumusekererya.
33 Bwabere bwahika saha mukagha* erihika saha mwenda,* muhabya omwirimya omwa kihugho kyosi ekyo.
34 Oku saha mwenda, Yesu mwalhaka omwa mulenge munene athi: “Eli, Eli, lama sabakatani?” kyamahindulhwa, kikamanyisaya, “Nyamuhanga waghe, Nyamuhanga waghe, busana naki wabirinyisighania?”
35 N’abaghuma b’okwa babya bimene hakuhi, babere b’owa eki, mubatsuka eribugha bathi: “Lebaya! Alikubirikira Eliya.”
36 Neryo omundu mulebe mwathibitha, amahira embuhuma y’omwa vini eyipakere, amahirayo okwa lhuseke, n’erimuhayo athi anywe n’eribugha athi: “Mumuleke! Thulebaye Eliya ng’anemwendyasa erisyamukimya okwa muthi.”
37 Aliwe Yesu mwabirikira omwa mulenge munene neryo amalekulha.*
38 N’ekisukuliryo ky’omwa hekalhu mukyasathika kabiri, eritsuka endatha erihika ekabunu.
39 Neryo omukulhu mughuma w’abasirikali oyuwabya imeneho abere alhangira ebyabya akalekulha, mwabugha athi: “Kwenene, omulhume oyu alhue Mughalha wa Nyamuhanga.”
40 Habya ihane n’abakali ababya bakasamalira ibane haali, abaghuma b’okw’ibo ni Maria Magdalene kuthya na Maria mama wa Yakobo Omulere na Yose, na Salome,
41 ababya bakakwama Yesu n’erimuwathikya omughulhu abya e Galilaya, n’abandi bakali bangyi ababya ibabiryasa nayu e Yerusalemu.
42 Erigholho-gholho lyabya iryabirihika, neryo kundi kyabya kiro ky’Eritheghekania, ni bugha ambu, omwa malhaliyo w’Esabato,
43 Yozefu owe Arimatea, omulhume w’ekitsumbi ow’omwa Kyaghanda ky’Abayuda, nayu oyuwabya inianemulindirira Obwami bwa Nyamuhanga mwasa. Mwakangania obuthubaha amaghenda ewa Pilato neryo amamusaba omubiri wa Yesu.
44 Aliwe Pilato mwabulha Yesu kwenene ng’abiriholha, neryo mwathuma omukulhu mughuma w’abasirikali eriyalebya kwenene ng’abiriholha.
45 Neryo omukulhu mughuma w’abasirikali abere abirikakasya Pilato ngoku Yesu abiriholha, Pilato mwalighira Yozefu erithwalha omubiri wa Yesu.
46 Yozefu abere abirighulha olhukimba olhw’ekitani olhuwene n’erimukimya, mwamuhira omwa lhukimba olhw’ekitani olhuwene n’erimuhira omw’isinda,* eyathakulhawa omwa lhukuka; neryo mwakumbaghalirya okwa bwingira bw’eyisinda kw’eribwe.
47 Aliwe Maria Magdalene na Maria mama wa Yose mubalholha embere erisamalira aho amahirwa.
Emyatsi Ahikwa
^ Kutse “ithirawe okwa muthi.”
^ Kutse “ithirawe okwa muthi.”
^ Kutse “eya papo.”
^ Kutse “wupipawe.”
^ Kutse “eya papo.”
^ Ni bugha ambu, saha nga 3 sy’engyakya.
^ Ni bugha ambu, nga saha 6 sy’erithungyi.
^ Ni bugha ambu, nga saha 9 sy’erithungyi.
^ Kutse “amathwa omuthima.”
^ Kutse “eyisinda y’ery’ibukwa.”
