Engulhu Yuwene Ngoku Yahandikawa na Mariko 2:1-28
2 Aliwe habere halhaba biro birebe, Yesu kandi mwasuba e Kapernaumu, n’omwatsi mwalhandaghana ngoku abirihikayo.
2 Kandi abandu bangyi mubahindana omwa nyumba mwamabya isimukiri omwanya nibya n’okwa lhukyo, neryo mwatsuka eribabwira ekinywe.
3 Neryo mubamulethera oyusanyarere, abalhume bbani ibanamuhekire.
4 Aliwe mubabya isibangamuhikya ahali Yesu busana n’obungyi bw’abandu, neryo mubasambulha olhuthwe lhw’enyumba omwa bulingirirane bwa Yesu, bamathulhaho ekyuna, bamalhabyaho akakingo akali kw’oyusanyarere.
5 Yesu abere alhangira erikirirya lyabu, mwabwira oyusanyarere athi: “Mwana waghe, ebibi byawu byamaghanyirwa.”
6 Neryo abaghuma b’okwa bakangirirya b’emighambo babya ibaneho, iban’ikere kandi ibanemughanirya omwa mithima yabo bathi:
7 “Busana naki omulhume oyu akabugha athya? Akatsuma. Nindi oyuwanga ghanyira ebibi athe Nyamuhanga?”
8 Aliwe aho n’aho omwa muthima wiwe, Yesu mwaminya ebyo bakalengekanaya, neryo amababulya athi: “Busana naki mukalengekanaya emyatsi eyi omwa mithima yenyu?
9 Ekyolhobire ky’ekyahi, eribwira oyusanyarere indi, ‘Ebibi byawu byamaghanyirwa,’ kutse eribugha indi, ‘Hangana wimaye akakyingo kawu wughende’?
10 Aliwe inywe erithoka eriminya ngoku Omughalha w’omundu awithe ehamuli y’erighanyira ebibi okwa kihugho—” mwabwira oyusanyarere athi:
11 “Ngakubwira nyithi, Hangana, imaya akakyingo kawu, wughende ewenyu.”
12 Mwahangana kandi mwalhuaho in’imya akakyingo kiwe n’eritsuka erilyatha embere sy’abosi. Neryo abosi mubasweka n’eripipa Nyamuhanga, bathi: “Sithuli thwathalhangira ekiri ng’eki.”
13 Kandi Yesu mwaghenda okwa musike w’engetse, n’abandu abosi mubabera eriasa eyo ali, nayu mwatsuka eribakangirirya.
14 Abere akalhaba, mwalhangira Lawi, mughalha wa Alfayo inian’ikere omwa ofisi eyabakathuhiramo emisolho, mwamubwira athi: “Nyikwame.” Aho naho mwahangana n’erimukwama.
15 Enyuma waho, Yesu abya inianemulira* omwa nyumba ya Lawi, n’abasolesya bangyi n’abakolha-nabi nabo babya ibanemulya* haghuma nayu n’abigha biwe, kundi habya abangyi b’okw’ibo ababya bakamukwama.
16 Aliwe abakangirirya b’Abafarisayo babere balhangira ngoku akalya haghuma n’abakolha-nabi n’abasolesya, mubatsuka eribulya abigha biwe bathi: “Akalya haghuma n’abasolesya n’abakolha-nabi?”
17 Yesu abere owa ekyo, mwababwira athi: “Abathalhwere sibaliyithagha omuthambiri, aliwe abalhwere bakamuyithagha. Nasa eribirikira abakolha-nabi butsira abathunganene.”
18 Neryo abigha ba Yohana n’Abafarisayo ibakasiba. Neryo mubasa n’erimubulya bathi: “Busana naki abigha ba Yohana n’abigha b’Abafarisayo bakasiba aliwe abigha bawu sibalisiba?”
19 Yesu mwabasubirya athi: “Mwira w’omuheruki amabya iniane n’abanywani biwe, sihali ekyangaleka ibasiba, kwa bithe? Bamabya ibane n’omwira w’omuheruki, sibangasiba.
20 Aliwe endambi yikendi syahika ibab’ihako mwira w’omuheruki, neryo ibabya b’erisiba okwa kiro ekyo.
21 Sihali omundu oyukasonera ekibbandiko ky’olhukimba olhuhyaka okwa lhukimba lhukulhu. Amakolha ekyo, olhukimba lhuhyaka lhukalhua okwa lhukimba lhukulhu, neryo ilhwasathikira ighuma.
22 Kandi sihali oyukahira evini nyihyaka omwa lhuhu lhw’evini olhukulire. Amakolha ekyo, evini iyikendi sathya olhuhu, neryo evini iyuthika n’olhuhu ilhwatsanda. Aliwe evini enyihyaka yikahirawa omwa lhuhu lhw’evini olhuhyaka.”
23 Yesu abere anemulhaba omwa malima w’engano okwa Sabato, abigha biwe mubatsuka erighenda bakathwa okwa ngano.
24 Neryo Abafarisayo mubamubwira bathi: “Lebaya! Busana naki bakakolha ebya emighambo yikabugha yithi isibyakolhawa okwa Sabato?”
25 Aliwe mwababwira athi: “Simwethasoma okwa kya Dawudi akolha omughulhu abya omwa buyithawa n’omughulhu iyo n’abalhume abo abya nabo bakwa enzalha?
26 Ngoku omo mwatsi owahambire okwa muhereri mukulhu Abiatari, Dawudi mwingira omwa nyumba ya Nyamuhanga n’erirya emiggati y’erikangania n’eriha kuyo kw’abalhume abo abya nabo, emiggati eya bathabya batholere erirya, aliwe ibabahereri basa?”
27 Neryo mwababwira athi: “Esabato yahirawaho busana n’abandu, butsira abandu busana n’Esabato.
28 Neryo Omughalha w’omundu ni Mukama we Sabato nibya.”
