Engulhu Yuwene Ngoku Yahandikawa na Mariko 3:1-35
3 Kandi mw’ingira omwa sinagogi, mwabya omulhume oyuwithe ebyalha ebisanyarere.
2 Neryo babya ibanemusamalira erilebya Yesu ng’anemwendi lhamya omulhume oyo okwa Sabato nuku bahandikirire Yesu.
3 Mwabwira omulhume oyuwithe ebyalha ebisanyarere athi: “Hangana wase omwakathi-kathi.”
4 Neryo mwababulya athi: “Mbwino kinatholere erikolha ekibuya kutse ekibi okwa Sabato, erilhamya engebe kutse er’itha?” Aliwe mubathasubirya.
5 Abere abirithimbya ameso akabasamalira inianahithene, inianakwire obulighe busana n’emithima yabo eyikalire, mwabwira omulhume athi: “Nanulha okuboko kwawu.” Nayu mwakunanulha, n’okuboko kw’iwe muk’uwana.
6 Busana n’ekyo, Abafarisayo mubaghenda bamalhuaho ibayahindana n’ab’omwa kyama kya Herode eriya embitha y’erimw’itha.
7 Aliwe Yesu mwaya okwa ngetse haghuma n’abigha biwe, n’abandu bangyi erilhua e Galilaya ne Yudea mubamukwama.
8 Abandu bangyi babere babiriowa okwa bingyi ebyo Yesu anemukolha, mubasa eyo ali nibya n’erilhua e Yerusalemu, Idumea, eyisirya we Yorodani, n’erithimba omwa Tiro ne Sidoni.
9 Neryo Yesu mwabwira abigha biwe athi bamulethere obwathu buke nuku abandu sibamuhathathanaye.
10 Kundi mwalhamya abangyi, abosi ababya balhwere amalhwere awakalha-kalire mubamuthimbako ibanemuyihathathania nuku bamuthuleko.
11 Nibya n’emirimu mibi, iyikabya yikamulhangira, iyikawa ahisi embere siwe n’erilhaka yithi: “Wuli Mughalha wa Nyamuhanga.”
12 Aliwe mirundi mingyi, Yesu iniakakongomererayo athi isiyamuminyikalhaya.
13 Mwahethukira okwa kithwe, amabirikira abo ayithagha, nabo mubasa eyo ali.
14 Neryo mwakolha* egurupu y’abandu 12, abo kandi ahulhamo bakwenda, abo angabere nabo kandi abo angathumire omw’ithulira
15 n’eribaha obuthoki bw’erihighitha esyombinga.
16 N’egurupu y’abandu 12 eyo akolha* mwabya Simoni, oyo aha erina erya Petero,
17 Yakobo mughalha wa Zebedayo na Yohana mughalha wobu Yakobo (nabo mwabaha erina erya Boanerge, erikamanyisaya “Baghalha b’Omulhumo”),
18 Anderea, Filipo, Batolomayo, Matayo, Tomasi, Yakobo mughalha wa Alfayo, Tadeo, Simoni Omukanana,*
19 na Yuda Iskariota, oyuwamughoberaya enyuma waho.
Neryo mwaghenda omwa nyumba,
20 kandi abandu mubayihindania, kyamaleka Yesu n’abigha biwe ibabya isibangathoka n’erirya.
21 Aliwe abahughu biwe babere b’owa ekyo, mubaghenda eriyamuhamba, kundi babya bakabugha bathi: “Abiribya musire.”
22 N’abakangirirya b’emighambo abalhua e Yerusalemu babya ibanemubugha bathi: “Aliko Belzebabu,* kandi akahighitha esyombinga omwa maaka w’omuthabali w’esyombinga.”
23 Neryo abere abiribabirikira, mwakania nabo omw’ikolesya eby’erileberyako athi: “Sitani angahighitha athi Sitani?
24 Obwami bwamayighabulha, obwami obo bukahwaho;
25 n’enyumba yamayighabulha, enyumba eyo siyir’imana.
26 Kandi Sitani amayirwanisya n’eriyighabulha; isyendibyaho aliwe iniakendihwaho.
27 Omo kwenene, sihali oyuk’ingira omwa nyumba y’omulhume w’amaaka oyuwanga thoka er’iba ebindu biwe athethatsuka eriboha omulhume w’amaaka oyo. Aho ibbwa imwakendi thoka eriheka ebiri omwa nyumba yiwe.
28 Kwenene ngababwira, abaghalha b’abandu bakendi syaghanyirwa ebyosi ebyo babirikolha, nomwangabya ini malholho awali athi n’ebitsumi ebiri bithi ebyo babiribugha.
29 Aliwe oyukatsuma omulimu abuyirire syendi syaghanyirwa na kera, aliwe ali kw’ekibi ekya kera na kera.”
30 Abugha eki kundi babya bakabugha bathi: “Aliko ekirimu kibi.”
31 Neryo mama wa Yesu n’abaghalha babo mubasa bam’imana eyihya, n’erimuthumako omundu bathi amubirikire.
32 Abandu bangyi babere ban’ikere kandi ibanamuthimbireko, mubamubwira bathi: “Lebaya! Mama wawu n’abaghalha benyu ban’imene eyihya, bakakubirikira.”
33 Aliwe mwabasubirya athi: “Mama waghe n’abaghalha bethu b’abahi?”
34 Neryo mwasamalira ababya b’ikere aho ibanamuthimbireko n’eribugha athi: “Lhangira, mama waghe n’abaghalha bethu b’aba!
35 Oyukakolha erisonda lya Nyamuhanga, oyo ya mughalha wethu, mwali wethu, na mama waghe.”
Emyatsi Ahikwa
^ Kutse, “mwasombolha.”
^ Kutse, “asombolha.”
^ Kutse “Ow’omuhwa.”
^ Erina erikahebawa Sitani.
