Engulhu Yuwene Ngoku Yahandikawa na Mariko 4:1-41
4 Kandi Yesu mwatsuka erikangirirya okwa musike w’engetse, n’abandu bangyi mubahindana aho ali. Neryo mwaya omwa bwathu am’ikalhamu haali okwa musike w’engetse, aliwe abandu bosi babya ibane okwa musike w’engetse.
2 Neryo mwatsuka eribakangirirya emyatsi mingyi omw’ikolesya emikya,* abere anemukangirirya, mwababwira athi:
3 “Muhulikirire. Lebaya! Omubibi mwayabiba.
4 Abere anemubiba, eyindi mbutho muyathoghera okwa musike w’enzira, n’esyonyonyi musyasa syamalyayo.
5 N’eyindi muyathoghera okwa lhukuka ahathabya omuthaka munene, neryo muyalhuaho iyalhasa kundi omuthaka abya muke.
6 Aliwe eryuba lyabere lyakolha, mulyahisyayo, nayu muyuma kundi siyabya yiwithe emirihi.
7 Eyindi mbutho muyathoghera omwa mahwa, n’amahwa mwalhasa, amakusyayo, kandi muyithahethya.
8 Aliwe eyindi muyathoghera okwa muthaka owuwene, neryo yabere yakulha n’erikanya, muyatsuka erihethya ebighuma, kandi muyasako emirundi 30, 60, na 100.”
9 Neryo mw’ongerako athi: “Oyuwithe amathwe w’eriowa, owe.”
10 Abere ane iyuwene, ababya bamuthimbireko haghuma n’abigha Ikumi n’Ababiri mubatsuka erimubulya ebihambire okwa mikya.*
11 Mwababwira athi: “Inywe mwabirihebwa esyombitha esibuyirire esy’Obwami bwa Nyamuhanga, aliwe okwa b’eyihya emyatsi yosi ni mikya,*
12 neryo nomwakine indi banasamalire, bangana samalira aliwe ibathalhangira, kandi nomwakine indi banahulikirire, bangana hulikirira aliwe ibathakenga; kutse sibanga binduka nuku baghanyirawe.”
13 Mwongera eribabwira athi: “Simwasi omukya* oyu, neryo mukendi yitheghererya muthi eyindi mikya* yosi?
14 “Omubibi akabiba ekinywe.
15 Neryo aba y’embutho eyikathoghera okwa musike w’enzira aho ekinywe kikabibawa; aliwe bakabya bakanakyowa, Sitani akasa iniabasaghulhako ekinywe ekyabibawa omw’ibo.
16 N’aba y’embutho eyikabibawa okwa lhukuka; bakabya bakan’owa ekinywe, bakaky’angirira n’obutseme.
17 Aliwe sibawithe emirihi, nomwabine bakalholha embere habw’akathuku kake; neryo bakabya bakabana amalighe kutse eriendereribwa busana n’ekinywe, bakathwikalha.
18 Hane n’abandi, embutho eyikabibawa omwa mahwa. Aba bababiriowa ekinywe,
19 aliwe amaghaniryo w’engebe y’omughulhu ono n’amathebo w’eby’obugaga n’esyongumbu sy’ebindi bindu sikabasamo isyakusya ekinywe, neryo ikithahethya.
20 Erighunzerera, eyabibawa okwa muthaka owuwene, b’abakahulikirira ekinywe n’eriky’angirira ndeke n’erihethya ebighuma, mirundi 30, 60, na 100.”
21 Kandi mwababwira athi: “Etara siyirihirawa omwisi sy’ekithiri kutse omwisi sy’engyingo, kwa bithe? Mbwino siyirihirawa okwa muthaghalha w’etara?
22 Kundi sihali ekibisire ekithendi syabisulhwa; sihali ekikuthire ndeke ekithendi syakundulhwa.
23 Oyuwithe amathwe w’eriowa, leka owe.”
24 Mwongera eribabwira athi: “Muhulikirire ndeke ebya mukowa. Olhulengo olhwamukalengamo, nenyu lhwamukendi syalengerwamo, kwenene, mwasy’ongerwa bingyi.
25 Kundi oyuwithe akendi sy’ongerwa bingyi; aliwe oyuthawithe akendi syalhusibwako n’eby’awithe.”
26 Neryo mw’ongera eribugha athi: “Obwami bwa Nyamuhanga buli ng’omughulhu omundu akabiba embutho okwa kithaka.
27 Akaghotsera omwa kiro iniabuka engyakya, n’embuthu iyalhasa n’erikulha—aliwe syaliminya ekyo nga kikasa kithi.
28 Lyolho-lyolho ekithaka okwa lyakyo kikahethaya, erimbere ekirimwa kikalhasa, neryo ikyasoholha, erighunzerera esyonguma isyakulha.
29 Aliwe yikabya yikan’era, akathwayo omwa mughusu, kundi obuthuku bw’erighesa bwabirihika.”
30 Neryo mwalholha embere eribugha athi: “Obwami bwa Nyamuhanga thwanga bulinganisya naki, kutse ni mukya* wahi ogho thwanga busoboreramo?
31 Buli ng’akaghuma k’eharadali, ako omughulhu kabibawa omwa kithaka ko kabya kake kutsibu okwa syombutho syosi esiri okwa kihugho.
32 Aliwe kakabya kabiribibwa, kakalhasa, ikyabya kirimwa kinene kutsibu okwa bindi birimwa byosi by’esyonyinyi, kandi ikyasako emithahi minene-minene, neryo esyonyonyi sy’omwa kyanya isyabya isyanganabana ah’erikalha omwa kitsutsu kyakyo.”
33 Mwababwira ekinywe omw’ikolesya emikya* mingyi y’omulingo oyo, erikwamana n’ebya bangathoka eriyitheghererya.
34 Omo kwenene, isyangakania nabo isyathakolesya emikya,* aliwe iniakasoborera abigha biwe b’emyatsi yosi eyi ibane ibobene.
35 Kandi okwa kiro ekyo, erigholho lyabere lyahika, mwababwira athi: “Muyire thusokere okwa wundi musirya.”
36 Neryo babere babiribwira abandu bathi baghende, mubamuthwalha omwa bwathu, ngoku anabya, kandi habya ihane n’awandi mathu.
37 Neryo muhahitha ekiyagha kinene kutsibu n’ebisunda ibikabera eriyiswirangya okwa bwathu, n’obwathu bwabya ibukayathobera.
38 Aliwe abya iniane enyuma omwa bwathu, inianaghotsere inianaseghemire okwa kasego. Neryo mubamubukya n’erimubwira bathi: “Mukangirirya, siwulhangire ngoku thukakwa?”
39 Neryo mwahangana, amakunga ekiyagha, n’eribwira engetse athi: “Huna! Ibya bukuthu!” N’ekiyagha mukyahuna, hamabya akahunerero kanene.
40 Neryo mwababwira athi: “Busana naki muk’ubaha? Simuli mwanabya n’erikirirya?”
41 Aliwe mubasa mw’obuba obuthe bwa buli kiro n’eribwirana bathi: “Oyu nindi na? Ekiyagha n’engetse nabyo bikamw’owa.”
Emyatsi Ahikwa
^ Kutse “eby’erileberyako.”
^ Kutse “eby’erileberyako.”
^ Kutse “eby’erileberyako.”
^ Kutse “eky’erileberyako.”
^ Kutse “eby’erileberyako.”
^ Kutse “eky’erileberyako.”
^ Kutse “eby’erileberyako.”
^ Kutse “eby’erileberyako.”
