Engulhu Yuwene Ngoku Yahandikawa na Mariko 5:1-43
5 Neryo mubahika okwa wundi musirya w’engetse omwa kitsweka kye Gerasene.
2 Yesu abere akanalhua omo bwathu, omulhume oyuliko ekirimu kibi mwamuhikako akalhua eyiri amasinda.*
3 Abya ikere eyiri amasinda, kandi erihika okwa buthuku obo, sihabya n’oyuwangathoka erimuboha ndeke, nibya n’omwa lhujeghere.
4 Mughulhu mungyi iniakabohawa omwa syombinga n’omwa syongyeghere, aliwe iniakatsutsanga esyongyeghere n’esyombinga; kandi isihali n’oyuwithe amani w’erimuhamba.
5 Kandi mughulhu wosi, omw’ithungyi n’omwa kiro iniakabya inianemulhakira eyiri amasinda n’okwa bithwe n’eriyisaranga omwa mabwe.
6 Aliwe abere akalhangirira Yesu ya haali, mwasa akathibitha n’erimunamira.
7 Mwalhaka omwa mulenge munene athi: “Yesu, Mughalha wa Nyamuhanga ow’Endatha Kutsibu, wukanyisonda kwaki? Ngakulhahirisaya embere sya Nyamuhanga indi siwunyithoghothaye.”
8 Kundi Yesu abya inianemukibwira athi: “Iwe kirimu kibi, ulhua omwa mulhume.”
9 Aliwe Yesu mwamubulya athi: “Erina lyawu ni wendi?” Nayu mwasubirya athi: “Erina lyaghe ningye Lijoni,* kundi thuli bangyi.”
10 Neryo mwabera erilemba-lemba Yesu athi isyathibitha okwa birimu erilhua omwa kihugho ekyo.
11 Habya ekihangulho ky’esyombunu nene isinemulira okwa kithwe.
12 Neryo ebirimu mubyamulemba-lemba bithi: “Thughuse omwa syombunu, nuku thw’ingire musyo.”
13 Mwabilighira. Neryo ebirimu bibi mubyamulhuamo byam’ingira omwa syombunu, n’ekihangulho kyosi mukyathibitha erihika okwa mukunguli w’engetse, esyombunu nga 2,000, syamawamo n’eriholeramo.
14 Neryo abalisya basyo mubathibitha bamayabwira abali omwa tawuni n’omwa kyalu, n’abandu mubasyalebya ekyabere.
15 Neryo mubasa eyiri Yesu, bamalhangira omulhume oyuwabya kw’esyombinga, oyuwabyako Elijoni,* inianambere kandi inian’ikere, iniabirilhama, neryo mububaha.
16 N’abalhangira eki kikabya mubababwira ekyabere okwa mulhume oyuwabyako esyombinga n’okwa syombunu.
17 Neryo mubatsuka erilemba-lemba Yesu bathi alhue omwa kitsweka kyabu.
18 Neryo abere asambira omo bwathu, omulhume oyuwabyako esyombinga mwamulemba-lemba athi akaghenda nayu.
19 Nomwabine, Yesu mwathamulighira aliwe mwamubwira athi: “Wughende eyiri abahughu bawu, wuyababwire ebyosi ebyo Yehova abirikukolera n’obughanyiri obw’abirikukangania.”
20 Omulhume oyu mwaghenda, amatsuka erithulhughania omwa Dekapoli* mw’ebyosi ebya Yesu abirimukolera, n’abandu abosi mubasweka.
21 Kandi Yesu abere abirisokera okwa wundi musirya w’engetse omo bwathu, abandu bangyi mubahindana aho ali, abya iniane okwa ngetse.
22 Neryo omughuma w’okwa bakulhu b’omwa sinagogi, oyukahulhawamo Yairo, mwasa, kandi abere amulhangira, mwakukama embere sy’ebisandu biwe.
23 Mwamulemba-lemba ngendo nyingyi athi: “Mwali waghe athohire.* Kisi asa wuyamuhireko ebyalha byawu nuku alhame n’eribyaho.”
24 Busana n’ekyo, Yesu mwaghenda haghuma nayu, n’ekikukumano ky’abandu mukyamukwama n’erimuhathania.
25 Neryo habya omukali oyuwabya iniamabirighunza emyaka 12 inianemulhuako omusasi.
26 Abya iniabiriaghalhwa kutsibu* omwa byalha by’abathambiri bangyi kandi iniabirikolesya ebyosi ebyo aby’awitheko, isyalilhama, aliwe omwakanya k’ekyo, iniakayongera.
27 Abere owa ebihambire oku Yesu, mwasira enyuma siwe omwa bandu neryo amathulha okwa lhukimba lhwiwe,
28 kundi iniakabera eribugha athi: “Namathathulha okwa lhukimba lhwiwe lisa, iningendi lhama.”
29 Neryo aho n’aho erisenda ly’omusasi liwe mulyaleka, neryo mwayowa omwa mubiri wiwe iniamalhama okwa bulhwere obukalire.
30 Aho n’aho Yesu mwaminya ngoku obuthoki bwamamulhuako, neryo mwabinduka amasamalira abandu n’eribulya athi: “Oyuwamathulha okwa lhukimba lhwaghe nindi?”
31 Aliwe abigha biwe mubamusubirya bathi: “Wunalhangire ekikukumano ky’abandu kandi iwabulya wuthi, ‘Oyuwamanyithulhako nindi?’”
32 Aliwe abya inianemuthimbya ameso w’omw’abandu erilebya nga nindi oyuwamakolha eki.
33 Omukali iniabirikwa obuba kandi iniane mutukumira, iniabiriminya ekyamabimubyako, mwasa, amakukama embere sya Yesu n’erimubwira okwenene okwosi.
34 Yesu mwamubwira athi: “Mwali waghe, erikirirya lyawu lyamakulhamya. Wughende buholho, kandi wulhamibawe kw’obulhwere bwawu obukalire.”
35 Abere akinabugha, abalhume balebe erilhua ew’omukulhu w’omwa sinagogi mubasa n’eribugha bathi: “Mwali wawu abiriholha! Busana naki wukinasurusuthaya Omukangirirya?”
36 Aliwe Yesu mw’owa ebyo bamabugha neryo mwabwira omukulhu w’omwa sinagogi athi: “Siwubahe, ekikulhu wubye n’erikirirya.”
37 Neryo mwathalighira omundu wosi-wosi akamukwama, aliwe mwaghenda na Petero, Yakobo, na Yohana mughalha wabo Yakobo basa.
38 Neryo mubahika ew’omukulhu w’omwa sinagogi, neryo mwalhangira abandu ibanemumunyuka n’erilira n’erilhaka omwa mulenge munene.
39 Neryo abere ingira omwa nyumba mwababwira athi: “Busana naki mukalira n’erimunyuka? Omwana syaholire aliwe aghotsere.”
40 Neryo abandu mubatsuka eriseka lhukukunia. Aliwe abere abirihulhukirya abosi b’eyihya, mwaghenda na thatha w’omwana na mama wiwe n’abo abya nabo, amaya aho omwana abya.
41 Neryo mwahamba ebyalha by’omwana n’eribugha athi: “Tali·ta kumi,” kyamahindulhwa, kikamanyisaya kithi: “Musika, ngakubwira nyithi, ‘Hangana!’”
42 Neryo aho n’aho omusika mwahangana n’eritsuka erilyatha. (Abya w’emyaka 12.) Neryo abandu mubalhuaho ibatsemer’ighuma.
43 Aliwe mwababwira mirundi mingyi* athi isibabwira owosi-wosi okw’eki, kandi mwababwira athi bahe omusika y’eky’erirya.
Emyatsi Ahikwa
^ Kutse “amasinda w’eryibukwa.”
^ Erisoborera, “Lebaya Matayo 26:53, omwatsi ahikwa.”
^ Erisoborera, “Lebaya Matayo 26:53, omwatsi ahikwa.”
^ Kutse “Ekitsweka ky’Esyotawuni Ikumi.”
^ Kutse “akisiya iniaholha.”
^ Kutse “iniabirilhaba omwa bulhumi bunene.”
^ Kutse “mwabakongomerera.”
