Engulhu Yuwene Ngoku Yahandikawa na Mariko 6:1-56
6 Mwalhua eyo, amasa ewabu, n’abigha biwe mubamukwama.
2 Esabato yabere yahika, mwatsuka erikangirirya omwa sinagogi, n’abangyi abamwowa mubasweka n’eribugha bathi: “Omulhume oyu ak’iha emyatsi eyi yahi? Kandi busana naki mwahebwa amenge aya, n’amaaka ng’aya aw’erikolha ebikaswekaya?
3 Oyu ni murandi, mughalha wa Maria kandi mughalha wobu Yakobo, Yozefu, Yuda, na Simoni, kwa bithe? Na bali babo bane hano nethu, kwa bithe?” Neryo mubatsuka erithwikalha busana nayu.
4 Aliwe Yesu mwababwira athi: “Omuminyereri syalisikibawa omwa bulhambu bwabo n’omwa bahughu biwe n’ab’omwa nyumba yiwe.”
5 Neryo eyo mwathakolhayo ekyosi-kyosi eky’amaaka aliwe mwahira okwa balhwere bake kw’ebyalha n’eribalhamya.
6 Omo kwenene, mwasweka kundi sibabya n’erikirirya. Kandi mwathimba omwa bulhambu obo erihika n’omwa byalu akakangirirya.
7 Neryo mwabirikira abigha Ikumi n’Ababiri n’eritsuka eribathuma mwa babiri-babiri, kandi mwabaha obuthoki okwa mirimu mibi.
8 Kandi mwababwira athi isibaheka ekyosi-kyosi busana n’olhughendo—emiggati, ehisaho hy’ebyalya, n’esyosente omwa hisaho hyabo hy’esyosente,* aliwe omutso musa—
9 kandi athi bambale esyongetha aliwe athi isibambalha esyongyimba ibiri.*
10 Mwongera eribabwira athi: “Omuyi wosi-wosi owamukahikako, mubyeko erihika aho mukendilhwirako.
11 Kandi ab’omo mwanya mulebe bamathendi bakokya kutse eribahulikirira, mukalhuayo, mukunguthe etsutsu eyiri okwa bisandu byenyu busana n’eribaha obwema.”
12 Neryo mubahongoka n’eritsuka erithulira bathi abandu batholere ibayisubamo,
13 kandi mubahighitha esyombinga nyingyi n’erihakabya abalhwere bangyi b’amaghutha n’eribalhamya.
14 Neryo Omwami Herode mw’owa eki, kundi erina lya Yesu lyabya iryabiriminywa kutsibu n’abandu babya ibanemubugha bathi: “Yohana Omubatizya abirilhubukibwa okwa baholi, kandi ky’ekyalekire iniakolha eby’amaaka.”
15 Aliwe abandi babya ibanemubugha bathi: “Ni Eliya.” N’abandi bathi: “Ni muminyereri ng’omughuma w’okwa baminyereri bakera.”
16 Aliwe Herode abere owa eki, mwabugha athi: “Yohana oyo nathwa kw’omuthwe, abirilhubukibwa.”
17 Kundi Herode iyuwene-wene abya iniabirilhaghira athi Yohana ahambawe kandi mwamuhira omwa ngomo busana n’omwatsi wa Herodia, mukali wa Filipo mughalha wobu Herode, kundi Herode abya iniabirimuthahya.
18 Kundi Yohana aby’akabera eribwira Herode athi: “Siwutholere wuk’imya muka mughalha wenyu.”
19 Neryo Herodia abya iniabirimubikako ekinigha kandi mwanza erimw’itha, aliwe mwathathoka.
20 Herode aby’akasagha Yohana, iniamwasi ng’omulhume muthunganene kandi mubuyirire, neryo mwabya inianamutheghirye. Abere abirimuhulikirira, mwabulha eky’erikolha, nomwabine mwalholha embere erimuhulikirira inianatsemire.
21 Aliwe akaghisa akuwene mukabanika omughulhu Herode atheghekaniraya abakulhu biwe, abakamanda b’amahe, n’abalhume b’ebitsumbi binene-binene abe Galilaya b’erirya ly’erigholho okwa kiro ky’amabuthwa wiwe.
22 Neryo mwali wa Herodia mwasa, amahotholha kandi amatsemesya Herode n’abo aby’akalya nabo. Omwami mwabwira omusika athi: “Nyisabe ekyosi-kyosi ekya wanzire, naghe ngendi kuhakyo.”
23 Kandi mwalhahirya embere sy’omusika athi: “Ekyosi-kyosi ekya wanganyisaba, ngendi kuhakyo, nibya nomulhwangabya lhuhandi lhw’obwami bwaghe.”
24 Neryo mwaghenda eyiri mama wiwe n’erimubulya athi: “Ngasabeki?” Mwamusubirya athi: “Omuthwe wa Yohana Omubatizya.”
25 Aho n’aho omusika mwanguha eyiri omwami n’erimusaba athi: “Nganza wunyihe omuthwe wa Yohana Omubatizya okwa sahani.”
26 Nomwakine indi eki muk’itha omwami y’obulighe bunene, mwathanza erighania erisaba ly’omusika, busana n’erilhahirya liwe n’abagheni biwe.*
27 Neryo aho n’aho omwami mwathuma omutheya n’erimulhaghira athi ayalethe omuthwe wa Yohana. Neryo mwaghenda omwa ngomo amathwa omuthwe wa Yohana
28 neryo mwaletha omuthwe w’okwa sahani. Amahagho omusika, n’omusika amahagho mama wiwe.
29 Neryo abigha ba Yohana babere b’owa eki, mubasa bamaheka omubiri wiwe n’erihiragho omw’isinda.*
30 Abakwenda mubayihindania ahali Yesu n’erimubwira ebyosi ebyo bakolire n’ebya balyakangiriraya.
31 Nayu mwababwira athi: “Mwase inyw’ibene ahathe bandu mulhuhuke hake.” Kundi abandu bangyi babya bakasa n’erisubayo, isibawithe n’endambi y’erilhuhuka nibya n’ey’erirya.
32 Neryo mubahongoka omo bwathu eriya omo mwanya ow’athe mw’abandu nuku babyeyo ibobene.
33 Aliwe abandu mubabalhangira bakaghenda n’abangyi mubaminya, n’ab’omwa syotawuni syosi mubaghenda bakathibitha omwa bisandu kandi mubabatsukayo.
34 Aliwe babere bakalhua omo bwathu, Yesu mwalhangira abandu bangyi, amabakwira obulighe kundi babya ng’esyombuli esithawithe mulisya. Neryo mwatsuka eribakangirirya emyatsi mingyi.
35 Bwabya ibwamabirira, neryo abigha biwe mubamuhikako n’eribugha bathi: “Eno siyiri bandu kandi bwamabirira.
36 Babwire wuthi baghende, nuku bangaya yighulira ebyalya by’erirya omwa byalu ebiri hakuhi-hakuhi.”
37 Mwabasubirya athi: “Inywe mubahe eky’erirya.” Nabu mubamubwira bathi: “Thuyaghule emiggati ey’esyodinari* 200 n’erihayo abandu bangalya?”
38 Mwababulya athi: “Muwithe emiggati mingahi? Muyalebaye!” Babere babiriminya nga ni mingahi, mubamusubirya bathi: “Ni miggati ithano n’esiswe ibiri.”
39 Neryo mwalhaghira abosi athi b’ikale okwa muyonga* mwa bigurupu-gurupu.
40 Neryo mub’ikalha mwa bigurupu-gurupu by’abandu kikumi-kikumi na makumi athano-athano.
41 Abere imya emiggati ithano n’esiswe ibiri, mwalhalhamira elhubulha n’erisaba. Neryo mwatsutsanga emiggati n’eritsuka erihayo abigha nuku bahireyo embere sy’abandu, n’esiswe ibiri, mwasighabira abosi.
42 Neryo abosi mubalya bam’ughutha,
43 kandi mubasorokya ehitahangukirya, hyamusulya ebithiri 12 isikuli esiswe.
44 Abalya emiggati babya balhume 5000.
45 Neryo ahathe erilindirirya, mwabwira abigha biwe athi basambire omo bwathu babye embere, baye okwa wundi musirya hakuhi ne Betisaida, nayu inianemulhagha abandu.
46 Abere abiribabwira athi bukyayi, mwahethukira okwa kithwe eriyasaba.
47 Erigholho lyabere lyahika, obwathu bwabya ibwabirihika omwakathi-kathi k’engetse, aliwe abya iniane iyuwene okwa musike w’engetse.
48 Neryo abere alhangira kubakalhwa n’esyongahya, kundi ekiyagha kyabya kikalholya eyo bakalhua, ng’omwa kisisimuko kyakani omw’ithumbi,* mwasa inianemulholha eyo bali, inianemuthandaghira okwa ngetse; aliwe asa iniakasa balhabako.
49 Babere bakamulhangira inianemuthandayira okwa ngetse, mubalengekania bathi: “Ni kirimu!” Neryo mubalhaka.
50 Kundi abosi mubamulhangira kandi mubakwa obuba. Aliwe Yesu mwalhuaho iniabugha nabo athi: “Musike! Ningye; simukwe obuba.”
51 Neryo mwasambira omo bwathu obo balimo, n’ekiyagha mukyathekana. Busana n’ekyo, mubasweka kutsibu,
52 kundi nibya babya isibali bayitheghererya eby’emiggati, aliwe babya ibakinathere omwa bulengekania.
53 Babere bahika okwa musike, babya ibamahika e Genezareti neryo mub’imania obwathu bw’aho.
54 Aliwe abere akanalhua omo bwathu, abandu mubamuminyerera.
55 Mubathibitha erithimba omwa kitsweka kyosi ekyo n’eritsuka eriletha abalhwere okwa hikyingo aho bowa ambu ali.
56 Kandi ehosi-hosi eyo anabya akaya, omwa byalu kutse omwa syotawuni, ibakahira abalhwere omwa hithali, kandi ibakamulemba-lemba bathi bathule okwa musike w’olhukimba lhwiwe. N’abosi abathulha kugho ibakalhama.
Emyatsi Ahikwa
^ Kinywe okwa kinywe, “ekopa.”
^ Kutse “olhundi lhukimba.”
^ Kutse “n’abo abya nabo okwa meza.”
^ Kutse “eyisinda y’eryibukwa.”
^ Lebaya Endomeko B14.
^ Kutse, “ebithi ebirere-birere.”
^ Ni bugha ambu, nga saha 9 sy’ekiro erihika nga saha 12 eryuba likahulhuka
