Engulhu Yuwene Ngoku Yahandikawa na Mariko 7:1-37
7 Neryo Abafarisayo n’abaghuma b’okwa bakangirirya b’emighambo ababya ibabirilhua e Yerusalemu mubayihindania ahali Yesu.
2 Neryo mubalhangira abaghuma b’okwa bigha biwe ibanemulya ebyalya omwa byalha ebitsandire, ni bugha ambu, isibanabire.*
3 (Kundi Abafarisayo n’Abayuda abosi isibangalya bathebanaba okwa byalha erihika okwa ngokolho, ibamakirire emirwa y’abandu bakera,
4 kandi ibakabya bakalhua omwa kathali, isibangalya bathebanaba. Hane n’eyindi mirwa mingyi eyo bahebawa kandi eyo babya ibabirimakirira, ng’olhubatizo lhw’ebikopo, amalegha, n’ebindu ebikolirwe omwa kopa.)
5 Neryo Abafarisayo n’abakangirirya b’emighambo aba mubamubulya bathi: “Busana naki abigha bawu sibali ghendera okwa mirwa y’abandu bakera, aliwe bakalya ebyalya omwa byalha ebitsandire?”
6 Mwababwira athi: “Ebya Isaya ababughako inywe bathebya bihikire, ngoku kihandikire kithi, ‘Abandu aba bakanyisikaya omwa minywe yabo, aliwe emithima yabo yiri haali okw’ingye.
7 Bakanubira busa bakalholha embere erinyiramya, kundi bakakangiriraya ebilhaghiro by’abandu.’
8 Mukasighanaya ebihano bya Nyamuhanga imwamakirira emirwa y’abandu.”
9 Mwongera eribabwira athi: “Omwa menge mukathwa ebihano bya Nyamuhanga nuku mughendere okwa mirwa yenyu.
10 Ng’eky’erileberyako, Musa mwabugha athi, ‘Wusikaye thatha wawu na mama wawu,’ kandi ‘Oyukatsuma thatha wiwe kutse mama wiwe atholere in’ithibwa.’
11 Aliwe inywe mukabugha muthi, ‘Omundu amabwira thatha wiwe kutse mama wiwe athi: “Ekya nangakuwathikiryemo ni korboni (ni bugha ambu, ekihembo ekyabirihebwayo oku Nyamuhanga),”’
12 simukimulighira akakolera thatha wiwe kutse mama wiwe y’ekyosi-kyosi.
13 Neryo mukaleka ekinywe kya Nyamuhanga ikithathunga mughaso busana n’emirwa yenyu eyo mwabiriyihiriraho. Kandi mukakolha emyatsi mingyi ng’eyi.”
14 Neryo kandi mwabirikira abandu, mwababwira athi: “Inywe bosi munyihulikirire kandi muyitheghereraye ekya kikamanyisaya.
15 Sihali ekiri eyihya w’omundu ekikamwingiramo ekyanga mutsandya; aliwe ebikalhua omwa mundu by’ebindu ebikamutsandaya.”
16 ——
17 Neryo abere abir’ingira omwa nyumba haali okwa bandu, abigha biwe mubatsuka erimubulya ebihambire okwa mukya.*
18 Neryo mwababwira athi: “Nenyu simuli mwakenga ng’ibo? Simuli mwaminya ngoku sihali ekiri eyihya ekik’ingira omwa mundu ekyanga mutsandya,
19 kundi kik’ingira butsira omwa muthima, aliwe omo nda, neryo ikyahulhuka?” Neryo mwahamulha athi ebyalya byosi byuwene.
20 Mwongera eribugha athi: “Ebikalhua omwa mundu by’ebikamutsandaya.
21 Kundi omwakathi, omwa mithima y’abandu, mukalhua amalengekania mabi, obusingiri,* obwibi, obwithi,
22 oburaghane, omururu, obubi, amabehi, emibere mibi,* eriso ly’eriyighomba, eritsuma, emiyiheko, n’obukiru.
23 Ebindu bibi byosi ebi bikalhua omwa kathi kandi ibyatsandya omundu.”
24 Mwalhua aho amaghenda omwa kitsweka kye Tiro ne Sidoni. Eyo mwingira omwa nyumba kandi mwathanza owosi-wosi akaminya, aliwe mubaminya.
25 Aho n’aho, omukali oyuwabya awithe mwali wiwe oyuli kw’ekirimu kibi mwowa oku Yesu, neryo mwasa amakukama embere sya Yesu.
26 Omukali abya Mugiriki, Omusirifoiniki;* kandi mwabera erihathikana Yesu athi ahighithe oku mwali wiwe kw’embinga.
27 Aliwe Yesu mwamubwira athi: “Leka abaana batsuke eryughutha, kundi sikitholere er’imya omuggati w’abaana n’erighusiragho ebibwana.”
28 Aliwe omukali mwamusubirya athi: “Ni kwenene, mukulhu, nomwabine, ebibwana bikanalya ehitahangukirya hy’abaana ehikathoghongera omwisi sy’emeza.”
29 Busana n’ekyo, mwamubwira athi: “Kundi wamabugha ekyo, ghenda; embinga yamabirilhua oku mwali wawu.”
30 Neryo omukali mwaghenda ewiwe ameya omwana wiwe inianakesirye omwa ngyingo, n’embinga iyabirimulhuako.
31 Yesu abere alhua omwa kitsweka kye Tiro, mwalhaba omwa kitsweka kye Sidoni n’ekye Dekapoli* akaya okwa Ngetse ye Galilaya.
32 Eyo mubamulethera omulhume omutsiha kandi oyuthebugha ndeke, neryo mubamulemba-lemba bathi amuhireko ebyalha.
33 Neryo mwamuthwalha ahathe bandu. Neryo mwahira eminwe yiwe y’omwa mathwe w’omulhume, kandi abere abirithwa amathande, mwathulha okwa lhulimi lhw’omulhume.
34 Neryo mwalhalhamira elhubulha, mwikya omuka munene n’erimubwira athi: “Efafata,” ni bugha ambu, “Hundukalha.”
35 Busana n’ekyo, amathwe wiwe mwahundukalha, n’erithendi bugha ndeke liwe mulyahwa, neryo amatsuka eribugha ndeke.
36 Neryo Yesu mwababwira athi isibabwira wosi-wosi, aliwe iniakabya akongera eribabwira athi isibabugha, ikubakanongera bathya erilhalhaniagho.
37 Omo kwenene, mubasweka kutsibu, neryo mubabugha bathi: “Abirikolha ebyosi bya ndeke. Nibya akaleka abatsiha ibowa n’esyomumu isyabugha.”
Emyatsi Ahikwa
^ Ni bugha ambu, sibali kolha emirwa y’eriyerya
^ Kutse “eky’erileberyako.”
^ Omwa Lhugiriki, porneia. Lebaya Erisoborera Ebinywe.
^ Kutse, “emibere eyikitha esisoni.” Omwa Lhugirki, a sel’geia. Lebaya Erisoborera Ebinywe.
^ Kutse, “embuthwa yeyo.”
^ Kutse “Ekitsweka ky’Esyotawuni Ikumi.”
