Engulhu Yuwene Ngoku Yahandikawa na Mariko 8:1-38
8 Omwa biro ebyo, kandi habya bandu banene, isibawithe eky’erirya. Neryo Yesu mwabirikira abigha biwe n’eribabwira athi:
2 “Nabirikwira abandu b’obulighe, kundi bamabirighunza biro bisathu ibane naghe kandi sibawithe eky’erirya.
3 Namababwira indi baghende ibanakwire enzalha, ibakendi hononokera omwa nzira, kandi abaghuma b’okw’ibo bakalhua haali.”
4 Aliwe abigha biwe mubamusubirya bathi: “Eyithe bandu eno omundu akendi lhusya hayi h’emiggati eyikaghunza eyang’ughuthya abandu aba?”
5 Neryo mwababulya athi: “Muwithe miggati mingahi?” Mubabugha bathi: “Musanju”
6 Neryo mwabwira abandu athi bikale ahisi. Neryo mw’imya emiggati musanju, amaha ewasingya, amatsutsangayo, n’eritsuka erihayo abigha biwe athi baheyo abandu, nabo mubahayo abandu.
7 Kandi babya ibanawithe ehiswe hike, neryo mwahitsumulha, amababwira athi nahyo babahehyo.
8 Neryo mubalya bamughutha, n’ebithangukirya ebyasaka mubyusulya ebithiri binene-binene musanju.
9 Habya abalhume nga 4,000. Neryo mwababwira athi baghende.
10 Aho n’aho iyo n’abigha biwe mubasambira omo bwathu bamaya omwa kitsweka kye Dalmanuta.
11 Neryo Abafarisayo mubasa n’eritsuka erikakalhukana nayu bathi abakanganaye ekiminyikalho erilhua elhubulha, bakanza erimulengako.
12 Neryo mwakwa obulighe bunene omwa muthima wiwe n’eribugha athi: “Busana naki olhulengo olhu lhukasaba ekiminyikalho? Kwenene ngababwira, sihali ekiminyikalho ekikendi hebwa olhulengo olhu.”
13 Neryo mwabasigha aho, amathasyasambira omo bwathu, amaghenda okwa wundi musirya.
14 Aliwe, abigha mubibirirwa eriheka emiggati, neryo babya omo bwathu n’omuggati mughuma musa.
15 Neryo mwabaghusa kw’akasali ahathe eribisirira athi: “Mubye imunalholire; kandi muyitheghaye okwa kihamya ky’Abafarisayo n’ekya Herode.”
16 Neryo mubatsuka erikakalhukana habw’eribya isibawithe miggati.
17 Abere aminya eki, mwababwira athi: “Busana naki mukakakalhukana ahabw’eribya isimuwithe miggati? Simuli mwakenga n’eriyitheghererya? Mukinahumene?
18 ‘Nomomunawithe ameso, simuli lhangira; kandi nomomunawithe amathwe, simulyowa?’ Simul’ibuka
19 omughulhu natsutsanga emiggati ithano eyo naha abalhume 5,000, ni bithiri bingahi ebyuswire mw’ebitahangukirya ebyo mwakuma-kuma?” Mubamusubirya bathi: “Ikumi n’Abibiri.”
20 “Omughulhu natsutsanga emiggati musanju eyo naha abalhume 4,000, ni bithiri bingahi ebyuswire mw’ebitahangukirya ebyo mwakuma-kuma?” Mubamusubirya bathi: “Musanju.”
21 Mwababwira athi: “Simuli mwanayitheghererya?”
22 Neryo mubaya e Betesaida. Eyo, abandu mubamulethera omulhume ndimethime, n’erimulemba-lemba bathi amuthuleko.
23 Neryo mwahamba omulhume ndimethime oyo y’okwa byalha n’erimuhulhukya omwa kyalu. Abere abirithwira amathande okwa meso wiwe, mwamuhirako ebyalha n’erimubulya athi: “Wanamalhangira ekyosi-kyosi?”
24 Omulhume mwasamalira n’eribugha athi: “Namalhangira abandu, aliwe bali ng’emithi eyinemughenda.”
25 Neryo kandi mwahira ebyalha biwe by’okwa meso w’omulhume, n’omulhume mwalhangira ndeke. Mwatsuka erilhangira, kandi mwalhangira obuli kindu kya ndeke.
26 Neryo mwamubwira athi aghende eka, n’eribugha athi: “Isiw’ingira omwa kyalu.”
27 Neryo Yesu n’abigha biwe mubaya omwa byalu bye Kaisari Filipi, babere bane omwa nzira mwatsuka eribulya abigha biwe athi: “Abandu bakabugha bathi ningye ndi?”
28 Mubamusubirya bathi: “Yohana Omubatizya, aliwe abandi bathi Eliya, n’abandi bathi omughuma w’okwa baminyereri.”
29 Neryo mwababulya athi: “Aliwe inywe, mukabugha muthi ningye ndi?” Petero mwasubirya athi: “Wuli Kristo.”
30 Neryo mwabakongomerera athi isibabwira owosi-wosi ebimuhambireko.
31 Kandi mwatsuka eribakangirirya ngoku Omughalha w’omundu atholere iniaghalhwa kutsibu kandi ngoku abakulhu n’abahereri bakulhu n’abakangirirya b’emighambo bakendi mughana kandi in’ithibwa, n’enyuma w’ebiro bisathu inialhubuka.
32 Omo kwenene, ebinywe ebyo mwabibugha ahathe eribisirira. Aliwe Petero mwamuhengeka n’eritsuka erimukunga.
33 Busana n’ekyo, mwabinduka, amasamalira abigha biwe, n’erikunga Petero athi: “Ghenda enyuma syaghe, Sitani! kundi wuwithe amalengekania w’abandu butsira awa Nyamuhanga.”
34 Neryo mwabirikira abandu n’abigha biwe n’eribabwira athi: “Omundu amanza erinyikwama, ayighane n’eriheka omuthi wiwe w’amaghali* n’erilholha embere erinyikwama.
35 Kundi oyukanza erilhamya engebe yiwe akendi syaheryayo, aliwe oyukaheraya engebe yiwe busana naghe na busana n’engulhu yuwene akendi syalhamyayo.
36 Omo kwenene, ni kibuya kyahi ekyo omundu angabana amathunga ebyosi eby’ekihugho aliwe akaherya engebe yiwe?
37 Kandi kwenene ni kyahi ekya omundu angahingisania n’engebe yiwe?
38 Kundi oyukakwa esisoni busana naghe na busana n’ebinywe byaghe omwa lhulengo olhusingiri* kandi lhubi olhu, Omughalha w’omundu akendi syakwa esisoni busana nayu akasa omwa lhukengerwa lhwa Thatha wiwe iniane n’abamalaika ababuyirire.”
