Engulhu Yuwene Ngoku Yahandikawa na Mariko 9:1-50
-
Erihindukibwa lya Yesu (1-13)
-
Omulhwana oyuliko embinga akalhamibawa (14-29)
-
Emyatsi yosi yithokekene oko yuwithe erikirirya (23)
-
-
Olhuholho lhwa Yesu lhukathasyalhaghulhawa (30-32)
-
Abigha bakakakalhukana busana n’obukulhu (33-37)
-
Oyuthelhwa nethu ali okwa lhuhandi lhwethu (38-41)
-
Ebikathwikalhaya (42-48)
-
“Mubye mw’omunyu” (49, 50)
9 Mwongera eribabwira athi: “Kwenene ngababwira ngoku hano hane abathendi syaholha bathe balhangira Obwami bwa Nyamuhanga ibwabiritsuka erithabalha.”
2 Enyuma w’ebiro mukagha, Yesu mwathwalha Petero, Yakobo na Yohana okwa kithwe kiri-kiri, bamabyayo ibobene. Neryo mwahindukibwa embere syabo;
3 esyongyimba siwe musyatsuka erikangabasania, syamabya nyeru-nyeru kutsibu indi okwa kihugho si kuli oyuwang’oya esyongyimba sikabya nyeru-nyeru sithya.
4 Eliya na Musa nabo mubababuthukirako, kandi babya ibanemukania na Yesu.
5 Neryo Petero mwabwira Yesu athi: “Rabbi, ni lhusunzo ithwe eribya hano. Leka thuhimbe esyohema isathu, eyawu, eya Musa, n’eya Eliya.”
6 Omo kwenene, aby’akabulha eky’eribugha, kundi babya ibabiryubaha kutsibu.
7 Neryo muhabya ekithu, kyamabaswika, n’omulenge mwalhua omwa ekithu athi: “Oyu ni Mughalha waghe, omwanzwa. Mumuhulikirire.”
8 Neryo kitsumbukirania mubasamalira eyi n’eyi hamabya isihakiri mundu, ihali Yesu musa.
9 Babere banemwandaghalha bakalhua okwa kithwe, mwabakongomerera athi isibabwira owosi-wosi ebyo babirilhangira erihika aho Mughalha w’omundu asyalhubukibwa okwa baholi.
10 Mubayihunira n’omwatsi oyo, aliwe mubabya ibanemubulhania erilhubuka okwa baholi eri nga likamanyisayaki.
11 Neryo mubatsuka eribulya Yesu bathi: “Busana naki abakangirirya b’emighambo bakabugha bathi Eliya atholere iniatsuka eriasa?”
12 Mwababwira athi: “Eliya atholere iniatsuka eriasa kandi iniasuba-subania emyatsi yosi; aliwe ibbwa, busana naki kihandikire kithi Mughalha w’omundu atholere iniaghalhwa kutsibu n’eriponwa?
13 Aliwe kwenene ngababwira, Eliya abiriasa, kandi mubamukolhako ekyosi-kyosi ekya banzire, ngoku ebimuhambireko byabya ibyabirihandikwa.”
14 Babere basa eyiri abandi bigha, mubalhangira abandu bangyi ibanabathimbireko, kandi habya ihane n’abakangirirya b’emighambo ibanemukakalhukana nabo.
15 Aliwe abandu bosi babere bakanamulhangira, mubasweka, bamathibitha eyo ali eriyamuramukya.
16 Neryo mwababulya athi: “Ni kyahi ekikaleka imwakakalhukana nabo?”
17 Omughuma w’okwa bandu mwamusubirya athi: “Mukangirirya, mungakulethera mughalha waghe kundi ali kw’ekirimu ekithebugha.
18 Kikabya kikamuwirira, kikamughusa okwa kithaka, iniaburura, inialya ameno, n’erihwa amani. Mungabwira abigha bawu indi bakihighithe aliwe mubakalemawa.”
19 Yesu mwababwira athi: “Inywe lhulengo olhuthawithe erikirirya, ngendi syalholha embere ingane nenyu erihika mughulhu wahi? Ngendi syabaghumisirizya erihika mughulhu wahi? Munyilethereyo.”
20 Neryo mubamulethera omulhwana, aliwe kandi ekirimu ekyo mukyakangararya omwana oyo, embere sya Yesu. Abere abiriwa okwa kithaka, mwabera eriyikumbaghalya, inianemuburura.
21 Neryo Yesu mwabulya thatha w’omwana athi: “Amaghunza buthuku bungahi inianemubya athya?” Mwasubirya athi: “Eritsuka omo bwana,
22 kandi mughulhu mungyi kikamughusa omwa muliro n’omwa maghetse erianza erimwitha. Neryo wamabya iwangana thoka erikolha ekyosi-kyosi, thukwire obulighe kandi thuwathikaye.”
23 Yesu mwamubwira athi: “Eribugha wuthi, ‘Wamabya iwangana thoka’! Emyatsi yosi yithokekene okwa yuwithe erikirirya.”
24 Aho n’aho thatha w’omwana mwabugha omwa mulenge munene athi: “Nganawithe erikirirya! Nyiwathikaye aho ngayithagha erikirirya!”
25 Neryo Yesu abere alhangira ngoku abandu bangyi banemwanguha eyo bali, mwakunga ekirimu kibi athi: “Iwe kirimu ekithebugha kandi ekitsiha, ngakubwira nyithi, mulhuemo kandi wuleke erisyathasyamwingiramo!”
26 Omwana abere abirilhaka n’erikangarara mirundi mingyi, mukyamulhuamo, amabya ng’oyuholire, n’abangyi b’okwa bandu mubabugha bathi: “Amabiriholha!”
27 Aliwe Yesu mwamuhamba okwa byalha n’erimuhangania, nayu mwahangana.
28 Neryo abere abiryingira omwa nyumba, abigha biwe mubamubulya ahathe bandu bathi: “Busana naki muthukalemawa erikihighitha?”
29 Mwababwira athi: “Omusabe musa wanga thoka erihighitha ekirimu ky’omulingo oyu.”
30 Neryo mubalhua eyo bamalhaba e Galilaya, aliwe mwathanza owosi-wosi akaminya.
31 Kundi aby’akakangirirya abigha biwe n’eribabwira athi: “Omughalha w’omundu akayaghoberibawa n’erihirwa omwa byalha by’abandu kandi bakendi mwitha, aliwe nomwanemwend’ithibwa, akendi lhubuka enyuma w’ebiro bisathu.”
32 Nomwabine mubathayitheghererya ebinywe biwe, kandi mubasagha erimubulya.
33 Neryo mubasa e Kapernaumu. Abere ane omwa nyumba, mwababulya athi: “Mulhue mukakakalhukaniraki omwa nzira?”
34 Mubathasubirya, kundi omwa nzira babya bakakuba obuhaka omukulhu omw’ibo nga nindi.
35 Neryo mw’ikalha ahisi amabirikira abigha Ikumi n’Ababiri n’eribabwira athi: “Owosi-wosi oyuwanzire eribya w’erimbere atholere iniabya w’erighunzerera okwa bosi n’eribya mukoli w’abosi.”
36 Neryo mwimya omwana mulere amamw’imania omwakathi-kathi kabo; abere abirihamba okwa bithigho biwe, mwababwira athi:
37 “Oyuk’angirira omwana mulere ng’oyu omwa lina lyaghe, naghe akanyangirira; kandi oyukanyangirira syaly’angirira ingye musa aliwe n’oyuwanyithuma.”
38 Yohana mwamubwira athi: “Mukangirirya, muthwalhangire omundu akahighitha esyombinga omwa lina lyawu, neryo thwamalengaho erimukakirya, kundi isyali thukwama.”
39 Aliwe Yesu mwabugha athi: “Isimwalengaho erimukakirya, kundi sihali oyuwanga kolha eby’amaaka omwa lina lyaghe oyuwangalhuaho akanyibughako ekyosi-kyosi ekithuwene.
40 Kundi oyuthelhwa nethu ali okwa lhuhandi lhwethu.
41 Kandi oyukabaha ekikopo ky’amaghetse w’erinywa kundi muli ba Kristo, omo kwenene ngababwira, syendi syaherya n’ahake olhuhembo lhwiwe.
42 Aliwe oyukathwikalhaya omughuma w’okwa baana balere aba abawithe erikirirya, ikikendibya kibuya olhusu olho epunda yikathimbaya lhulyaboherawa omwa bikya biwe neryo iniaghuswa omwa ngetse.
43 “Ebyalha byawu byamaleka wukathwikalha, bithweho. Kyuwene iwe eribana engebe iwabiribya mulema kwilhaba eriya omwa Gehena,* omwa muliro ow’athe angalimibwa, iwuneko ebyalha bibiri.
44 ——
45 Kandi ekisandu kyawu kyamaleka wukathwikalha, kithweho. Kyuwene iwe eribana engebe iwune mulema kwilhaba erighuswa omwa Gehena* iwuneko ebisandu bibiri.
46 ——
47 Kandi eriso lyawu lyamaleka wukathwikalha, lighuse. Kyuwene iwe eryingira omo Bwami bwa Nyamuhanga iwuneko eriso lighuma kwilhaba erighuswa omwa Gehena* iwuneko ameso abiri,
48 eyo emimbodi yitheholha n’eyo omuliro athe angalimibwa.
49 “Kundi obuli mundu atholere inialhungwa omo munyu w’omuliro.
50 Omunyu uwene, aliwe omunyu amahwamo obusihe bwagho, wangathasyasihyagho omuki? Mubye mw’omunyu, kandi mubye buholho n’abandi.”
