Engulhu Yuwene Ngoku Yahandikawa na Matayo 10:1-42
10 Neryo mwabirikira abigha biwe 12 n’eribaha obuthoki okwa mirimu mibi, nuku bahighitheyo n’erilhamya obuli mulingo w’obulhwere n’obutseke.
2 Amena w’abakwenda 12 wano: Ow’erimbere, Simoni oyukahulhawamo Petero na mughalha wabu ya Anderea; Yakobo na Yohana, baghalha ba Zebedayo;
3 Filipo na Batolomayo; Tomasi na Matayo omusolesya; Yakobo mughalha wa Alfayo; Tadeo;
4 Simoni Omukanana;* na Yuda Iskariota, oyuwaghoberaya Yesu enyuma waho.
5 Yesu mwathuma abakwenda 12 aba n’eribahana athi: “Isimwaghenda okwa b’ebihanda, kandi isimwingira omwa tawuni yosi-yosi y’Abasamaria;
6 aliwe mughende okwa syombuli esithere esy’enyumba ya Israeli.
7 Mukaghenda, muthulegho muthi: ‘Obwami bw’elhubulha bwabirihika hakuhi.’
8 Mulhamaye abalhwere, mulhubukaye abaholi, mulhamaye abahagha, muhighithe esyombinga. Mwahebawa ahathe eriliha, muhe ahathe erilihisya.
9 Simuheke ehoro kutse efeza kutse ekopa omwa hisaho hyenyu hy’esyosente,
10 kutse akasaho k’ebyalya busana n’olhughendo, kutse esyongyimba ibiri,* kutse esyongetha, kutse omutso, kundi omukoli atholere iniahebwa ebyalya.
11 “Omwa buli tawuni kutse ekyalu ekyamukahikamo, musondaye oyutholere, kandi mubye ewiwe erihika aho mukendilhwirayo.
12 Omughulhu muk’ingira omwa nyumba, muramukaye ab’omwa nyumba eyo.
13 Ab’omwa nyumba eyo bamabya ibanatholere, muleke obuholho bwenyu obwa mukabasunzira bubye okw’ibo; aliwe bamabya isibatholere, muleke obuholho bwenyu bubasubeko.
14 Omundu amathendi b’angirira kutse eribahulikirira, mukunguthe etsutsu eyiri okwa bisandu byenyu mukalhua okwa nyumba eyo kutse omwa tawuni eyo.
15 Kwenene ngababwira, okwa Kiro ky’Eritswera, olhubanza lhw’etawuni eyo lhwasyabya lhunene kwilhaba olhwe Sodomu ne Gomora.
16 “Lebaya! Ngabathuma ng’esyombuli omwa byuhu; neryo muyitheghaye ng’esyonzoka kandi mubye bolho ng’ehirikuku.
17 Muyitheghaye okwa bandu, kundi bakendi syabathwalha omwa syokoti n’eribaswirirya omwa syosinagogi syabo.
18 Kandi mukendi syalethwa embere sy’abathabali n’abami busana naghe, nuku bubye bwema okw’ibo n’ab’ebihanda.
19 Aliwe omughulhu bakabaletha embere syabo, simuhanga-hangaye nga mukendi syabughaki kandi muthi, kundi mukendi syahebwa ebyo mwasyabugha okwa ndambi eyo;
20 kundi mukendi syabya is’inywe mukabugha, aliwe omulimu wa Thatha wenyu iwakabugha erilhabira omw’inywe.
21 Eryongera okw’ekyo, omundu asy’itha mughalha wabo, thatha asy’itha omwana wiwe, n’abaana basyabindukira ababuthi n’eribitha.
22 N’abandu abosi basyabapona busana n’erina lyaghe, aliwe oyukendi syayiyinia erihika okwa nduli yukendi syalhamibwa.
23 Omughulhu bakab’endereraya omwa tawuni ndebe, muthibithe omwa yindi; kundi kwenene ngababwira, simwendi syaghunza esyotawuni sye Israeli esyosi Mughalha w’omundu athali asa.
24 “Omwigha syalengire mukangirirya wiwe, kutse omukobe syalengire mukama wiwe.
25 Kikaghunza omwigha eribya ng’omukangirirya wiwe, n’omukobe eribya ng’omukama wiwe. Abandu bamabya imubahulha omukama w’enyumba mwa Belzebabu,* ibbwa kyangabya bungahi okwa b’omwa nyumba yiwe?
26 Neryo simusaghebo, kundi sihali ekikuningire ekithendi syakunulhwa, n’embitha eyithendi syaminywa.
27 Ebya ngababwirira omwa mwirimya, mubughirebyo omwa kyakakalha, n’ebyamukowa omwa bihwehwe, muthulhughanayebyo imune okwa nyumba kw’endatha.
28 Kandi simusaghe abak’itha omubiri aliwe isibangaherya engebe;* aliwe, musaghe oyuwangathoghothya engebe n’omubiri omwa Gehena.*
29 Mbwino ehindegheya hibiri sihirighulibawa ekinusu ky’obughuli* buke? Nomwabine, Thatha wenyu akaminya n’akaghuma k’okw’ihyo kakathoghera ahisi.
30 Nibya n’esyonzwiri sy’okwa mithwe yenyu esyosi sinaghanzirwe.
31 Neryo simubahe; muli b’obughuli bunene kwilhaba ehindegheya hingyi.
32 “Neryo obuli mundu oyukanyiligha embere sy’abandu, naghe nasyamuligha embere sya Thatha waghe oyuli omwa lhubulha.
33 Aliwe oyukanyighana embere sy’abandu, naghe nasyamughana embere sya Thatha waghe oyuli omwa lhubulha.
34 Simulengekanaye muthi nasa eriletha okwa kihugho kw’obuholho; nasa eriletha omuyali, butsira obuholho.
35 Kundi nasa eriletha erighabulhana, thatha na mughalha wiwe, mwali na mama wiwe, n’omwalyana na nyoko-byalha wiwe.
36 Kwenene esyonzighu sy’omundu bakendi syabya iban’ab’omwa nyumba yiwe.
37 Oyuwanzire thatha kutse mama ya kutsibu kwilhaba ingye, syanyitholere; n’oyuwanzire mughalha kutse mwali ya kutsibu kwilhaba ingye, syanyitholere.
38 Kandi oyutheligha omuthi wiwe w’amaghali* akanyikwama, syanyitholere.
39 Oyukalhamaya engebe yiwe akendi syaheryayo, n’oyukaheraya engebe yiwe busana naghe akendi syabanayo.
40 “Oyukab’angirira naghe akanyangirira, n’oyukanyangirira ak’angirira n’Oyuwanyithuma.
41 Oyukangirira omuminyereri kundi ni muminyereri akendi syahebwa ekihembo ky’omuminyereri, n’oyukangirira omuthunganene kundi ni muthunganene akendi syahebwa ekihembo ky’omundu oyuthunganene.
42 Kandi oyukaha omughuma w’okw’abalere aba y’ekikopo ky’amaghetse kisa, kundi ni mwigha waghe, kwenene ngababwira, syendi syaherya olhuhembo lhwiwe.”
Emyatsi Ahikwa
^ Kutse “ow’omuhwa.”
^ Kutse “olhundi lhukimba.”
^ Erina erikahebawa Sitani, omukulhu, kutse omuthabali, w’esyombinga.
^ Ni bugha ambu, “amaha w’eribyaho.”
^ Kinywe okwa kinywe, “esariyoni nguma.”
