Engulhu Yuwene Ngoku Yahandikawa na Matayo 11:1-30
11 Yesu abere aghunza eriha abigha biwe 12 b’obusondoli, mwayakangirirya n’erithulira omwa syotawuni syabu.
2 Aliwe Yohana iniane omwa ngomo, abere abiriowa okwa bya Kristo anemukolha, mwathuma abigha biwe
3 eriyamubulya bathi: “Niwe wukayasa, kutse thulindirire owundi?”
4 Yesu mwabasubirya athi: “Mughende mubwire Yohana ebyo mwamowa n’erilhangira:
5 Esyondimethime sinemulhangira n’ebirema binemughenda, abahagha banemulhamibwa, abatsiha bali mwowa, abaholi banemulhubukibwa n’abanakwa banemubwirwa engulhu yuwene.
6 Obutseme buli okwa oyuthethwikalha busana naghe.”
7 Babere banemusubayo, Yesu mwatsuka erikanirya abandu ebihambire oku Yohana athi: “Mwabya mukayalebyaki omo mbwarara? Olhuseke olho omuyagha akatsinga-tsingaya?
8 Neryo kwesi, mwayalebaya yaki? Omulhume oyuwambere esyongyimba esyuwene?* Kundi abakambalha esyongyimba esyuwene bakabya omwa manyumba w’abami.
9 Kwesi, mwayakolhayaki? Eriyalebya omuminyereri? Ngababwira, syabya muminyereri buyira.
10 Oyu yo amasako akanayako athi: ‘Lebaya! Ngathuma omukwenda waghe embere syawu,* oyukendi kutheghekera enzira!’
11 Kwenene ngababwira, okwa bandu abosi ababuthawa n’abakali, sihali hathabya oyulengire Yohana Omubatizya, aliwe omuke kutsibu omwa Bwami bw’elhubulha amulengire.
12 Eritsuka omwa biro bya Yohana Omubatizya erihika na lino, abandu bakalhubirira Obwami bw’elhubulha, kandi abakabulhubirira bakabubana.
13 Abaminyereri abosi n’Emighambo, mubaminyerera erihika okwa mughulhu wa Yohana;
14 kandi mwamabya imunayitheghekire eriligha ekyo, ‘Eliya yukendyasa.’
15 Oyuwithe amathwe owe.
16 “Nanga linganisya olhulengo olhu na bahi? Lhuli ng’abaana balere abikere omwa kathali bakabirikira abo bakasatha nabo,
17 bathi: ‘Muthwababuhira enyabulere, aliwe mumuthahotholha; muthwalira ekiriro ky’obulighe, aliwe mumuthayihumbanga okwa kikuba busana n’obulighe.’
18 Kuthya, Yohana mwasa isyalirya kutse erinywa, aliwe abandu bathi, ‘Ali kw’embinga.’
19 Omughalha w’omundu abiryasa iniakalya n’erinywa, aliwe abandu bathi: ‘Lebaya! Omulhume oyukalya binene kandi omuthamiri, omunywani w’abasolesya n’abakolha-nabi.’ Nomwabine, amenge akaminyikalha kw’athunganene omwa mibiiri* yagho.”
20 Neryo mwatsuka eritsumanga esyotawuni esy’akoleramo ebingyi by’okwa by’amaaka eby’akolha, kundi mubathayisubamu, athi:
21 “Obulighe okw’iwe, Korazini! Obulighe okw’iwe, Betisaida! kundi eby’amaaka ebyakoleka omw’inywe, kubyakoleka e Tiro ne Sidoni, bangabere ibabiriyisubamu kera omw’ambalha esyongyimba sy’enguniha n’omw’ikalha omw’ibu.
22 Aliwe ngababwira, okwa Kiro ky’Eritswera, olhubanza lhwenyu lhwasyabya lhunene kwilhaba olhwe Tiro ne Sidoni.
23 Nawu Kapernaumu, mbwino wukalengekanaya wuthi wukendi sumbirwa elhubulha? Wukendi andaghalira omw’Isinda;* kundi eby’amaaka ebyakoleka omw’iwe, kubyakoleka omwa Sodomo, ambi namunabwire e Sodomo yineho.
24 Aliwe ngababwira, okwa Kiro ky’Eritswera, olhubanza lhwawu lhukendi syabya lhunene kwilhaba olhwe Sodomo.”
25 Okwa ndambi eyo, Yesu mwabugha athi: “Embere sy’abandu, ngakupipa Thatha, Omukama w’olhubulha n’ekihugho, kundi wabiribisa emyatsi eyi okwa b’amenge n’abasomire aliwe wabiribisulirayo abaana balere.
26 Kwabine bithya, Thatha, kundi kuwanzire ikyabya kithya.
27 Thatha abirimba ebyosi, kandi sihali oyuwasi Mughalha ya ndeke athe Thatha; kutse sihali oyuwasi Thatha ya ndeke athe Mughalha n’owosi-wosi oyo Mughalha anzire erimubisulirayo.
28 Mwase okw’ingye, inywe bosi abakanuba n’eriheka ebirithohire, ngendi balhuhukya.
29 Muheke engomo yaghe kandi munyighireko, kundi ngali w’omuthima mwolho n’oyuhehere, neryo mukendi syabana erilhuhuka.
30 Kundi engomo yaghe ni nyibuya n’omuheke waghe anguhirire.”
Emyatsi Ahikwa
^ Kinywe okwa kinywe, “esy’olhoberere ndeke.”
^ Kinywe okwa kinywe, “embere sy’obusu bwawu.”
^ Kutse “ebikalhwiririramo.”
^ Kutse “Hadesi.” Lebaya Erisoborera Ebinywe.
