Engulhu Yuwene Ngoku Yahandikawa na Matayo 12:1-50
-
Yesu, “Mukama we Sabato” (1-8)
-
Omulhume w’ebyalha ebisanyarere akalhamibawa (9-14)
-
Omughombe mwanzwa wa Nyamuhanga (15-21)
-
Esyombinga sikahighithawa erilhabira omwa mulimu abuyirire (22-30)
-
Ekibi ekitheghanyirawa (31, 32)
-
Omuthi akaminyirawa okwa bighuma byagho (33-37)
-
Ekiminyikalho kya Yona (38-42)
-
Ekirimu kibi kikabya kikasubulha (43-45)
-
Baghalha bobu Yesu na mama wiwe (46-50)
12 Okwa buthuku obo, Yesu mwalhaba omwa malima w’engano okwa kiro kye Sabato. Abigha biwe mubakwa enzalha, neryo mubatsuka erighenda bakathwa okwa ngano n’eriryayo.
2 Abafarisayo babere balhangira eki, mubamubwira bathi: “Lebaya! Abigha bawu bakakolha ebithalighirwe erikolhwa okwa Sabato.”
3 Mwababwira athi: “Simwethasoma okwa bya Dawudi akolha omughulhu iyo n’abalhume biwe bakwa enzalha?
4 Ngoku ingira omwa nyumba ya Nyamuhanga n’erirya emiggati y’erikangania, emiggati eyo iyo kutse abo abya nabo bathabya batholere erirya aliwe ibabahereri basa?
5 Kutse simwethasoma omwa Mighambo ngoku okwa syo Sabato, abahereri omwa hekalhu ibakathwa omughambo we Sabato kandi ibabya isibaliko lhubanza?
6 Aliwe ngababwira ngoku ekilengire ehekalhu kine hano.
7 Aliwe, ku mwayitheghererya ekya eki kikamanyisaya, ngoku ‘Nganzire obughanyiri butsira obuhere,’ simwanga tswebire abatheko lhubanza.
8 Kundi Omughalha w’omundu ni Mukama we Sabato.”
9 Yesu abere alhua aho, mwaghenda omwa sinagogi yabo,
10 neryo lebaya! yabya omulhume oyuwithe ebyalha ebisanyarere! Neryo babere bakanza eritsweba Yesu, mubamubulya bathi: “Mbwino kinatholere erilhamya okwa Sabato?”
11 Mwabasubirya athi: “Wamabya iwuwithe embuli nguma neryo yikathoghera omwa kyuna okwa Sabato, nindi okw’inywe oyuthe wangalhusyayomo?
12 Omundu ka ni w’obughuli bunene kwilhaba embuli! Kwesi kihikire erikolha ekyuwene okwa kiro kye Sabato.”
13 Neryo mwabwira omulhume oyo athi: “Nanulha okuboko kwawu.” Nayu mwakunanulha, kwamuwana ng’okundi.
14 Aliwe Abafarisayo mubaghenda eyihya, bamayamuyira embitha y’erimwitha.
15 Yesu abere aminya eki, mwalhua eyo. Abandu bangyi mubamukwama, nayu mwalhamya abosi,
16 aliwe mwabakongomerera athi isibamuminyikalhaya,
17 nuku aberereraye ebyabughawa erilhabira omwa muminyereri Isaya, oyuwabugha athi:
18 “Lebaya! omughombe waghe oyo nabirisombolha, omwanzwa waghe, oyo nabirisima! Ngendisyamuhirako omulimu waghe kandi asyakangania ab’ebihanda b’obulingirirania.
19 Syendisyaneghena kutse eribuya olhukanda, kutse sihali oyukendisyowa omulenge wiwe omwa syonzira nene-nene.
20 Syendi syathwa olhuseke olhubunikire, kandi syendi syalimya orutambi olhukathumba olhukayalima, erihika aho akendi syalethera obulingirirania.
21 Omo kwenene, ebihanda bikendi syahira amaha omwa lina liwe.”
22 Neryo mubamulethera omulhume oyuliko embinga, endimethime kandi oyuli mumu, nayu mwamulhamya, n’emumu eyo muyathoka eribugha n’erilhangira.
23 Neryo abandu bosi mubasweka n’eritsuka eribugha bathi: “Mbwino oyu syangabya ini Mughalha wa Dawudi?”
24 Abafarisayo babere bowa eki, mubabugha bathi: “Omundu oyu akahighitha esyombinga omwa maaka wa Belzebabu,* omuthabali w’esyombinga.”
25 Yesu abere aminya amalengekania wabu, mwababwira athi: “Obuli bwami obughabulene bukahwaho, n’obuli tawuni kutse enyumba eyighabulene siyir’imana.
26 Kuthya, Sitani amahighitha Sitani, iniabiriyighabulha iyuwene-wene; neryo obwami bwiwe ibukend’imana buthi?
27 Neryo namabya iningahighitha esyombinga omwa maaka wa Belzebabu, n’abaana benyu nabu bakasihighitha omwa maaka wandi? Eki ky’ekikendi syaleka ibabya batsweri benyu.
28 Aliwe namabya ini ngahighitha esyombinga omwa maaka w’omulimu wa Nyamuhanga, Obwami bwa Nyamuhanga ibwabiribahikako isimwasi.
29 Kutse omundu angathoka athi eryingira omwa nyumba y’omulhume w’amaaka n’eriheka ebindu biwe isyathatsuka erimuboha? Aho imwakendi thoka eriheka ebiri omwa nyumba eyo.
30 Oyuthe okwa lhuhandi lhwaghe, ni nzighu yaghe, n’oyuthekuma-kuma haghuma naghe, akapanza-panza.
31 “Busana n’eki ngababwira nyithi, abandu bakendi syaghanyirwa obuli mulingo w’ebibi n’ebitsumi, aliwe oyukatsuma omulimu, syendi syaghanyirwa.
32 Ng’eky’erileberyako, oyukabugha nabi okwa Mughalha w’omundu, akendi syaghanyirwa; aliwe oyukabugha nabi okwa mulimu abuyirire, syendi syaghanyirwa, okwa mughulhu ono kutse owakasa.
33 “Mwamabya imuli muthi owuwene, imukendi hethya ebighuma ebyuwene, aliwe mwamabya imuli muthi owalhundire, imukendi hethya ebighuma ebibbolire, kundi omuthi akaminyirawa okwa bighuma byagho.
34 Inywe baana b’esyonzoka, mwanga thoka muthi eribugha ebibuya kandi imuli babi? Kundi obunu bukabugha ebyoswire omwa muthima.
35 Omundu mubuya akahulhukaya omwa kighona kiwe kibuya mw’ebindu bibuya, n’omundu mubi akahulhukaya omwa kighona kiwe kibi mw’ebindu bibi.
36 Ngababwira, okwa Kiro ky’Eritswera, abandu bakendi syalhuthonda busana n’obuli binywe ebithuwene ebyo babugha;
37 kundi wukendi syahulhwamo muthunganene busana n’ebyo wabugha, kandi wukendi syatswerwa busana n’ebya wabugha.”
38 Neryo abaghuma b’okwa bakangirirya b’Emighambo n’Abafarisayo mubamusubirya bathi: “Mukangirirya, thwanzire thulhangire ekiminyikalho erilhua okw’iwe.”
39 Mwabasubirya athi: “Olhulengo lhubi kandi olhusingiri* lhukabera erisaba ekiminyikalho, aliwe sihali ekiminyikalho ekya lhukendihebwa, aliwe kya n’ekiminyikalho ky’omuminyereri Yona.
40 Ngoku Yona anaghunza omo nda y’eyiswe nene mw’ebiro bisathu, omwa musibo n’omwa kiro, n’Omughalha w’omundu asyaghunza omwa kulimu mw’ebiro bisathu, omwa musibo n’omwa kiro.
41 Abandu be Ninawe basyahangana olhulengo olhu lhukatswerwa kandi basyalhusingisya omusango, kundi ibo mubayisubamu Yona akathulira. Aliwe lebaya! oyulengire Yona ane hano.
42 Omwami-kali w’eyikwa asyahangana olhulengo olhu lhukatswerwa kandi asyalhusingisya omusango, kundi mwalhua okwa nduli y’ekihugho akasyahulikirira amenge wa Solomona. Aliwe lebaya! oyulengire Solomona ane hano.
43 “Ekirimu kibi kikabya kikalhua omwa mundu, kikalhaba eyithe maghetse kikasondya ah’erilhuhukira aliwe ikithabanaho.
44 Neryo kikayibwira kithi, ‘Ngendisuba omwa nyumba yaghe eyo nalhuamu,’ neryo kikabya kikahikamo, kik’eghayayo isiyiri mwaki aliwe iyinabirirye ndeke n’eryuwanibwa ndeke.
45 Neryo kikaghenda ikyayaletha ebindi birimu muthina-muthina musanju ebibi kukilhaba, neryo bikabya by’abir’ingiramu, bik’ikalhamu; n’emibere y’omundu oyo yikabya mibi kutsibu kwilhaba kwabya erimbere. Kwabine mwendisyabya bithya n’okwa lhulengo lhubi olhu.”
46 Yesu abere akinakaniraya abandu, mama wiwe n’abaghalha babo babya ibanimene eyihya bakanza erikania nayu.
47 Neryo omundu mwabugha nayu athi: “Lebaya! Mama wawu n’abaghalha benyu ban’imene eyihya, bakanza erikania nawu.”
48 Mwasubirya omundu oyo athi: “Mama waghe y’owahi, n’abaghalha bethu b’abahi?”
49 Neryo mwakangania abigha biwe n’eribugha athi: “Lebaya! Mama waghe n’abaghalha bethu baba!
50 Kundi oyukakolha erisonda lya Thatha waghe oyuli elhubulha, oyo ya mughalha wethu, mwali wethu, na mama waghe.”
