Engulhu Yuwene Ngoku Yahandikawa na Matayo 13:1-58
-
EMIKYA Y’OBWAMI (1-52)
-
Omubibi (1-9)
-
Ekyaleka Yesu iniakolesya emikya (10-17)
-
Omukya w’omubibi akasoborerawa (18-23)
-
Engano n’ebithi (24-30)
-
Akaghuma k’eharadali n’ekihamya (31-33)
-
Erikolesya emikya kikaberereraya obuminyereri (34, 35)
-
Omukya w’engano n’ebithi akasoborerawa (36-43)
-
Eky’obughuli ekibisirwe n’elulu eyuwene (44-46)
-
Obutimba (47-50)
-
Ebindu ebihyaka n’ebikulhu (51, 52)
-
-
Yesu akaghanawa omwa bulhambu bw’ewabo (53-58)
13 Okwa kiro ekyo Yesu mwalhua omwa nyumba amay’ikalha okwa musike w’engetse.
2 N’abandu bangyi mubayisorokerya aho ali, nayu mwaya omo bwathu am’ikalhamu, n’abandu bosi mub’imana okwa musike w’engetse.
3 Neryo mwababwira myatsi mingyi omw’ikolesya emikya* athi: “Lebaya! Omubibi mwayabiba.
4 Abere anemubiba, esindi mbutho musyathoghera okwa musike w’enzira, n’esyonyonyi musyasa syamalyasyo.
5 N’eyindi muyathoghera okwa lhukuka ahathabya muthaka munene, neryo muyalhuaho iyalhasa kundi omuthaka abya muke.
6 Aliwe eryuba lyabere lyakolha, mulyahisyayo, nayu muyuma kundi siyabya yiwithe emirihi.
7 Eyindi muyathoghera omwa mahwa, n’amahwa mwalhasa amakusyayo.
8 N’eyindi muyathoghera okwa muthaka owuwene, muyatsuka erihethya ebighuma, eyindi emirundi 100, eyindi 60, n’eyindi 30.
9 Oyuwithe amathwe owe.”
10 Neryo abigha mubamuhikako n’erimubulya bathi: “Busana naki wukabugha nabu omwa mikya?”*
11 Mwabasubirya athi: “Inywe mwabirihebwa olhusunzo lhw’erikenga esyombitha esibuyirire esy’Obwami bw’elhubulha, aliwe ibo sibethahebwalho.
12 Kundi oyuwithe akendi syongerwa bingyi, neryo iniabya n’ebingyi; aliwe oyuthawithe akendi syalhusibwako n’eby’awithe.
13 Ky’ekikaleka ingakania nabu omwa mikya;* kundi bakasamalira, aliwe sibelhangira, kandi bakahulikirira aliwe sibalyowa kutse erikenga.
14 Neryo obuminyereri bwa Isaya bukababerererako. Bukabugha buthi: ‘Mukendi syahulikirira aliwe simwendi syakenga, kandi mukendi syasamalira aliwe simwendi syalhangira.
15 Kundi abandu aba babirikalya emithima yabu, amathwe wabo akowa aliwe sibaliyira eky’erikolha, kandi babiriliba ameso wabo nuku baleke erisyalhangira omwa meso wabo n’eriowa omwa mathwe wabu n’erikenga omwa mithima yabu kandi sibebinduka naghe ngabalhamya.’
16 “Neryo obutseme buli okw’inywe kundi ameso wenyu akalhangira n’amathwe wenyu akowa.
17 Kundi kwenene ngababwira, abaminyereri bangyi n’abathunganene mubayisunza erilhangira emyatsi eyo mukalhangira aliwe mubathalhangirayo, n’eriowa emyatsi eyo mukowa aliwe mubathowayo.
18 “Neryo muhulikirire omukya* w’omulhume oyuwabiba.
19 Owosi-wosi oyukowa ekinywe ky’Obwami aliwe akathendi kengakyo, omubi akasa n’erimusaghulhako ebyabibawa omwa muthima wiwe; eyi y’embutho eyathoghera okwa musike w’enzira.
20 N’embutho eyathoghera okwa lhukuka, y’omundu oyukowa ekinywe n’erilhuaho iniangirirakyo n’obutseme.
21 Aliwe kundi syawithe emirihi omwa muthima wiwe, akalholha embere ahabw’akathuku, neryo akabya akabana obulighe kutse eriendereribwa busana n’ekinywe, akalhuaho iniathwikalha.
22 N’embutho eyathoghera omwa mahwa, y’omundu oyukowa ekinywe, aliwe amaghaniryo w’engebe y’omughulhu ono n’amathebo w’eby’obugaga bikakusaya ekinywe, neryo ikithahethya.
23 N’eyabibawa omwa muthaka owuwene, y’omundu oyukahulikirira ekinywe n’erikengakyo, omo kwenene akahethaya ebighuma, eyindi emirundi 100, eyindi 60, n’eyindi 30.”
24 Mwababwira owundi mukya* athi: “Obwami bw’elhubulha bwangana linganisibwa n’omundu oyuwahera embutho eyuwene omw’irima liwe.
25 Abandu babere banaghotsere, enzighu yiwe muyasa n’erihera ebithi by’omwa ngano n’eriyighendera.
26 Engano yabere yalhasa n’erihethya ebighuma, ebithi nabyo mubyalhasa.
27 Neryo abaghombe b’omukama w’enyumba mubasa n’erimubulya bathi, ‘Mukama, muwuthahera embutho eyuwene omw’irima lyawu? Neryo, busana naki muli ebithi?’
28 Mwabasubirya athi: ‘Omulhume, enzighu yaghe yuwakolha ekyo.’ N’abaghombe mubamubulya bathi: ‘Neryo wunanzire thuyabikulhangemo?’
29 Mwabasubirya athi, ‘Eyihi, kundi ngasagha indi imwangana kulirania engano y’omwa bithi.
30 Muleke ebyosi bikulire haghuma erihika okw’ighesa, neryo okwa mughulhu w’erighesa ngendi syabwira abaghesi nyithi: Mutsuke erikulhanga ebithi n’eribiboha mwa mighanda-mighanda nuku bihisibawe; mwanahira engano y’omwa kighona kyaghe.’”
31 Neryo mwabaha owundi mukya* athi: “Obwami bw’elhubulha bulingene n’akaghuma k’eharadali ako omulhume ahera omw’irima liwe.
32 Omo kwenene, akaghuma aka, k’akake kutsibu omwa syonguma esyosi, aliwe kakabya kabirilhasa, akabya muthi munene kutsibu okwa bindi birimwa byosi by’esyonyinyi, neryo esyonyonyi sy’omwa kyanya sikikalha omwa mithahi yagho.”
33 Mwababwira owundi mukya* athi: “Obwami bw’elhubulha bulingene n’ekihamya ekya omukali imaya n’erikidunga omwa hilengyi hinene-hinene hisathu hy’eyisyano y’engano erihika aho kyathundira.”
34 Yesu mwabwira abandu b’emyatsi yosi eyi omwa mikya.* Omo kwenene, isyangakania nabo ahathe erikolesya emikya,*
35 nuku aberereraye ebyabughawa erilhabira omwa muminyereri athi: “Nasyakania omwa mikya;* nasyathulhughania ebyabisawa eritsuka okwa nzuko.”*
36 Abere abiribwira abandu athi baghende, mw’ingira omwa nyumba. Abigha biwe mubasa n’eribugha bathi: “Thusoborere omukya* w’ebithi eby’omw’irima.”
37 Mwabasubirya athi: “Oyuwabiba embutho eyuwene y’Omughalha w’omundu;
38 eririma ky’ekihugho. N’embutho eyuwene, b’abaana b’Obwami, aliwe ebithi b’abaana b’omubi,
39 n’enzighu eyabihera, ni Diabolo. Erighesa, ly’erihwererera ly’omughulhu, n’abaghesi b’abamalaika.
40 Neryo ngoku ebithi bikanakuma-kumawa n’erihisibwa omwa muliro, kwa bikendi syabya bithya okw’ihwererera ly’omughulhu.
41 Omughalha w’omundu akendisyathuma abamalaika biwe, neryo bakendi syalhusya omo Bwami bwiwe mw’ebyosi ebikathwikalhaya n’abandu abakathwa ebilhaghiro,
42 kandi basyaghusabo omwa muliro owakaghulhumirira. Eyo yabakendi syalirira n’erikereghetha ameno wabo.
43 Okwa buthuku obo, abathunganene bakendi syakangabasania ng’eryuba omo Bwami bwa Thatha wabu. Oyuwithe amathwe owe.
44 “Obwami bw’elhubulha bulingene n’eky’obughuli, ekibisirwe omw’irima, ekya omulhume abana n’eribisa; neryo busana n’etseme, mwayaghulya obuli kindu eky’awithe n’erighulha eririma eryo.
45 “Kandi Obwami bw’elhubulha bulingene n’omusuburi oyukasondaya esyolulu esyuwene.
46 Abere abiribana elulu nguma ey’obughuli bunene, aho naho mwayaghulya ebyosi ebyo aby’awithe, amayaghulhayo.
47 “Kandi Obwami bw’elhubulha bulingene n’obutimba obwaghusawa omwa ngetse n’erisoha obuli mulingo wosi w’esiswe.
48 Bwabere busulha, mubabukurira okwa musike, bam’ikalha n’erisombolera esyuwene sy’omwa bithiri, n’erighusa esithuwene.
49 Kwa bikendi syabya bithya okw’ihwererera ly’omughulhu. Abamalaika bakendi syasa n’erighabulha ababi omwa bathunganene
50 n’erighusabo omwa muliro owakaghulhumirira. Eyo yabakendi syalirira n’erikereghetha ameno wabo.
51 “Mwanamakenga emyatsi yosi eyi?” Mubamusubirya bathi: “Ee.”
52 Neryo mwababwira athi: “Kyamabya ikwakiri kithya, obuli mukangirirya w’abandu oyuwabirikangiriribwa ebihambire okwa Bwami bw’elhubulha ali ng’omulhume, omukama w’enyumba, oyukahulhukaya omwa kighona kiwe mw’ebindu ebihyaka n’ebikulhu.”
53 Neryo Yesu abere aghunza eribabwira emikya* eyi, mwaghenda.
54 Abere ahika omwa bulhambu bw’ewabu, mwatsuka eribakangirirya omwa sinagogi yabo, neryo mubasweka n’eribugha bathi: “Omulhume oyu iha amenge wosi aya n’eby’amaaka ebi byahayi?
55 Mbwino oyu si mughalha w’omurandi? Na mama wiwe si y’oyukahulhawamo Maria, n’abaghalha babu, si Yakobo, Yozefu, Simoni na Yuda?
56 Na bali babu, sib’abosi abo thuli nabo hano? Neryo ebyosi ebi, ab’iha hayi?”
57 Neryo mubatsuka erithwikalha busana nayu. Aliwe Yesu mwababwira athi: “Omuminyereri syalisikibawa omwa bulhambu bwabo n’ewabu.”
58 Neryo, Yesu mwathakolera eyo y’eby’amaaka kundi sibabya bawithe erikirirya.
Emyatsi Ahikwa
^ Kutse “eky’erileberyako.”
^ Kutse “eby’erileberyako.”
^ Kutse “eby’erileberyako.”
^ Kutse “eky’erileberyako.”
^ Kutse “eky’erileberyako.”
^ Kutse “eky’erileberyako.”
^ Kutse “eky’erileberyako.”
^ Kutse “eby’erileberyako.”
^ Kutse “eby’erileberyako.”
^ Kutse “eby’erileberyako.”
^ Kutse obundi, “okw’ihangikwa ly’ekihugho.”
^ Kutse “eky’erileberyako.”
^ Kutse “eby’erileberyako.”
