Engulhu Yuwene Ngoku Yahandikawa na Matayo 14:1-36
14 Okwa buthuku obo, Herode omuthabali w’ekitsweka, mwowa emyatsi eyihambire oku Yesu
2 neryo mwabwira abaghombe biwe athi: “Oyu ni Yohana Omubatizya. Abirilhubukibwa, kandi ky’ekyalekire iniakolha eby’amaaka ebi.”
3 Herode* abya iniabirihamba Yohana n’erimuhira omwa ngomo busana na Herodia, mukali wa mughalha wabu ya Filipo.
4 Kundi Yohana aby’akabera eribwira Herode athi: “Sikihikire iwe erimya Herodia.”
5 Aliwe, nomwakine indi Herode aby’anzire eritha Yohana, mwasagha abandu kundi babya bamwasi ng’omuminyereri.
6 Aliwe okwa kiro ky’eryibuka amabuthwa wa Herode, mwali wa Herodia mwahotholera okwa mukonga oyo kandi mwatsemesya Herode ya kutsibu
7 neryo omw’ilhahirya mwayilhagha erimuha ekyosi-kyosi ekyo angasaba.
8 Aliwe busana n’ebya mama wiwe amuhana, mwabugha athi: “Wunyihe omuthwe wa Yohana Omubatizya okwa sahani eno.”
9 Nomwakine indi omwami mwakwa obulighe, aliwe busana n’erilhahirya liwe na busana n’abo abya inianemulya* nabo, mwahamulha athi bamuhegho.
10 Neryo mwathuma omundu y’omwa ngomo athi ayathwe oku Yohana kw’omuthwe.
11 Neryo mubalethera omusika y’omuthwe wa Yohana okwa sahani, nayu mwathwaliragho mama wiwe.
12 Enyuma waho, abigha ba Yohana mubasa bamaheka ekinda kiwe n’eriyakitsika; neryo mubayabwira Yesu.
13 Yesu abere abiriowa eki, mwaya omwa bwathu amaghenda eyithe abandu. Aliwe abandu babere baminya, mubalhua omwa syotawuni omwa bisandu bamamukwama.
14 Yesu abere ahika okwa musike w’engetse, mwalhangira bandu bangyi, neryo mwabakwira obulighe, kandi amalhamya abalhwere babu.
15 Erigholho lyabere lyahika, abigha biwe mubamuhikako n’eribugha bathi: “Thuli eyithe abandu kandi bwamabirira; bwira abandu wuthi baghende omwa byalu bayayighulire ebyalya.”
16 Aliwe Yesu mwabasubirya athi: “Sibatholere bakaghenda; mubahe eky’erirya.”
17 Mubamubwira bathi: “Sithuwitheki, aliwe thuwithe emiggati ithano n’esiswe ibiri.”
18 Mwababwira athi: “Mundetherebyo.”
19 Neryo mwabwira abandu athi bikale okwa bithi. Mw’imya emiggati ithano n’esiswe ibiri, mwalhalhamira endatha, amasaba, abere abiritsutsanga emiggati, mwahayo abigha, n’abigha mubahayo abandu.
20 Abosi mubalya bamughutha, kandi bamasorokya ebitahangukirya ebyasaka, byamusulya ebithiri 12.
21 Abalhume abalya, babya nga 5,000, abakali n’abaana isibathabarwa.
22 Neryo ahathe erilindirirya, mwabwira abigha biwe athi, basambire omo bwathu babye embere baye okwa wundi musirya, nayu inianemulhagha abandu.
23 Abere abiribwira abandu athi baghende, mwahethukira okwa kithwe kw’iyuwene eriyasaba, n’obuthuku mubwamwirirayo inianeyo iyuwene.
24 Okwa ndambi eyo, obwathu bwabya ibwabirihika haali omwa ngetse, n’ebisunda byabya ibinemulemesya obwathu kundi ekiyagha kyabya kinene.
25 Aliwe omwa kisisimuko ekyakani,* Yesu mwasa eyo bali inianemuthandayira okwa ngetse.
26 Abigha babere bakamulhangira inianemuthandayira okwa ngetse, mububaha kutsibu n’eribugha bathi: “Ni kirimu!” Neryo mubalhaka ibanakwire obuba.
27 Aliwe aho n’aho Yesu mwabugha nabo athi: “Musike! Ningye, simukwe buba.”
28 Petero mwasubirya athi: “Mukama, amabya ini nawe, nyilighire ngase eyawuli inganemuthandayira okwa maghetse.”
29 Mwamubwira athi: “Asa!” Neryo Petero mwalhua omo bwathu n’eritsuka erithandayira okwa maghetse erilholha eyiri Yesu.
30 Aliwe Petero abere alhangira ekiyagha, mwakwa obuba. Neryo abere atsuka erithobera, mwalhaka athi: “Mukama, nyilhamaye!”
31 Aho naho Yesu mwananulha okuboko n’erimukura, n’erimubwira athi: “Iwe w’erikirirya like, busana naki muwukathika-thika?”
32 Babere babirisambira omwa bwathu, ekiyagha mukyathulera.
33 Neryo ababya omo bwathu, mubamunamira n’eribugha bathi: “Kwenene wuli Mughalha wa Nyamuhanga.”
34 Neryo mubasoka bamaghenda e Genezareti.
35 Neryo abandu b’omwa kitsweka ekyo babere bamuminyerera, mubathuma omwatsi omwa bitsweka ebyosi ebithimbire okwa kihugho ekyo, n’abandu mubamulethera abalhwere abosi.
36 Neryo mubamulemba-lemba bathi hakiri banamathathulha okwa musike w’olhukimba lhwiwe, n’abosi abathulha kugho, mubalhama ndeke.
Emyatsi Ahikwa
^ Ni bugha ambu, Herode Antipa. Lebaya Erisoborera Ebinywe.
^ Kutse “iniane nabo okwa meza.”
^ Ni bugha ambu, saha nga mwenda esy’omwa kiro erihika saha ng’ikuminibiri esy’engyakya.
