Engulhu Yuwene Ngoku Yahandikawa na Matayo 15:1-39
15 Neryo Abafarisayo n’abakangirirya b’emighambo mubalhua e Yerusalemu, bamahika oku Yesu n’erimubulya bathi:
2 “Busana naki abigha bawu bakathwa emirwa y’abandu abakera? Ng’eky’erileberyako, sibalinaba* okwa byalha bakalya.”
3 Mwabasubirya athi: “Busana naki mukathwa ebihano bya Nyamuhanga busana n’emirwa yenyu?
4 Ng’eky’erileberyako, Nyamuhanga mwabugha athi, ‘Wusikaye thatha wawu na mama wawu,’ kandi ‘Oyukatsuma* thatha wiwe kutse mama wiwe atholere in’ithibwa.’
5 Aliwe inywe mukabugha muthi, ‘Owosi-wosi oyukabwira thatha wiwe kutse mama wiwe athi: “Ekya nangakuwathikiryemo ni kihembo ekyabirihebwayo oku Nyamuhanga,”
6 akabya isyakiyithagha erisikya thatha wiwe nahake.’ Neryo mukaleka ekinywe kya Nyamuhanga ikithathunga mughaso busana n’emirwa yenyu.
7 Inywe bathebya, ebya Isaya ababughako bihikire, akalhaghulha athi:
8 ‘Abandu aba bakanyisikaya omwa minywe yabo, aliwe emithima yabo yiri haali okw’ingye.
9 Ibo erilholha embere erinyiramya ni nubira busa, kundi bakakangiriraya ebilhaghiro by’abandu bisa.’”
10 Busana n’ekyo mwabirikira abandu athi baseghere hakuhi neryo amababwira athi: “Muhulikirire kandi muyitheghereraye enzumwa:
11 Ekik’ingira omwa buno bw’omundu siky’ekikamutsandaya, aliwe ekikahulhuka omwa buno bwiwe ky’ekikamutsandaya.”
12 Neryo abigha mubasa n’erimubwira bathi: “Muwukanaminya ngoku Abafarisayo mubakathwikalha bakowa ebya wulyabugha?”
13 Mwabasubirya athi: “Ekyosi-kyosi ekikalhasa ekya Thatha waghe athahera kikendi syakulhwa.
14 Mulekebo. Ni basondoli ndimethime. Neryo omundu ndimethime amasondolha owundi ndimethime, abosi babiri ibakendi thoghera omwa kyuna.”
15 Petero mwabugha athi: “Thukengesaye omukya* oyo.”
16 Yesu mwabugha athi: “Nenyu nalino simuli mwakenga?
17 Simwasi ngoku ekyosi-kyosi ekik’ingira omwa buno kikaya omo nda neryo ikyahulhuka?
18 Aliwe, ebikalhua omwa buno bikalhua omwa muthima, kandi ebyo by’ebikatsandaya omundu.
19 Ng’eky’erileberyako, omwa muthima mukalhua amalengekania mabi, obwithi, oburaghane, obusingiri,* obwibi, amabehi, n’ebitsumi.
20 Ebi by’ebindu ebikatsandaya omundu; aliwe erirya butsir’inaba* sikiritsandaya omundu.”
21 Yesu abere alhua aho, mwaghenda omwa kitsweka kye Tiro ne Sidoni.
22 Neryo lebaya! omukali Omufoiniki ow’omwa kitsweka ekyo mwasa n’eribugha athi: “Mukama, Mughalha wa Dawudi, nyiwathikaye. Mwali waghe aliko embinga eyikalire kutsibu.”
23 Aliwe mwathamusubirya ekyosi-kyosi. Neryo abigha biwe mubasa n’eritsuka erihathikana Yesu bathi: “Mubwire wuthi aghende, kundi akathutokerera.”
24 Yesu mwabugha athi: “Nathumawa okwa syombuli esithere esy’enyumba ya Israeli sisa.”
25 Aliwe omukali mwasa n’eryunamira Yesu athi: “Mukama, ngwathikaye!”
26 Yesu mwamubwira athi: “Sikihikire er’imya ebyalya by’abaana n’eribighusira ebibwana.”
27 Omukali mwabugha athi: “Ee, Mukama, aliwe n’ebibwana nabyo bikanalya ehitahangukirya ehikathoghonga okwa syomeza sy’abakama babyo.”
28 Neryo Yesu mwamusubirya athi: “Mukali, wuwithe erikirirya linene; leka kibye ngoku wanzire.” Neryo mwali wiwe mwalhama okwa saha eyo.
29 Yesu mwalhua aho, amaghenda hakuhi n’Engetse ye Galilaya, abere abirihethukira okwa kithwe, mw’ikalha.
30 Neryo abandu bangyi mubasa eyiri Yesu n’erimulethera ababuthawa ini balema, abalehema, esyondimethime, esyomumu, n’abandi bangyi, mubabahira hakuhi n’ebisandu bya Yesu nayu mwalhamyabo.
31 Neryo abandu mubasweka bakalhangira esyomumu sikabugha n’abalema bakalhamibwa n’ababuthawa mw’abalema bakaghenda n’esyondimethime sikalhangira, neryo mubapipa Nyamuhanga wa Israeli.
32 Aliwe Yesu mwabirikira abigha biwe n’eribabwira athi: “Nabirikwira abandu b’obulighe, kundi bamabirighunza biro bisathu ibane naghe kandi isibawithe eky’erirya. Singanzire eribabwira indi baghende ibanakwire enzalha,* kundi ibanganahononokera omwa nzira.”
33 Aliwe abigha mubamubwira bathi: “Eyithe abandu eno thukendi lhusya ebyalya byahayi ebikendighuthya abandu bosi aba?”
34 Yesu mwababulya athi: “Muwithe emiggati mingahi?” Mubabugha bathi: “Musanju, n’ehiswe hike.”
35 Neryo abere abiribwira abandu athi bikale ahisi,
36 mwimya emiggati musanju n’esiswe, mwaha ewasingya, mwatsutsangayo n’eritsuka erihayo abigha, n’abigha mubahayo abandu.
37 Kandi abosi mubalya bamughutha, kandi mubusulya ebithiri binene-binene musanju eby’ebitahangukirya ebyasaka.
38 Neryo abalya babya balhume 4,000, abakali n’abaana isibathabarwa.
39 Erighunzerera, Yesu abere abiribwira abandu athi baghende, mwaya omo bwathu n’erighenda omwa kitsweka kye Magadani.
Emyatsi Ahikwa
^ Ni bugha ambu, sibali kolha emirwa y’eriyerya.
^ Kutse “oyukatsamba.”
^ Kutse “eky’erileberyako.”
^ Omwa Lhugiriki por·neiʹa. Lebaya Erisoborera Ebinywe.
^ Ni bugha ambu, erithendi kolha emirwa y’eriyerya.
^ Kutse “erisiba.”
