Engulhu Yuwene Ngoku Yahandikawa na Matayo 16:1-28
16 Abafarisayo n’Abasadukayo mubahika oku Yesu bakanza erimulengako, mubamusaba bathi abakanganaye ekiminyikalho erilhua elhubulha.
2 Mwabasubirya athi: “Erigholho-gholho likabya likahika, mukabugha muthi, ‘Obuthuku bukendyuwana, kundi olhubulha lhwabiribya kisasi-sasi,’
3 kandi bukabya bukabya ngyakya, ‘Muthi, munabwire yikendibya embeho, n’embulha, kundi olhubulha lhwabirya kisasi-sasi aliwe obuthuku bwabiririrana.’ Munasi eriminyerera emibere y’obuthuku, aliwe simwanga thoka eriminyerera ebiminyikalho by’emighulhu.
4 Olhulengo lhubi kandi olhusingiri* lhukabera erisaba ekiminyikalho, aliwe sihali ekiminyikalho ekyo lhukendihebwa, kya n’ekiminyikalho kya Yona.” Neryo mwalhuaho, amabasigha aho, amaghenda.
5 Neryo abigha mubasokera okwa wundi musirya aliwe mubibirirwa eriheka emiggati.
6 Yesu mwababwira athi: “Mulhole embere eribya imunalholire kandi muyitheghaye okwa kihamya ky’Abafarisayo n’Abasadukayo.”
7 Neryo mubatsuka eriyibughako, bathi: “Sithuthaheka muggati wosi-wosi.”
8 Yesu abere aminya eki, mwababulya athi: “Busana naki mukayibughako muthi simuthaheka emiggati, inywe b’erikirirya like?
9 Simuli mwayitheghererya enzumwa, kutse eryibuka emiggati ithano eyo abandu 5,000 balya n’ebithiri ebyasaka?
10 Kutse emiggati musanju eyo abandu 4,000 balya n’ebithiri binene-binene ebyasaka?
11 Busana naki simuthaminya ngoku sindyakanaya okwa miggati? Aliwe muyitheghaye okwa kihamya ky’Abafarisayo n’Abasadukayo.”
12 Neryo mubayitheghererya ngoku alyabugha athi bayitheghaye okwa syongangirirya sy’Abafarisayo n’Abasadukayo butsira okwa kihamya ky’omuggati.
13 Yesu abere ahika omwa kitsweka kye Kaisari Filipi, mwabulya abigha biwe athi: “Abandu bakabugha bathi Mughalha w’omundu nindi?”
14 Mubamusubirya bathi: “Abandi bakabugha bathi Yohana Omubatizya, abandi bathi Eliya, n’abandi bathi Yeremia kutse omughuma w’okwa baminyereri.”
15 Neryo mwababulya athi: “Nenyu mukabugha muthi ningye ndi?”
16 Simoni Petero mwasubirya athi: “Wuli Kristo, Mughalha wa Nyamuhanga oyuliho.”
17 Yesu mwamubwira athi: “Obutseme okw’iwe, Simoni mughalha wa Yona, kundi sihali omundu w’omunyoku n’omusasi oyuwakubisulira eki, aliwe Thatha waghe oyuli omwa lhubulha.
18 Kandi ngakubwira nyithi: Wuli Petero, kandi okwa lhukuka lhuno ngendi syahimbako ekithunga kyaghe, n’esyonyuyi sy’Eyisinda* sisyendi syakindakyo.
19 Ngendi kuha ebisumuruzyo by’Obwami bw’elhubulha, kandi ekinduki ekyo wanga boha okwa kihugho kikendi syabya ikyabiribohwa omwa lhubulha, n’ekinduki ekya wanga boholha okwa kihugho kikendi syabya ikyabiriboholhwa omwa lhubulha.”
20 Neryo mwakongomerera abigha biwe athi isibabwira owosi-wosi ngoku iyo ni Kristo.
21 Eritsuka okwa ndambi eyo, Yesu mwatsuka erisoborera abigha biwe ngoku atholere iniaghenda e Yerusalemu nuku abakulhu, abahereri bakulhu, n’abakangirirya b’emighambo bamw’aghalhaye kutsibu kandi ithibawe, n’okwa kiro kyakasathu inialhubukibwa.
22 Neryo Petero mwahengeka Yesu n’eritsuka erimukunga athi: “Mukama, yikwire obulighe; siwulighire ekyo erikubyako n’ahake.”
23 Yesu mwalholya oku Petero kw’omughongo, n’erimubwira athi: “Ghenda enyuma syaghe, Sitani! Wuli ndwikale yaghe, kundi wuwithe amalengekania w’abandu butsira awa Nyamuhanga.”
24 Neryo Yesu mwabwira abigha biwe athi: “Omundu amanza erinyikwama, ayighane n’eriheka omuthi* wiwe w’amaghali n’erilholha embere erinyikwama.
25 Kundi oyukanza erilhamya engebe yiwe akendi syaheryayo, aliwe oyukaheraya engebe yiwe busana naghe akendi syabanayo.
26 Omo kwenene, ni kibuya kyahi ekya mundu angabana amathunga ebyosi eby’ekihugho aliwe akaherya engebe yiwe? Kutse ni kyahi ekya mundu angahingisania n’engebe yiwe?
27 Kundi Omughalha w’omundu asyasa omwa lhukengerwa lhwa Thatha wiwe iniane n’abamalaika biwe, neryo akendi syaliha obuli mundu erikwamana n’emikolere yiwe.
28 Kwenene ngababwira ngoku hano hane abathendi syaholha bathe balhangira Omughalha w’omundu akasa omo Bwami bwiwe.”
