Engulhu Yuwene Ngoku Yahandikawa na Matayo 17:1-27
17 Enyuma w’ebiro mukagha, Yesu mwathwalha Petero na Yakobo na mughalha wabo ya Yohana okwa kithwe kiri-kiri kandi mubabyako ibobene.
2 Neryo mwahindukibwa embere syabo; obusu bwiwe mubwaka ng’eryuba, n’esyongyimba siwe musyakolerya* ng’ekyakakalha.
3 Neryo lebaya! muhabuthuka Musa na Eliya ibanemukanirania na Yesu.
4 Neryo Petero mwabwira Yesu athi: “Mukama, ni lhusunzo okw’ithwe eribya hano. Wamabya iwunanzire, ngendi himba hano h’esyohema isathu, eyawu, eya Musa, n’eya Eliya.”
5 Abere akinabugha, lebaya! ekithu ekikangabasenie mukyabaswika, neryo lebaya! omulenge mwalhua omwa ekithu ekyo athi: “Oyu ni Mughalha waghe, omwanzwa, oyo ngatsemera. Mumuhulikirire.”
6 Abigha babere bowa eki, mubawa ahisi kandi mububaha kutsibu.
7 Neryo Yesu mwaseghera hakuhi nabo, amabathulhako, n’eribabwira athi: “Muhangane. Simubahe.”
8 Babere basumba ameso, mubalhangira Yesu musa abandi isibakiriho.
9 Babere banemwandaghalha bakalhua okwa kithwe, Yesu mwabahana athi: “Isimwabwira owosi-wosi okw’ibonokerwa eri erihika aho Mughalha w’omundu asyalhubukibwa okwa baholi.”
10 Aliwe abigha mubabulya Yesu bathi: “Busana naki abakangirirya b’emighambo bakabugha bathi Eliya atholere iniatsuka eriasa?”
11 Mwabasubirya athi: “Kwenene Eliya anemwasa kandi akendisuba-subania emyatsi yosi.
12 Aliwe ngababwira Eliya abiryasa, kandi mubathamuminyerera aliwe mubamukolhako ekyosi-kyosi ekya banzire. N’Omughalha w’omundu kubanemwendi mwaghalya bathya.”
13 Neryo abigha mubaminya ngoku akabakaniraya oku Yohana Omubatizya.
14 Babere bahika ahali abandu bangyi, omulhume mwahika oku Yesu, amamukukamira n’eribugha athi:
15 “Mukama, kwira mughalha waghe y’obulighe, kundi akwire ebithutsa kandi alhwere. Mughulhu mungyi akayithinira omwa muliro n’omwa maghetse.
16 Mungamulethera abigha bawu, aliwe bamalemwa erimulhamya.”
17 Yesu mwabugha athi: “Inywe lhulengo olhuthawithe erikirirya kandi olhuthere, ngendi syalholha embere ingane nenyu erihika mughulhu wahi? Ngendi syabaghumisirizya erihika mughulhu wahi? Munyilethereyo.”
18 Neryo Yesu mwahighitha embinga, neryo muyamulhuako, n’omulhwana mwalhama okwa saha eyo.
19 Neryo abigha mubahika oku Yesu ahathe abandu n’erimubulya bathi: “Busana naki muthukalemawa erihighitha embinga eyo?”
20 Mwabasubirya athi: “Busana n’erikirirya lyenyu like. Kwenene ngababwira, mwamabya n’erikirirya eryingene n’enguma y’eharadali, mwasyabwira ekithwe eki muthi, ‘Huma hano wuye erya,’ nakyo kyasyahuma, kandi sihali n’ekikendi syabalema.”
21 ——
22 Omughulhu babya bahindene haghuma e Galilaya, bw’obuthuku Yesu abwira abigha biwe athi: “Mughalha w’omundu akayaghoberibawa n’erihirwa omwa byalha by’abandu,
23 kandi bakendi mw’itha, n’okwa kiro kyakasathu inialhubukibwa.” Neryo mubakwa obulighe bunene.
24 Babere babirihika e Kapernaumu, abalhume abakasorokaya omusolho* w’ehekalhu mubahika oku Petero n’erimubulya bathi: “Mbwino omukangirirya wenyu akanaliha omusolho w’ehekalhu?”
25 Mwabasubirya athi: “Ee.” Aliwe Petero abere ingira omwa nyumba, Yesu mwatsuka erikania nayu athi: “Simoni, wukalengekanaya wuthiki? Abami b’ekihugho bakathuhaya abahi b’esyongemu kutse emisolho? Abaana babu kutse ab’ehandi?”
26 Abere asubirya athi: “Ab’ehandi,” Yesu mwamubwira athi: “Kwesi kyamabya ikwakiri kithya, abaana sibalisolha.
27 Aliwe ithwe erithendi bathwikalya, wughende okwa ngetse, wughusemo oburobo, wimaye eyiswe eyawukendi tsuka erihamba, wukendibya wukathandulha obuno bwayu, wukendi banamo ekinusu* ky’efeza. Wubathwalirekyo, wuthulihire ingye nawu.”
Emyatsi Ahikwa
^ Kutse “nyeru-nyeru.”
^ Kinywe okwa kinywe, “esyodrakma ibiri.”
^ Kinywe okwa kinywe, “ekinusu kye stata,” ekingene n’esyodrakma ini.
