Engulhu Yuwene Ngoku Yahandikawa na Matayo 18:1-35
18 Okwa ndambi eyo abigha mubasa hakuhi na Yesu n’erimubulya bathi: “Omukulhu kutsibu omo Bwami bw’elhubulha nindi?”
2 Neryo Yesu mwabirikira omwana mulere n’erimwimania omwakathi-kathi kabo
3 n’eribabwira athi: “Kwenene ngababwira, mwamathendi binduka n’eribya ng’abaana balere, isimwendisyingira omo Bwami bw’elhubulha.
4 Busana n’ekyo, oyukayikehaya ng’omwana mulere oyu, y’omukulhu kutsibu omo Bwami bw’elhubulha;
5 kandi oyuk’angirira omwana mulere ng’oyu omwa lina lyaghe, naghe ak’anyangirira.
6 Aliwe oyukathwikalhaya omughuma w’okwa baana balere aba abanyikirirye, ikikendibya kibuya eribohera omwa bikya biwe mw’olhuso olho epunda yikathimbaya n’erighuswa omwa ngetse.
7 “Obulighe okwa kihugho busana n’ebikathwikalhaya! Ni kwenene, ebikathwikalhaya bikendi syabyaho, aliwe obulighe okwa mundu oyukaleka abandu ibathwikalha!
8 Neryo ebyalha byawu kutse ekisandu kyawu kyamaleka wukathwikalha, kithweho wukighuse haali. Kyuwene iwe eribana engebe iwabiribya mulema kutse erilehema kwilhaba erighuswa omwa muliro owakera na kera iwuneko ebyalha bibiri kutse ebisandu bibiri.
9 Kandi eriso lyawu lyamaleka wukathwikalha, likulemo n’erilighusa haali. Kyuwene iwe eribana engebe iwuneko eriso lighuma kwilhaba erighuswa omwa Gehena* iwuneko ameso abiri.
10 Mulhangire muthi simulighaya omughuma w’okwa baana balere aba, kundi ngababwira ngoku abamalaika babu ab’elhubulha mughulhu wosi bakabya ibane embere sya Thatha waghe ow’elhubulha.
11 ——
12 “Mukalengekanaya muthiki? Omundu amabya iniawithe esyombuli 100 n’enguma yikathalha, mbwino isyendisigha 99 okwa bithwe akayasondya enguma eyabirithalha?
13 Kandi amabanayo, omo kwenene ngababwira, akatsema busana nayu kwilhaba 99 esithethathalha.
14 Kuthya, Thatha waghe* w’elhubulha syanzire nahake omughuma w’okwa balere aba akahera.
15 “Aliwe mulikyenyu amakolha ekibi, ghende wuyamubwire okwa kibi* kiwe imune babiri basa. Amakuhulikirira, iwukendibya iwamabirilhamya mulikyenyu.
16 Aliwe amaghana erikuhulikirira, ghenda n’omundu mughuma kutse babiri, kundi eriminya omwatsi nga nina w’okwenene hatholere ihabya ihane abema babiri kutse basathu.
17 Amaghana eribahulikirira, iwabwira ekithunga. Amaghana n’erihulikirira ekithunga, mumulhangire ng’omundu w’ebihanda kandi ng’omusolesya.
18 “Kwenene ngababwira, ebyosi ebya mukendi syaboha okwa kihugho bikendi syabya ibyabiribohwa elhubulha, n’ebyosi ebya mukendi syaboholha okwa kihugho bikendi syabya ibyabiriboholhwa elhubulha.
19 Kandi kwenene ngababwira, abandu babiri bamalighirana omw’isaba ekindu kyosi-kyosi eky’omughaso, Thatha waghe w’elhubulha asyabahakyo.
20 Kundi abandu babiri kutse basathu bamahindana haghuma omwa lina lyaghe, iningendibya omwakathi-kathi kabo.”
21 Neryo Petero mwasa n’erimubulya athi: “Mukama, ngatholere ingaghanyira mulikyethu ya mirundi mingahi akanyisoberya? Mirundi musanju?”
22 Yesu mwamusubirya athi: “Ngakubwira butsira mirundi musanju, aliwe mirundi 77.
23 “Ky’ekikaleka Obwami bw’elhubulha ibwabya ibwangana linganisibwa n’omwami oyuwanza eriminya abaghombe biwe abali mw’amabanza wiwe.
24 Abere akatsuka erikania nabu, mubamulethera omulhume oyuwabya mw’eribanza liwe ery’esyotalanta* 10,000.
25 Aliwe kundi abya isyanga thoka eriliha eribanza eryo, omukama wiwe mwahamulha athi iyo na mukali wiwe n’abaana biwe n’ebyosi eby’awithe bighulibawe nuku angathuha eribanza liwe.
26 Neryo omughombe oyo mwakukama embere sy’omukama wiwe n’eribugha athi, ‘Nyighumisirizaye, ngendi kuthuha obuli kindu.’
27 Neryo omukama mwakwira omughombe oyo y’obulighe, amabugha athi aghende kandi amamughanyira eribanza liwe.
28 Aliwe omughombe oyo mwaghenda amasangana omughuma w’okwa baghombe balikyabo, oyuwabyamo eribanza liwe ery’esyodinari 100, mwamuhamba, amatsuka erimun’igha, n’eribugha athi, ‘Nyithuhe eribanza lyaghe.’
29 Neryo omughombe mulikyabo mwawa ahisi n’eritsuka erimulemba-lemba athi, ‘Nyighumisirizaye, ngendi kuthuha.’
30 Nomwabine, mwathaligha, aliwe mwamuhamba n’erimughusa omwa ngomo erihika aho akendi syathuhira eribanza liwe.
31 Abaghombe balikyabo babere balhangira ebyabere, mubapona kutsibu, neryo mubaghenda eyiri mukama wabo n’erimubwira ebyosi ebyabere.
32 Neryo omukama wiwe mwamubirikira n’erimubwira athi: ‘Iwe mughombe mubi, munakughanyire eribanza lyawu eryosi wukanyilemba-lemba.
33 Mbwino nawu siwanga ghanyira omughombe mulikyenyu ngoku naghe nakughanyira?’
34 Neryo omukama wiwe mwahithana kutsibu, mwamuhira omwa byalha by’abatheya b’engomo erihika aho akendi syathuhira eribanza liwe eryosi.
35 Thatha waghe w’elhubulha kw’anemwendi syakolera athya obuli mughuma w’okw’inywe oyukaghana erighanyira mulikyabo erilhua okwa muthima.”
Emyatsi Ahikwa
^ Kutse obundi, “wenyu.”
^ Kinywe okwa kinywe, “erimukunga.”
^ Esyotalanta 10,000 sy’efeza singene-ngene n’esyodinari 60,000,000.
