Engulhu Yuwene Ngoku Yahandikawa na Matayo 19:1-30
19 Yesu abere aghunza eribugha emyatsi eyi, mwalhua e Galilaya amasokera okwa musirya we Yorodani okwa mithano ye Yudea.
2 N’abandu bangyi mubamukwama, nayu mwabalhamirya eyo.
3 N’Abafarisayo mubasa eyo ali bakanza erisyamulengako, n’erimubulya bathi: “Mbwino omulhume anatholere iniakomolha mukali wiwe busana n’obuli kandu?”
4 Mwasubiryabo athi: “Simwethasoma ngoku oyuwahangikabo eritsuka okwa nzuko mwahangikabo omulhume n’omukali
5 n’eribugha athi: ‘Busana n’eki, omulhume asyasigha thatha wiwe na mama wiwe n’erimathana na mukali wiwe, n’ababiri basyabya mubiri mughuma’?
6 Neryo ibabya isibakiri babiri aliwe mubiri mughuma. Busana n’ekyo, ekyo Nyamuhanga abirimathania haghuma, sihabye omundu oyukakighabulha.”
7 Mubamubulya bathi: “Neryo busana naki Musa mwahamulha erihandikira omukali y’ebaruha y’erimuthibithako n’ey’erimukomolha?”
8 Mwabasubirya athi: “Musa mwabalighira erikomolha bakali benyu busana n’emithima yenyu eyikalire, aliwe sikukyabya kithya eritsuka okwa nzuko.
9 Aliwe ngababwira, oyukakomolha mukali wiwe akathahya owundi, isi busana n’obusingiri,* akabya iniamasingira.”
10 Abigha mubabwira Yesu bathi: “Ebyo mulhume na mukali wiwe byamabya ikwabiri bithya, kyuwene erithendi thahya.”
11 Mwabasubirya athi: “Sib’abosi abanga thoka erikolha ekyo, aliwe b’abo basa abawithe olhuhembo.
12 Kundi hali abakonwa ababuthawa bathya, n’abandi bakonwa abandu mubabakolha mwa bakonwa, n’abandi bayikolha mwa bakonwa busana n’omwatsi w’Obwami bw’elhubulha. Oyuwanga thoka erikolha eki, akikole.”
13 Neryo mubamulethera abaana balere nuku abahireko ebyalha n’eribasabira, aliwe abigha mubabakakirya.
14 Aliwe, Yesu mwababwira athi: “Muleke abaana balere, simubakakiraye eriasa okw’ingye, kundi Obwami bw’elhubulha ni bw’abali ng’abo.”
15 Neryo mwabahira kw’ebyalha n’erilhuaho.
16 Neryo lebaya! omundu mulebe mwasa eyiri Yesu n’eribugha athi: “Mukangirirya, ni kibuya kyahi ekyo ngatholere ingakolha nuku ngabane engebe y’erikotha?”
17 Mwamusubirya athi: “Busana naki wukanyibulhaya ekibuya nga ky’ekyahi? Hali mubuya mughuma. Aliwe wamabya iwunanzire eribana engebe, wulhole embere erighendera okwa bihano.”
18 Mwamubulya athi: “By’ebyahi?” Yesu mwamusubirya athi: “Siwutholere wuk’itha, siwutholere wukasingira, siwutholere wuk’iba, siwutholere wukabugha amabehi,
19 wusikaye thatha wawu na mama wawu, kandi wutholere iwanza omuliranwa wawu ngoku wuyanzire.”
20 Omulhwana mwamubwira athi: “Ebyosi ebi nganemubikolha; ni kindi kyahi ekya nga thasyakolha?”
21 Yesu mwamusubirya athi: “Wamabya iwunanzire eribya oyuhikene,* wughende wughulhaye ebyo wuwithe n’esyosente wusihe abanakwa, neryo wukendibya n’eby’obughuli omwa lhubulha; neryo wase wunyikwame.”
22 Omulhwana abere abiriowa ebi, mwakwa obulighe kundi aby’awithe bindu bingyi.
23 Neryo Yesu mwabwira abigha biwe athi: “Kwenene ngababwira, kikendi syakalira omugaga eryingira omo Bwami bw’elhubulha.
24 Kandi ngababwira, kyolhobire engamia erilhaba omo kuna k’enginzu kwilhaba omugaga eryingira omo Bwami bwa Nyamuhanga.”
25 Abigha babere bowa ebi, mubasweka kutsibu n’eribugha bathi: “Kwesi nindi oyuwanga lhamibwa?”
26 Yesu mwabathungerera n’eribugha athi: “Eki sikithokekene okwa bandu, aliwe oku Nyamuhanga emyatsi yosi yithokekene.”
27 Neryo Petero mwabulya athi: “Lebaya! Thwabirisigha ebindu byosi n’erikukwama; neryo ni kyahi ekyo thukendi syabana?”
28 Yesu mwabasubirya athi: “Kwenene ngababwira, omw’ihangika lihya-lihya, omughulhu Omughalha w’omundu asyikalha okwa kithumbi kiwe ky’obwami eky’olhukengerwa, inywe ababirinyikwama mukendi sy’ikalha okwa bithumbi 12 by’obwami, mukatswera ebihanda 12 bye Israeli.
29 Kandi obuli mundu oyuwabirisigha amanyumba kutse abaghalha babo kutse bali babo kutse thatha kutse mama kutse abaana kutse ebithaka busana n’erina lyaghe, akendi syahebwabyo emirundi kikumi kandi akendi syabana engebe y’erikotha.
30 “Aliwe abangyi ab’erimbere bakendi syabya b’erighunzerera n’ab’erighunzerera bakendi syabya b’erimbere.
