Engulhu Yuwene Ngoku Yahandikawa na Matayo 2:1-23
2 Yesu abere abiributhirwa e Betelehemu eye Yudea omwa biro by’omwami Herode,* lebaya! abalhaghuli b’esyongununu mubalhua Ebulhua Lyuba bakasa e Yerusalemu,
2 bathi: “Omwami w’Abayuda oyuwabuthawa ali hayi? Kundi muthwalhangire engununu yiwe ithune Ebulhua Lyuba, neryo thwabiryasa erisyamunamira.”
3 Omwami Herode abere akowa eki, mwahangya-hangya, ne Yerusalemu yosi muyahithana haghuma nayu.
4 Abere abirihindania abahereri bakulhu abosi n’abahandiki, mwababulya Kristo* ng’angabuthirwe hayi.
5 Mubamubwira bathi: “E Betelehemu eye Yudea, kundi erilhabira omwa muminyereri kyabirihandikwa kithi:
6 ‘Iwe Betelehemu, ekihugho kye Yuda, siwe tawuni nyike kutsibu omwa bathabali be Yuda, kundi omw’iwe mwasyalhua omuthabali, oyuwasyalisya abandu baghe Abaisraeli.’”
7 Neryo Herode mwabirikira abalhaghuli bubiso-biso eribabulya ndeke nga balhangira engununu eyo mughulhu wahi.
8 Abere akabathuma e Betelehemu, mwabugha athi: “Mughende musondaye ndeke omwana oyo, mukendibya mukamubana, mwase mumbwire nuku naghe ngayamunamire.”
9 Babere babirihulikirira omwami, mubaghenda, neryo lebaya! engununu eya balhangira ibane Ebulhua Lyuba muyabya embere syabo erihika aho yimanira aho omwana abya.
10 Babere balhangira engununu, mubatsema kutsibu.
11 Neryo babere b’ingira omwa nyumba, mubalhangira omwana, mama wiwe ya Maria iniane nayu, mubawa ahisi n’erimunamira. Mubakyungulha ehisanduku hyabu n’erimuha ebihembo—ehoro n’obukwa n’emane-mane.
12 Aliwe kundi Nyamuhanga mwalhaghirabo omwa kilhotho athi isibasuba eyiri Herode, mubahamba eyindi nzira bamasuba ewabo.
13 Babere babirisubayo, lebaya! omumalaika wa Yehova mwabuthukira oku Yozefu omwa kilhotho, athi: “Hangana, wimaye omwana na mama wiwe muthibithe e Misiri, kandi mubyeyo erihika aho nasyakubwirira eky’erikolha, kundi Herode akanza erisondya omwana nuku amw’ithe.”
14 Neryo Yozefu mwahangana omwa kiro, mwimya omwana na mama wiwe bamaya e Misiri.
15 Mubabyayo erihika aho Herode aholera. Eki mukyaberererya ebya Yehova abugha erilhabira omwa muminyereri wiwe, athi: “Munabirikira mughalha waghe erilhua e Misiri.”
16 Neryo Herode abere aminya ngoku abalhaghuli b’esyongununu babirimulhabirya ahisi, mwahithana kutsibu n’erilhaghira athi abaana bosi b’obulhume abe Betelehemu n’omwa bindi bitsweka byosi byayo, b’ithawe, eritsuka okw’ab’emyaka ibiri erisuba ahisi, erikwamana n’embaririra y’obuthuku eyo aminya erilhua okwa balhaghuli b’esyongununu.
17 Neryo ekyo mukyaberererya ebyabughawa erilhabira omwa muminyereri Yeremia, oyuwabugha athi:
18 “Omulenge w’ekiriro kinene kandi ow’obulighe mwowibwa e Rama. Abya ini Rakeli akalira abaana biwe, kandi mwathaligha erihumulikanibwa, kundi babya isibakiriho.”
19 Herode abere abiriholha, lebaya! Yozefu iniane e Misiri, omumalaika wa Yehova mwamubuthukirako omwa kilhotho.
20 n’eribugha athi: “Hangana, wimaye omwana na mama wiwe mughende e Israeli, kundi abalhue bakanza eritha omwana babiriholha.”
21 Neryo mwahangana, am’imya omwana na mama wiwe, bamaya omwa kihugho kye Israeli.
22 Aliwe abere owa ngoku Arkelayo yuwabiribya muthabali we Yudea erisuba omwa bwa thatha wiwe Herode, mwasagha eriyayo. Aliwe kundi omwa kilhotho, Nyamuhanga abya iniabirimulhaghira, mwaya omwa bulhambu bwe Galilaya.
23 Neryo mw’ikalha omwa tawuni ye Nazareti, eriberererya ebyabughawa erilhabira omwa baminyereri, bithi: “Asyahulhwamo Munazareti.”*
Emyatsi Ahikwa
^ Kutse “Masiya; Omuhakabibwa.”
^ Obundi erilhua omwa kinywe ky’Ekiebrania “Erisasa.”
