Engulhu Yuwene Ngoku Yahandikawa na Matayo 20:1-34
20 “Kundi Obwami bw’elhubulha bulingene n’omukama w’enyumba oyuwaghenda omwa ngyakya-ngyakya akayasondya abakendi kolera omw’irima liwe ly’emizabibu.
2 Abere abirilighirana n’abakoli kwakendi baha edinari nguma okwa kiro, mwabathuma omw’irima liwe.
3 Abere akasubayo saha ng’isathu,* mwalhangira abandi iban’imene omwa kathali isibali babana omubiiri;
4 nabo mwababwira athi: ‘Nenyu mughende omw’irima lyaghe ly’emizabibu, ngendi bathuha esibatholere.’
5 Neryo mubaghenda omw’irima. Kandi mwasubulha okwa saha nga mukagha* na saha nga mwenda* kandi mwakolha ikyan’ekyo.
6 Erighunzerera, okwa saha* nga 11, mwasa ameya abandi ibanimene, neryo amababulya athi, ‘Busana naki mwabirighunza ekiro ekyosi imun’imene hano isimuwithe omubiiri?’
7 Mubamusubirya bathi: ‘Kundi sihali oyuwathuhere omubiiri.’ Mwababwira athi, ‘Nenyu mughende omw’irima lyaghe.’
8 “Bwabere bwabya erigholho-gholho, omukama w’eririma mwabirikira omwimaniri n’eribugha athi, ‘Birikira abakoli wubathuhe. Wutsuke okwa b’erighunzerera erihika okwa b’erimbere.’
9 Abahinga saha nga 11 babere basa, obuli mundu mwathuhwa edinari nguma.
10 Neryo abatsuka erihinga babere basa, mubalengekania bathi bakendihebwa sinene kw’aho, aliwe nabo mubathuhwa edinari nguma-nguma.
11 Babere bahebwasyo, mubatsuka eriyineghenia okwa mukama w’enyumba
12 n’eribugha bathi, ‘Abalyahinga okw’ighunzerera aba mubakakolha habw’esaha nguma; nabu wukabaha sighumerere n’esyethu ithwe thwabirikolha ekiro kyosi omwa lyuba!’
13 Aliwe mwabwira omughuma w’okw’ibo athi, ‘Thahye, kasingatha kusoberya. Muthukalighirana edinari nguma, kwabithe?
14 Imaya esyawu wughende. Namanza eriha abalyahinga okw’ighunzerera aba b’esingene n’esyawu.
15 Mbwino singwithe obughabe bw’erikolesya ebindu byaghe ngoku nganzire? Kutse wukanzamalira omwa liso ly’erihali* kundi ngali mubuya?’*
16 Omwa nzira eyi, ab’erighunzerera bakendi syabya b’erimbere, n’ab’erimbere bakendisyabya b’erighunzerera.”
17 Babere banemughenda e Yerusalemu, Yesu mwasegherya abigha biwe 12 ba lhuhandi okwa nzira ahathe bandu n’eribugha athi:
18 “Lebaya! Thukaghenda e Yerusalemu, n’Omughalha w’omundu akendi hirwa omwa byalha by’abahereri bakulhu n’abakangirirya b’emighambo. Bakendi mutswera olhw’erikwa
19 n’erimuhira omwa byalha by’ab’ebihanda nuku bamusekereraye, bamuswiraye n’erimuhanika okwa muthi; n’okwa kiro kyakasathu, akendi syalhubukibwa.”
20 Neryo mama w’abaghalha ba Zebedayo iniane n’abaghalha biwe mwahika oku Yesu, amamunamira, n’erimusaba ekindu kirebe.
21 Yesu mwabugha nayu athi: “Wukayithaghaki?” Mwamusubirya athi: “Ngakusaba indi baghalha baghe babiri aba, omughuma asyikalha okwa byalha byawu by’amali n’owundi okwa by’amalembe omo Bwami bwawu.”
22 Yesu mwasubirya athi: “Simwasi ebya mukasaba. Mwangananywa ekikopo ekyo ng’akisiya inganywa?” Mubamusubirya bathi: “Thwangana kinywa.”
23 Mwababwira athi: “Ni kwenene mwangananywa ekikopo kyaghe, aliwe singye ngathwamu nga nindi oyukendi sy’ikalha okwa byalha byaghe by’amali kutse eby’amalembe, aliwe abakendi sy’ikalhako, b’abo abo Thatha waghe abiritheghekera.”
24 Abandi bigha ikumi babere bowa ekyo, mubahithana okwa babiri ababuthenwe haghuma.
25 Aliwe Yesu mwabirikira abigha biwe n’eribabwira athi: “Munasi ngoku abathabali b’ebihanda bakabithabalhako n’abakulhu babiwitheko ehamuli.
26 Inywe simutholere mukabya ng’ibo; aliwe oyuwanzire eribya mukulhu omwakathi-kathi kenyu atholere iniabakolera,
27 n’oyuwanzire eribya w’erimbere omwakathi-kathi kenyu atholere iniabya mukobe wenyu.
28 Ngoku Omughalha w’omundu asa, isi busana n’erikolerwa aliwe erikolha n’erihayo engebe yiwe ng’endongolya busana n’abandu bangyi.”
29 Babere banemulhua e Yeriko, abandu bangyi mubamukwama.
30 Neryo lebaya! abalhume babiri esyondimethime babere ban’ikere okwa musike w’enzira, mubowa Yesu akalhaba neryo mubabirikira bathi: “Mukama, Mughalha wa Dawudi, thuwathikaye!”
31 Aliwe abandu mubabakunga n’eribabwira bathi bahune; nomwabine, mubabirikira omwa mulenge munene, bathi: “Mukama, Mughalha wa Dawudi, thuwathikaye!”
32 Neryo Yesu mw’imana, amababirikira n’eribabulya athi: “Mwanzire ingabakoleraki?”
33 Mubamusubirya bathi: “Mukama, libulha ameso wethu.”
34 Yesu mwabakwira obulighe, amahamba okwa meso wabo, neryo aho naho ameso wabo mwalibukalha, nabo mubamukwama.
Emyatsi Ahikwa
^ Ni bugha ambu, nga saha 3 esy’engyakya.
^ Ni bugha ambu, saha nga 6 esy’erithungyi.
^ Ni bugha ambu, saha nga 9 esy’erithungyi.
^ Ni bugha ambu, saha nga 11 esy’erigholho.
^ Kinywe okwa kinywe, “wukabya n’eriso libi.”
^ Kutse “oyukahithaya, omwenge.”
