Engulhu Yuwene Ngoku Yahandikawa na Matayo 21:1-46
21 Babere bahika e Betefage okwa Kithwe ky’Emizaituni hakuhi ne Yerusalemu, Yesu mwathuma abigha babiri,
2 mwababwira athi: “Mughende omwa kyalu ekya mulhangire, mukendilhuaho imwalhangira epunda n’ekyana kyayu ibinahangire. Muhangulesyo munyiletheresyo.
3 Omundu amababulya ngamukasithwalha hayi, imwamubwira muthi, ‘Omukama akasiyithagha.’ Nayu akendilhuaho iniabalighira.”
4 Omo kwenene eki kyabya eriberererya obuminyereri obwabughawa erilhabira omwa muminyereri, oyuwabugha athi:
5 “Mubwire mwali we Sioni muthi: ‘Lebaya! Omwami wawu anemwasa eyo wuli, ni w’omuthima mwolho kandi anikere okwa punda, ee, okwa kyana ky’epunda.’”
6 Neryo abigha mubaghenda bamakolha ngoku Yesu abahana.
7 Mubaletha epunda n’ekyana kyayu, bamahira kusyo kw’esyongyimba, nayu amasikalhako.
8 Abangyi b’okwa bandu babya ibanemusanza esyongyimba syabo sy’omwa nzira, n’abandi ibanemuthwa okwa mithi kw’emithahi n’erisanzayo omwa nzira.
9 Aliwe abandu bangyi ababya embere siwe n’ababya enyuma siwe mubalholha embere eribirikira bathi: “Thukasaba, lhamaya, Mughalha wa Dawudi! Ali n’omughisa oyukasa omwa lina lya Yehova! Thukasaba, iwe wuli endatha kutsibu, wumulhamaye!”
10 Neryo abere ak’ingira omwa Yerusalemu, etawuni eyosi muyamunyuka n’eribugha bathi: “Oyu nindi?”
11 Abandu bangyi mubabera eribugha bathi: “Oyu ni muminyereri Yesu, owe Nazareti ye Galilaya!”
12 Yesu mw’ingira omwa hekalhu, amathibitha okwa bosi abakaghuliraya omwa hekalhu n’erighuliramo, kandi mwakubbungulha ehimeza hy’abahingisya b’esyosente n’ebithumbi by’abakaghulhaya ehirikuku.
13 Neryo mwababwira athi: “Kihandikire kithi, ‘Enyumba yaghe yasyahulhwamo nyumba y’erisabiramu,’ aliwe inywe mukakolhayo mo mwangalhu w’abibi.”
14 N’esyondimethime n’abalema mubasa ahali Yesu omwa hekalhu, nayu mwabalhamya.
15 Abahereri bakulhu n’abakangirirya b’emighambo babere balhangira ebikaswekaya ebya Yesu akolha n’abaana ibanemubirikira omwa hekalhu bathi, “Thukasaba, wulhamaye, Mughalha wa Dawudi!” mubahithana kutsibu,
16 n’erimubulya bathi: “Wun’owire ebya aba bakabugha?” Yesu mwababwira athi: “Ee. Simwethasoma ahakabugha hathi, ‘Wasyaleka amunu w’abaana n’esyomekeke iniakupipa’?”
17 Neryo mwabasigha, amalhua omwa tawuni, amaya Betania, amaghotserayo.
18 Yesu abere akasuba omwa tawuni omwa ngyakya-ngyakya, mwakwa enzalha.
19 Mwalhangira omuthi w’omuthini okwa nzira, mwaya aho ali, aliwe simwabyaki, ikuli ebikoma bisa. Neryo mwabwiragho athi: “Siwendi syathasyahethya na kera.” Aho naho omuthi muma.
20 Abigha babere balhangira eki, mubasweka n’eribugha bathi: “Omuthi oyu amalhuaho iniuma athi?”
21 Yesu mwabasubirya athi: “Kwenene ngababwira, mwamabya n’erikirirya, isimuthathika-thika, simwendi syasubulira okw’ikolha ekiri ng’ekyanamakolha okwa muthi w’omuthini, aliwe kandi mwasyabwira n’ekithwe muthi, ‘Yikule aho wuyighuse omwa ngetse,’ nakyo kyasyabya.
22 N’ebyosi ebyamukasaba imunawithe erikirirya, mukendi syahebwabyo.”
23 Yesu abere abir’ingira omwa hekalhu, abahereri bakulhu n’abakulhu b’abandu mubasa eyo ali inianemukangirirya, mubamubulya bathi: “Wukakolha ebi omwa buthoki bwandi? Kandi oyuwakuha obuthoki obu nindi?”
24 Yesu mwabasubirya athi: “Naghe ngendi babulya kibulyo kighuma. Mwamanyisubirya, naghe iningendi babwira nga ngakolha ebi omwa buthoki bwandi:
25 Olhubatizo lhwa Yohana, lhwalhua hayi? Lhwalhua omwa lhubulha kutse okwa bandu?” Mubatsuka eriyibughako bathi: “Thwamabugha thuthi, ‘Lhwalhua omwa lhubulha,’ neryo iniakendi thubulya athi, ‘Busana naki mumuthamw’ikirirya?’
26 Kandi thwamabugha thuthi, ‘Lhwalhua okwa bandu,’ thukasagha abandu kundi abosi basi Yohana ng’omuminyereri.”
27 Neryo mubasubirya Yesu bathi: “Sithwasi.” Nayu mwababwira athi: “Naghe sinendi babwira nga ngakolha emyatsi eyi omwa buthoki bwandi.
28 “Mukalengekanaya muthiki? Omulhume aby’awithe abaana babiri. Mwabwira ow’okubanza athi, ‘Mwana waghe, munabwire wughende omw’irima ly’emizabibu wuyakole.’
29 Mwamusubirya athi: ‘Sinendiyayo,’ aliwe enyuma waho, mwayikubya bwomo amayayo.
30 Abere ahika okw’owakabiri, mwamubwira ikyan’ekyo. Nayu mwamusubirya athi, ‘Ngendiyayo Mukulhu,’ aliwe mwathayayo.
31 Okwa babiri, nindi oyuwakolha erisonda lya thatha wiwe?” Mubasubirya bathi: “Ow’okubanza.” Yesu mwabasubirya athi: “Kwenene ngababwira, abasolesya n’abamalaya banemubatsuka omo Bwami bwa Nyamuhanga.
32 Kundi Yohana mwabahikako omwa nzira y’erithunganene, aliwe mumuthamw’ikirirya. Aliwe abasolesya n’abamalaya mubamw’ikirirya, kandi mwabere mwalhangira eki, mumuthayikubyabwomo mukamw’ikirirya.
33 “Muhulikirire owundi mukya:* Habya omulhume omwinye eririma, mwahera emizabibu n’erithimbya okw’irima liwe kw’olhughuthu n’erithakulhamo ah’erikamira evini kandi mwahimbamo akaleberyo;* neryo mwalisighira abalimi, amaghenda omwa kindi kihugho.
34 Emizabibu yabere y’era, mwathuma abaghombe biwe eyiri abalimi eriyamulethera kuyo.
35 Aliwe, abalimi mubahamba abaghombe biwe, bamaswirya omughuma, bam’itha owundi, n’owundi bamamuswirya omwa mabwe.
36 Mwathasyathumayo abandi baghombe banene kwilhaba ab’erimbere, aliwe mubabakolhako ebya banakolha okwa bandi.
37 Erighunzerera mwathuma mughalha wiwe, iniakayibwira athi, ‘Bakendisikya mughalha waghe.’
38 Babere balhangira mughalha wiwe, mubayibwira bathi, ‘Oyu y’omuli w’omwandu.* Mwase, thumwithe thwanalya omwandu wiwe!’
39 Neryo mubamuhamba, bamamughusa eyihya w’eririma ly’emizabibu n’erimwitha.
40 Busana n’ekyo, omwinye eririma ly’emizabibu akendisyabya akasa, akendi syakolera abalimi abo baki?”
41 Mubamusubirya bathi: “Kundi ni babi, akendi syabathoghothya, neryo iniahererya eririma ly’abandi balimi abakendisyabya bakamuha ebighuma bik’era.”
42 Yesu mwabasubirya athi: “Simwethasoma omwa Masako ngoku, ‘Eribwe eryo abahimbi baghana, ly’eryabiribya libwe likulhu okwa sonda? Omwatsi oyu akalhua oku Yehova, kandi mbwino syali thuswekaya’?
43 Eki ky’ekikaleka ingababwira nyithi, Obwami bwa Nyamuhanga bukendi lhusibwa okw’inywe ibwahebwa ekihanda ekikahethaya ebighuma byabu.
44 Kandi omundu oyukawa okw’ibwe eri akendi syathulhangika. N’oyo eribwe eri likawako, likendi syamuhinolera.”
45 Abahereri bakulhu n’Abafarisayo babere bowa emikya* yiwe, mubaminya ngoku n’ibo akakanayako.
46 Nomubanabya banzire erimuhamba, mubasagha abandu kundi ibamwasi ng’omuminyereri.
Emyatsi Ahikwa
^ Kutse “eky’erileberyako.”
^ Erisoborera, “ah’erileberya.”
^ Kutse “Omuwetwa.”
^ Kutse “eby’erileberyako.”
